.jpg)
ស្តេចប្រដាល់របស់ថៃ ប៊ូខាវ (ស្តាំ) នៅពហុកីឡដ្ឋានជាតិមរតកតេជោ ពីថ្ងៃទី ៥ កក្កដា ២០២២។ រូបថត សហការី
ភ្នំពេញៈ ស្តេចប្រដាល់របស់ថៃ Buakaw Banchamek (ប៊ូខាវ) ដែលបានខកខានឡើងប្រកួតអស់រយៈពេល ៣ ឆ្នាំមកហើយនោះ បានបង្ហាញពីចេតនា ក្នុងការបង្ហាញភាពខ្លាំងរបស់ខ្លួនឡើងវិញ សម្រាប់ការប្រកួតជាមួយម្ចាស់ខ្សែក្រវាត់ Varats Dzmitry នៅលើសង្វៀនគុនខ្មែរជើងឯកពិភពលោក ឬ World Fight Tournaments 2022 ក្នុងពហុកីឡដ្ឋានជាតិមរតកតេជោ នាថ្ងៃពុធ ទី ៦ ខែកក្កដានេះ។
កីឡាករជើងខ្លាំង ប៊ូខាវ បានធ្វើដំណើរ មកដល់ព្រលានយន្តហោះអន្តរជាតិភ្នំពេញ កាលពីថ្ងៃទី ៣ កក្កដា ហើយរូបគេបានថ្លឹងទម្ងន់រួចហើយ ដើម្បីត្រៀមប្រកួតជាមួយអ្នកប្រយុទ្ធមកពីប្រទេសបេឡារុ Varats Dzmitry ក្នុងទម្ងន់ ៧១ គីឡូក្រាម ហើយ ប៊ូខាវ ក៏បានបង្ហាញវីដេអូខ្លី បញ្ជាក់ពីពាក្យ «គុនខ្មែរ» នៅមុនការប្រកួតដ៏ធំនេះផងដែរ ដោយគេនិយាយថា៖ «ជួបគ្នា ថ្ងៃទី ៦ គុនខ្មែរ»។
ជាមួយការបង្ហាញពីសកម្មភាពហ្វឹកហាត់យ៉ាងខ្លាំងក្លា ប៊ូខាវ បានអះអាងថា រូបគេ បានត្រៀមខ្លួនរួចរាល់អស់ហើយ។ «ខ្ញុំធ្លាប់បានមកប្រកួតនៅកម្ពុជា កន្លងមកដែរ ប៉ុន្តែដោយសារវិបត្តិជំងឺកូវីដ ១៩ បានធ្វើឱ្យខ្ញុំ ខកខានឡើងប្រកួតចូល៣ឆ្នាំហើយ។ តែទោះបីជាយ៉ាងណា នៅពេលនេះ ខ្ញុំបានព្យាយាមហ្វឹកហាត់ រក្សានូវកម្រិតបច្ចេកទេស និងទិចនិកបានល្អបំផុត»។
អ្នកប្រយុទ្ធ ដែលគេចាត់ទុកថា ជា «ស្តេចប្រដាល់» ប្រចាំនៅថៃ ប៊ូខាវ បានបន្ថែមថា៖ «ខ្ញុំមិនធ្លាប់ជួបដៃគូម្នាក់នេះទេ តែខ្ញុំបានមើលការប្រកួតរបស់គាត់ហើយ ហើយខ្ញុំគិតថា ការប្រកួតនេះ នឹងមានភាពទាក់ទាញ និងរំភើបសប្បាយរីករាយ សម្រាប់អ្នកទស្សនា។ ខ្ញុំធ្លាប់មកប្រកួត នៅកម្ពុជា ២ លើកហើយ ប៉ុន្តែសង្វៀនគុនខ្មែរជើងឯកពិភពលោក ជាព្រឹត្តិការណ៍ធំ អ៊ីចឹងខ្ញុំត្រូវត្រៀមខ្លួនការប្រកួតនេះ ឱ្យបានពេញទំហឹង និងត្រូវខំប្រឹងឱ្យអស់ពីសមត្ថភាព ដើម្បីកុំឱ្យទស្សនិកជន ដែលរង់ចាំទស្សនា មានការខកបំណង»។
ជាមួយគ្នានេះ អ្នកជំនាញកីឡារបស់កម្ពុជា លោក វ៉ាត់ ចំរើន ដែលជាអគ្គលេខាធិការគណៈកម្មាធិការជាតិអូឡាំពិកកម្ពុជា បានចាត់ទុកការប្រកួត World Fight នេះ ជាព្រឹត្តិការណ៍ ដែលនឹងជួយបំផុសឱ្យគុនខ្មែរ ក្លាយទៅជាក្បាច់គុនមួយ មានប្រជាប្រិយភាព នៅលើឆាកអន្តរជាតិ ហើយលោកបានទទូចសុំភាគីថៃ និងកម្ពុជា ជាពិសេសអ្នកគាំទ្រ ឱ្យឈប់ឈ្លោះគ្នា និងប្រកាន់គ្នា ពីក្បាច់គុន «Muay Thai» និង «គុនខ្មែរ» នេះ បន្តទៅទៀតទៅ។
លោក វ៉ាត់ ចំរើន បានថ្លែង នៅក្នុងសន្និសីទកាសែត ស្តីពីការប្រកួត World Fight នេះ កាលពីថ្ងៃទី ៣០ ខែមិថុនាថា៖ «សូមឈប់ឈ្លោះគ្នា ពីគុនខ្មែរ និង Muay Thai អីទៀតទៅ! ពេលប្រកួតនៅក្រៅប្រទេស យើងប្រកួត Muay Thai តែពេលនៅកម្ពុជា យើងប្រកួតគុនខ្មែរ កុំឈ្លោះគ្នា គឺត្រូវធ្វើឱ្យមានភាពជឿនលឿនឡើង នៅក្នុងកីឡា និងបើកបេះដូងឡើង។ គេអភិវឌ្ឍកីឡាគេ យើងអភិវឌ្ឍកីឡាយើង ព្រោះកីឡាអត់មានអីក្រៅពីគោលដៅចុងក្រោយគឺ សុខភាព និងរស់នៅដោយមានគុណភាពជីវិត នោះទេ»។
ជាមួយគ្នានេះម្ចាស់មេដាយមាសស៊ីហ្គេម នៅប្រទេសវៀតណាម កាលពីពេលថ្មីៗ ម៉ឺន មេឃា និង បឺត សង្ឃឹម សុទ្ធតែបានតាំងចិត្ត និងប្តេជ្ញាប្រកួតឱ្យអស់ពីសមត្ថភាព ដើម្បីស្វែងរកលទ្ធផលដ៏ល្អមួយ ក្នុងការរួមចំណែកផ្សព្វផ្សាយប្រដាល់គុនខ្មែរ ទៅកាន់ពិភពលោក តាមរយៈ World Fight នេះ។
កូនប្រុសរបស់លោក អេ ភូថង កីឡាករ ម៉ឺន មេឃា បានប្រាប់ ភ្នំពេញ ប៉ុស្តិ៍ថា៖ «ទោះខ្ញុំជាម្ចាស់មេដាយមាសស៊ីហ្គេមផ្នែកកីឡាវ៉ូវីណាម ប៉ុន្តែការប្រកួតគុនខ្មែរនេះ វាមិនមានសម្ពាធនោះទេ ព្រោះគិតមកដល់ពេលនេះ ខ្ញុំហ្វឹកហាត់បានច្រើនដែរ ហើយណាមួយ យើងជាកូនខ្មែរ អ៊ីចឹងយើងត្រូវការពារមុខមាត់របស់ខ្លួនឯង ដោយខ្ញុំមានការតាំងចិត្តខ្លាំងថា នឹងយកឈ្នះកីឡាករប្រេស៊ីលឱ្យបាន ព្រោះនេះជាការប្រកួត ដើម្បីលើកមុខមាត់គុនខ្មែររបស់យើង»។
ចំណែក បឺត សង្ឃឹម ដែលឈ្នះបានមេដាយស៊ីហ្គេម លើជំនាញកីឡាប្រដាល់ឃីកបុកស៊ីង បាននិយាយថា៖ «ទោះពេលស៊ីហ្គេម ខ្ញុំប្រកួតឃីកបុកស៊ីង ប៉ុន្តែខ្ញុំយល់ថា ការវិលមកប្រកួតគុនខ្មែរវិញនេះ វាមិនជាបញ្ហានោះទេ ព្រោះមូលដ្ឋានគ្រឹះរបស់ខ្ញុំ គឺគុនខ្មែរ នេះតែម្តង ដោយខ្ញុំត្រៀមខ្លួនបានគ្រប់គ្រាន់ហើយ ហើយខ្ញុំតាំងចិត្តថា នឹងខំប្រឹងធ្វើឱ្យបានល្អ និងអស់ពីសមត្ថភាព ក្នុងការស្វែងរកជ័យជម្នះ ដើម្បីលើកកេរ្តិ៍ឈ្មោះខ្លួនឯង និងគុនខ្មែរ នៅក្នុងព្រឹត្តិការណ៍ដ៏ធំនេះ»។
ចំពោះការប្រកួត World Fight នៅថ្ងៃទី ៦ ខែកក្កដានេះ កីឡាករកម្ពុជា កាន់ ម៉េងហុង ត្រូវជួបអូស្ដ្រាលី Dylan Eagle ក្នុងទម្ងន់ ៥៥,៣ គីឡូក្រាម រីឯ បឺត សង្ឃឹម ត្រូវតតាំងនឹងជើងខ្លាំងថៃ Penthep Eakmuangnon ទម្ងន់ ៥៧,២ គីឡូក្រាម ហើយម្ចាស់មេដាយមាស ម៉ឺន មេឃា ត្រូវប៉ះប្រេស៊ីល Felype Souza ក្នុងទម្ងន់ ៦១,២ គីឡូក្រាម។
ចំណែកគូប្រកួតសំខាន់ជាងគេ គឺការជួបគ្នារវាង Buakaw Banchamek និង Varats Dzmitry ទម្ងន់ ៧១ គីឡូក្រាម មុនពេលកីឡាការិនីកម្ពុជា ទូច ច័ន្ទវត្តី ត្រូវប្រកួតជាមួយកីឡាការិនីអេស្ដូនី Marie Ruumet ក្នុងទម្ងន់៥៣,៥ គីឡូក្រាម៕
