លោក Raul Fornes Valenciano ពេលថ្លែង នៅក្នុងជំនួបពិភាក្សាការងារជាមួយលោក ស សុខា កាលពីព្រឹកថ្ងៃទី ២០ ខែតុលា ឆ្នាំ ២០២២។ រូបថត សហការី
ភ្នំពេញ៖ សមាជិករដ្ឋសភាគុយបា លោក Raul Fornes Valenciano បានអះអាងថា ប្រទេសរបស់លោក ជាពិសេសវិទ្យាស្ថានជាតិកីឡា អប់រំកាយ និងកម្សាន្ដនៃសាធារណរដ្ឋគុយបា នឹងធ្វើការយ៉ាងស្អិតល្មួតជាមួយក្រសួងអប់រំ យុវជន និងកីឡារបស់កម្ពុជា និងភាគីពាក់ព័ន្ធមួយចំនួនទៀត ក្នុងការជួយអភិវឌ្ឍវិស័យកីឡានៅកម្ពុជា ឱ្យមានការរីកចម្រើន បានឆាប់រហ័ស ដើម្បីត្រៀមទៅកាន់ការប្រកួតស៊ីហ្គេម ឆ្នាំ ២០២៣ ដែលកម្ពុជា ត្រូវធ្វើជាម្ចាស់ផ្ទះ។
នៅក្នុងជំនួបជាមួយលោក ស សុខា រដ្ឋលេខាធិការក្រសួងអប់រំ យុវជន និងកីឡា នៅមជ្ឈមណ្ឌលជាតិហ្វឹកហ្វឺនកីឡា ដែលមានការចូលរួមរបស់លោកជំទាវ Liurka Rodríguez Barrios ឯកអគ្គរដ្ឋទូតគុយបា ប្រចាំនៅកម្ពុជាផងនោះ លោក Raul Fornes Valenciano បានទទួលយកនៅគ្រប់សំណើរបស់កម្ពុជា តាមរយៈ លោក ស សុខា ហើយលោកបានសន្យាថា នឹងរៀបចំឱ្យបានលឿនផងដែរ។
តាងនាមឱ្យលោកបណ្ឌិតសភាចារ្យ ហង្សជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា លោក ស សុខា បានយកជំនួបជាមួយប្រតិភូគុយបា កាលពីថ្ងៃទី ២០ ខែតុលានេះ ដើម្បីអរគុណទៅដល់ប្រទេសគុយបា ដែលបានជួយជ្រោមជ្រែងទៅលើវិស័យជាច្រើនរបស់កម្ពុជា រួមទាំងវិស័យកីឡាផងដែរ។
ជាមួយគ្នានោះ លោក ស សុខា បានស្នើឱ្យប្រទេសគុយបា ជួយផ្តល់នៅមន្រ្តីវិទ្យាសាស្រ្តកីឡា ពេទ្យ និងគ្រូកីឡា ជាពិសេសទៅលើប្រភេទកីឡា ដែលគុយបា មានភាពខ្លាំងស្រាប់ ដូចជាប្រដាល់សកល យូដូ បាល់ទះ អត្តពលកម្ម ជាពិសេសបេសបល ដោយលោកបញ្ជាក់ថា កម្ពុជា អាចនឹងដណ្តើមបានមេដាយមាស នៅស៊ីហ្គេម បើសិនជាមានការជួយបង្វឹកពីគ្រូជំនាញគុយបា ព្រោះគុយបា ខ្លាំងលើប្រភេទកីឡានេះ ខណៈនៅក្នុងតំបន់អាស៊ាន បេសបល នៅមានកម្រិតទាប នៅឡើយទេ។
បន្ថែមលើនេះ លោក ស សុខា បានស្នើបញ្ជូនមន្រ្តីជំនាញកីឡា ៣ នាក់ ទៅទស្សនកិច្ច ក៏ដូចជាទៅសិក្សាវគ្គខ្លី នៅប្រទេសគុយបា ដោយផ្តោតទៅលើការសិក្សាស្រាវជ្រាវលើជំនាញរៀបចំព្រឹត្តិការណ៍ និងគ្រប់គ្រងកីឡា ដោយលោកចាត់ទុកថា «នេះជាទុនដ៏សំខាន់ ក្នុងការរៀបចំព្រឹត្តិការណ៍ស៊ីហ្គេម នៅកម្ពុជា» ហើយលោកក៏បានសុំឱ្យអ្នកជំនាញរបស់ប្រទេសគុយបា ជួយរៀបចំមជ្ឈមណ្ឌលកីឡាកម្ពុជា ដែលប្រហាក់ប្រហែលមជ្ឈមណ្ឌលកីឡានៅគុយបា ផងដែរ។
ជាការឆ្លើយតបទៅនឹងសំណើទាំងអស់នេះរបស់កម្ពុជា លោក Raul Fornes Valenciano បានលើកឡើងថា តាមរយៈការទំនាក់ទំនងរបស់ប្រទេសទាំង ២ អស់រយៈពេលជាង ៦០ ឆ្នាំមកនេះ ហើយក៏ស្ថិតក្នុងការទទួលខុសត្រូវលើផ្នែកកីឡាផងនោះ លោកជឿជាក់ថា វិស័យកីឡា ជាផ្នែកមួយដ៏ល្អ ក្នុងការជួយដល់កិច្ចសហប្រតិបត្តិការរវាងប្រទេសកម្ពុជា និងគុយបា។
លោក Raul Fornes Valenciano ដែលបានអមដំណើរ លោករដ្ឋមន្រ្តីក្រសួងអប់រំ ហង្សជួន ណារ៉ុន ពេលលោកទៅទស្សនកិច្ច នៅប្រទេសគុយបា នាពេលកន្លងមកនេះ បានបញ្ជាក់ថា៖ «ដំណើរទស្សនកិច្ចរបស់រដ្ឋមន្រ្តីក្រសួងអប់រំ យុវជន និងកីឡា បាននាំមកនូវការចុះ MOU ហើយយើងនឹងទទួលបានផលជាផ្លែផ្កា គឺមិនមែនតែផ្នែកកីឡា ១ ប្រភេទនោះទេ ប៉ុន្តែនៅមានប្រភេទកីឡាផ្សេងៗទៀតជាច្រើន»។
លោកបានបន្ថែមថា៖ «ចំណែកការស្នើសុំឱ្យមានមន្រ្តីវិទ្យាសាស្រ្តកីឡា របស់ឯកឧត្តម ស សុខា គឺជាគំនិតផ្តួចផ្តើមដ៏ល្អហើយ ព្រោះគុយបា មិនមែនរីកចម្រើនត្រឹមតែកីឡាប៉ុណ្ណោះទេ ប៉ុន្តែយើងមានការរីកចម្រើនខាងផ្នែកវិស័យសុខាភិបាលកីឡាទៀតផង។ ជាមួយគ្នានេះ យើងមានគ្រូបង្វឹក និងកីឡាករល្អៗផងដែរ ហើយតាមកិច្ចសន្យានៃកិច្ចសហប្រតិបត្តិការរបស់ប្រទេសយើងទាំង ២ គឺគុយបា ត្រូវដាក់ចេញនូវគ្រូជំនាញល្អៗ ដើម្បីមកជួយដល់កម្ពុជា»។
ចំពោះការស្នើសុំឱ្យមាន មជ្ឈមណ្ឌលកីឡានៅកម្ពុជា ដែលមានភាពប្រហាក់ប្រហែលទៅនឹងមជ្ឈមណ្ឌលកីឡានៅប្រទេសគុយបាវិញ លោក Raul Fornes Valenciano បានបញ្ជាក់ថា៖«យើងមានលក្ខខណ្ឌល្អ ក្នុងការរៀបចំ ហើយគុយបា នឹងជួយឱ្យកីឡាកម្ពុជា មានបទពិសោធកាន់តែច្រើនផងដែរ ទៅលើការងារនេះ ដើម្បីអភិវឌ្ឍចំណេះដឹងបន្ថែមទៀត»។
លោក Raul Fornes Valenciano ដែលជាអនុប្រធានវិទ្យាស្ថានជាតិ កីឡា អប់រំកាយ និងកម្សាន្ដនៃសាធារណរដ្ឋគុយបា ផងនោះ បានបន្ថែមថា៖ «គុយបា ក៏មានការបង្ហាត់បង្ហាញជំនាញជាច្រើន ដើម្បីគោរពតាមលក្ខខណ្ឌ។ យើងនឹងជួយ ដោយផ្តោតលើការផ្តល់បទពិសោធ ដែលប្រទេសគុយបាមាន ដើម្បីអភិវឌ្ឍវិស័យកីឡារបស់កម្ពុជា។ យើងនឹងខិតខំចាប់ផ្តើមធ្វើការងារនេះភ្លាម ដើម្បីសាមគ្គីភាព និងមិត្តភាពរបស់ប្រទេសទាំង២ ហើយយើងរៀបចំធ្វើម៉េចឱ្យបានប្រសើរ និងរហ័ស ដើម្បីឆ្លើយតបទៅនឹងសំណើរបស់ឯកឧត្តម ស សុខា ក៏ដូចជាក្រសួងរបស់យើងទាំង ២»៕
