ភ្នំពេញៈ លោក Raja Randhir Singh ប្រធានស្តីទីក្រុមប្រឹក្សាអូឡាំពិកអាស៊ី (OCA) បានបង្ហាញភាពជឿជាក់ខ្លាំងមកលើប្រទេសកម្ពុជា ដោយលោកមានភាពប្រាកដប្រជាថា ការប្រកួតកីឡាស៊ីហ្គេមលើកទី៣២ ជាប្រវត្តិសាស្ត្រនៅលើទឹកដីកម្ពុជា នឹងមានការរៀបចំដ៏អស្ចារ្យ ហើយលោកក៏ជឿដែរថា កម្ពុជានឹងឈានទៅរៀបចំការប្រកួតកីឡាអាស៊ី (ASIAN Games) នាពេលអនាគតផងដែរ។
តាមរយៈការធ្វើដំណើរមកចូលរួមមហាសន្និបាតក្រុមប្រឹក្សាអូឡាំពិកអាស៊ីលើកទី៤១ ដែលបានធ្វើនៅសណ្ឋាគារសុខា កាលពីថ្ងៃទី ១ ដល់ទី ៥ ខែតុលា លោក Raja Randhir Singh បានមើលឃើញយ៉ាងច្បាស់ពីភាពរីកចម្រើនរបស់កម្ពុជា និងឆន្ទៈដ៏ពិតប្រាកដរបស់កម្ពុជា ក្នុងការត្រៀមខ្លួនធ្វើជាម្ចាស់ផ្ទះស៊ីហ្គេម-អាស៊ានប៉ារ៉ាហ្គេម ឆ្នាំ ២០២៣ ហើយលោកក៏បានជួបពិភាក្សាផ្ទាល់ជាមួយលោកនាយករដ្ឋមន្ត្រី ហ៊ុន សែន ផងដែរ មុនពេលលោកទាំង ២ ថ្លែងសុន្ទរកថារួមគ្នា នៅក្នុងកិច្ចប្រជុំមហាសន្និបាត OCA កាលពីថ្ងៃទី ៤ ខែតុលា ។
លោក Raja Randhir Singh បានវាយតម្លៃខ្ពស់ និងកោតសរសើរពីការរៀបចំបានយ៉ាងល្អរបស់កម្ពុជា ក្នុងការធ្វើម្ចាស់ផ្ទះមហាសន្និបាត OCA នេះ ដោយលោកអះអាងថា «កម្ពុជាបានឈ្នះលើបដិសណ្ឋារកិច្ច» ដែលធ្វើឱ្យតំណាងស្ថាប័នកីឡាទាំង ៤៥ ប្រទេសមកពីទ្វីបអាស៊ីរួមទាំងអ្នកសង្កេតការណ៍របស់គណៈកម្មាធិការជាតិអូឡាំពិកអន្តរជាតិ (IOC) មកពី ១០ ប្រទេសទៀតពិតជារីករាយខ្លាំងនិងមានការភ្ញាក់ផ្អើលចំពោះភាពរួសរាយរាក់ទាក់របស់ប្រជាជនកម្ពុជា។
បន្ថែមលើនេះ លោក Raja Randhir Singh បានកោតសរសើរទៅដល់លោកនាយករដ្ឋមន្ត្រីដែលបានយកចិត្តទុកខ្លាំងទៅលើការអភិវឌ្ឍវិស័យកីឡា និងធ្វើឱ្យមានភាពរស់រវើកនៃចលនាអូឡាំពិកនៅកម្ពុជា។ អ្វីដែលលោកប្លែកភ្នែកខ្លាំងទៀតនោះ គឺកម្ពុជា បានកសាងហេដ្ឋារចនាសម្ព័ន្ធដ៏សម្បូរបែប ជាពិសេសពហុកីឡដ្ឋានជាតិមរតកតេជោ ហើយលោកថា អ្វីៗទាំងអស់នេះ នឹងជួយឱ្យកម្ពុជាអាចរៀបចំស៊ីហ្គេម-អាស៊ានប៉ារ៉ាហ្គេម ឆ្នាំ ២០២៣ ដ៏អស្ចារ្យមិនខាន។
ប្រធានស្តីទី OCA រូបនេះ បានបញ្ជាក់ថា៖ «សម្ដេចតេជោនាយករដ្ឋមន្ត្រី ពិតជាគាំទ្រណាស់។ ខ្ញុំទៅមើលពហុកីឡដ្ឋានជាតិមរតកតេជោ ដោយបានសាងសង់ឡើងធំ អាចផ្ទុកទស្សនិកជនបាន៦ម៉ឺននាក់ គឺជាពហុកីឡដ្ឋានដ៏អស្ចារ្យ និងស្រស់ស្អាត ហើយសូម្បីតែបរិវេណជុំវិញពហុកីឡដ្ឋាន ក៏ពិតជាស្រស់ស្អាត»។
«យើងឃើញថា កម្ពុជានៅសល់ពេល ១ ឆ្នាំទៀត ដើម្បីរៀបចំការប្រកួតកីឡាស៊ីហ្គេម និងអាស៊ានប៉ារ៉ាហ្គេម ជាលើកដំបូងនេះ ហើយវាគ្រប់គ្រាន់ សម្រាប់អ្នកដើម្បីជួបប្រជុំរួមគ្នា ខ្ញុំគិតថា សមត្ថភាពនៃការរៀបចំនឹងអស្ចារ្យ»។ នេះបើតាមការបញ្ជាក់បន្ថែមពី លោក Raja Randhir Singh ។
ជាមួយគ្នានេះ ការថ្លែងរបស់លោកនាយករដ្ឋមន្ត្រី ហ៊ុន សែន នៅក្នុងកិច្ចប្រជុំមហាសន្និបាត OCA កាលពីថ្ងៃទី ៤ ខែតុលា ដែលថា «កម្ពុជាកំពុងសម្លឹងឃើញការអភិវឌ្ឍកីឡាស្ដង់ដានៅក្នុងប្រទេស» នោះ ត្រូវបានលោក Raja Randhir Singh ចាត់ទុកថា ជាជំហានដ៏ត្រឹមត្រូវ ហើយលោកថា ការទទួលរៀបចំស៊ីហ្គេម គឺនឹងផ្ដល់ការជំរុញដល់យុវជន និងផ្ដល់ចំណេះដឹងដល់កុមារ យុវជនជាច្រើន ដែលបានក្លាយជាផ្នែកមួយនៃព្រឹត្តិការណ៍ ដូច្នេះវានឹងដំណើរការរលូនសម្រាប់កម្ពុជា។
បន្ថែមទៅលើការរៀបចំការប្រកួតស៊ីហ្គេម-អាស៊ានប៉ារ៉ាហ្គេម ឆ្នាំ ២០២៣ និងការធ្វើម្ចាស់ផ្ទះការប្រកួតកីឡាយុវជនអាស៊ី (Asian Youth Games) នៅឆ្នាំ ២០២៩ របស់កម្ពុជានេះ លោក Raja Randhir Singh បានបង្ហាញការជឿជាក់យ៉ាងមុតមាំថា កម្ពុជាមានសមត្ថភាពគ្រប់គ្រាន់ដើម្បីរៀបចំការប្រកួតកីឡាអាស៊ី (Asian Games) នាថ្ងៃអនាគត ផងដែរ។
លោក Raja Randhir Singh បញ្ជាក់ថា៖ «ពិតណាស់ ឆ្នាំ ២០២៩ អ្នកនឹងរៀបចំកីឡាយុវជនអាស៊ី ដែលស្ថិតក្នុងដែននៃការរៀបចំរបស់កម្ពុជា។ ខ្ញុំជឿថា ថ្ងៃអនាគត កម្ពុជាក៏អាចទទួលរៀបចំកីឡាអាស៊ី។ ហេតុអ្វីមិនអាច? ខ្ញុំជឿលើសមត្ថភាពរបស់កម្ពុជា»។
«កម្ពុជាមានព្រឹត្តិការណ៍កីឡា ២ កីឡាស៊ីហ្គេម បន្ទាប់មកកីឡាយុវជនអាស៊ី អ៊ីចឹងកម្ពុជាក៏អាចទទួលរៀបចំកីឡាអាស៊ីដែរ។ ខ្ញុំចង់លើកឡើងថា ចំនួនអត្តពលិកនឹងកើន ហើយមានគ្រូល្អៗ សម្ភារកីឡាល្អៗ ហើយការចូលរួមប្រកួតក្នុងព្រឹត្តិការណ៍កាន់តែច្រើន នឹងធ្វើឱ្យប្រសិទ្ធផលកើនឡើង។ នេះជាការបញ្ជាក់បន្ថែមរបស់លោក Raja Randhir Singh។
យ៉ាងណាក៏ដោយ នៅក្នុងកិច្ចប្រជុំ OCA នោះ លោក ហ៊ុន សែន បានជំរុញ NOCC ជាពិសេសគណៈកម្មាធិការជាតិ CAMSOC ត្រូវបង្កើនកិច្ចសហការទាំងបច្ចេកទេស និងបទពិសោធជាមួយក្រុមប្រឹក្សាអូឡាំពិកអាស៊ី និងស្ថាប័នអន្តរជាតិផ្សេងៗទៀត ដើម្បីបណ្តុះបណ្តាល និងអភិវឌ្ឍកម្រិតបច្ចេកទេសរបស់អត្តពលិកកម្ពុជាឱ្យមានកម្រិតខ្ពស់ហើយលោកបានអំពាវនាវដល់បណ្តាប្រទេសសមាជិករបស់ OCA សូមគាំទ្រគ្រប់ទម្រង់ដល់កម្ពុជា ដើម្បីជួយឱ្យកម្ពុជាទទួលបានជោគជ័យក្នុងការរៀបចំការប្រកួតស៊ីហ្គេមនិងអាស៊ានប៉ារ៉ាហ្គេមនៅឆ្នាំ ២០២៣៕