.jpg)
កីឡាករ អុង ភារាក់ (ឆ្វេង) ពេលហាត់សមជាមួយ ហ៊ុន គឹមហ៊ាង នៅក្នុងក្រុមជម្រើសជាតិប្រដាល់សកល។ រូបថត សហការី
ភ្នំពេញ៖ មន្រ្តីជំនាញរបស់សហព័ន្ធកីឡាប្រដាល់សកលកម្ពុជា លោក ប៊ុយ សុភ័ណ្ឌ បានលើកឡើងថា ព្រឹត្តិការណ៍ប្រកួតប្រដាល់សកលអាជីព ULTIMATE PRO BOXING ដែលនឹងចាប់ដំណើរការប្រកួតប្រចាំសប្តាហ៍ទី១ នៅថ្ងៃព្រហស្បតិ៍នេះ គឺដើម្បីវាស់ស្ទង់កម្រិតសមត្ថភាពកីឡាករជម្រើសជាតិកម្ពុជា ព្រមទាំងពង្រឹងដល់ការរៀបចំកម្មវិធីប្រកួត សម្រាប់ព្រឹត្តិការណ៍ស៊ីហ្គេម ឆ្នាំ ២០២៣ ដែលកម្ពុជាធ្វើជាម្ចាស់ផ្ទះ។
អគ្គលេខាធិការសហព័ន្ធកីឡាប្រដាល់សកលកម្ពុជា លោក ប៊ុយ សុភ័ណ្ឌ បាននិយាយថា៖ «សម្រាប់ទិសដៅ ដែលយើងរៀបចំឱ្យមានការប្រកួត ULTIMATE PRO BOXING នេះ គឺយើងផ្ដោតធ្វើយ៉ាងណាឱ្យកីឡាករ មានសកម្មភាពប្រកួត ដើម្បីដកស្រង់បច្ចេកទេសកម្រិតក្នុងប្រទេស មុនពេលពួកគាត់ ឈានទៅរកការប្រកួតលក្ខណៈអន្តរជាតិ ជាពិសេសការប្រកួតស៊ីហ្គេម លើកទី៣២ ឆ្នាំ ២០២៣ នៅប្រទេសកម្ពុជា ខាងមុខនេះ»។
សម្រាប់ការប្រកួតបើកឆាកចំនួន ៥ គូ នៅពហុកីឡដ្ឋានជាតិ ដែលនឹងចាប់ផ្តើមពីម៉ោង ៥ តទៅនោះ មានកីឡាករ កំពុងហ្វឹកហាត់ក្នុងក្រុមជម្រើសជាតិប្រដាល់សកលកម្ពុជា រហូតដល់៨នាក់ ហើយក្នុងនោះ ក៏មានវត្តមានអតីតម្ចាស់មេដាយប្រាក់ស៊ីហ្គេម វ៉ែន រដ្ឋា ផងដែរ ដោយពេលនេះ គេប្រើឈ្មោះផ្លូវការថា Remi Aleye។
ជើងខ្លាំង វ៉ែន រដ្ឋា ដែលដណ្តើមបានមេដាយប្រាក់ឱ្យកម្ពុជា ក្នុងការប្រកួតស៊ីហ្គេម កាលពីឆ្នាំ ២០១៥ នោះ នឹងត្រូវប្រកួតជាមួយអ្នកប្រដាល់ ពេញ វណ្ណថង ក្នុងទម្ងន់ ៦៧ គីឡូក្រាម ក្នុងលំដាប់គូឯក ដែលមាន ៥ ទឹកពេញ រីឯម្ចាស់មេដាយប្រាក់ស៊ីហ្គេម ឆ្នាំ ២០២២ អុង ភារាក់ ត្រូវជួបកីឡាករ Martin Chmielo ក្នុងទម្ងន់ ៨៥ គីឡូក្រាម ហើយជនជាតិប៉ូឡូញម្នាក់នេះ កំពុងហ្វឹកហាត់ នៅក្លិប KH គុនខ្មែរខេត្តកំពត។
ម្ចាស់មេដាយប្រាក់ វ៉ែន រដ្ឋា បានម៉ាត់ទៅលើផ្ទៃមុខកីឡាករឥណ្ឌូនេស៊ី ពេលប្រកួតស៊ីហ្គេម កាលឆ្នាំ ២០១៥។ រូបថត ភ្នំពេញប៉ុស្តិ៍
យ៉ាងណាមិញ សម្រាប់គូទី១ ដល់ទី៣ ជាការប្រកួតរវាងកីឡាករកម្ពុជា ដែលហ្វឹកហាត់ក្នុងជម្រើសជាតិប្រដាល់សកលកម្ពុជាជាមួយគ្នា ប៉ុន្តែលោក ប៊ុយ សុភ័ណ្ឌ បានអះអាងថា សហព័ន្ធបានចងក្រងក្បួនច្បាប់មួយចំនួន ដើម្បីឱ្យកីឡាករ ធ្វើយ៉ាងណា ប្រកួតអស់ពីសមត្ថភាព ចំណែកការប្រកួត ត្រូវបានប្តូរពីការប្រកួតមាន៣ទឹក មកប្រកួត ៤ ទឹកវិញ។
លោក ប៊ុយ សុភ័ណ្ឌ បានបញ្ជាក់ប្រាប់ ភ្នំពេញ ប៉ុស្តិ៍ នៅព្រឹកថ្ងៃព្រហស្បតិ៍នេះថា៖ «ឆ្នាំនេះ ប្លែកជាងឆ្នាំមុន ដោយយើងមានការប្រកួតចាប់ពី ៤ ទឹកឡើងទៅ ដោយល្ងាចនេះ ពីគូទី១ ដល់ទី៤ ត្រូវប្រកួត ៤ ទឹក ចំណែកគូឯកទី៥ ប្រកួត ៥ ទឹក ហើយចំពោះកីឡាករវាយមិនអស់សមត្ថភាព អាជ្ញាកណ្តាល នឹងមានការព្រមានដល់ ៣ ដង រួចបណ្តេញចុះទាំង២តែម្តង បើគាត់នៅតែមិនព្រមវ៉ៃ។ បន្ទាប់មក យើងអាចនឹងផ្អាកចាប់គូដល់ពួកគាត់ ឬមិនឱ្យគាត់ចេញទៅប្រកួតជាអន្តរជាតិនោះទេ បើរកឃើញថា គាត់ពិតជាមានចេតនា ប្រកួតមិនអស់សមត្ថភាព មែននោះ»។
យ៉ាងណាក៏ដោយ ការផ្តល់ឱកាសឱ្យក្រុមជម្រើសជាតិប្រដាល់សកលកម្ពុជា បានប្រកួតប្រជែងញឹកញាប់ ពិតជារឿងសំខាន់ ដោយលោក ប៊ុយ សុភ័ណ្ឌ បានបញ្ជាក់ថា ប្រភេទកីឡាប្រដាល់សកល គឺមិនមានឱកាសប្រកួតប្រចាំសប្ដាហ៍ នៅតាមស្ថានីយទូរទស្សន៍ ដូចប្រដាល់គុនខ្មែរនោះទេ។
អ្នកជំនាញកីឡាវ័យក្មេងរូបនេះ បានបញ្ជាក់បន្ថែមថា៖ «មូលហេតុនេះហើយ ទើបសហព័ន្ធ សម្រេចបង្កើតការប្រកួតផ្ទាល់ខ្លួន ព្រោះទី១ យើងផ្ដល់ឱកាសឱ្យកីឡាករ ទី២ យើងពង្រឹងសមត្ថភាពនៃការវិនិច្ឆ័យរបស់មន្ត្រីគណៈកម្មការ អាជ្ញាកណ្ដាល ចៅក្រម ហើយមួយទៀត គឺយើងពង្រឹងលើការរៀបចំការប្រកួតឱ្យស្របតាមលក្ខណៈស្តង់ដារបច្ចេកទេស របស់សហព័ន្ធអន្តរជាតិ ដើម្បីឱ្យពួកគាត់អាចត្រៀមឆ្ពោះទៅរៀបចំការប្រកួតធំៗ ជាពិសេសការប្រកួតស៊ីហ្គេម នៅឆ្នាំក្រោយ»៕
