ភ្នំពេញៈ រដ្ឋមន្ត្រីក្រសួងទេសចរណ៍លោក ថោង ខុន បានជំរុញឱ្យគណៈកម្មការវប្បធម៌ បរិស្ថាននិងអប់រំកីឡា ពង្រឹងការផ្សព្វផ្សាយអំពីយុទ្ធនាការទាំង ៥ រួមមាន យុទ្ធនាការកីឡារស់ក្នុងសន្ដិភាព,ប្រជាជនម្នាក់លេងកីឡាមួយមុខក្នុងមួយជីវិត, កម្ពុជាស្អាតបដិសណ្ឋារកិច្ចល្អ, កាត់បន្ថយគ្រោះថ្នាក់ចរាចរណ៍ និងកាត់បន្ថយគ្រឿងញៀននៅតាមគោលដៅធំៗដែលត្រូវរៀបចំការប្រកួតកីឡាស៊ីហ្គេមលើកទី៣២ ឆ្នាំ ២០២៣ (CAMSOC) នៅកម្ពុជា។
នៅក្នុងកិច្ចប្រជុំប្រចាំសប្ដាហ៍របស់គណៈអចិន្ដ្រៃយ៍ CAMSOC ស្ដីពីការត្រួតពិនិត្យការងារព្រមទាំងកំណត់ផែនការសកម្មភាពការងារ និងទិសដៅអនុវត្តការងារបន្ដរបស់គណៈកម្មការវប្បធម៌ បរិស្ថាន និងអប់រំកីឡា នៅទីស្នាក់ការ NOCC កាលពីថ្ងៃទី ១៦ ខែសីហា ប្រធានអង្គប្រជុំលោក ថោន ខុន អនុប្រធានអចិន្ត្រៃយ៍ CAMSOC បានជំរុញឱ្យគណៈកម្មការទទួលខុសត្រូវលើការងារនេះត្រូវផ្សព្វផ្សាយឱ្យបានទូលំទូលាយនៅតាមគោលដៅធំៗ ជាពិសេសនៅរាជធានីភ្នំពេញ។
លោក តុប សុភ័ក ប្រធានគណៈកម្មការវប្បធម៌ បរិស្ថាន និងអប់រំកីឡា បានថ្លែង នៅក្រោយកិច្ចប្រជុំនោះថា៖ «ឯកឧត្តមរដ្ឋមន្ត្រី ថោង ខុន បានដឹកនាំការរៀបចំការងាររបស់គណៈកម្មការវប្បធម៌ បរិស្ថាន និងអប់រំកីឡាដោយផ្តោតលើយុទ្ធនាការកីឡារស់ក្នុងសន្ដិភាព, ប្រជាជនម្នាក់លេងកីឡាមួយមុខក្នុងមួយជីវិត, កម្ពុជាស្អាតបដិសណ្ឋារកិច្ចល្អ, កាត់បន្ថយគ្រោះថ្នាក់ចរាចរណ៍ និងកាត់បន្ថយគ្រឿងញៀនដែលចំណុចទាំងអស់ហ្នឹងយើងត្រូវបញ្ជ្រាបព័ត៌មានទៅដល់ប្រជាពលរដ្ឋទូទៅឱ្យគាត់បានយល់ដឹងអំពីការរៀបចំព្រឹត្តិការណ៍ស៊ីហ្គេមឆ្នាំ ២០២៣»។
លោកបានបន្ដថា ប្រជាពលរដ្ឋទាំងអស់ ត្រូវចូលរួមនូវយុទ្ធនាការប្រជាជនម្នាក់លេងកីឡា ១ ប្រភេទ កម្ពុជាស្អាត កម្ពុជាបៃតង គឺមានន័យថា ពួកគាត់ត្រូវចូលរួមរៀបចំអនាម័យបរិស្ថាន ជាពិសេសផ្ទះសម្តែងរបស់ខ្លួនឱ្យបានស្អាតល្អ ដើម្បីត្រៀមទទួលបដិសណ្ឋារកិច្ចទាំងការរៀបចំម្ហូបអាហារ ការបណ្តុះបណ្តាលសេវាកម្មឱ្យបានល្អប្រសើរ។
លោកបានបញ្ជាក់ថា៖ «ជាមួយគ្នានេះយើងត្រូវអប់រំប្រជាពលរដ្ឋផងដែរពាក់ព័ន្ធទៅនឹងការកាត់បន្ថយគ្រោះថ្នាក់ចរាចរណ៍ និងការកាត់បន្ថយគ្រឿងញៀនដោយយើងត្រូវរួមចំណែកក្នុងការផ្សព្វផ្សាយទៅលើការងារទាំងនេះ»។
សម្រាប់ការផ្សព្វផ្សាយអំពីយុទ្ធនាការកីឡាទាំង ៥ នេះ CAMSOC ដោយមានលោកឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ទៀ បាញ់ ជាប្រធាន បានផ្តោតខ្លាំងទៅលើខេត្តសៀមរាប ព្រះសីហនុ កំពត និងកែប ជាពិសេសរាជធានីភ្នំពេញដែលជាកន្លែងរៀបចំព្រឹត្តិការណ៍កីឡាស៊ីហ្គេម ឆ្នាំ ២០២៣ ធំជាងគេ។
រដ្ឋលេខាធិការក្រសួងទេសចរណ៍លោក តុប សុភ័ក បានថ្លែងថា៖ «គណៈកម្មការរបស់យើងបានពិភាក្សាជាមួយឯកឧត្តម វ៉ាត់ ចំរើន រួចហើយ ក្នុងការរៀបចំបំផ្ទុះព្រឹត្តិការណ៍ឆ្ពោះទៅស៊ីហ្គេមឆ្នាំ ២០២៣ ទៅតាមគោលដៅធំៗជាពិសេសនៅគ្រប់ខណ្ឌទាំងអស់ក្នុងរាជធានីភ្នំពេញ ព្រោះនៅភ្នំពេញជាកន្លែងយើងរៀបចំព្រឹត្តិការណ៍នេះធំជាងគេ អ៊ីចឹងនៅគ្រប់គោលដៅខណ្ឌទាំងអស់ត្រូវតែស្អាត»។
លោកបានបន្ថែមថា ភាពស្អាតនេះ ជាចំណុចទាក់ទាញមុនគេបង្អស់ដោយធ្វើម៉េចឱ្យអនាម័យបរិស្ថានស្អាត និងសណ្តាប់ធ្នាប់ល្អ ហើយការងារនេះ CAMSOC ត្រូវធ្វើជាមួយអាជ្ញាធរដែនដីនៅថ្នាក់ក្រោមជាតិ។ ជាមួយគ្នានេះខេត្តសៀមរាប ព្រះសីហនុ កំពត និងខេត្តកែប ដែលមានការរៀបចំប្រភេទកីឡាមួយចំនួននៅស៊ីហ្គេមឆ្នាំ ២០២៣ ដែរនោះ ក៏ត្រូវជំរុញយុទ្ធនាការនេះ ទៅតាមគោលដៅធំៗផងដែរ។
នៅក្នុងកិច្ចប្រជុំនោះ លោក ថោង ខុន ដែលជាប្រធានគណៈកម្មាធិការជាតិអូឡាំពិកកម្ពុជាផងដែរនោះបានប្រាប់ទៅគណៈកម្មការវប្បធម៌ បរិស្ថាន និងអប់រំកីឡា ឱ្យយកចិត្តទុកលើការផ្សព្វផ្សាយតាមរយៈការរៀបចំឱ្យមានបទចម្រៀងសម្រាប់អបអរដល់ព្រឹត្តិការណ៍ស៊ីហ្គេម ដោយលោកបានបញ្ជាក់ថា ជារឿងសំខាន់ ដែលនឹងអាចជួយឱ្យប្រជាពលរដ្ឋកម្ពុជាយល់បានកាន់តែច្បាស់ពីដំណើរការធ្វើម្ចាស់ផ្ទះស៊ីហ្គេមរបស់កម្ពុជា។
ជុំវិញការងារនេះលោក តុប សុភ័ក បានបញ្ជាក់ថា៖ «ឯកឧត្តមរដ្ឋមន្ត្រីបានឱ្យគណៈកម្មការរបស់យើងយកចិត្តទុកដាក់ទៅលើការផ្សព្វផ្សាយអំពីបទចម្រៀងសម្រាប់អបអរដល់ស៊ីហ្គេម ព្រោះបទចម្រៀងវាមានសក្តានុពលដោយអាចជ្រួតជ្រាបទៅដល់់មហាជនទាំងអស់ ព្រោះពួកគាត់បានមើលទូរទស្សន៍ហើយឃើញបទចម្រៀងហ្នឹងគាត់នឹងបានដឹងកាន់តែច្បាស់ពីដំណើរការឆ្ពោះទៅធ្វើម្ចាស់ផ្ទះស៊ីហ្គេមរបស់កម្ពុជានៅឆ្នាំ ២០២៣»៕