ភ្នំពេញៈ កម្ពុជាតាមរយៈគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ ឆ្នាំ ២០២៣ (CAMSOC) បានបង្ហាញពីចេតនាក្នុងការរៀបចំយកភ្លើងគប់ពីអាទិទេព និងការរត់ភ្លើងគប់ស៊ីហ្គេមឆ្លងកាត់ប្រទេសទាំងអស់នៅក្នុងអាស៊ាន ឱ្យបានល្អនិងមានភាពស្តង់ដាខ្ពស់ដើម្បីអាចក្លាយជាប្រទេសគំរូមួយ សម្រាប់បណ្តាប្រទេសផ្សេងៗទៀតយកទៅធ្វើតាម។
ជាមួយគ្នានេះ លោកនាយករដ្ឋមន្ត្រី ហ៊ុន សែន បានកំណត់និងអនុញ្ញាតជាផ្លូវការរួចហើយថា ការរៀបចំទទួលភ្លើងគប់ពីព្រះអាទិទេពនឹងត្រូវធ្វើនៅអង្គរវត្តដែលជាទីតាំងដ៏ពិសិដ្ឋ ហើយតាមផែនការ គឺព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជានឹងយាងទៅប្រទានភ្លើងគប់ដោយផ្ទាល់នៅក្នុងពិធីដ៏ធំមិនធ្លាប់មាននៅកម្ពុជានេះ។
នៅក្នុងកិច្ចប្រជុំប្រចាំសប្តាហ៍របស់ CAMSOC កាលពីថ្ងៃទី ៩ ខែសីហា ដឹកនាំដោយលោក ថោង ខុន ជាអនុប្រធានអចិន្ត្រៃយ៍ និងដោយមានការចង្អុលបង្ហាញពីលោក ទៀ បាញ់ ជាប្រធាន CAMSOC គឺអង្គប្រជុំបានធ្វើការត្រួតពិនិត្យឡើងវិញទៅលើគណៈកម្មាធិការជំនាញនីមួយៗ ដើម្បីពន្លឿនការបំពេញការងារឱ្យបានល្អ និងទាន់ពេលវេលា។
ទន្ទឹងនឹងនោះ លោករដ្ឋមន្ត្រីក្រសួងទេសចរណ៍ ថោង ខុន ដែលជាប្រធានគណៈកម្មាធិការជាតិអូឡាំពិកកម្ពុជាផងនោះ បានប្រាប់ទៅគ្រប់ផ្នែកទាំងអស់ឱ្យយកចិត្តទុកដាក់ខ្ពស់បំផុតគឺធ្វើយ៉ាងណាឱ្យពិធីរៀបចំយកភ្លើងគប់នេះក្លាយជាភាពគំរូមួយសម្រាប់បណ្តាប្រទេសផ្សេងៗទៀតនៅក្នុងអាស៊ាន ដែលគេអាចយកអង្គរវត្ត ជាទីកន្លែងសម្រាប់សុំភ្លើងពីអាទិទេពដែរព្រោះអង្គរវត្តជាសម្បត្តិបេតិកភណ្ឌពិភពលោកដែលមានភាពល្បីល្បាញខ្លាំងនៅលើពិភពលោក។
ជុំវិញការងារនេះ លោក វ៉ាត់ ចំរើន អគ្គលេខាធិការ CAMSOC បានថ្លែងក្រោយកិច្ចប្រជុំថា៖ «ឯកឧត្តមបណ្ឌិត ថោង ខុន បានមានប្រសាសន៍យ៉ាងច្បាស់លាស់ថា យើងធ្វើជាគំរូមួយទៅលើការសុំភ្លើងគប់និងរត់ភ្លើងគប់ស៊ីហ្គេមនេះ ព្រោះដោយសារបញ្ហាកូវីដបានធ្វើឱ្យស៊ីហ្គេម២លើកចុងក្រោយនេះបាត់បង់នូវស្តង់ដាខ្លះ អ៊ីចឹងយើងងាកមករៀបចំឱ្យត្រូវតាមគន្លងនៃស្តង់ដាកីឡាឡើងវិញ»។
លោកបានបន្តថា៖ «ការយកភ្លើងគប់នៅក្នុងទីឋានរបស់អាទិទេពមួយ ដែលយើងជឿថា មានភាពស័ក្តិសិទ្ធិ និងជាទីឋានរបស់អាទិទេពនោះគឺមានតែប្រាសាទអង្គរវត្តរបស់យើងនេះទេ ព្រោះអង្គរវត្តមានភាពល្បីល្បាញនៅលើពិភពលោក ហើយក៏ជាទីសក្ការៈនៃអាទិទេព សម្រាប់អាស៊ីអាគ្នេយ៍ផងដែរ អ៊ីចឹងសម្រាប់ប្រទេសជាសមាជិកស៊ីហ្គេមនិងអាស៊ានប៉ារ៉ាហ្គេមក៏គេមើលឃើញបែបនេះដែរ។គេថា កម្ពុជាបានរៀបចំត្រឹមត្រូវ រកឃើញកន្លែងពិសេសក្នុងការសុំភ្លើងពីអាទិទេព ដែលអាស៊ានគួរយកជាគំរូ»។
យ៉ាងណាក៏ដោយ លោក ចំរើន ថា ភាពគំរូនេះ គឺលុះត្រាតែកម្ពុជារៀបចំបានល្អ។ «នេះគ្រាន់តែជាគំរូទេ ប៉ុន្តែបើក្រុមប្រឹក្សាសហព័ន្ធកីឡាអាស៊ីអាគ្នេយ៍ មើលឃើញថា អាហ្នឹងវាចាំបាច់សម្រាប់ប្រទេសផ្សេងៗទៀត ត្រូវយកភ្លើងគប់នៅអង្គរវត្ត ពេលធ្វើម្ចាស់ផ្ទះស៊ីហ្គេម ដូចជា អូឡាំពិក ដែលត្រូវតែទៅយកភ្លើងគប់នៅឯលើភ្នំអូឡាំព្យា (Mount Olympus) នៅប្រទេសក្រិកនោះគឺយើងនឹងស្វាគមន៍ហើយយើងនឹងក្លាយជាប្រទេសមួយដែលបានផ្តើមចេញនូវគំនិតផ្តួចផ្តើមដ៏ល្អមួយសម្រាប់មនុស្សជាតិនិងប្រទេសទាំងអស់នៅអាស៊ាន»។
លោក វ៉ាត់ ចំរើន បានបន្ថែមថា៖ «នេះជាចំណុចសំខាន់ ដែលយើងងាកទៅរកភាពស្តង់ដា ព្រោះនៅក្នុងធម្មនុញ្ញរបស់ស៊ីហ្គេមបានចែងថា ធម្មនុញ្ញស៊ីហ្គេម គឺជាធម្មនុញ្ញ ដែលគោរពទៅតាមធម្មនុញ្ញរបស់អូឡាំពិក អ៊ីចឹងអូឡាំពិកអន្តរជាតិឱ្យចំណុចយ៉ាងម៉េច គឺយើងត្រូវធ្វើតាមគោលការណ៍ទាំងអស់ហ្នឹង»។
យ៉ាងណាមិញ សម្រាប់ការរត់ភ្លើងគប់ស៊ីហ្គេម ចេញពីអង្គរវត្តនេះ នឹងចាប់ផ្តើមធ្វើពីដើមខែកុម្ភៈ ឆ្នាំ ២០២៣ ទៅ ដោយត្រូវឆ្លងកាត់ប្រទេសទាំងអស់ ជាសមាជិកស៊ីហ្គេមនៅក្នុងតំបន់អាស៊ាន ហើយនៅក្នុងកិច្ចប្រជុំក្រុមប្រឹក្សាសហព័ន្ធកីឡាអាស៊ីអាគ្នេយ៍នៅសណ្ឋាគារសុខាកាលពីថ្ងៃទី ១១ ខែកក្កដា កន្លងមកនេះ ប្រទេសទាំងនេះបានសន្យានឹងជួយជ្រោមជ្រែងដល់កម្ពុជាក្នុងការរត់ភ្លើងគប់ឆ្លងកាត់ប្រទេសរបស់ពួកគេ គឺធ្វើយ៉ាងណាឱ្យកម្ពុជាទទួលបានការគាំទ្រខ្លាំង។
អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) លោក វ៉ាត់ ចំរើន បានបញ្ជាក់ថា៖ «យើងបានប្រាប់ទៅក្រុមប្រឹក្សាសហព័ន្ធកីឡាអាស៊ីអាគ្នេយ៍នៅក្នុងកិច្ចប្រជុំកាលពីពេលថ្មីៗនេះរួចហើយថា ឱ្យត្រៀមខ្លួនជួយដល់ការរត់ភ្លើងគប់នេះ ដើម្បីឱ្យកម្ពុជា ដែលបានរៀបចំព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេម ជាលើកដំបូងនេះមានភាពផុសផុល និងទទួលបានការគាំទ្រពេញលេញពីបណ្តាប្រទេសព្រមទាំងប្រជាជននិងកីឡាកររបស់ប្រទេសទាំងអស់»។
លោកបានបញ្ជាក់បន្ថែមថា៖ «ដោយសារតែនេះជាលើកដំបូង សម្រាប់កម្ពុជា ធ្វើជាម្ចាស់ផ្ទះស៊ីហ្គេម អ៊ីចឹងយើងត្រូវរត់ភ្លើងគប់ឆ្លងកាត់ប្រទេសទាំងអស់ជាសមាជិករបស់ស៊ីហ្គេម ព្រោះនេះជាចំណុចល្អ ដែលយើងត្រូវធ្វើដើម្បីបំផុសឱ្យគាត់ត្រៀមលក្ខណៈ និងមើលឃើញ ក្នុងការត្រៀមចូលរួម។ ក្រៅពីនោះ យើងមករត់នៅប្រទេសយើងជុំវិញបឹងទន្លេសាបដោយយើងនឹងចាប់ផ្តើមពីថ្ងៃទី ៦ ខែកុម្ភៈ រហូតដល់ថ្ងៃទី ៥ ខែឧសភា ដែលជាថ្ងៃបើកពិធីស៊ីហ្គេមតែម្តង។មានន័យថា យើងរត់រហូតគឺរត់ពីក្នុងចេញទៅក្រៅ រត់ពីក្រៅចូលមកក្នុងប្រទេសដើម្បីធ្វើឱ្យព្រឹត្តិការណ៍នេះ មាននិរន្តរភាព»៕