ប្រទេសអារ៉ាប៊ី សាអ៊ូឌីត នឹងធ្វើជាម្ចាស់ផ្ទះទទួលរៀបចំព្រឹត្តិការណ៍កីឡាអាស៊ីរដូវរងា Asian Winter Games នៅឆ្នាំ ២០២៩។ បើតាមអារ៉ាប៊ី សាអ៊ូឌីតព្រឹត្តិការណ៍កីឡានេះ នឹងត្រូវប្រព្រឹត្តធ្វើនៅលើភ្នំ Trojena ក្បែរគម្រោងទីក្រុងអនាគ តម្លៃ ៥០០ ប៊ីលានដុល្លារដែលមានឈ្មោះថា «Neom»។ ជាទីក្រុងដែលក្នុងនោះ គ្រោងរៀបចំបង្កើតឱ្យមានរមណីយដ្ឋានជិះស្គីមួយផងដែរ នៅក្នុងឆ្នាំ ២០២៦។
ការសម្រេចជ្រើសរើសប្រទេសអារ៉ាប៊ី សាអ៊ូឌីត ដែលគ្របដណ្ដប់ដោយវាលខ្សាច់ និងភ្នំឱ្យទទួលធ្វើជាម្ចាស់ផ្ទះរៀបចំព្រឹត្តិការណ៍កីឡាអាស៊ីរដូវរងានេះ ត្រូវបានប្រកាសដោយក្រុមប្រឹក្សាកីឡាអូឡាំពិកអាស៊ី នៅថ្ងៃអង្គារ ទី ៤ ខែតុលាឆ្នាំ ២០២២។ រដ្ឋមន្ដ្រីទទួលបន្ទុកផ្នែកកីឡារបស់អារ៉ាប៊ី សាអ៊ូឌីត ព្រះអង្គម្ចាស់ Abdulaziz bin Turki Al-Faisal មានព្រះរាជបន្ទូលថា៖ «Trojena គឺជាតំបន់ដែលមានទំហំ ៦០ គីឡូម៉ែត្រក្រឡា និងស្ថិតនៅកម្ពស់ ១ ៥០០ ទៅ ២ ៦០០ ម៉ែត្រ ដែលជាអនាគតនៃការរស់នៅលើភ្នំ»។
គួរបញ្ជាក់ដែរថា ក្រៅពីធ្វើជាម្ចាស់ផ្ទះកីឡាអាស៊ីរដូវរងា Asian Winter Games នៅឆ្នាំ ២០២៩ អារ៉ាប៊ីសាអ៊ូឌីត ក៏នឹងទទួលរៀបចំព្រឹត្តិការណ៍កីឡាអាស៊ី Asian Games នៅឆ្នាំ ២០៣៤ ក្នុងទីក្រុងរីយ៉ាដផងដែរ។ អារ៉ាប៊ី សាអ៊ូឌីត បានបង្ហាញមហិច្ឆតាក្នុងការរៀបចំព្រឹត្តិការណ៍កីឡាធំៗ ដើម្បីព្យាយាមស្វែងរកប្រភពចំណូលផ្សេង បន្ថែមពីលើចំណូលបានមកពីការបូមប្រេង៕