The Phnom Penh Post Search

Search form




Logo of Phnom Penh Post newspaper Phnom Penh Post - ក្រុម​វ៉ូវីណាម ប្តេជ្ញា​រួមគ្នាដណ្តើម​យក​​មេដាយ​មាស​ជូន​កម្ពុជានៅស៊ី​ហ្គេម ឆ្នាំ​ ២០២៣

ក្រុម​វ៉ូវីណាម ប្តេជ្ញា​រួមគ្នាដណ្តើម​យក​​មេដាយ​មាស​ជូន​កម្ពុជានៅស៊ី​ហ្គេម ឆ្នាំ​ ២០២៣

Content image - Phnom Penh Post
ការប្រកួតកីឡាវ៉ូវី​ណាម ​ជ្រើសរើសជើងឯកថ្នាក់ជាតិ កាលពីថ្ងៃទី ១៩ កញ្ញា។ ឈន ណន

ក្រុម​វ៉ូវីណាម ប្តេជ្ញា​រួមគ្នាដណ្តើម​យក​​មេដាយ​មាស​ជូន​កម្ពុជានៅស៊ី​ហ្គេម ឆ្នាំ​ ២០២៣

ភ្នំពេញៈ ប្រធាន​សហព័ន្ធ​កីឡាវ៉ូវី​ណាម​កម្ពុជា លោក​ អ៊ូ រតនា បាន​បញ្ជាក់​ជា​ថ្មី​ថា ក្រុមវ៉ូវីណាម​កម្ពុជា បាន​និង​កំពុង​បន្តខិតខំ​បណ្តុះ​បណ្តាល​ធន​ធាន​មនុស្ស ដើម្បី​ឈាន​ទៅ​ទទួល​បាន​ជោគ​ជ័យកាន់​តែ​ធំ គឺ​ការ​ដណ្តើម​យកមេដាយ​មាស​ឱ្យបាន​កាន់តែ​ច្រើន ​នៅពេល​កម្ពុជា​ធ្វើ​ជាម្ចាស់​ផ្ទះ​ស៊ីហ្គេម ជា​ប្រវត្តិ​សាស្រ្ត​លើក​ដំបូង នៅ​ឆ្នាំ​ ២០២៣។

ការ​ដណ្តើម​បាន​មេដាយ​មាស​ ៣ ប្រាក់​ ២ និង​សំរឹទ្ធ​ចំនួន​ ៩ ពីការ​ប្រកួត​ស៊ីហ្គេម ​លើក​ទី​៣១ ឆ្នាំ​ ២០២១ នៅទី​ក្រុងហា​ណូយ ប្រទេស​វៀត​ណាម កាលពី​ខែ​ឧសភា ឆ្នាំ​ ២០២២​ ត្រូវ​បាន​លោក អ៊ូ រតនា ចាត់ទុក​ថា ជាការ​សម្រេច​បាន​នូវ​សមិទ្ធ​ផល​ដ៏​រីករាយ របស់​ក្រុម​វ៉ូវីណាម​កម្ពុជា ជូន​ទៅ​ដល់​ប្រជាជន​កម្ពុជា ប្រមាណ​ ១៧​ លាន​នាក់​។

តែ​ទោះ​បីជា​យ៉ាង​ណា លោក អ៊ូ រតនា បាន​និយាយ​ថា៖​ «សហព័ន្ធ​កីឡាវ៉ូវី​ណាម​កម្ពុជា បាន​និង​កំពុង​បន្ត​ខិតខំ​បណ្តុះ​បណ្តាល​ធនធាន​កីឡាករ កីឡា​ការិនី ទាំង​ក្រុម​ឈុត​ស៊ីហ្គេម ព្រម​ទាំង​កីឡា​ករ កីឡាការិនី​ថ្នាល​វ័យក្មេង​របស់​យើង នៅ​តាម​បណ្តា​ក្លិប សមាគម រាជ​ធានី-ខេត្ត ដើម្បី​​​ត្រៀម​លក្ខណៈ​ចូល​រួម​ការ​ប្រកួត​នានា ទាំងថ្នាក់​ជាតិ និងអន្តរជាតិ។ ចំណែក​ស៊ីហ្គេមនៅ​កម្ពុជា គឺ​គិត​ត្រឹម​ថ្ងៃ​នេះ យើង​នៅ​សល់​ពេល​ត្រឹម ​២២៧ ​ថ្ងៃ​ទៀត​ប៉ុណ្ណោះ»។

យ៉ាង​ណា​មិញ ​តាម​រយៈការ​ប្រកួត​កីឡា​វ៉ូវីណាម​ជ្រើស​រើស​ជើងឯក​ថ្នាក់​ជាតិ ឆ្នាំ​ ២០២២ នៅ​​សាកល​វិទ្យា​ល័យ​ភូមិន្ទ​ភ្នំ​ពេញ កាល​ពី​ព្រឹក​ថ្ងៃ​ទី​ ១៩ ខែកញ្ញា​ លោក អ៊ូ រតនា បាន​អះអាង​ថា ជា​ការ​ប្រកួត​ដ៏សំខាន់ ដើម្បី​ផ្តល់​ឱកាស​ឱ្យកីឡាករ កីឡាការិនី បានអភិវឌ្ឍ និង​​បង្កើនសមត្ថភាព​របស់​ពួក​គេ​បន្ថែម​ទៀត ដើម្បីឈាន​ទៅរកការ​ឈ្នះ​បាន​មេដាយ​មាស នៅស៊ី​ហ្គេម ឆ្នាំ​ ២០២៣ ដោយ​សហព័ន្ធ​កីឡា​វ៉ូវីណាម​កម្ពុជា ត្រូវ​បាន CAMSOC ដាក់​សម្ទុះ​ដណ្តើម​មេ​ដាយមាស​ឱ្យបាន​ចំនួន​ ៩ ជូន​ជាតិ។

លោក អ៊ូ រតនា បាន​បញ្ជាក់ នៅក្នុង​ពិធីបិទ​ការ​ប្រកួត​ថ្នាក់ជាតិ​នេះ​ថា៖ «ក្រោម​ការ​ដឹកនាំ​ប្រកប​ដោយ​គតិបណ្ឌិត​របស់​សម្តេច​អគ្គមហា​សេនាបតី​តេជោ ហ៊ុន សែន គឺ​ប្រទេស​កម្ពុជា​បាន​ទទួល​សិទ្ធិ​ធ្វើជា​ម្ចាស់​ផ្ទះ កីឡា​ស៊ីហ្គេម លើក​ទី​៣២ ជា​ប្រវត្តិ​សាស្រ្ត​ ហើយ​មន្រ្តី គ្រូ​បង្វឹក កីឡាករ កីឡា​​ការិនី​នៃ​សហព័ន្ធ​កីឡា​វ៉ូវីណាម​កម្ពុជា នឹង​រួមគ្នា​ប្តេជ្ញា​ខិតខំ​រក​មេដាយ​មាស​ជូន​ជាតិ​​ឱ្យបាន ក្នុង​ព្រឹត្តិ​ការណ៍​កីឡា​ស៊ី​ហ្គេម ឆ្នាំ​ ២០២៣»។

តាម​របាយ​ការណ៍​របស់​លោក យ៉ាំ ថៃសាន អគ្គ​លេខាធិការ​សហព័ន្ធ​កីឡាវ៉ូវី​ណាម​កម្ពុជាបាន​ឱ្យ​ដឹងថា​ ការ​ប្រកួតកីឡា​វ៉ូវីណាម​ជ្រើស​រើស​ជើងឯក​ថ្នាក់ជាតិ ឆ្នាំ​ ២០២២​ មានកីឡាករ​ ៥៨​ នាក់ កីឡា​ការិនី ​២៤ ​នាក់ មកពី​ក្លិប​ចំនួន ​៨ នៅ​ទូទាំង​ប្រទេស​កម្ពុជា បាន​ចូលរួម​ ដោយ​ពួក​គេត្រូវ​ប្រកួត​ប្រជែង​គ្នាលើ​វិញ្ញាសា​សរុប​ចំនួន ​១៩ គឺ​សម្តែង​មេគុន​ចំនួន​ ១២ និង​ប្រយុទ្ធ ចំនួន​ ៧។

ជា​លទ្ធផល​នៃ​ការ​ប្រកួតចំនួន​៣​ថ្ងៃ​នោះ ​ក្រុម​កីឡាករ​កីឡាការិនី​របស់​ក្រសួង​ការពារ​ជាតិ ឈរ​នៅ​លេខ​រៀងទី​១ ដោយ​ដណ្តើម​បាន​មេដាយ​មាស ​៩ ប្រាក់ ​២ និង​សំរឹទ្ធ​ ៤ រីឯ​ក្លិប​កីឡា​វ៉ូវីណាម​​ខេត្ត​ស្វាយ​រៀង ឈរ​នៅ​លេខ​ ២ ដោយ​បានមេដាយ​មាស ​២ ប្រាក់​ ៣ សំរឹទ្ធ​ ១ និង​ក្លិប​ក្រសួង​មហា​ផ្ទៃ ឈរ​នៅលេខ​៣ ដោយ​បាន​មេដាយ​មាស ​២ ប្រាក់​ ២ និង​សំរឹទ្ធ​ ១ ចំណែក​ក្លិប​​ចំនួន​ ៥​ ទៀត ក៏ដណ្តើម​បាន​មេដាយ​មាស ប្រាក់ និង​សំរឹទ្ធ ពី​ការ​ប្រកួត​នេះ​ដូច​គ្នា។

ជាមួយ​លទ្ធផល​ដែល​ស្តែង​ចេញ​ពីការ​ប្រកួត​ប្រជែង​គ្នា​យ៉ាង​ស្វិត​ស្វាញ​រយៈពេល​៣ថ្ងៃ គឺ​ពី​ថ្ងៃ​ទី​ ១៧ ដល់​ថ្ងៃទី​ ១៩ ខែកញ្ញា​ លោក យ៉ាំ ថៃ​សាន បាន​អះអាង​ថា មាន​កីឡាករ ​កីឡា​ការិ​នី​​​ថ្មីៗ​ជា​ច្រើន​រូប មាន​សមត្ថ​ភាព និង​បច្ចេក​ទេស​ល្អ ដែល​អាច​ដាក់ឱ្យ​ប្រកួត​ប្រជែង ក្នុងការ​ប្រកួត​អន្តរ​ជាតិ ជាពិសេស​ស៊ី​ហ្គេម ឆ្នាំ​ ២០២៣ នៅ​កម្ពុជា បាន។

លោក​បានប​ញ្ជាក់​ថា៖ «សហព័ន្ធ​សម្លឹង​ឃើញ​កីឡាករ កីឡាការិនី​ថ្មីៗ ដែល​មាន​​បច្ចេក​ទេស​ ទេព​កោស​ល្យ និង​មាន​សមត្ថ​ភាព​ខ្ពស់ មាន​ស្មារតី​អង់អាច​ក្លាយ​ហាន ដែលអាច​ប្រកួត​ប្រជែង នៅ​ក្នុង​កម្រិត​ជាតិ និង​អន្តរជាតិ​បាន។ ចំណែក​ចៅក្រម អាជ្ញាកណ្តាល មន្រ្តី​បច្ចេក​ទេស​​រៀបចំ​ការ​ប្រកួត ពិត​ជាមាន​សមត្ថ​ភាព​គ្រប់​គ្រាន់ ក្នុងការ​រៀបចំ​ការ​ប្រកួត​នានា ជាពិសេស​​ការ​​ប្រកួត​កីឡា​ជាតិ លើក​ទី​៣ នៅខែ​វិច្ឆិកា ឆ្នាំ​២០២២ និង​ស៊ីហ្គេម លើក​ទី​៣២ ឆ្នាំ​២០២៣»។

ជាមួយ​គ្នា​នេះ លោក​ប៊ូ ជុំសេរី អនុរដ្ឋ​លេខាធិការ​ក្រសួង​អប់រំ យុវជន និង​កីឡា ក៏បាន​វាយ​តម្លៃ​ខ្ពស់ ទៅ​លើភាព​រីក​ចម្រើន របស់​ក្រុម​កីឡាករ កីឡាកា​រិនី​វ៉ូវីណាម ផង​ដែរ។ «ក្នុង​នាម​ឱ្យក្រសួង​អប់រំ និង​ខ្លួន​ខ្ញុំ​ផ្ទាល់ ខ្ញុំសូម​វាយ​តម្លៃ​ខ្ពស់​ ចំពោះ​ការ​ខិតខំ​ប្រឹង​ប្រែង​របស់​សហព័ន្ធ​កីឡា​វ៉ូវីណាម​កម្ពុជា ក្នុង​ការ​អភិវឌ្ឍ​កីឡា​នេះឱ្យមាន​ការ​រីក​ចម្រើន និង​ទទួល​បានជោគ​ជ័យ​ នៅ​ក្នុងការ​ប្រកួត​ប្រជែង​»។

លោក ប៊ូ ជុំសេរី បាន​បន្ថែម​ថា៖ ​«ចំណែក​ការ​ប្រកួត​ថ្នាក់ជាតិ​នេះ ជាបទ​ពិសោធ​មួយ​ដ៏​ថ្លៃ​ថ្លា ដែល​អនុញ្ញាត​ឱ្យគណៈ​កម្មការ​រៀបចំការ​ប្រកួត បាន​ដក​ស្រង់​នូវ​បទពិ​សោធ ដើម្បី​ត្រៀម​លក្ខណៈ ធ្វើ​យ៉ាង​ណា​ឱ្យការ​ប្រកួត​ស៊ីហ្គេម ប្រព្រឹត្ត​ទៅបាន​ល្អ​ប្រសើរ ហើយ​វា​ជា​ឱកាស​មួយ​ទៀត ​​សម្រាប់​កីឡាករ កីឡា​ការិនី​បាន​បញ្ចេញ​សមត្ថ​ភាព ធ្វើ​យ៉ាង​ណា​រក​ឱ្យ​ឃើញ កីឡាករ កីឡា​ការិនី​ឆ្នើម​ អាច​មាន​សមត្ថ​ភាព ដណ្តើម​យក​ជ័យ​ជម្នះ នៅស៊ី​ហ្គេម ឆ្នាំ​ ២០២៣»៕

អត្ថបទគួរចាប់អារម្មណ៍