ភ្នំពេញៈ កម្ពុជាតាមរយៈគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ ២០២៣ (CAMSOC) បានជួបជាមួយប្រតិភូសហព័ន្ធកីឡាអេឡិចត្រូនិក (E-Sports) និងប្រតិភូកីឡារបស់វៀតណាម ដើម្បីពិភាក្សាលម្អិត លើការចុះអនុស្សរណៈយោគយល់គ្នា (MoU) ដោយវៀតណាម បានសន្យាជួយកម្ពុជា ឱ្យទទួលបានជោគជ័យ លើការរៀបចំ និងប្រកួតកីឡា E-Sports នេះ ពេលកម្ពុជាធ្វើម្ចាស់ផ្ទះស៊ីហ្គេម ជាប្រវត្តិសាស្រ្តលើកដំបូង នៅឆ្នាំ ២០២៣។
កិច្ចពិភាក្សារបស់ប្រតិភូកីឡាកម្ពុជា និងវៀតណាម ត្រូវបានធ្វើឡើង នៅទីស្នាក់ការគណៈកម្មាធិការជាតិអូឡាំពិកកម្ពុជា (NOCC) កាលពីល្ងាចថ្ងៃទី ១២ ខែសីហា ហើយលោក វ៉ាត់ ចំរើន អគ្គេលេខាធិការ CAMSOC បានឱ្យដឹងថា ភាគីទាំង ២ នេះ បានពិភាក្សាគ្នាលម្អិតទៅលើចំណុចសំខាន់ ២ ដែលភាគីវៀតណាម ធ្លាប់បានសន្យាជួយដល់កម្ពុជា។
លោក វ៉ាត់ ចំរើន បានប្រាប់ប្រព័ន្ធផ្សព្វផ្សាយ ក្រោយកិច្ចពិភាក្សាគ្នានោះថា ការមកដល់ប្រតិភូកីឡា E-Sports និងប្រតិភូកីឡារបស់វៀតណាម គឺដើម្បីរៀបចំកិច្ចសហប្រតិបត្តិការ ជាមួយគណៈកម្មាធិការរបស់ CAMSOC លើបច្ចេកទេសនៃការរៀបចំការប្រកួតកីឡា E-Sports នៅក្នុងព្រឹត្តិការណ៍ស៊ីហ្គេម ឆ្នាំ ២០២៣ ដោយផ្តោតលម្អិតលើអនុស្សរណៈយោគយល់ មាន ២ ចំណុចសំខាន់។
លោកបញ្ជាក់ថា៖ «ទី១ វៀតណាម នឹងជួយយើង ខាងលក្ខណៈបច្ចេកទេស ក្នុងការរៀបចំកីឡា E-Sports ព្រោះ E-Sports មានរូបមន្តនៃការប្រើប្រាស់បច្ចេកវិទ្យាមួយខ្ពស់ ដែលយើងគិតថា កម្ពុជាយើងនៅមានកម្រិត នៅក្នុងការរៀបចំនេះ។ ចំណុចទី២ គឺវៀតណាម នឹងជួយបង្ហាត់បង្រៀនអំពីជំនាញកីឡា E-Sports នេះ បន្ថែមទៀតដល់កម្ពុជា ព្រោះវៀតណាម គេមានកម្រិតល្អប្រសើរ ហើយបានឈ្នះមេដាយមាស ក្នុងការប្រកួតស៊ីហ្គេម កន្លងមកផងដែរ»។
លោកបន្ថែមថា៖ «កីឡា E-Sports របស់វៀតណាម អាចថា មានកម្រិតខ្ពស់មួយ ដែលអាចផ្ទេរចំណេះ ជំនាញ ផ្ទេររបៀបនៃការលេងមកកម្ពុជា ហើយវៀតណាមបានសន្យា ជួយទាំងការរៀបចំការប្រកួត និងផ្ដល់នូវការបណ្ដុះបណ្ដាលជំនាញទៅកីឡាករ កីឡាការិនី E-Sports របស់យើង។ ដូច្នេះយើងបានយោគយល់គ្នា ហើយមានការស្រុះស្រួលគ្នា នៅក្នុងការរៀបចំប្រភេទកីឡានេះ ឱ្យដំណើរការតទៅមុខទៀត ដើម្បីទទួលបានជោគជ័យ នៅស៊ីហ្គេម ឆ្នាំ ២០២៣»។
គួររំឭកថា លោកឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ ទៀ បាញ់ ជាប្រធាន CAMSOC និងលោករដ្ឋមន្រ្តីក្រសួងទេសចរណ៍ ថោង ខុន ដែលជាអនុប្រធានអចិន្ត្រៃយ៍ CAMSOC បានអនុញ្ញាតឱ្យសហព័ន្ធកីឡាអេឡិចត្រូនិកកម្ពុជា និងសហព័ន្ធកីឡាអេឡិចត្រូនិកវៀតណាម ចុះ MoU ក្នុងការព្រមព្រៀងគ្នាជាបឋម នៅក្នុងពេលដែលវៀតណាម ធ្វើជាម្ចាស់ផ្ទះស៊ីហ្គេម លើកទី៣១ ឆ្នាំ ២០២១ កាលពីខែឧសភា ឆ្នាំ ២០២២។
លោក វ៉ាត់ ចំរើន បានបន្ថែមថា៖ «ភាគីវៀតណាមមកនេះ គឺដើម្បីពិភាក្សាគ្នាលម្អិត ក្នុងការធ្វើអនុស្សរណៈយោគយល់គ្នាលម្អិតមួយ សម្រាប់ការរៀបចំការងារនេះ ហើយយើងទាំងអស់គ្នា ព្រមទាំង CAMSOC និងសហព័ន្ធកីឡាអេឡិចត្រូនិកកម្ពុជា នឹងរៀបចំនូវ MoU នេះឱ្យបានរួចរាល់ ហើយដាក់ជូនទៅថ្នាក់ដឹកនាំ ដើម្បីផ្ដល់សិទ្ធិ ទៅដល់សហព័ន្ធ ក៏ដូចជាគណៈអចិន្ត្រៃយ៍របស់ CAMSOC និងអគ្គលេខាធិការដ្ឋាន CAMSOC មានការចុះ MOU អនុវត្តទៅលើការងារនេះ»៕