.jpg)
លោក វ៉ាត់ ចំរើន ពេលចូលរួមក្នុងកិច្ចប្រជុំក្របខ័ណ្ឌលេខាធិការដ្ឋាននៃសហព័ន្ធកីឡាអាស៊ីអាគ្នេយ៍ នៅទីក្រុងបាងកក កាលពីថ្ងៃទី ១៦ សីហា។ រូបថត សហការី
ភ្នំពេញៈ មន្រ្តីជំនាញរបស់គណៈកម្មាធិការជាតិរៀបចំការប្រកួតកីឡា អាស៊ីអាគ្នេយ៍លើកទី៣២ ឆ្នាំ ២០២៣ (CAMSOC) លោក វ៉ាត់ ចំរើន បានអះអាងថា កម្ពុជា ទទួលបានជោគជ័យបន្ថែមទៀត ទៅលើការកំណត់វិញ្ញាសា ដែលត្រូវបានដាក់ឱ្យ ប្រកួតក្នុងស៊ីហ្គេម ឆ្នាំ ២០២៣ ហើយការលក់សិទ្ធិទូរទស្សន៍ ក៏កម្ពុជាទទួលបានការគាំទ្របន្ថែមពីតំណាងប្រទេសទាំងអស់នៅអាស៊ានផងដែរ។
ក្នុងនាមជាប្រធានប្រតិភូកម្ពុជា ដែលបានទៅចូលរួមក្នុងកិច្ចប្រជុំក្របខ័ណ្ឌលេខាធិការដ្ឋាននៃសហព័ន្ធកីឡាអាស៊ីអាគ្នេយ៍ នៅទីក្រុងបាងកក ប្រទេសថៃ កាលពីថ្ងៃទី ១៦ ខែសីហា លោក វ៉ាត់ ចំរើន បានថ្លែងថា៖ «យើងបានបង្ហាញទៅគ្រប់ប្រទេស អំពីការត្រៀមប្រភេទវិញ្ញាសាជាង ៦០០ ហើយក្នុងវិញ្ញាសាទាំងអស់ហ្នឹង មានការជជែកវែកញែកគ្នា ដោយវិញ្ញាសាភាគច្រើន បានទទួលការគាំទ្រពីបណ្ដាប្រទេសទាំងអស់ គឺនៅមានវិញ្ញាសាតិចតួចទេ ដែលគេស្នើសុំឱ្យយើងមានការពិចារណាឡើងវិញ»។
អគ្គលេខាធិការ CAMSOC លោក វ៉ាត់ ចំរើន បានបន្ថែមថា៖ «ក្នុងនាមជាម្ចាស់ផ្ទះ យើងបានយកសំណូមពររបស់គេមកធ្វើការជាមួយសហព័ន្ធកីឡាជាតិមួយចំនួនរបស់យើងឡើងវិញ ហើយនេះជាអ្វីដែលយើងបានខិតខំប្រឹងប្រែង ដើម្បីធ្វើការតស៊ូមតិបន្ដ តែវឌ្ឍនភាពរបស់យើង បានដើរទៅមុខយ៉ាងរលូន ព្រោះយើងបានសុំឱ្យប្រទេសទាំងអស់ គាំទ្រកម្ពុជា និងជួយកម្ពុជា ឱ្យធ្វើការប្រកួតទទួលបានជោគជ័យ»។
ប្រទេសទាំងអស់ បានសន្យានឹងជួយដល់កម្ពុជា ដែលខិតខំប្រឹងប្រែង ក្នុងការធ្វើម្ចាស់ផ្ទះស៊ីហ្គេម លើកដំបូងនេះ ឱ្យបានជោគជ័យ ។
សម្រាប់វិញ្ញាសាជាង ៦០០ ដែលបានកំណត់នេះ គឺផ្តោតការប្រកួតប្រជែងនៅលើប្រភេទវិញ្ញាសាចំនួន ៣៩ និងកីឡាសម្ដែង ១ ប្រភេទ ដែលត្រូវបានសម្រេចដាក់ក្នុងស៊ីហ្គេម ឆ្នាំ ២០២៣ ក្នុងនោះមានកីឡាអត្តពលកម្ម (Track&Field និង ម៉ារ៉ាតុង) កីឡាលើទឹក (ហែលទឹក, លោតទឹក និងបាល់ទឹក) វាយសី បាល់បោះ (៥×៥ និង ៣×៣) ប៊ីយ៉ាស្នូកឃ័រ ប្រដាល់សកល ប្រណាំងទូកប្រពៃណី អុក (អុកចត្រង្គ និងអុកចិន) គ្រីឃីត ទោចក្រយាន (កង់គួក និងកង់ភ្នំ) កីឡារាំ បាល់ទាត់ គុនដាវ កីឡាហែលទឹកជើងទា វាយកូនហ្គោល កាយសម្ព័ន្ធ (Aerobic and Artistic) ហុកគី (ក្នុងសាល និងក្រៅសាល)។
កីឡាយូដូ ការ៉ាតេ គុនខ្មែរ (មួយ) ប៉េតង់ ទូកក្ដោង សីដក់ (រួមបញ្ជូលសីឈិនឡូន) សូហ្វតិន្នីស វាយកូនឃ្លីលើតុ តេក្វាន់ដូ WT វាយកូនបាល់ ទ្រីយ៉ាត្លុង (អាគ័រត្លុង និងឌូអាត្លុង) កីឡាបាល់ទះ (ក្នុងសាល និងលើឆ្នេរខ្សាច់) លើកទម្ងន់ ចំបាប់ វ៉ូស៊ូ កាយវប្បកម្ម កីឡាអេឡិចត្រូនិក កីឡា Floorball ម៉ូតូទឹក កីឡាឧបសគ្គ និងយុទ្ធគុនចម្រុះ (គុនល្បុក្កតោ កីឡាគុនដំបងរបស់ហ្វីលីពីន(Arnis), ជឺជីតស៊ូ, ឃីកបុកសីង, យុទ្ធគុនចម្រុះកូរ៉េ ITF និងកីឡាវ៉ូវីណាម)។
នៅក្នុងកិច្ចប្រជុំក្របខ័ណ្ឌលេខាធិការដ្ឋាន នៃសហព័ន្ធកីឡាអាស៊ីអាគ្នេយ៍ នៅប្រទេសថៃ កាលពីថ្ងៃទី ១៦ ខែសីហានោះ អង្គប្រជុំរបស់អាស៊ាន ក៏បានពិភាក្សាបន្ថែមលើការរៀបចំឱ្យមានការលក់សិទ្ធិទូរទស្សន៍ ក្រោមគំនិតផ្ដួចផ្ដើមដំបូងគេរបស់កម្ពុជា នៅស៊ីហ្គេម ឆ្នាំ ២០២៣ ហើយគំនិតនេះទទួលបានការគាំទ្រពីប្រទេសជាសមាជិក ដោយគេបានចាត់ទុកថា ជារបត់ថ្មី ដើម្បីជាគំរូសម្រាប់ស៊ីហ្គេម ជាបន្តបន្ទាប់ទៀត។
ជុំវិញការងារនេះ លោក វ៉ាត់ ចំរើន បានបញ្ជាក់ថា៖ «ការរៀបចំឱ្យមានការលក់សិទ្ធិទូរទស្សន៍នេះ ត្រូវបានប្រទេសទាំងអស់ ចាត់ទុកថា ជារបត់នៃការផ្លាស់ប្ដូរមួយដ៏សំខាន់ ក្នុងប្រវត្តិសាស្ត្ររបស់ស៊ីហ្គេម ព្រោះមានតែកម្ពុជាទេ ដែលអាចធ្វើជាគំរូ ក្នុងការលក់សិទ្ធិទូរទស្សន៍នេះ ដើម្បីឱ្យស៊ីហ្គេមបន្ដៗទៀត យកជាមេរៀន បទពិសោធ ទាំងការផលិតឱ្យមានគុណភាព និងការផ្ដល់នូវតម្លាភាព ក្នុងការចែករំលែកភាគលាភ នៃការលក់សិទ្ធិទូរទស្សន៍ ចំពោះស៊ីហ្គេមនៅកម្ពុជានេះ»។
លោក វ៉ាត់ ចំរើន ដែលជាអគ្គលេខាធិការគណៈកម្មាធិការជាតិអូឡាំពិកកម្ពុជា ផងនោះ បានធ្វើការវាយតម្លៃជារួម ចំពោះលទ្ធផលទទួលបាន នៅក្នុងអង្គប្រជុំសហព័ន្ធកីឡាអាស៊ីអាគ្នេយ៍ នៅប្រទេសថៃនោះថា៖ «ក្នុងនាមកម្ពុជាជាម្ចាស់ផ្ទះ យើងទទួលបានជោគជ័យក្នុងកិច្ចប្រជុំនេះ ដែលជាកិច្ចប្រជុំមួយ ទទួលបាននូវសុទិដ្ឋិនិយមច្រើន នៅក្នុងការលើកទឹកចិត្តឱ្យម្ចាស់ផ្ទះ រៀបចំទទួលបានជោគជ័យ សម្រាប់ស៊ីហ្គេម ឆ្នាំ ២០២៣»៕
