ភ្នំពេញៈ លោកឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ទៀ បាញ់ បានចាត់ទុកការទទួលគ្រឿងឥស្សរិយយសថ្នាក់ខ្ពស់បំផុត «ខ្សែកមាស» របស់លោករដ្ឋមន្ត្រីក្រសួងទេសចរណ៍ ថោង ខុន ពីក្រុមប្រឹក្សាអូឡាំពិកអាស៊ី (OCA) ថា ជាកិត្តិយសដ៏ឧត្តុងឧត្តមសម្រាប់កម្ពុជា និងជាការផ្តល់កិត្តិយសដល់កីឡាករ កីឡាការិនី គ្រូបង្វឹក និងភាគីពាក់ព័ន្ធផ្សេងទៀត ដែលបានរួមគ្នាជំរុញការអភិវឌ្ឍវិស័យកីឡាជាតិ និងចលនាអូឡាំពិកនៅកម្ពុជា។
ប្រធានគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ ២០២៣ (CAMSOC) លោក ទៀ បាញ់ បានធ្វើការវាយតម្លៃខ្ពស់ និងបានចាត់ទុកការទទួលបានគ្រឿងឥស្សរិយយសថ្នាក់ខ្ពស់បំផុត «ខ្សែកមាស» របស់ប្រធានគណៈកម្មាធិការជាតិអូឡាំពិក (NOCC) លោក ថោង ខុន ថា វាមានអត្ថន័យជ្រាលជ្រៅជាប្រវត្តិសាស្ត្រ សម្រាប់វិស័យកីឡា នៅកម្ពុជា។
តាមលិខិតជូនពររបស់ខ្លួន លោក ទៀ បាញ់ បានលើកឡើងថា៖ «នៅក្នុងឱកាសដ៏ឧត្តុងឧត្តមប្រសើរថ្លៃថ្លា ប្រកបដោយក្តីសោមនស្សរីករាយ មានអត្ថន័យដ៏ជ្រាលជ្រៅជាប្រវត្តិសាស្ត្រនេះ ខ្ញុំសូមចូលរួមអបអរសាទរយ៉ាងក្លៀវក្លាចំពោះលោក ថោង ខុន រដ្ឋមន្ត្រីក្រសួងទេសចរណ៍ និងជាប្រធាន NOCC ទទួលបានគ្រឿងឥស្សរិយយសថ្នាក់ខ្ពស់បំផុត «ខ្សែកមាស» ពី OCA ដែលបានបង្ហាញពីកិច្ចខិតខំប្រឹងប្រែងរបស់ឯកឧត្តមបណ្ឌិត ក្នុងការជំរុញចលនាអូឡាំពិក ក៏ដូចជាចលនាអូឡាំពិកអន្តរជាតិ»។
សម្រាប់ការផ្តល់គ្រឿងឥស្សរិយយសថ្នាក់ខ្ពស់បំផុត «ខ្សែកមាស» ពីសំណាក់លោក Raja Randhir Singh ប្រធានស្តីទីអូឡាំពិកអាស៊ី ជូនទៅដល់លោក ថោង ខុន ត្រូវបានធ្វើឡើង ក្នុងពិធីបើកមហាសន្និបាត OCA នៅសណ្ឋាគារសុខា កាលថ្ងៃទី៤ ខែតុលា ក្រោមអធិបតីភាពរបស់លោកនាយករដ្ឋមន្ត្រី ហ៊ុន សែន ហើយមហាសន្និបាតនេះ ក៏មានឥស្សរជន និងថ្នាក់ដឹកនាំចលនាកីឡាអូឡាំពិកអាស៊ី និងអន្ដរជាតិប្រមាណ ៤០០ នាក់ មកពី ៥៥ប្រទេស ជុំវិញពិភពលោកបានចូលរួមផងដែរ។
លោក ទៀ បាញ់ បានបញ្ជាក់ថា៖ «ការទទួលបានគ្រឿងឥស្សរិយយសថ្នាក់ខ្ពស់បំផុត នេះ ជាកិត្តិយសដ៏ឧត្តុងឧត្តមសម្រាប់ប្រទេសកម្ពុជា និងជាការផ្តល់នូវកិត្តិយសដល់កីឡាករ កីឡាការិនី គ្រូបង្វឹក NOCC សហព័ន្ធកីឡាជាតិ ក្រសួងទេសចរណ៍ ក្រសួងអប់រំ យុវជន និងកីឡា និងអ្នកចូលរួមក្នុងចលនាអូឡាំពិកទាំងអស់ ដែលជាកម្លាំងចលករដ៏សំខាន់មួយ សម្រាប់ជំរុញការអភិវឌ្ឍវិស័យកីឡាជាតិ និងចលនាអូឡាំពិក នៅកម្ពុជា»។
ជាមួយគ្នានោះ លោក Raja Randhir Singh បានគាំទ្រដល់លោក ថោង ខុន ដែលបានខិតខំរៀបចំកិច្ចប្រជុំមហាសន្និបាត OCA នេះ បានល្អ ហើយលោកក៏អរគុណដល់លោក ហ៊ុន សែន ដែលជាអ្នកគាំទ្រចលនាអូឡាំពិកដ៏សំខាន់ជាងគេ នៅប្រទេសកម្ពុជា ស្របពេលកម្ពុជា ក៏នឹងត្រូវធ្វើម្ចាស់ផ្ទះ ការប្រកួតស៊ីហ្គេម-អាស៊ានប៉ារ៉ាហ្គេម ឆ្នាំ ២០២៣ និងការប្រកួតកីឡាអូឡាំពិកយុវជនអាស៊ី ឆ្នាំ ២០២៩ ផងដែរ។
ចំណែកលោក ថោង ខុន បានថ្លែង ក្រោយទទួលបានគ្រឿងឥស្សរិយយសថ្នាក់ខ្ពស់បំផុតនេះថា ខ្សែកមាសនេះ បានផ្ដល់កិត្តិយសយ៉ាងក្រៃលែងដល់កម្ពុជា ហើយជាមេដាយ សម្រាប់ការផ្ដល់កិត្តិយសដល់កីឡាករ កីឡាការិនី គ្រូបង្វឹក សហព័ន្ធកីឡាជាតិ ក្រសួងអប់រំ យុវជន និងកីឡា ព្រមទាំងអ្នកចូលរួមពីចលនាអូឡាំពិកទាំងអស់ ដែលបានគាំទ្រចលនាអូឡាំពិកនៅកម្ពុជា ហើយបានរួមគ្នា ធ្វើឱ្យវិស័យកីឡានៅកម្ពុជា មានការរីកចម្រើន និងរៀបចំព្រឹត្តិការណ៍ប្រកួតធំៗ។
លោក វ៉ាត់ ចំរើន អគ្គលេខាធិការ NOCC បានថ្លែងថា៖ «ឯកឧត្តមបណ្ឌិត ថោង ខុន បានទទួលនូវគ្រឿងឥស្សរិយយសថ្នាក់ខ្ពស់បំផុត «ខ្សែកមាស» ដែលផ្ដល់ដោយ OCA គឺបានផ្ដល់នូវកិត្តិយសជូនដល់ការលះបង់ផ្ទាល់របស់ឯកឧត្តម ចំពោះចលនាអូឡាំពិក ក៏ដូចជាកីឡា ដោយឯកឧត្តម ជាអ្នកកសាងនូវចលនាអូឡាំពិកកម្ពុជាបានរីកចម្រើន រហូតដល់ទទួលបានសិទ្ធិរៀបចំព្រឹត្តិការណ៍អន្ដរជាតិធំៗ គឺកីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ និងការប្រកួតកីឡាអូឡាំពិកយុវជនអាស៊ី ឆ្នាំ ២០២៩»៕