.jpg)
អ្នកចូលរួមរត់ម៉ារ៉ាតុងអន្តរជាតិចក្រភពខ្មែរលើកទី៧ឆ្នាំ ២០២២ នៅខេត្តសៀមរាប នៅថ្ងៃទី ៧ សីហា។ រូបថត Cambodia 2023 page
សៀមរាបៈព្រឹត្តិការណ៍ទិវារត់ប្រណាំងម៉ារ៉ាតុងអន្តរជាតិចក្រភពខ្មែរលើកទី ៧ ឆ្នាំ ២០២២ (7th Khmer Empire Marathon 2022) ដែលទើបត្រូវបានរៀបចំឱ្យមានជាថ្មីឡើងវិញ នៅលើទឹកដីខេត្តសៀមរាប បន្ទាប់ពីខកខានរៀបចំអស់រយៈពេល ២ ឆ្នាំ ដោយសារវិបត្តិជំងឺកូវីដ ១៩ នោះ ត្រូវបានមន្រ្តីជំនាញអះអាងថា បានបញ្ចប់ដោយជោគជ័យ និងបានក្លាយជាសញ្ញាណល្អ ក្នុងការជួយឱ្យវិស័យទេសចរណ៍ក្នុងស្រុក ងើបឡើងវិញ។
ក្រោមការរៀបចំរបស់គណៈកម្មាធិការជាតិអូឡាំពិកកម្ពុជា (NOCC) និងក្រសួងទេសចរណ៍ ព្រមទាំងដៃគូសហការផ្សេងៗទៀត បានធ្វើឱ្យការចាប់ផ្តើមនៃទិវារត់ប្រណាំងម៉ារ៉ាតុងអន្តរជាតិចក្រភពខ្មែរ ឆ្នាំ ២០២២ នេះ អាចដំណើរការទៅបានយ៉ាងរលូន និងពោរពេញដោយស្នាមញញឹមពីអ្នកចូលរួមផ្ទាល់ជាង ២ ពាន់នាក់ កាលពីព្រឹកថ្ងៃអាទិត្យ ទី ៧ ខែសីហា។
ជាមួយគ្នានេះ លោក វ៉ាត់ ចំរើន អគ្គលេខាធិការ NOCC បានថ្លែងថា៖ «ឯកឧត្តមបណ្ឌិត ថោង ខុន រដ្ឋមន្រ្តីក្រសួងទេសចរណ៍ និងជាប្រធាន NOCC បានជំរុញឱ្យ NOCC ព្រមទាំងក្រសួងទេសចរណ៍ ផ្នែកទេសចរណ៍ និងកីឡានេះ ធ្វើពិពិធកម្មកីឡា គឺធ្វើយ៉ាងណាឱ្យព្រឹត្តិការណ៍កីឡាហ្នឹងរស់ឡើងវិញ ដំណាលគ្នានឹងការស្តាសេដ្ឋកិច្ច និងទេសចរណ៍ នៅក្នុងដំណាក់កាលនៃការងើបឡើងវិញពីជំងឺកូវីដ ១៩ នេះ»។
លោកបានបន្តថា នៅក្នុងដំណាក់កាលនេះ ក្រសួងទេសចរណ៍ និង NOCC បានដាក់ទិសដៅថា ធ្វើយ៉ាងម៉េចជួយសេដ្ឋកិច្ច ឱ្យមានការកម្រើកឡើងវិញ តាមរយៈព្រឹត្តិការណ៍កីឡា និងទេសចរណ៍។
លោកបន្តថា៖ «អ៊ីចឹងហើយយើងបានធ្វើការងារច្រើនណាស់ ហើយប៉ុន្មានថ្ងៃនេះ យើងក៏បានរៀបចំព្រឹត្តិការណ៍កីឡាទេសចរណ៍បាល់ទាត់មិត្តភាពវ័យចាស់ចំណាស់មេគង្គ នៅខេត្តសៀមរាបហ្នឹងដែរ ដោយមាន ៤ ប្រទេសចូលរួម។ ហេតុនេះការយកចិត្តទុកដាក់របស់ឯកឧត្តមបណ្ឌិត ថោង ខុន គឺដើម្បីធ្វើយ៉ាងណាឱ្យគោលដៅទេសចរណ៍ធំៗហ្នឹង បានស្រូបយកអ្នកទេសចរឡើងវិញ»។
តាមរបាយការណ៍របស់គណៈកម្មការរៀបចំ បានឱ្យដឹងថា ទិវារត់ប្រណាំងម៉ារ៉ាតុងអន្តរជាតិចក្រភពខ្មែរ លើកទី ៧ ឆ្នាំ ២០២២ នេះ មានអ្នកចុះឈ្មោះចូលរួមចំនួន ២ ១០០ នាក់ មកពី ៤០ ប្រទេស ដោយក្នុងនោះ មានកីឡាករបរទេស មកពីក្រៅស្រុកប្រមាណពី ៥០ ទៅ ៦០ នាក់ និងបរទេសរស់នៅក្នុងស្រុកខ្មែរ ប្រហែល ៣០០ នាក់។ ក្រៅពីនោះ ជាយុវជន និងប្រជាពលរដ្ឋខ្មែរ ដែលមកពីគ្រប់ខេត្ត-ក្រុង នៅក្នុងប្រទេសកម្ពុជា។
ចំពោះចំនួនអ្នកចូលរួមទាំងនេះ ត្រូវបានលោក វ៉ាត់ ចំរើន លម្អិតថា ការប្រកួតម៉ារ៉ាតុងពេញ ចម្ងាយ ៤២,១៩៥ គីឡូម៉ែត្រ មានអ្នករត់ជិត ២០០ នាក់ រីឯវិញ្ញាសាពាក់កណ្តាលម៉ារ៉ាតុង ចម្ងាយ ២១,០៩៧៥ គីឡូម៉ែត្រ មានជាង ៣០០ នាក់ ដែលភាគច្រើនជាជនបរទេស ហើយរត់ចម្ងាយ ១០ គីឡូម៉ែត្រ មានជាង ១ ០០០ នាក់ និងការរត់បែបកម្សាន្តចម្ងាយ ៣ គីឡូម៉ែត្រ មានពី ៥០០ ទៅ ៦០០ នាក់។
ជាមួយសកម្មភាពនេះ លោក វ៉ាត់ ចំរើន បានបញ្ជាក់ថា៖ «យើងឃើញថា ការរៀបចំឱ្យមានព្រឹត្តិការណ៍កីឡា និងទេសចរណ៍ឡើងវិញនេះ មានសញ្ញាណល្អ ក្នុងការចូលរួម ថែរក្សាសុខភាព ដើម្បីជួយដល់វិស័យទេសចរណ៍ និងធ្វើឱ្យទេសចរក្នុងស្រុក ធ្វើចលនាឡើងវិញ ព្រោះបើសិនជាយើងមិនរុញទេសចរក្នុងស្រុកទេ គឺយើងមានការពិបាកណាស់ ក្នុងការលើកតម្កើងជីវភាពរបស់អាជីវករ ឬប្រតិបត្តិករទេសចរណ៍ ដោយពួកគាត់ នៅតែជួបបញ្ហា អ៊ីចឹងចំណុចនេះ យើងបានយកចិត្តទុកដាក់ខ្ពស់ណាស់»។
លោកបានបន្ថែមថា៖ «រាជរដ្ឋាភិបាល បានអនុញ្ញាតឱ្យ ក្រសួងទេសចរណ៍ និង NOCC រៀបចំព្រឹត្តិការណ៍កីឡាទេសចរណ៍ជាលក្ខណៈអន្តរជាតិធំៗបែបនេះ ឱ្យបានច្រើន ដោយយើងគ្រោងធ្វើនៅខេត្តព្រះសីហនុ ជាម៉ារ៉ាតុងផង ប្រណាំងកង់ផង និងព្រឹត្តិការណ៍កីឡាផ្សេងៗទៀត ចាប់ពីចុងឆ្នាំ ២០២២ នេះទៅ រហូតដល់ឆ្នាំក្រោយៗទៀត ដើម្បីអបអរសាទរ ការធ្វើជាម្ចាស់ផ្ទះស៊ីហ្គេម របស់កម្ពុជា នៅឆ្នាំ ២០២៣ ផងដែរ»។
រដ្ឋលេខាធិការក្រសួងទេសចរណ៍ លោក វ៉ាត់ ចំរើន បានបញ្ជាក់ទៀតថា ចាប់ពីពេលនេះតទៅ កម្ពុជានឹងពង្រឹងគុណភាពនៃការរៀបចំព្រឹត្តិការណ៍កីឡា ជាពិសេសសុវត្ថិភាពអ្នករត់ ដែលជាកត្តាចាំបាច់ ព្រោះក្រសួងទេសចរណ៍ចង់ឱ្យពួកគាត់មករត់សប្បាយហើយមានសុវត្ថិភាពល្អ និងត្រឡប់ទៅវិញ ដោយមោទនភាព។
លោកបានបន្ថែមថា៖ «យើងចង់ផ្តល់ឱ្យអ្នកមកចូលរួម នូវអនុស្សាវរីយ៍ល្អៗ និងបានឃើញពីអ្វីដែលមានការប្រែប្រួលមុខមាត់ថ្មី និងការអភិវឌ្ឍថ្មីៗ នៅតំបន់អង្គរ ដែលជាគោលដៅទេសចរណ៍មានសុវត្ថិភាព និងបៃតង។ នេះជាអ្វីដែលយើងចង់បានទៅថ្ងៃក្រោយទៀត ដូច្នេះយើងចង់ឱ្យប្រជាពលរដ្ឋចូលរួម លើកតម្កើងនូវព្រឹត្តិការណ៍កីឡាទេសចរណ៍នេះ ដើម្បី ជាគោលដៅនៃការកសាងកេរ្តិ៍ឈ្មោះសេដ្ឋកិច្ចជាតិ និងកេរ្តិ៍ឈ្មោះកម្ពុជាយើង ទៅក្រៅប្រទេស»៕
