The Phnom Penh Post Search

Search form




Logo of Phnom Penh Post newspaper Phnom Penh Post - ក្រុមជប៉ុន បញ្ជាក់ពីជំហររកឱ្យ​ឃើញ​ការ​ឈ្នះ​ តែកម្ពុជាក៏តាំងចិត្ត​ប្រជែងរក​​ជ័យ ទោះដឹង​ថា មាន​ការលំបាក

ក្រុមជប៉ុន បញ្ជាក់ពីជំហររកឱ្យ​ឃើញ​ការ​ឈ្នះ​ តែកម្ពុជាក៏តាំងចិត្ត​ប្រជែងរក​​ជ័យ ទោះដឹង​ថា មាន​ការលំបាក

Content image - Phnom Penh Post
លោក Lee Wooyoung គ្រូ​បង្វឹក​ក្រុម U23 ជប៉ុន (ឆ្វេង) បានចាប់ដៃស្វាគមន៍​គ្រូ​បង្គោល​ក្រុម​ជម្រើសជាតិកម្ពុជា លោក Ryu Hiros នៅ​ក្នុង​សន្និសីទកាសែត។ រូប​ថត FFC

ក្រុមជប៉ុន បញ្ជាក់ពីជំហររកឱ្យ​ឃើញ​ការ​ឈ្នះ​ តែកម្ពុជាក៏តាំងចិត្ត​ប្រជែងរក​​ជ័យ ទោះដឹង​ថា មាន​ការលំបាក

ភ្នំពេញ៖ ក្រុម​ជម្រើសជាតិកម្ពុជា​អាយុ​ក្រោម ​២៣​ ឆ្នាំ នឹង​បើក​ទ្វារពហុកីឡដ្ឋានជាតិ​មរតកតេជោ ដើម្បី​​ប្រកួតមិត្ត​ភា​ពអន្តរជាតិជាមួយក្រុម U23 ជម្រើសជាតិជប៉ុន នា​យប់ម៉ោង ​៧ ថ្ងៃ​អង្គារ​នេះ ហើយ​សម្រាប់ជំនួបនេះ គ្រូ​បង្វឹក​របស់​ក្រុមទាំង​ ២ សុទ្ធតែ​បាន​ជំរុញ​កូន​ក្រុម​ ឱ្យ​លេងអស់ពីលទ្ធភាព​រៀងៗ​ខ្លួន ដោយ​ផ្តោត​ទៅលើការ​ពង្រឹង​សមត្ថ​ភាព និងបច្ចេកទេស សម្រាប់​ត្រៀមការ​ប្រកួតនៅចំពោះមុខ​ដូចគ្នា។​

សម្រាប់​ក្រុម​ U23 ជម្រើសជាតិកម្ពុជា បាន​ចាត់ទុកការ​ប្រកួត​មិត្តភាព​អន្តរជាតិនេះ ថាជាពេលវេលា​ដ៏សំខាន់ ដើម្បីដក​ស្រង់​បាននូវ​បច្ចេក​ទេសថ្មីៗ​បន្ថែម​ទៀត ក៏ដូចជាតេស្ត​នៅទម្រង់លេងរបស់​ក្រុមទាំង​មូល សម្រាប់​ត្រៀម​ខ្លួនទៅកាន់ការ​ប្រកួត​ស៊ីហ្គេម លើកទី​៣២ ឆ្នាំ ​២០២៣ ដែល​កម្ពុជា ត្រូវ​ធ្វើជា​ម្ចាស់​ផ្ទះ។

លោក ភា សុភ័ក្ត្រា គ្រូ​ជំនួយ​ក្រុមជម្រើសជាតិកម្ពុជា បាន​ប្រាប់ ​ភ្នំពេញ ​ប៉ុស្តិ៍​​ថា៖​ «ថ្វីបើនេះជា​​ការ​ប្រកួត​មិត្តភាព ប៉ុន្តែ​យើងត្រូវជួប​ជាមួយក្រុមជប៉ុន ដែល​មាន​កម្រិតខ្ពស់មួយ​ ហើយពួកគាត់ទាំង​នោះ នឹងត្រូវ​ចូល​លេង នៅលីគកំពូល​ជប៉ុន អ៊ីចឹងវាជាឱកាស​ល្អមួយ ដើម្បី​យើងអាច​ត្រួត​ពិ​និត្យ​មើល​ទៅលើ​សមត្ថ​ភាព​កីឡា ហើយយើងក៏​ចង់​ដឹង​ដែរ​ថា តើ​​ការ​រៀបចំប្រព័ន្ធ​លេង​របស់​យើង វាសមប្រកបបែបណា ជាមួយ​​គុណភាព​​កីឡាករ​របស់យើង»។

ជាមួយគ្នានេះ លោក Ryu Hiros គ្រូ​បង្គោល​ក្រុម​ជម្រើសជាតិកម្ពុជា បានអះអាង នៅ​ក្នុង​​សន្និសីទកាសែត កាលពី​ថ្ងៃចន្ទ​​ថា ការ​ប្រកួត​មិត្ត​ភាព​​នេះ មិនមែន​ជា​ការ​​ងាយស្រួលនោះ​ទេ ព្រោះ​លោក បាន​មើល​ឃើញ​ថា ក្រុម U23 ជប៉ុន ដែលបាន​ធ្វើ​ដំណើរ​មក​ប្រកួតនេះ មានសមត្ថ​ភាព និងកម្រិត​លេងខ្ពស់ បើទោះបីជា​​ពួកគេ​​ភាគ​ច្រើន ជាកីឡាករ​​លេង​នៅតាម​សាកលវិទ្យាល័យ​​ក៏​ដោយ។

Content image - Phnom Penh Post
សកម្ម​ភាព​ហ្វឹកហាត់របស់​ក្រុមជម្រើសជាតិ​កម្ពុជា​អាយុក្រោម​ ២៣ ​ឆ្នាំ នៅពហុកីឡដ្ឋានជាតិមរតកតេជា។ រូប​ថត FFC

លោក​បាន​ថ្លែង​ នៅក្នុងសន្និសីទកាសែត កាលពី​ថ្ងៃចន្ទ​ថា៖ «ពិតណាស់ ក្រុម U23 ជប៉ុនមក​ប្រកួត នៅកម្ពុជា​​លើកនេះ គឺ​ភាគ​ច្រើន ជាកីឡាករ​មកពីសាកលវិទ្យាល័យ ប៉ុន្តែយើង​ត្រូវ​ដឹង​ថា ក្រុមបាល់ទាត់សាកលវិទ្យាល័យជប៉ុន គឺមានកម្រិតខ្ពស់ ហើយកីឡាករមួយចំនួនធំ កំពុងត្រៀមខ្លួនចូលលេង​ឱ្យ​ក្រុមលីគបាល់ទាត់ នៅជប៉ុន ដូច្នេះក្នុងក្រុមទាំងមូល យើងត្រូវតែផ្លាស់ប្ដូរការ​គិតរបស់យើង»។

គ្រូបង្វឹកជនជាតិជប៉ុន​វ័យ ​៦៦ ឆ្នាំ លោក Ryu Hiros បាន​បន្ថែម​ថា៖ «វានឹងមិនមែនជាការប្រកួតងាយស្រួល ដូចអ្វី​ដែលប្រជាជនកម្ពុជា រំពឹងទុក​នោះឡើយ អ៊ីចឹងយើងនឹងព្យាយាមឱ្យ​អស់ពីលទ្ធភាព ហើយ​នេះជាឱកាសដ៏ល្អ​ក្នុងការ​ប្រកួតប្រជែង ដើម្បី​ដឹង​ថា តើយើងធ្វើបានកម្រិតណាទល់នឹងក្រុមជប៉ុន ដែលស្ថិតនៅជំនាន់ដូចយើង អ៊ីចឹង​នេះជាការត្រៀមខ្លួន​ដ៏ល្អ សម្រាប់ការប្រកួតជាបន្ទាប់ទៀត»។

ចំណែក​លោក Lee Wooyoung គ្រូបង្វឹក​ក្រុម ​U23 ជប៉ុន បាន​ទទួលស្គាល់ថា កីឡាករជប៉ុន​ ដែលបាន​​ធ្វើ​ដំណើរ​មក​ប្រកួត នៅ​កម្ពុជា​លើកនេះ គឺភាគ​ច្រើន ពិតជា​មកពីក្រុម​មកពី​សាកលវិទ្យាល័យ មែន ប៉ុន្តែ លោក​បានអះអាង​ថា ពួកគេ​ជាកីឡាករ ដែលមានសក្ដានុពល ព្រោះ​ក្រោយការប្រកួតនេះចប់ ពួកគេភាគច្រើន នឹងចូលរួមជាមួយក្លិបអាជីព លីគកំពូល និងលីគទី២ នៅជប៉ុន។

Content image - Phnom Penh Post
ក្រុម ​U23 ជប៉ុន ពេល​ហ្វឹកហាត់កម្តៅ​សាច់ដុំ នៅកីឡដ្ឋាន RSN របស់​ភ្នំពេញ​ក្រោន។ រូប​ថត ភ្នំពេញក្រោន

លោក Lee Wooyoung ​បាន​ថ្លែង នៅក្នុងសន្និសីទកាសែត កាលពី​ថ្ងៃ​ចន្ទ​ថា៖​ ​«ទោះបីជាក្រុមរបស់យើង មិនមានកីឡាករអាជីពច្រើនក៏ដោយ ប៉ុន្តែ​នេះជាការប្រកួតមួយដ៏សំខាន់ ដែលពួក​យើងបាន​​ទន្ទឹង​រង់ចាំ​ជាយូរ​ណាស់​មក​ហើយ ហេតុ​នេះ​​ពួក​យើង​នឹង​ខំប្រឹងប្រែង​លេង​​ឱ្យបានល្អ​បំផុត ដើម្បី​ទទួលបាន​លទ្ធផល​ល្អ ជូន​អ្នកគាំ​ទ្រ​របស់ប្រទេស​ជប៉ុន គឺ​យើង​ចង់​ឈ្នះ​​ការ​​ប្រ​កួត​មួយនេះ»។

យ៉ាង​ណា​ក៏ដោយ ចំពោះ​ក្រុម U23 កម្ពុជា ក៏​ត្រូវបានជំរុញ​ឱ្យប្រកួត ដោយ​ផ្តោតសំខាន់ទៅលើការ​ស្វែង​រកជ័យជម្នះ​ដូចគ្នា ដើម្បីជា​ការ​ទទួលបាននៅកម្លាំង​ចិត្ត និងទំនុក​ចិត្ត កាន់តែ​ខ្លាំង សម្រាប់​​ត្រៀម​ខ្លួន ទៅកាន់ការ​ប្រកួត​ផ្សេងៗ​ទៀត ជាពិសេស​ស៊ីហ្គេម ឆ្នាំ​ ២០២៣ ព្រោះ​កីឡាករ​ទាំង​ ២២ នាក់ ដែលបានជាប់នៅក្នុងបញ្ជីឈ្មោះការ​ប្រកួត​មិត្តភាពលើក​​នេះ គឺ​ភាគ​ច្រើន នឹង​ទទួលបានឱកាស​ប្រកួត​តំណាងឱ្យ​ជាតិ នៅ​ស៊ីហ្គេម ខាងមុខ​នេះ។

លោក ភា សុភ័ក្ត្រា បានបញ្ជាក់​ថា៖ «ជាទូទៅ​រាល់ការប្រកួតទាំងអស់ យើងតែងតែ​ជំរុញ​ឱ្យ​កីឡាករ ត្រូវការ​ឈ្នះ​ដូចគ្នា ព្រោះ​នេះ វាពាក់ព័ន្ធ​ទៅនឹងកត្តា​ចិត្ត​សាស្រ្ត​ កត្តា​ផ្លូវចិត្ត​ អ៊ីចឹង​រាល់ការ​ប្រកួត​ យើងឱ្យពួកគេ ត្រូវតែ​ចង់​ឈ្នះ​ការ​ប្រកួត​ គ្រាន់តែការប្រកួត​ឥឡូវ​ គឺ​​ឱកាស​នៃ​ការស្វែង​រក​ជ័យជម្នះណា​មួយ វាមិនទាន់សម​ប្រកប​ដូច​អ្វី ដែល​យើងចង់​បាន»៕

អត្ថបទគួរចាប់អារម្មណ៍