.jpg)
មន្ត្រីពាក់ព័ន្ធក្នុងកិច្ចប្រជុំរដ្ឋបាលខេត្តព្រះសីហនុ កាលពីថ្ងៃទី ៥ តុលា។ រូបថត រដ្ឋបាលខេត្តព្រះសីហនុ
ព្រះសីហនុៈ ថ្នាក់ដឹកនាំខេត្តព្រះសីហនុ កាលពីថ្ងៃទី ៥ តុលា បានបើកកិច្ចប្រជុំស្តីពីការត្រៀមរៀបចំពិធីប្រកួតកីឡា SEA GAMES លើកទី ៣២ និង ASEAN PARA GAMES លើកទី១២ ដែលនឹងចាប់ផ្តើមដំណើរការពីដើមខែកុម្ភៈ ឆ្នាំ ២០២៣ ខណៈដែលខេត្តទេសចរជាប់មាត់សមុទ្រ ១ នេះ នឹងទទួលវិញ្ញាសារ ការប្រកួតកីឡាស៊ីហ្គេមចំនួន ៥។ នេះបើតាមការចុះផ្សាយរបស់រដ្ឋបាលខេត្តព្រះសីហនុ នៅថ្ងៃទី ៦ តុលា។
លោក គង់ វិតាណៈ អភិបាលរងខេត្តព្រះសីហនុ បានដឹកនាំកិច្ចប្រជុំគណៈបញ្ជាការឯកភាពខេត្ត ស្តីពីផែនការការពារសន្តិសុខ សណ្តាប់ធ្នាប់ក្នុងឱកាសពិធីប្រកួតកីឡា SEA GAMES លើកទី ៣២ និង ASEAN PARA GAMES លើកទី១២ ឆ្នាំ ២០២៣ ដោយមានការចូលរួមពីលោកនាយករដ្ឋបាលសាលាខេត្ត អភិបាលក្រុង ស្រុក និងប្រធានមន្ទីរ អង្គភាពពាក់ព័ន្ធក្នុងខេត្តព្រះសីហនុ។
លោក គង់ វិតាណៈ មានប្រសាសន៍បើកកិច្ចប្រជុំថា ការប្រកួតកីឡា SEA GAMES លើកទី៣២ និង ASEAN PARA GAMES លើកទី១២ ឆ្នាំ ២០២៣ នឹងចាប់ផ្តើមដំណើរការពីដើមខែកុម្ភៈ ឆ្នាំ ២០២៣ រហូតដល់ខែមិថុនា ឆ្នាំ ២០២៣។
លោកបន្តថា ខេត្តព្រះសីហនុ ត្រូវបានទទួលវិញ្ញាសារ ការប្រកួតកីឡាស៊ីហ្គេមចំនួន ៥ សម្រាប់ស៊ីហ្គេមឆ្នាំ ២០២៣ មានដូចជា កីឡាទូកក្តោង កីឡាម៉ូតូទឹក និងកីឡា ៣ ប្រភេទផ្សេងទៀត។ ដោយឡែកខេត្ត ៤ ផ្សេងទៀត ក៏ទទួលវិញ្ញាសារក្នុងការប្រកួតស៊ីហ្គេមផ្សេងៗផងដែរ។
ចំណែករាជធានីភ្នំពេញ ទទួលការប្រកួតកីឡាស៊ីហ្គេមសម្រាប់ការប្រកួតការបើក និងបិទកីឡា ស៊ីហ្គេមឆ្នាំ ២០២៣ ដែលទាមទារឱ្យស្ថាប័នពាក់ព័ន្ធរួមគ្នារៀបចំផែនការការពារសន្តិសុខ សណ្តាប់ធ្នាប់ធ្វើយ៉ាងណាឱ្យដំណើរការការប្រកួតទទួលបានលទ្ធផលល្អ។
លោកអភិបាលរងខេត្ត បានលើកឡើងថា ការបើកដំណើរការកីឡាអាស៊ីអាគ្នេយ៍ កម្ពុជាត្រូវធ្វើជាម្ចាស់ផ្ទះ ដូច្នេះកម្ពុជាត្រូវការមេដាយមាសឱ្យបានកាន់តែច្រើន ម្យ៉ាងទៀតកម្ពុជា ក៏បានគិតគូរពីលទ្ធភាពដណ្តើមយកមេដាយ មាស ពីស៊ីហ្គេមនេះឱ្យបានច្រើនផងដែរ។
មានវិញ្ញាសារចំនួន ២ ត្រូវបានចុះបញ្ជីរួចហើយ នៅសល់វិញ្ញាសារចំនួន ៣ ផ្សេងទៀត មានដូចជា បាល់ទះ លើឆ្នេរខ្សាច់ បាល់ទាត់លើតុ និងកីឡាមួយប្រភេទទៀត ដែលស្ថាប័នពាក់ព័ន្ធត្រូវត្រៀម និងផ្សព្វផ្សាយឱ្យបាន ទូលំទូលាយដល់មហាជន ពិសេសកិច្ចការពារសន្តិសុខ សម្រាប់ការប្រកួតកីឡាស៊ីហ្គេម នាពេលខាងមុខ។
លោកបញ្ជាក់ថា កិច្ចការនេះអាជ្ញាធរត្រូវធានាការពារសន្តិសុខសណ្តាប់ធ្នាប់សម្រាប់ការប្រកួតកីឡាស៊ីហ្គេម និងប៉ារ៉ាហ្គេមនៅខេត្តព្រះសីហនុ។ ចំពោះវិញ្ញាសារទូកក្តោង និងម៉ូតូទឹក គ្រោងធ្វើការប្រកួតនៅឆ្នេរអូរឈើទាល។
បន្ថែមពីនេះ លោកអភិបាលរងខេត្ត សូមឱ្យស្ថាប័នសមត្ថកិច្ចពាក់ព័ន្ធខេត្ត ត្រូវរៀបចំ និងបង្ហាញពីផែនការសន្តិសុខសណ្តាប់ធ្នាប់ ពិសេសការចូលរួមពីមន្ត្រីកងកម្លាំងប្រដាប់អាវុធដែលមានស្នងការដ្ឋាននគរបាលខេត្ត កងរាជអាវុធហត្ថខេត្ត ដែលជាសេនាធិការឱ្យគណៈបញ្ជាការឯកភាពខេត្ត រៀបចំធ្វើផែនការការពារសន្តិសុខសណ្តាប់ធ្នាប់ ដើម្បីបញ្ចូលជាមួយនឹងក្រុមការងារថ្នាក់ជាតិ។
លោកគង់ វិតាណៈ បានបញ្ជាក់ថា ក្នុងការប្រកួតកីឡា SEA GAMES លើកទី៣២ និង ASEAN PARA GAMES លើកទី១២ ឆ្នាំ ២០២៣ ខេត្តព្រះសីហនុមានគោលដៅចំនួន ២ គឺគោលដៅ នៃការការពារសន្តិសុខសណ្តាប់ធ្នាប់ក្នុងការប្រកួត និងការស្នាក់នៅរបស់គណៈប្រតិភូកីឡាដែលចូលរួមការប្រកួតកីឡានៅខេត្តព្រះសីហនុ។
លោកបានជំរុញឱ្យស្ថាប័នពាក់ព័ន្ធ ត្រូវយកពិធីប្រកួតកីឡា SEA GAMES លើកទី៣២ និង ASEAN PARA GAMES លើកទី១២ នេះ ផ្សព្វផ្សាយពីសក្តានុពលរបស់ព្រះរាជាណាចក្រកម្ពុជា ពិសេសខេត្តព្រះសីហនុ និង ក៏ជាមុខមាត់របស់ប្រទេសកម្ពុជាផងដែរ៕
