.jpg)
លោក ហង់ជួន ណារ៉ុន និងប្រទេសជាសមាជិកអាស៊ាននៅក្នុងសិក្ខាសាលា ស្ដីពីការអភិរក្សកីឡាប្រពៃណីអាស៊ាន។ រូបថត MoEYS
ភ្នំពេញៈ កម្ពុជាតាមរយៈក្រសួងអប់រំ យុវជន និងកីឡា ក្នុងនាមជាប្រធានអាស៊ាន ឆ្នាំ ២០២២ នេះ បាននិងកំពុងរៀបចំសិក្ខាសាលាមួយស្តីពី ការអភិរក្សកីឡាប្រពៃណីអាស៊ាន នៅសណ្ឋាគារសុខាភ្នំពេញ ដោយមានតំណាងប្រទេសជាសមាជិកអាស៊ានទាំង ១០ បានចូលរួម។
នៅក្នុងពិធីបើកសិក្ខាសាលា កាលពីព្រឹកថ្ងៃទី ៨ ខែសីហានេះ លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានជំរុញឱ្យសមាជិកអាស៊ានទាំង ១០ ប្រទេស ត្រូវរួមគ្នាអភិរក្ស និងអភិវឌ្ឍកីឡាប្រពៃណី នៅក្នុងតំបន់អាស៊ាន ហើយតំណាងរបស់អង្គការយូណេស្កូ ក៏បានចូលរួមបញ្ចេញជាមតិយោបល់ពីចម្ងាយតាមរយៈវីដេអូអនឡាញ ដើម្បីលើកទឹកចិត្តឱ្យមានការរួមគ្នាលើកកម្ពស់អត្តសញ្ញាណអាស៊ាន តាមរយៈកីឡាប្រពៃណីនេះផងដែរ។
លោក ហង់ជួន ណារ៉ុន បានថ្លែង នៅក្នុងសិក្ខាសាលានោះថា៖ «កីឡាប្រពៃណី ដែលជាផ្នែកជាក់លាក់មួយនៃប្រព័ន្ធកីឡាសកល គឺមានសញ្ញាណរបស់វា ក្នុងការបង្ហាញពីអំពីវប្បធម៌ចំណាស់ កម្រ និងអសកម្ម និងជិតផុតពូជ។ វាពិតជាមានប្រវត្តិដ៏វែងឆ្ងាយ ហើយកីឡាមួយចំនួនអាចត្រូវបានគេបំភ្លេចចោល ឬអាចមានអ្នកលេងតែ២ទៅ៣នាក់ប៉ុណ្ណោះ។ ចំណែកកីឡាមួយចំនួន មានប្រជាប្រិយភាពខ្លាំង នៅក្នុងតំបន់រៀងៗខ្លួន ខណៈកីឡាប្រពៃណីផ្សេងទៀត រង់ចាំការស្វែងរកឱ្យឃើញម្តងទៀត»។
លោកបានបន្ថែមថា៖ «កីឡាប្រពៃណីភាគច្រើន ដែលបង្ហាញអំពីវប្បធម៌ និងរបៀបរស់នៅរបស់ជនជាតិដើមភាគតិច ដោយរួមចំណែកដល់អត្តសញ្ញាណរួមរបស់មនុស្សជាតិ នោះ បានផុតរលត់អស់ហើយ ហើយកីឡាប្រពៃណី ដែលនៅមានជីវិត កំពុងប្រឈមមុខនឹងការផុតរលត់ ក្រោមឥទ្ធិពលរួមនៃសកលភាវូបនីយកម្ម និងការចុះសម្រុងគ្នានៃភាពសម្បូរបែបនៃបេតិកភណ្ឌកីឡាពិភពលោករបស់យើង»។
«ក្នុងន័យនេះ ក្នុងនាមជារដ្ឋសមាជិកអាស៊ាន យើងត្រូវតែមានការយកចិត្តទុកខ្ពស់ និងធ្វើឱ្យមានសកម្មភាពជាក់ស្តែង ដើម្បីការពារ និងលើកកម្ពស់កីឡាប្រពៃណី ក៏ដូចជាដើម្បីកសាងស្មារតីសហគមន៍របស់យើង និងជំរុញឱ្យប្រជាពលរដ្ឋរួមគ្នា បង្កើតការយល់ដឹង និងមានមោទនភាព ក្នុងមូលដ្ឋានគ្រឹះវប្បធម៌របស់សង្គមមួយ»។ លោក ណារ៉ុន បានបន្ថែម។
ចំពោះសិក្ខាសាលា ដែលកំពុងធ្វើនៅសណ្ឋាគារសុខាភ្នំពេញនេះ ត្រូវបានចែកជា២ប្រធានបទដាច់ពីគ្នា គឺប្រធានបទទី១ ស្តីពី «ការអភិរក្សកីឡាប្រពៃណីអាស៊ាន» ដែលបានចាប់ផ្តើមពីថ្ងៃទី ៨ ដល់ទី ៩ ខែសីហា និងប្រធានបទទី២ ស្តីពី «ការអភិវឌ្ឍតំបន់ហាត់ប្រាណ និងលេងកីឡាប្រទេសអាស៊ាន» ហើយប្រធានបទទាំង ២ នេះ គឺគាំទ្រទៅដល់សេចក្តីប្រកាសចំនួន ២ របស់ក្រសួងអប់រំ ទាក់ទងនឹងការរៀបចំឯកសារទស្សនទាន។
ជុំវិញការងារនេះ លោក អ៊ុក ឌីវ៉ង់ អគ្គនាយករងនៃអគ្គនាយកដ្ឋានកីឡា បានថ្លែងថា៖ «ដោយសារឆ្នាំនេះ កម្ពុជាធ្វើជាម្ចាស់ផ្ទះអាស៊ាន អ៊ីចឹងក្រសួងអប់រំ យុវជន និងកីឡា ជាពិសេសអគ្គនាយកកីឡា បានរៀបចំសេចក្តីប្រកាស២ តាំងពីដើមឆ្នាំ ២០២២ គឺមានន័យថា យើងរៀបចំឯកសារទស្សនទាន ទាក់ទងនឹងសេចក្តីប្រកាសនេះ ហើយប្រទេសទាំង ១០ នៅអាស៊ានបានផ្តល់ការគាំទ្រទៅនឹងឯកសារទស្សនទានរបស់កម្ពុជា ហើយនៅក្នុងដំណាក់កាលទី២ យើងកំពុងកសាងសេចក្តីព្រាង ដើម្បីប្រកាសឯកសារទស្សនទានហ្នឹង»។
លោកបន្ថែមថា៖ «ដំណើរការលើការងារនេះ ជិតបញ្ចប់ហើយ គឺយើងបាន ៨០ ទៅ ៩០ ភាគរយហើយ ទៅលើសេចក្តីព្រាងនេះ ដោយយើងនៅពិភាក្សា១ជុំទៀត ជាមួយប្រទេសនៅអាស៊ាន ជាសមាជិក ដើម្បីកែសម្រួល និងកែលម្អធាតុចូល ហើយអ្វីដែលយើងធ្វើសិក្ខាសាលាទាំង ២ នេះ គឺដើម្បគាំទ្រទៅនឹងសេចក្តីប្រកាសទាំង ២ នេះឯង ព្រោះអ្វីដែលយើងចង់បាន គឺការគាំទ្រពីថ្នាក់ដឹកនាំកំពូល នៅក្នុងកិច្ចប្រជុំកំពូលអាស៊ាន នៅខែវិច្ឆិកា»។
លោក អ៊ុក ឌីវ៉ង់ បានបញ្ជាក់ថា៖ «នៅក្នុងកិច្ចប្រជុំកំពូលអាស៊ាន នៅខែវិច្ឆិកានោះយើងនឹងដាក់សេចក្តីប្រកាសរបស់យើង ឆ្លងទៅថ្នាក់ដឹកនាំអាស៊ានទាំង ១០ ធ្វើការអនុម័ត ហើយនៅពេលថ្នាក់ដឹកនាំអនុម័ត យើងនឹងយកអ្វីដែលមាន នៅក្នុងខ្លឹមសារនៃសេចក្តីប្រកាសនេះ ទៅអនុវត្ត នៅគ្រប់ប្រទេស នៅអាស៊ាន»។
នៅក្នុងសិក្ខាសាលានេះ មានការបញ្ជាក់ពីប្រភេទកីឡាប្រពៃណី នៅក្នុងប្រទេសអាស៊ាន ដោយមានខ្លឹមសារនៃការអភិរក្សវប្បធម៌ ព្រោះកីឡាជាផ្នែកមួយនៃវប្បធម៌ ហើយជាមួយគ្នានេះ កម្ពុជាក្នុងនាមជាម្ចាស់ផ្ទះ ក៏បានធ្វើបទបង្ហាញពីការអភិរក្ស និងអភិវឌ្ឍប្រភេទកីឡាប្រពៃណីរបស់ខ្លួន រួមមានគុនខ្មែរ និងគុនល្បុក្កតោ ដើម្បីឱ្យអង្គសិក្ខាសាលាបានយល់ និងបានដឹងច្បាស់ ព្រមទាំងគាំទ្រដល់កីឡាប្រពៃណីនេះផងដែរ។
នៅត្រង់ចំណុចនេះ លោក អ៊ុក ឌីវ៉ង់ បានបញ្ជាក់ថា៖ «គោលបំណងចម្បង នៃសិក្ខាសាលានេះ គឺការលើកកម្ពស់អត្តសញ្ញាណអាស៊ាន តាមរយៈការដាក់បញ្ចូលនូវប្រភេទកីឡាប្រពៃណីរៀងៗខ្លួន។ ដូច្នេះគោលដៅរបស់អាស៊ាន នាពេលនេះ គឺរួមគ្នាដើម្បីអភិរក្សនូវប្រភេទកីឡាអត្តសញ្ញាណជាតិ ដែលបណ្តាប្រទេសអាស៊ានទាំងអស់មានពីមុនមក ហើយរួមគ្នាអភិវឌ្ឍឱ្យក្លាយទៅជាប្រភេទកីឡាទំនើប ដើម្បីត្រៀមដាក់បញ្ចូលក្នុងការប្រកួតព្រឹត្តិការណ៍ធំៗ ដូចជាស៊ីហ្គេម អូឡាំពិកហ្គេម និងការប្រកួតផ្សេងៗទៀត»។
លោកបានបន្ថែមថា៖ «សម្រាប់កម្ពុជា ក្នុងឋានៈជាម្ចាស់ផ្ទះរៀបចំការប្រកួតកីឡា ស៊ីហ្គេម លើកទី៣២ ឆ្នាំ២០២៣ គឺយើងបានបញ្ចូលប្រភេទកីឡាប្រពៃណីរបស់យើង មានដូចជាគុនល្បុក្កតោ គុនខ្មែរ ចំបាប់ និងទូកជាដើម»។
ជាមួយគ្នានេះ លោក ហង់ ជួន ណារ៉ុន បានថ្លែងថា៖ «យើងមានមោទនភាព ចំពោះបេតិកភណ្ឌរបស់យើង ជាពិសេសកីឡាប្រពៃណី ដូច្នេះយើងត្រូវចាប់ផ្តើមបង្កើតផែនការសកម្មភាពយុទ្ធសាស្ត្រ ដើម្បីការពារ និងលើកកម្ពស់ការអភិរក្សកីឡាប្រពៃណីអាស៊ាន នៅទូទាំងរដ្ឋសមាជិកអាស៊ាន។ យើងក៏ត្រូវធ្វើការស្រាវជ្រាវផងដែរ ដើម្បីផលិតគោលនយោបាយផ្អែកលើភ័ស្តុតាង សម្រាប់តម្លៃជាតិ និងតំបន់របស់យើង ទាក់ទងនឹងការលើកកម្ពស់ និងអភិរក្សកីឡាប្រពៃណី និងអាស៊ានហ្គេម»។
«ខ្ញុំជឿជាក់ថា គោលនយោបាយនេះ នឹងបម្រើជាយន្តការមូលដ្ឋានមួយ ដើម្បីលើកទឹកចិត្តឱ្យមានការចូលរួមពីភាគីពាក់ព័ន្ធ ជាពិសេសការចូលរួមរបស់យុវជនក្នុងគ្រប់សកម្មភាព ដើម្បីបង្កើនការយល់ដឹងស្តីពីកីឡាប្រពៃណី និងអាស៊ានហ្គេម នៅក្នុងសហគមន៍អាស៊ាន និងការតស៊ូមតិ សម្រាប់ការលើកកម្ពស់ និងអភិរក្សកីឡាប្រពៃណី និងអាស៊ានហ្គេម ក្នុងថ្នាក់ជាតិ និងតំបន់»។ លោក ហង់ជួន ណារ៉ុន បានបញ្ជាក់៕
