ពិធីដង្ហែក្បួនឡានដោយអមម៉ូតូធំដឹកក្រុមម្ចាស់មេដាយក្រុមកីឡាករ កីឡាការិនី ជាកងកម្លាំងនគរបាលជាតិ ពីព្រលានយន្តហោះអន្តរជាតិភ្នំពេញ ឆ្ពោះទៅកាន់វិមានឯករាជ្យ រួចត្រឡប់មកជួបជុំគ្នា នៅពហុកីឡដ្ឋានជាតិ។ រូបថត សហការី
ភ្នំពេញៈ ក្រុមកីឡាករ កីឡាការិនី ជាកងកម្លាំងនគរបាលជាតិ បានរួមគ្នាបង្កើតនូវស្នាដៃ គួរជាទីមោទនភាពជូនជាតិ នៅលើឆាកអន្តរជាតិ គឺការដណ្តើមបានមេដាយសរុបចំនួន ៣៣ ពីព្រឹត្តិការណ៍កីឡានគរបាលជាតិ និងកងកម្លាំងពន្លត់អគ្គិភ័យពិភពលោក លើកទី១៩ ឆ្នាំ ២០២២ (The 19th World Police & Fire Games 2022) នៅប្រទេសហូឡង់។
តាមរយៈការប្រកួតនេះ ប្រតិភូកីឡានគរបាលជាតិ ទាំង ២២ នាក់ បានឈ្នះមេដាយ គ្រប់ប្រភេទកីឡាទាំង ៩ ដែលពួកគេបានចូលរួម ដោយពួកគេ ឈ្នះបានមេដាយមាស ១៥ ប្រាក់ ៨ និងមេដាយសំរឹទ្ធ ១០ សរុបចំនួន ៣៣មេដាយ ហើយលទ្ធផលនេះ បានជួយឱ្យកម្ពុជា ឈរនៅចំណាត់ថ្នាក់លេខ ១៥ ក្នុងចំណោមប្រទេសចូលរួមជាង ៧០ នៅលើពិភពលោក។ សម្រាប់ការនាំយកជយលាភីដ៏ធំធេងនេះ ពីប្រទេសហូឡង់ មកដល់មាតុប្រទេសវិញ កាលពីព្រឹកថ្ងៃទី ២ ខែ សីហា ឆ្នាំ ២០២២ នេះ គឺប្រតិភូកីឡានគរបាលជាតិ បានទទួលការស្វាគមន៍យ៉ាងកក់ក្តៅបំផុត ដោយក្នុងនោះ ក្រុមប្រឹក្សាកីឡាក្រសួងមហាផ្ទៃ បានរៀបចំឱ្យមានពិធីដង្ហែក្បួនឡានដោយអមម៉ូតូធំដឹកក្រុមម្ចាស់មេដាយទាំងនេះពីព្រលានយន្តហោះអន្តរជាតិភ្នំពេញ ឆ្ពោះទៅកាន់វិមានឯករាជ្យ រួចត្រឡប់មកជួបជុំគ្នា នៅពហុកីឡដ្ឋានជាតិ ផងដែរ។
លោក នេត សាវឿន អគ្គស្នងការនគរបាលជាតិ បានថ្លែងដោយចាត់ទុកថា ជាជោគជ័យយ៉ាងធំ ដែលបានរួមចំណែកលើកស្ទួយកិត្យានុភាពនគរបាលជាតិ នៅលើឆាកអន្តរជាតិ។
តាមរយៈលិខិតអបអរ ជូនចំពោះថ្នាក់ដឹកនាំ និងកីឡាករ កីឡាការិនីនៃអង្គភាពកីឡានគរបាលជាតិកម្ពុជា លោក នេត សាវឿន បានសរសេរថា៖ «តាងនាមថ្នាក់ដឹកនាំកងកម្លាំងនគរបាលជាតិ និងក្នុងនាមខ្លួនខ្ញុំផ្ទាល់ សូមសម្តែងនូវសេចក្តីរំភើបរីករាយ និងអបអរសាទរចំពោះប្រតិភូអង្គភាពកីឡានគរបាលជាតិកម្ពុជា ដែលបានទទួលជោគជ័យយ៉ាងត្រចះត្រចង់ ក្នុងព្រឹត្តិការណ៍ប្រកួតកីឡានគរបាល និងកងកម្លាំងពន្លត់អគ្គិភ័យពិភពលោក លើកទី១៩ ឆ្នាំ ២០២២»។
លោកថ្លែងថា៖ «ជោគជ័យដ៏ត្រចះត្រចង់ ដែលទទួលបាននាឱកាសនេះ គឺជាមោទនភាពរបស់កងកម្លាំងនគរបាលជាតិ ក៏ដូចជាប្រជាជាតិទាំងមូល ហើយក៏បានស្តែងឱ្យឃើញពីការលះបង់ដ៏ធំធេង ឆ្លៀតពេលពីការបំពេញភារកិច្ចស្នូលក្នុងការរ៉ាប់រងសភាពការណ៍សន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម យកអស់កម្លាំងកាយចិត្តប្រកបដោយការប្តេជ្ញាចិត្តខ្ពស់ ប្រឹងប្រែងហ្វឹកហាត់រហូតទទួលបានជោគជ័យជូនជាតិមាតុភូមិ រួមចំណែកលើកស្ទួយកិត្យានុភាពនគរបាលជាតិ នៅលើឆាកអន្តរជាតិ»។
ក្រោមការគាំទ្រថវិកា និងស្មារតី របស់លោករដ្ឋមន្ត្រីក្រសួងមហាផ្ទៃ ស ខេង បានផ្តល់លទ្ធភាពឱ្យអង្គភាពកីឡានគរបាលជាតិកម្ពុជា បញ្ជូនប្រតិភូកីឡានគរបាលជាតិ ចំនួន២២នាក់ ទៅចូលរួមការប្រកួតព្រឹត្តិការណ៍ The 19th World Police & Fire Games 2022 នៅប្រទេសហូឡង់នេះ។ ជាលទ្ធផលនៃការប្រកួតនូវប្រភេទកីឡាជូជីតស៊ូ ចំបាប់ យូដូ វាយកូនឃ្លីលើតុ ការ៉ាតេ វាយសី តេក្វាន់ដូ ចំបាប់កាច់ដៃ និងលើកទម្ងន់ ដែលទើបបានបញ្ចប់ជាផ្លូវការ កាលពីថ្ងៃទី ១ ខែ សីហា ឆ្នាំ ២០២២ កន្លងទៅនេះ ក្រុមកីឡានគរបាលជាតិ ដណ្តើមបានមេដាយមាស១៥ ប្រាក់៨ និងមេដាយសំរឹទ្ធចំនួន ១០។
ចំពោះមេដាយមាសទាំង ១៥ នេះ គឺក្រុមកីឡានគរបាលជាតិ ដណ្តើមបាននៅក្នុងការចំបាប់កាច់ដៃ ចំនួន ៦ តេក្វាន់ដូ ចំនួន ៣ ប្រកួតចំបាប់បចំនួន ៣ ហើយខាងជូជីតស៊ូ ការ៉ាតេ និងលើកទម្ងន់ ដណ្តើមបានម្នាក់ ១ ដូចគ្នា។
ជាមួយគ្នានេះ ជ័យជម្នះរបស់កីឡាករតេក្វាន់ដូ សំ យូដេត កីឡាករ វ៉ា មិថុនា និង ផល សុវណ្ណាត់ បានទទួលការអបអរពីលោកនាយករដ្ឋមន្ត្រី ហ៊ុន សែន ដោយសារពួកគេ បានឈ្នះមេដាយមាស នៅលើប្រភេទទម្ងន់រៀងៗខ្លួន ពីការប្រកួត World Police & Fire Games 2022 នេះ។ លោក ហ៊ុន សែន បានបង្ហោះសារអបអរ ទៅដល់កីឡាករតេក្វាន់ដូទាំង ៣ នាក់ ក្រោយពួកគេ ដណ្តើមបានមេដាយមាសថា៖ «នេះ គឺជាមោទនភាពរបស់ប្រទេសជាតិយើងទាំងមូល ដែលកីឡាករតេក្វាន់ដូ WT ចំនួន៣រូប ដែលបានទៅចូលរូមកម្មវិធីប្រកួត World Police & Fire Games 2022 នៅប្រទេសហូឡង់ ចាប់ពីថ្ងៃទី ២៦ ដល់ថ្ងៃទី ៣១ ខែ កក្កដា ឆ្នាំ ២០២២ ហើយទទួលបានមេដាយមាសទាំង ៣ នាក់តែម្តង»៕
