.jpg)
លោក វ៉ាន់ ចំរើន ពេលថ្លែងទៅកាន់អ្នកសារព័ត៌មានកាលពីខែមុន ។ ឈន ណន
ភ្នំពេញៈ មហាសន្និបាតក្រុមប្រឹក្សាអូឡាំពិកអាស៊ី (OCA) លើកទី៤១ ដែលបានចាប់ផ្តើមនៅព្រឹកថ្ងៃទី ៤ ខែតុលា នឹងធ្វើឱ្យប្រទេសកម្ពុជាទទួលបានឱកាសក្នុងការបង្ហាញសក្ដានុពលក្នុងដំណាក់កាលអភិវឌ្ឍន៍។ បន្ថែមលើនេះមហាសន្និបាតនេះ ក៏ជាព្រឹត្តិការណ៍ដ៏សំខាន់សម្រាប់ការជជែកពិភាក្សាលើព្រឹត្តិការណ៍កីឡាអូឡាំពិកអាស៊ីដែលតែងតែធ្វើឡើងជារៀងរាល់ឆ្នាំផងដែរ។
ជុំវិញរឿងនេះលោក វ៉ាត់ ចំរើន អគ្គលេខាធិការគណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២ (CAMSOC) បានប្រាប់ថា មហាសន្និបាតនេះមានបណ្ដាប្រទេសជាច្រើននៅអាស៊ីបានចូលរួមហើយនេះជាការបង្ហាញនូវសក្ដានុពលរបស់ប្រទេសកម្ពុជានៅក្នុងដំណាក់កាលដែលកំពុងអភិវឌ្ឍ និងមានសន្តិភាព ដូច្នេះហើយទើបផ្ដល់ឱ្យកម្ពុជាធ្វើជាម្ចាស់ផ្ទះ។
លោក វ៉ាត់ ចំរើន លើកឡើងថា៖ «ការធ្វើជាម្ចាស់ផ្ទះនឹងផ្ដល់អត្ថប្រយោជន៍ឱ្យកម្ពុជាជាច្រើនដូចជាបណ្ដាប្រទេសដែលមកចូលរួម សុទ្ធតែជារដ្ឋមន្ត្រី និងជាសាច់ឈាមរាជវង្សានុវង្ស និងអ្នកមុខ អ្នកការនៅក្នុងវិស័យកីឡាជាតិរបស់គេ ក៏មកច្រើនដែរ។អ៊ីចឹងយើងឃើញថា ការមកដល់នេះមានជាង ៣០០ នាក់ ដែលមកចូលរួមក្នុងពិធីគឺបានផ្ដល់នូវការគាំទ្រកម្ពុជារបស់យើង នៅក្នុងដំណើរឆ្ពោះទៅកាន់ការអភិវឌ្ឍសេដ្ឋកិច្ចសង្គម»។
លើសពីនេះទៀតលោកថា ចំពោះកិច្ចប្រជុំនេះ គឺប្រជុំផ្ទៃក្នុងដែលទាក់ទងនឹងកីឡា ប៉ុន្តែមានការជួបប្រជុំជាលក្ខណៈអន្តរទ្វេភាគីរវាងរដ្ឋមន្ត្រីកីឡា និងប្រធានអូឡាំពិក ដែលបានពិភាក្សាគ្នារួមជាមួយរដ្ឋមន្ត្រីក្រសួងអប់រំនិងរដ្ឋមន្ត្រីក្រសួងពាណិជ្ជកម្មជាដើម ដើម្បីផ្លាស់ប្ដូរយោបល់ និងពង្រឹងការជួយគ្នាទៅវិញទៅមក។
លោកបន្ថែមថា៖ «កាលណាគេស្គាល់ប្រទេសយើង ដឹងពីយើងអ៊ីចឹង ទាំងនេះសុទ្ធជាផលចំណេញ រូបភាពនៃនយោបាយការទូត នយោបាយការបរទេស និងនយោបាយកីឡាដូច្នេះទទួលបានភាពល្អប្រសើរ»។
សូមបញ្ជាក់ថា ក្រុមប្រឹក្សាអូឡាំពិកអាស៊ី ត្រូវបានបង្កើតឡើងនៅថ្ងៃទី ១៦ ខែវិច្ឆិកា ឆ្នាំ ១៩៨២ នៅទីក្រុងញូវដែលីប្រទេសឥណ្ឌា។បច្ចុប្បន្នក្រុមប្រឹក្សានេះមានទីស្នាក់ការធំនៅប្រទេសកូវ៉ែតដឹកនាំដោយប្រធានស្ដីទី គឺលោក Raja Randhil Singh ជនជាតិឥណ្ឌា ក្រោយពីព្រះអង្គម្ចាស់ Sheikh Ahmad Al Fahad Al Sabah បានលាលែងពីតំណែងនៅឆ្នាំ ២០១៩។
ក្រុមប្រឹក្សាអូឡាំពិកអាស៊ី មានសមាជិកជាគណៈកម្មាធិការជាតិអូឡាំពិកចំនួន ៤៥ ប្រទេសក្នុងទ្វីបអាស៊ី ក្នុងនោះក៏មានគណៈកម្មាធិការជាតិអូឡាំពិកកម្ពុជាផងដែរ។ គណៈកម្មាធិការជាតិអូឡាំពិកកម្ពុជាបានចូលជាសមាជិកក្រុមប្រឹក្សាអូឡាំពិកអាស៊ី ឆ្នាំ ១៩៩៤៕
