.jpg)
ក្រុមកីឡាថតរូបក្រោយឈ្នះបានមេដាយមាសការប្រកួតកីឡាអាស៊ានប៉ារ៉ាហ្គេម លើកទី១១ នៅទីក្រុងសូឡូ ប្រទេសឥណ្ឌូនេស៊ី។ រូបថត សហការី
ភ្នំពេញៈ ក្រុមបាល់ទះអង្គុយបុរសកម្ពុជា អាចបង្កើតបាននូវកំណត់ត្រាដ៏ល្អបំផុត គឺការឈ្នះគ្រប់ការប្រកួតទាំងអស់ ដើម្បីយកបានមេដាយមាសឱ្យកម្ពុជា នៅក្នុងការប្រកួតកីឡាអាស៊ានប៉ារ៉ាហ្គេម លើកទី១១ នៅទីក្រុងសូឡូ ប្រទេសឥណ្ឌូនេស៊ី ហើយជាមួយគ្នានេះ ក្រុមកីឡាជនពិការកម្ពុជា ក៏ឈ្នះបានមេដាយសរុបច្រើន ដើម្បីបំបែកឯតទគ្គកម្មចំនួនមេដាយ ដែលកម្ពុជាធ្លាប់ដណ្តើមបាន នៅអាស៊ានប៉ារ៉ាហ្គេម ចំនួន ៩ លើក កន្លងមកផងដែរ។
តាមរយៈការប្រកួតលើប្រភេទកីឡាបាល់ទះអង្គុយផ្នែកបុរសនេះ ក្រុមកម្ពុជា បានឈ្នះទាំង ២ ប្រកួត សម្រាប់ការប្រកួតជម្រុះក្នុងពូល A ដោយពួកគេ បានយកឈ្នះក្រុមហ្វីលីពីន ៣ សិតទល់សូន្យ (៣-០) រួចបានបន្តយកឈ្នះក្រុមម្ចាស់មេដាយមាសមីយ៉ាន់ម៉ា ៣-១ ដើម្បីសម្រេចការសងសឹក ចំពោះការចាញ់ក្រុមនេះ នាការប្រកួតផ្តាច់ព្រ័ត្រ នៅអាស៊ានប៉ារ៉ាហ្គេម ប្រទេសម៉ាឡេស៊ី កាលពីឆ្នាំ ២០១៧។
បន្ថែមទៅលើការទទួលបានលេខ ១ ក្នុងពូល A នេះ ក្រុមបាល់ទះអង្គុយកម្ពុជា បានបន្តទម្លាក់ក្រុមម្ចាស់ផ្ទះ ឥណ្ឌូនេស៊ី ដោយការយកឈ្នះ ៣-២ នៅវគ្គពាក់កណ្តាលផ្តាច់ព្រ័ត្រ ហើយការឡើងទៅជួបក្រុមឈ្នះគ្រប់ការប្រកួតដូចគ្នារបស់ថៃ នៅវគ្គផ្តាច់ព្រ័ត្រ កាលពីថ្ងៃទី ៤ ខែសីហា នេះ ក្រុមកម្ពុជា បានយកឈ្នះ ៣-១ ជាមួយគ្រាប់បាល់ ២៥-២៣ ២៥-២២ ១៩-២៥ និង ២៥-២២ ដើម្បីឈ្នះបានមេដាយមាសយ៉ាងរំភើបបំផុត ព្រោះការប្រកួតនេះ មានភាពស្វិតស្វាញខ្លាំង។
តាមរយៈការដណ្តើមបានមេដាយមាសដ៏មានន័យ របស់ក្រុមបាល់ទះអង្គុយបុរសនេះ បានបង្ហាញឱ្យឃើញថា ក្រុមកីឡាករជនពិការកម្ពុជា បានសម្រេចជោគជ័យលើសការដាក់គោលដៅរបស់ថ្នាក់ដឹកនាំហើយ ព្រោះនៅមុនការប្រកួតចាប់ផ្តើម នាយកបេសកកម្មអាស៊ានប៉ារ៉ាហ្គេម លោក យី វាសនា មានក្តីរំពឹងការឈ្នះមេដាយមាសត្រឹម ៣ ទេ ពីព្រឹត្តិការណ៍នេះ ប៉ុន្តែគិតត្រឹមល្ងាចថ្ងៃទី ៤ ខែសីហានេះ កម្ពុជា បានឈ្នះមេដាយមាសចំនួន ៦ រួមជាមួយមេដាយប្រាក់ ៩ និងសំរឹទ្ធ ៨ ទៀត។
ជាមួយការឈ្នះបានមេដាយសរុបជាបណ្តោះអាសន្នចំនួន២៣នេះ វាបានក្លាយជាតួលេខថ្មីមួយ ដែលបានជួយឱ្យក្រុមកីឡាជនពិការកម្ពុជា អាចបំបែកឯតទគ្គការឈ្នះបានមេដាយច្រើនបំផុត ប្រើប្រៀបធៀបទៅនឹង ចំនួនមេដាយសរុប ដែលកម្ពុជា ធ្លាប់ដណ្តើមបាន ក្នុងការប្រកួតអាស៊ានប៉ារ៉ាហ្គេម ចំនួន ៩ លើកកន្លងមក។
លោក យី វាសនា ដែលទើបត្រូវបានបោះឆ្នោតបន្តតំណែងជាអនុប្រធានសហព័ន្ធកីឡាជនពិការអាស៊ីអាគ្នេយ៍ (APSF) អាណត្តិថ្មីឆ្នាំ ២០២២-២០២៦ ក្នុងកិច្ចប្រជុំគណៈកម្មាធិការប្រតិបត្តិ APSF នៅទីក្រុងសូឡូ ប្រទេសឥណ្ឌូនេស៊ី កាលពីថ្ងៃទី ២ ខែសីហា បានថ្លែងថា៖ «តាមរយៈចំនួនមេដាយសរុប ដែលក្រុមកីឡាករ កីឡាការិនីរបស់យើង ដណ្តើមបាននៅពេលនេះ វាបានបំបែកឯតទគ្គកម្មចំនួនមេដាយ ពីការប្រកួតអាស៊ានប៉ារ៉ាហ្គេម តាំងពីឆ្នាំ២០០១ ដល់ឆ្នាំ ២០១៧ រួចទៅហើយ ហើយយើងនៅសល់វិញ្ញាសាប្រកួតមួយចំនួនទៀត ដែលត្រូវប្រជែងយកមេដាយបន្ថែម»។
អគ្គលេខាធិការនៃគណៈកម្មាធិការជាតិប៉ារ៉ាឡាំពិកកម្ពុជា លោក យី វាសនា បានឱ្យដឹងថា ការចូលរួមអាស៊ានប៉ារ៉ាហ្គេម ចំនួន ៩ លើកកន្លងមក គឺកាលឆ្នាំ ២០០១ កម្ពុជាបានមេដាយសរុបត្រឹម៣គ្រឿង ឆ្នាំ ២០០៣ បាន ៩គ្រឿង ឆ្នាំ ២០០៥ បាន៥គ្រឿង ឆ្នាំ ២០០៧ បាន ១ គ្រឿង ឆ្នាំ ២០០៩ បាន ៧ គ្រឿង ឆ្នាំ ២០១១ បាន ៧ គ្រឿង ឆ្នាំ ២០១៣ បាន ៩ គ្រឿង ឆ្នាំ ២០១៥ បាន ៩ គ្រឿង និងអាស៊ានប៉ារ៉ាហ្គេម លើកចុងក្រោយ នៅម៉ាឡេស៊ី ឆ្នាំ ២០១៧ ក្រុមកីឡាជនពិការកម្ពុជា ទទួលបានមេដាយសរុបចំនួន ១០ គ្រឿង៕
