ភ្នំពេញៈ ក្រសួង​អប់រំ​យុវជន និង​កីឡា​បាន​បង្ហាញ​ពី​សមិទ្ធ​ផល​ផ្នែក​កីឡា​ដែល​សម្រេច​បាន​ក្នុង​រយៈ​ពេល ​៥​ ឆ្នាំ​មក​នេះ ​ហើយ​បាន​អះអាង​ថា ​នឹង​បន្ត​អភិវឌ្ឍ​វិស័យ​កីឡា​ឱ្យ​កាន់​តែ​មាន​ភាព​រីក​ចម្រើន ​និង​ទទួល​បាន​ជោគ​ជ័យ​ថែម​ទៀត​ ដើម្បី​លើក​មុខ​មាត់​ជាតិ​នៅ​លើ​ឆាក​អន្តរ​ជាតិ​ ជាពិសេស​ក្នុង​ព្រឹត្តិការណ៍​ស៊ី​ហ្គេម​លើក​ទី​៣២ ឆ្នាំ​ ២០២៣ ដែល​កម្ពុជា​ត្រូវ​ធ្វើ​ជា​ម្ចាស់​ផ្ទះ​ជា​លើក​ដំបូង​។​

​អ្នក​នាំ​ពាក្យ​ក្រសួង​អប់រំ ​យុវជន និង​កីឡា លោក ​រស់ សុ​វាចា បាន​បង្ហាញ​ក្នុង​សន្និ​សីទ​កាសែត​ស្តីពី​សមិទ្ធ​ផល​សម្រេច​បាន​រយៈ​ពេល​៥​ឆ្នាំ​របស់​ក្រសួង​អប់រំ​លើវិស័យ​កីឡា​នៅ​ទីស្តី​ការគណៈ​រដ្ឋមន្ត្រី​កាលពី​ថ្ងៃទី ១៦ ​ខែសីហាថា លទ្ធ​ផល​នៃ​ការ​ប្រកួត​កីឡា​ជា​លក្ខណៈ​ជើង​ឯក ​និង​លក្ខណៈ​ហ្គេម​ពី​អន្តរ​ជាតិ​រយៈ​ពេល​ ៥ ​ឆ្នាំ​កន្លង​មក​ កម្ពុជា​ទទួល​បាន​មេ​ដាយ​សរុប​ចំនួន​ ៤៥២ ​ក្នុង​នោះ ​មេដាយ​មាស​ ១១២ ​ប្រាក់ ​១១៦​ និង​សំរឹទ្ធិ ​២២៤​។​

​ជា​មួយ​គ្នានេះ លោក ​រស់ សុ​វាចា បាន​ថ្លែង​ថា​៖ «​ក្រសួង​អប់រំ បាន​និង​កំពុង​បន្តធ្វើ​កំណែ​ទម្រង់​ស៊ី​ជម្រៅ​ការងារ​អប់រំ​កាយ ​និង​កីឡា ដោយ​ផ្តោត​លើ ​៤ ​ចំណុច​ ដើម្បី​លើក​កម្ពស់​វិស័យ​អប់រំ​កាយ និង​កីឡា​ឆ្ពោះ​ទៅ​ដណ្តើម​មេដាយ​ឱ្យ​បាន​ច្រើន ​និង​រៀបចំ​ធ្វើជា​ម្ចាស់​ផ្ទះ​នៃ​ការ​ប្រកួត​កីឡា​ស៊ី​ហ្គេម​លើក​ទី​៣២​ ឆ្នាំ​ ២០២៣ ​ឱ្យ​បាន​ល្អ និង​លើក​កិត្តិ​យស​ជាតិ​នៅ​លើ​ឆាក​អន្តរ​ជាតិ​»​។

​ចំពោះ​ការ​ធ្វើកំណែ​ទម្រង់​ស៊ី​ជម្រៅ​ទាំង​ ៤ ​ចំណុច​នេះ ​លោក ​សុ​វាចា ​បាន​បញ្ជាក់​ថា​៖ «​ក្រសួង​ជួស​ជុល​កែលម្អ និង​កសាង​ហេដ្ឋា​រចនា​សម្ព័ន្ធ​កីឡា​, ការ​បណ្តុះ​បណ្តាល​ធន​ធាន​មនុស្ស​សម្រាប់​ដណ្តើម​មេ​ដាយ ​និង​សម្រាប់​កាត់​សេចក្តី​ការ​ប្រកួត​, ការ​កែ​លម្អ​រចនា​សម្ព័ន្ធ​នៃ​ការ​ប្រកួត​កីឡា​គ្រប់​ប្រភេទ​ និង​គ្រប់​កម្រិត​ព្រម​ទាំងការ​ពង្រឹង​និង​ផ្តល់​ថវិកា​គាំទ្រ​ទៅ​សហ​ព័ន្ធ​កីឡា​ជាតិ​ចំនួន​ ៤២ និង​ការបង្កើន​ប្រាក់​រង្វាន់​ដល់​ជយ​លាភី​ប្រកួត​ជា​លក្ខណៈ​តំបន់​ និង​អន្តរ​ជាតិ​»​។

​អ្នក​នាំ​ពាក្យ​រូបនេះ​បាន​បន្តថា ជា​លទ្ធផល​ សហ​ព័ន្ធ​កីឡា​ជាតិ​ចំនួន​ ៤២​ បាន​ទទួល​ថវិកា​គាំទ្រ​និង​មាន​ភាព​រឹងមាំ ទាំង​ការ​ងារ​រដ្ឋ​បាល​គ្រប់​គ្រង និង​ការ​ប្រកួត ​ដើម្បី​ឈាន​ទៅ​រៀបចំ​ធ្វើ​ម្ចាស់ផ្ទះ​ជើង​ថ្នាក់​ជាតិ ​ជើងឯ​ក​ថ្នាក់​តំបន់ ជើង​ឯក​ថ្នាក់​ទ្វីប ​និង​ជើង​ឯក​ពិភព​លោក ​ព្រម​ទាំង​បាន​បង្កើត​ទីលាន​បាល់​ទាត់នៅ​តាម​វិទ្យា​ល័យ​ក្នុង​រាជ​ធានី ខេត្ត​ចំនួន​ ២៥ ​ដើម្បី​តម្រង់​ទិស​យុវ​ជន​ឱ្យ​ស្រឡាញ់ ​និង​ហាត់​កីឡា​បាល់​ទាត់​តាម​ស្តង់​ដា​បច្ចេក​ទេស​។​

​តាម​របាយ​ការណ៍​ស្តីពី​សមិទ្ធ​ផល​សម្រេច​បាន​រយៈ​ពេល​ ៥ ​ឆ្នាំ (២០១៨-​២០២២) ​នេះ ​បាន​ឱ្យដឹង​ទៀត​ថា ក្រសួង​បាន​ជំរុញ​និង​លើក​ទឹក​ចិត្ត​ដល់​ប្រជា​ជន​ឱ្យ​ចូលរួម​ហាត់​ប្រាណ ​លេង​កីឡា​ជា​ប្រចាំ​និង​បាន​រៀបចំ​សកម្ម​ភាព​អប់រំ​កាយ ​និង​កីឡា ក្នុង​និង​ក្រៅ​សាលា​រៀន​ ដើម្បី​សុខ​ភាព​និង​កាត់​បន្ថយ​ភាព​អសកម្ម​ផ្សេងៗ​ក្នុង​សង្គម ការ​រស់​នៅ​ប្រកប​ដោយ​ភាពស៊ី​វិល័យ សុខ​ដុម​នីយ​កម្ម​ក្នុង​សង្គម ក្រោម​ម្លប់​សន្តិ​ភាព​។

​ទន្ទឹម​នឹង​នេះ ​ក្រសួង​បាន​រៀប​ចំ​ការ​ប្រកួត​ជា​លក្ខណៈ​ហ្គេម​កម្រិត​ជាតិ ​សិស្ស​បឋម​សិក្សា ​សិស្ស​មធ្យម​សិក្សា និង​និស្សិត​មធ្យម​សិក្សា​បច្ចេក​ទេស ឧត្តម​សិក្សា​។ ក្រសួង​បាន​លើក​កម្ពស់​កីឡា​ប្រពៃ​ណី ល្បុក្កតោ ​គុន​ខ្មែរ និង​ការ​បង្កើត​តំបន់​ហាត់​ប្រាណ​អាស៊ាន​ដើម្បី​ផ្សព្វ​ផ្សាយ​កីឡា​ប្រពៃ​ណី ​ក្នុង​ពេល​កម្ពុជា​ធ្វើជា​ម្ចាស់​ផ្ទះ​អាស៊ាន​ ហើយ​ក្រសួង​បាន​រៀប​ចំ​ប្រកួត​កីឡា​ជាតិ​បាន​៣​ដង ​ដោយ​មាន​ការ​ចូលរួម​ពី​សហ​ព័ន្ធ​កីឡា​ជាតិ គណៈ​កម្មាធិ​ការ​ជាតិ​អូឡាំ​ពិក​កម្ពុជា​និង​ក្រសួង​-​ស្ថាប័ន​ពាក់​ព័ន្ធ ដើម្បី​ឆ្ពោះទៅ​ធ្វើជា​ម្ចាស់​ផ្ទះ​ស៊ី​ហ្គេម ឆ្នាំ​ ២០២៣​។​

​ជា​មួយ​គ្នា​នេះ​ ក្រសួង​អប់រំ​បាន​ដាក់​ទិស​ដៅ​ក្នុង​ការបន្ត​អភិវឌ្ឍ​វិស័យ​កីឡា ដោយ​ផ្តោត​លើ​វិធាន​ការ​ចំនួន​ ៣ គឺ​ទី​១- ការ​បន្ត​លើក​កម្ពស់​វិស័យ​កីឡាជា​វិស័យ​អាទិ​ភាព​មួយ​របស់​ជាតិ​ ដើម្បី​កសាង​ធនធាន​មនុស្ស​ឱ្យមាន​សុខ​ភាព និង​សុខុ​មាល​ភាព​ល្អ​, កាយ​សម្បទា​មាំមួន​, ឆន្ទៈ​មោះមុត​, អំណត់​ព្យាយាម​, មាន​វិន័យ​, មាន​ស្មារតី​ក្រុម​, គំនិត​ច្នៃ​ប្រឌិត ​និង​មាន​ជីវភាព​រស់នៅ​ប្រកប​ដោយ​សុខ​ដុម​រមនា​ក្នុង​សង្គម ​ក្រោម​ម្លប់​សន្តិភាព ​ស្រប​តាម​ពាក្យ​ស្លោក «​កីឡា​រស់​នៅ​ក្នុង​សន្តិភាព​»​។​

​ទី​២- ជំរុញ​ការ​អនុវត្ត​កំណែ​ទម្រង់​ស៊ី​ជម្រៅ​វិស័យ​អប់រំ ​និង​កីឡា ​តាម​រយៈ​ការ​ពង្រឹង​ការគ្រប់​គ្រង​វិស័យ​អប់រំ​កាយ និង​កីឡា​, ការ​ពង្រឹង​យន្តការ​ដែល​មាន​ស្រាប់​ ដើម្បី​អភិវឌ្ឍ​វិស័យ​កីឡា​អប់រំ​កាយ ​និង​កីឡា​ទាំង​ការ​អភិវឌ្ឍ​ហេដ្ឋា​រចនា​សម្ព័ន្ធ​កីឡា ការ​បណ្តុះ​បណ្តាល​ធន​ធាន​មនុស្ស និង​ការ​លើក​ទឹក​ចិត្ត ​ដែលជា​កត្តា​ចម្បង​ក្នុង​ការ​បង្កើន​ប្រសិទ្ធ​ភាព និង​គុណ​ភាព​នៃ​ការ​ត្រៀម​ខ្លួន​របស់​អត្ត​ព​លិ​ក​ និង​ការ​ពង្រឹង​គុណ​ភាព​នៃ​ការ​ប្រកួត​គ្រប់​កម្រិត តាម​រយៈ​ការ​ពង្រឹង​សហ​ព័ន្ធ​កីឡា​ជាតិ ​ការ​ពង្រឹង​ការអនុវត្ត​កម្មវិធី​អប់រំ​កាយនិង​កីឡា ​ក្នុង​ម៉ោង​សិក្សា ​និង​ក្រៅ​ម៉ោង​សិក្សា​។​

​ចំណែក​វិធានការ​ ទី​៣- គឺ​ជំរុញ​ការ​លើក​ទឹក​ចិត្ត និង​បណ្តុះ​វប្បធម៌​អប់រំ​កាយ ​និង​កីឡា​ដល់​ប្រជា​ជន​ ដើម្បី​បង្កើន​ការ​យល់​ដឹង​ពី​សារៈ​សំខាន់​នៃ​ការ​ហាត់​ប្រាណ ​និង​លេង​កីឡា​ជាប្រចាំ​ ដើម្បី​សុខ​ភាព​, ផ្សារ​ភ្ជាប់​ទៅនឹង​កិច្ច​ការ​សង្គម​ វប្បធម៌ បន្ត​ឈាន​ទៅ​ចូល​រួម​លុប​បំបាត់​ភាព​អសកម្ម​ក្នុង​សង្គម​ ដើម្បី​ឱ្យ​ប្រជា​ជន​រស់នៅ​ប្រកប​ដោយ​សុខ​ភាព​ល្អ និង​សុខ​ដុម​នីយកម្ម​ក្នុង​សង្គម​៕