ភ្នំពេញ៖ ថ្នាក់ដឹកនាំគណៈកម្មាធិការជាតិប៉ារ៉ាឡាំពិកកម្ពុជា (NPCC) បានបង្ហាញពីមោទនភាព ចំពោះក្រុមកីឡាជនពិការកម្ពុជា ដែលបង្កើតបានស្នាដៃយ៉ាងធំធេង ជូនជាតិ គឺការឈ្នះបានមេដាយមាស លើសគោលដៅកំណត់ ពីការប្រកួតកីឡាអាស៊ានប៉ារ៉ាហ្គេម លើកទី ១១ នៅទីក្រុងសូឡូ ប្រទេសឥណ្ឌូនេស៊ី ឆ្នាំ ២០២២ ហើយប្រតិភូទាំងនេះ បាននាំយកជយលាភីដ៏ធំធេងនេះ និងការដង្ហែទង់អាស៊ានប៉ារ៉ាហ្គេម មកដល់មាតុប្រទេសវិញ កាលពីថ្ងៃអាទិត្យ ទី ៧ ខែសីហា។
នាយបេសកកម្មប្រតិភូកីឡាជនពិការកម្ពុជា លោក យី វាសនា បានចាត់ទុកការទទួលបានជោគជ័យ លើសគោលដៅកំណត់ គឺការឈ្នះបានមេដាយមាស ៧ ប្រាក់ ១០ និងមេដាយសំរឹទ្ធ ១១ ក្នុងព្រឹត្តិការណ៍អាស៊ានប៉ារ៉ាហ្គេមនេះ ថា ជាកត្តាសំខាន់បំផុត សម្រាប់កម្ពុជា ក្នុងការត្រៀមរៀបចំធ្វើម្ចាស់ផ្ទះអាស៊ានប៉ារ៉ាហ្គេម លើកទី ១២ ឆ្នាំ ២០២៣។
លោក យី វាសនា បានថ្លែងថា៖ «យើងបានចាកចេញពីរាជធានីភ្នំពេញ ជាមួយការកំណត់យកមេដាយមាសឱ្យបាន ៣ គ្រឿង ហើយឥឡូវនេះ យើងធ្វើបានសម្រេចហើយ ហើយថែមទាំងបានបំបែកកំណត់ត្រាច្រើនលើសលប់ជាងការប្រកួតមុនៗទៀត។ ការប្រឹងប្រែងគ្រប់បែបយ៉ាងទាំងកម្លាំងកាយ និងកម្លាំងចិត្តរបស់កីឡាករ កីឡាការិនីជនពិការកម្ពុជាបានផ្តល់ផលលើសគោលដៅកំណត់»។
អគ្គលេខាធិការគណៈកម្មាធិការជាតិប៉ារ៉ាឡាំពិកកម្ពុជា រូបនេះ បានបន្ថែមថា៖ «ការទទួលបានជោគជ័យ និងការចូលរួមប្រកួត នៅអាស៊ានប៉ារ៉ាហ្គេម លើកទី ១១ នេះ គឺជាឱកាសល្អសម្រួចគោលដៅចុងក្រោយ សម្រាប់កីឡាករ កីឡាការិនីជនពិការយើង ក្នុងការវាស់ស្ទង់សមត្ថភាព មុនពេលរៀបចំការប្រកួតអាស៊ានប៉ារ៉ាហ្គេម លើកទី ១២ ឆ្នាំ ២០២៣ នៅប្រទេសកម្ពុជា»។
ជាមួយគ្នានេះ លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា ដែលដឹកនាំប្រតិភូកីឡាប៉ារ៉ាឡាំពិកកម្ពុជា ចូលរួមការប្រកួតកីឡាអាស៊ានប៉ារ៉ាហ្គេមនេះ ក៏បានកោតសរសើរទៅដល់កីឡាការិនី កីឡាការិនីជនពិការ ដែលបានខំប្រឹងប្រែងដណ្តើមបានជយលាភីយ៉ាងធំធេងជូនជាតិមាតុភូមិ លើកនេះផងដែរ។
អនុប្រធានគណៈកម្មាធិការជាតិប៉ារ៉ាឡាំពិកកម្ពុជា លោក ម៉ានី បានថ្លែងនៅក្នុងពិធីពិសាអាហារជុំគ្នាជាមួយប្រតិភូកីឡាជនពិការ ក្រោយការប្រកួតថា ៖ «ពួកខ្ញុំ ពិតជាមានកិត្តិយស ដែលបានអមដំណើរជាមួយកីឡាករ កីឡាការិនីជួមុខតំណាងឱ្យព្រះរាជាណាចក្រកម្ពុជា តំណាងឱ្យប្រជាពលរដ្ឋទាំង ១៧ លាននាក់ សម្រាប់ការប្រកួតនៅលើឆាកអន្តរជាតិ ដោយស្មើមុខ ស្មើមាត់ និងយកបទពិសោធ ភាពជោគជ័យជូនប្រទេសជាតិ ហើយនេះ ជាបទពិសោធមួយ ដែលខ្ញុំមិនអាចកាត់ថ្លៃបាន»។
លោកបានបញ្ជាក់ថា៖ «បើខ្ញុំ មិនបានមកចូលរួមទេ ខ្ញុំនឹងមិនបានយល់ដឹង និងស្វែងយល់បន្ថែមពីការខំប្រឹងប្រែង ដោយស្មារតី និងការតស៊ូរបស់បងៗ ជាកីឡាករ កីឡាការិនីនោះទេ។ ខ្ញុំគ្មានអ្វីក្រៅពីកោតសរសើរដោយស្មោះ ចំពោះការខិតខំប្រឹងប្រែងរបស់បងៗ។ ចំណែកប្រភេទកីឡា មិនឈ្នះបានមេដាយ ពេលត្រឡប់ទៅវិញ ត្រូវសិក្សាដកស្រង់បទពិសោធ ស្វែងរកចំណុចខ្សោយ ពង្រឹងចំណុចខ្លាំងទៅលើបច្ចេកទេសតាមប្រភេទនីមួយៗ ដើម្បីឱ្យមានសក្តានុពល ត្រៀមដណ្តើមមេដាយ ក្នុងនាមជាម្ចាស់ផ្ទះ នៅឆ្នាំ ២០២៣»។
សម្រាប់ការប្រកួតកីឡាអាស៊ានប៉ារ៉ាហ្គេមនេះ កម្ពុជា បានបញ្ជូនអត្តពលិកចំនួន ១១ ប្រភេទកីឡា ឱ្យចូលរួម ហើយជាលទ្ធផល ក្រុមអត្តពលិកជនពិការ នៃប្រភេទកីឡាអត្តពលកម្ម ប៊ូស្យា បាល់ទះអង្គុយបុរស បាល់បោះជិះរទេះនារី វាយកូនឃ្លីលើតុ អុក និងហែលទឹក បានរួមគ្នាដណ្តើមបានមេដាយមាស ៧ ប្រាក់ ១០ និងសំរឹទ្ធ ១១ សរុបចំនួន ២៨ ជូនកម្ពុជា ប៉ុន្តែសម្រាប់ប្រភេទកីឡាវាយសី លើកទម្ងន់ បាល់បោះពិការភ្នែក (Goalball) និងបាល់ទាត់ចលករខួរក្បាល (Football CP) មិនដណ្តើមបានមេដាយទេ។
ចំពោះមេដាយមាសទាំង ៧ ដែលកម្ពុជា ដណ្តើមបានលើកនេះ គឺមេដាយមាសទី ១ រកបានដោយក្រុមបាល់បោះជិះរទេះនារី លើវិញ្ញាសា ៣ នាក់ទល់ ៣ នាក់ របស់កីឡាការិនី អាន ស៊ីណែត, ឡាក់ សាវរី, ស៊ឹម ដា, សាន រដ្ឋា និង ដួង ច័ន្ទរក្សា។
ទី ២ កីឡាការិនីអត្តពលិក វ៉ិត ចន្ថា លើវិញ្ញាសា លោតចម្ងាយ។ ទី ៣ កីឡាការិនីប៊ូស្យា សន សាស លើវិញ្ញសានារីឯកត្តជន និងមេដាយមាស ទី ៤ រកបានដោយកីឡាការិនី ងួន រតនា លើការរត់ចម្ងាយ ១ ៥០០ ម៉ែត្រ ប្រភេទ T46។
ចំណែកកីឡាការិនី វ៉ិត ចន្ថា បានឈ្នះមេដាយមាសទី ២ របស់ខ្លួន និងជាមេដាយមាសទី ៥ របស់កម្ពុជា លើវិញ្ញាសារត់ចម្ងាយ ៤០០ ម៉ែត្រ ប្រភេទ T47។ រីឯមេដាយមាសទី ៦ រកបានដោយក្រុមកីឡាករបាល់ទះអង្គុយ រួមមានកីឡាករ តង់ រ៉ាវី, អឿន ណុត, យ៉ុន ក្រឹម, ញូញ សុខ, អ៊ូ ផល្លា, អ៊ីង ភីរៀម, ណៃ ការ, ស្រៀង លាប, ស្រៀង សុខណា, ពូន ឌីណា, ម៉ន យ៉ារ៉ាញ់ និង កៅ ហឿន។ មេដាយមាសទី ៧ ចុងក្រោយ កម្ពុជា រកបានដោយក្រុមកីឡាករអត្តពលកម្ម វ៉ាន វ៉ុន, ឈុន ពន់, ហៀ ហុក និង ហេង សាវឿន លើវិញ្ញាសាប្រណាំងរទេះបណ្ដាក់ ១០០ ម៉ែត្រ ៤x៤។
យ៉ាងណាមិញ នៅក្នុងពិធីបិទការប្រកួតអាស៊ាន លើកទី ១១ ក្រោមអធិបតីភាពលោក Joko Widodo ប្រធានាធិបតីឥណ្ឌូនេស៊ី កាលពីយប់ថ្ងៃទី ៦ ខែសីហានេះ កម្ពុជា តាមរយៈលោក ហ៊ុន ម៉ានី បានទទួលទង់អាស៊ានប៉ារ៉ាហ្គេម ពីលោក Osoth Bhavilai ប្រធានសហព័ន្ធកីឡាជនពិការអាស៊ាន ដើម្បីយកមកប្រគល់បន្តឱ្យលោក យី វាសនា ហើយក្នុងពិធីទទួលនោះ កម្ពុជាបានរៀបចំការសម្តែងសិល្បៈវប្បធម៌ និងបង្ហាញពីសក្តានុពលទេសចរណ៍ដែលទទួលបានការចាប់អារម្មណ៍យ៉ាងខ្លាំង ពីអ្នកចូលរួមទស្សនាផ្ទាល់ ពេញកីឡដ្ឋាន Manahan។
ជាមួយគ្នានេះ លោក ហ៊ុន ម៉ានី និងប្រតិភូកីឡាប៉ារ៉ាហ្គេមកម្ពុជា បាននាំយកទង់អាស៊ានប៉ារ៉ាហ្គេមនេះ មកដល់ព្រលានយន្តហោះអន្តរជាតិភ្នំពេញ ដើម្បីប្រគល់ជូនលោកឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ទៀ បាញ់ ជាប្រធាន CAMSOC កាលពីល្ងាចថ្ងៃអាទិត្យ ទី ៧ ខែសីហា។
បន្ទាប់មក កម្ពុជា បានរៀបចំក្បួនដង្ហែទង់អាស៊ានប៉ារ៉ាហ្គេម ដោយឡានឆៃយាំ ឡានទង់ ឡានកីឡាករ កីឡាការិនី ឈ្នះមេដាយអាស៊ានប៉ារ៉ាហ្គេម រួមទាំងម៉ូតូអម ៣ គ្រឿង ដោយក្បួនដង្ហែនេះ បានចេញដំណើរពីអាកាសយានដ្ឋានអន្តរជាតិភ្នំពេញ តាមមហាវិថីសហព័ន្ធរុស្ស៊ី ឆ្ពោះទៅមហាវិថីព្រះនរោត្តម បន្តទៅមហាវិថីព្រះសីហនុ រួចបត់តាមមហាវិថីសាធារណរដ្ឋប្រជាមានិតប៉ូឡូញ និងចូលមកឈប់នៅទីស្នាក់ការគណៈកម្មាធិការជាតិអូឡាំពិកកម្ពុជា ដែលជាកន្លែងតម្កល់ទុកទង់អាស៊ានប៉ារ៉ាហ្គេមនេះ ដើម្បីកម្ពុជា ត្រៀមធ្វើជាម្ចាស់ផ្ទះអាស៊ានប៉ារ៉ាហ្គេមវិញម្តង នៅឆ្នាំ ២០២៣។
ជុំវិញការទទួលបានទង់អាស៊ានប៉ារ៉ាហ្គេមនេះ លោក យី វាសនា បានថ្លែងថា ៖ «ចុងបញ្ចប់ ក្នុងពិធីបិទដ៏អស្ចារ្យនេះ កម្ពុជាបានទទួលទង់សហព័ន្ធកីឡាជនពិការអាស៊ីអាគ្នេយ៍ជាផ្លូវការ ហើយនេះជាមោទនភាព សម្រាប់កម្ពុជាយើង ព្រោះទង់នេះ គឺជាទង់តំណាងឱ្យអាស៊ាន ដែលតំណាងឱ្យ ១១ ប្រទេស។ ការរៀបចំកីឡាអាស៊ានប៉ារ៉ាហ្គេមនេះ បញ្ជាក់ថា កម្ពុជាយកចិត្តទុកដាក់លើបងប្អូនជនមានពិការភាពរបស់យើងនៅប្រទេសកម្ពុជា ក៏ដូចជានៅក្នុងតំបន់ ហើយយើងឃើញហើយ ពេលកម្ពុជាយើងទទួលទង់ គឺអ្នកគាំទ្រទះដៃគាំទ្រយ៉ាងខ្លាំង»៕