.jpg)
ការប្រកួតកីឡាបាល់ទះមិត្តភាពអន្តរជាតិ កម្ពុជា-សិង្ហបុរី នៅភ្នំពេញ។ រូបថត សហការី
ភ្នំពេញៈ កម្ពុជា តាមរយៈសហព័ន្ធកីឡាបាល់ទះកម្ពុជា បានឈានដល់ការចុះអនុស្សរណៈនៃការយោគយល់គ្នា (MoU) ជាមួយសមាគមកីឡាកម្ពុជា-អាមេរិក ព្រមទាំងបង្កើតឱ្យមានកិច្ចសហប្រតិបត្តិជាមួយសហព័ន្ធកីឡាបាល់ទះបារាំង ដើម្បីបើកផ្លូវឱ្យមាននៅការប្រកួតមិត្តភាពអន្តរជាតិ នាពេលខាងមុខ ជាពិសេសគឺការជ្រើសរើសកីឡាការិនី ដែលរស់នៅក្រៅប្រទេស ឱ្យមកចូលរួមជាមួយក្រុមជម្រើសជាតិនារីកម្ពុជា ត្រៀមការប្រកួតស៊ីហ្គេម លើកទី៣២ ឆ្នាំ ២០២៣ នៅកម្ពុជា។
មន្ត្រីជំនាញរបស់សហព័ន្ធកីឡាបាល់ទះកម្ពុជា លោក អាំង សិរីពិសិដ្ឋ បានចាត់ទុកការចុះ MoU និងការបង្កើតឱ្យមាននូវទំនាក់ទំនងការទូត ជាមួយប្រទេសជាអំណាចខាងវិស័យបាល់ទះទាំង ២ អាមេរិក-បារាំង ជាការបើកផ្លូវឱ្យក្រុមជម្រើសជាតិបាល់ទះកម្ពុជា មានឱកាសកាន់តែច្រើន ក្នុងការអភិវឌ្ឍសមត្ថភាព និងគុណផលរបស់ខ្លួន ដើម្បីអាចឈានទៅសម្រេចការឈ្នះបានមេដាយមាស នៅស៊ីហ្គេម ឆ្នាំ ២០២៣ ហើយក៏ដើម្បីធ្វើឱ្យមានភាពលេចធ្លោកាន់តែខ្លាំង នៅលើឆាកអន្តរជាតិ ផងដែរ។
អគ្គលេខាធិការសហព័ន្ធ លោក អាំង សិរីពិសិដ្ឋ បានថ្លែងថា៖ «កាលដែលយើងបានធ្វើទំនាក់ទំនងកិច្ចការងារបរទេស ជាមួយបណ្តាប្រទេស នៅលើពិភពលោកនេះ គឺវាជាជំហានថ្មី ក៏ដូចផែនការមេរបស់សហព័ន្ធកីឡាបាល់ទះកម្ពុជាយើង បានន័យថា យើងមិនអាចជោគជ័យ ដូចកង្កែបក្នុងអណ្តូងទេ។ ភាពជោគជ័យ និងភាពអស្ចារ្យរបស់សហព័ន្ធ គឺយើងចង់ធ្វើម៉េចឱ្យប្រទេសនៅក្នុងតំបន់ ក៏ដូចជាពិភពលោក ទទួលស្គាល់យើងដែរ»។
តាមលោក អាំង សិរីពិសិដ្ឋ បានឱ្យដឹងថា សហព័ន្ធកីឡាបាល់ទះកម្ពុជា បានទំនាក់ទំនងជាមួយសហព័ន្ធកីឡាបាល់ទះបារាំង កាលពីថ្ងៃទី ២៧ ខែតុលានេះ តាមរយៈកិច្ចប្រជុំតាម ZOOM រវាងលោក Eric Tanguy ប្រធានសហព័ន្ធកីឡាបាល់ទះបារាំង លោកឯកអគ្គរាជទូតវិសាមញ្ញរបស់កម្ពុជា ប្រចាំនៅប្រទេសបារាំង និងថ្នាក់ដឹកនាំសហព័ន្ធកីឡាបាល់ទះកម្ពុជា ហើយកិច្ចសហប្រតិការនេះ ត្រូវបានធ្វើឡើង បន្ទាប់ពីកម្ពុជា បានទំនាក់ទំនងការទូតជាមួយប្រទេសគុយបា និងបាននាំយកគ្រូបង្វឹកគុយបា មកជួយបង្វឹកដល់ក្រុមជម្រើសជាតិក្នុងសាល និងឆ្នេរខ្សាច់ កាលពីថ្ងៃទី ១៨ ខែកញ្ញា ឆ្នាំ ២០២២ កន្លងទៅនេះ។
លោក អាំង សិរីពិសិដ្ឋ ពេលប្រជុំតាមអនឡាញជាមួយសមាគមកីឡាកម្ពុជា-អាមេរិក នៅទីស្នាក់ការសហព័ន្ធកីឡាបាល់ទះកម្ពុជា។ រូបថត សហការី
តាមរយៈកិច្ចប្រជុំតាម ZOOM នោះ លោក សិរីពិសិដ្ឋ បានអះអាងថា កម្ពុជាទទួលបានផ្លែផ្កាដ៏ល្អប្រសើរ ដោយក្នុងនោះ លោកអគ្គស្នងការនគរបាលជាតិ នេត សាវឿន បានសំណូមពរទៅកាន់ភាគីបារាំង ចំនួន ២ ចំណុច ទី ១ ការអញ្ជើញក្រុមកីឡាបាល់ទះកម្រិតជាតិ កម្រិត A ឬ B ឬក៏ក្លិបអាជីពនៅប្រទេសបារាំង ឱ្យធ្វើដំណើរមកប្រកួតមិត្តភាពអន្តរជាតិ នៅកម្ពុជា ហើយទី ២ កម្ពុជាអាចបញ្ជូនក្រុមកីឡាកររបស់ខ្លួន ទៅប្រកួតមិត្តភាពអន្តរជាតិ នៅប្រទេសបារាំង។
«ខ្ញុំជឿជាក់ថា បងប្អូនជនរួមជាតិ បានជ្រាបហើយ បារាំង ជាមហាអំណាចបាល់ទះ ហើយបើខ្ញុំចាំមិនខុស គឺឈរនៅលេខ៣ ក្នុងពិភពលោក អ៊ីចឹងកម្រិតរបស់គាត់ ខ្ពស់ជាងគុយបាទៅទៀត ហេតុនេះទោះជាក្រុមស្ថិតក្នុងកម្រិតអាយុណាមួយ ក៏គុណផលរបស់គេ ខ្លាំងលើសលប់រួចស្រេចទៅហើយ ក្នុងខណៈកម្ពុជាយើង ឈរនៅលេខ ១៤១ ឯណោះ ចំណែកការប្រកួតមិត្តភាពអន្តរជាតិរវាងក្រុមតំណាងឱ្យប្រទេសទាំង ២ នេះ នឹងលេចរូបរាង ក្នុងពេលឆាប់ៗខាងមុខនេះ»។ លោក សិរីពិសិដ្ឋ បានបញ្ជាក់។
ដោយឡែក ចំពោះការចុះ MoU ជាមួយសមាគមកីឡាកម្ពុជា-អាមេរិក និងសហព័ន្ធកីឡាបាល់ទះកម្ពុជា ត្រូវបានធ្វើឡើងតាម ZOOM កាលពីថ្ងៃទី ២៨ ខែតុលា រវាងលោក អាំង សិរីពិសិដ្ឋ ផ្ទាល់់ជាមួយថ្នាក់ដឹកនាំរបស់សមាគមកីឡាកម្ពុជា-អាមេរិក ហើយតាមរយៈជំនួបនោះ ភាគីកម្ពុជា បានស្នើសុំឱ្យភាគីអាមរិក ជួយកម្ពុជា បង្កើតឱ្យមានការប្រកួតលើវិញ្ញាសាបាល់ទះឆ្នេរខ្សាច់ផ្នែកនារី។
លោកបានបញ្ជាក់ថា៖ «កីឡាការិនីប្រភេទឆ្នេរខ្សាច់ នៅប្រទេសកម្ពុជារបស់យើង អត់ដែលមានទេ ភាគច្រើន វាពាក់ព័ន្ធទៅនឹងវប្បធម៌ប្រពៃណី ក៏ថាបានដែរ ហើយបណ្ដាប្រទេសអាស៊ានមួយចំនួន ក៏អ៊ីចឹងដែរ គឺការស្លៀកប៊ីគីនី មិនអាចលេងបានទេ ដូច្នេះហើយវិញ្ញាសាមួយនេះ មិនត្រូវបានអ្នកណាផ្ដួចផ្ដើមគំនិតនោះឡើយ។ ខ្ញុំជឿជាក់ថា វប្បធម៌ អរិយធម៌ យើងត្រូវតែថែរក្សាហើយ ប៉ុន្តែពិភពលោកសកលភាវូបនីយកម្ម ក៏យើងមិនត្រូវតែបុរាណនិយមពេកនោះដែរ ក្នុងន័យតែមួយ គឺអភិរក្ស តែត្រូវមានការអភិវឌ្ឍ»។
សកម្មភាពហ្វឹកហាត់របស់ក្រុមកីឡាការិនីជម្រើសជាតិបាល់ទះកម្ពុជា នៅប្រទេសចិន។ រូបថត សហការី
ជាមួយគ្នានេះ អគ្គលេខាធិការសហព័ន្ធរូបនេះ បានសំណូមពរដល់បណ្ដាអត្តពលិកកម្ពុជារបស់យើង មិនត្រឹមតែនៅអាមេរិកទេ គឺនៅតាមបណ្ដាប្រទេសនានាលើពិភពលោកទាំងអស់ គឺឱ្យតែគាត់មានឆន្ទៈស្រឡាញ់ជាតិ ចង់ជួយជាតិ ជ្រោងកីឡាជាតិ គឺសហព័ន្ធស្វាគមន៍ ក្នុងករណីដែលគាត់មានទេពកោសល្យគ្រប់គ្រាន់ ដើម្បីក្លាយជាកីឡាករ កីឡាការិនី តំណាងជាតិរបស់យើង គឺធ្វើម៉េចឱ្យកម្ពុជាទទួលបាននូវលទ្ធផលល្អប្រសើរ ពេលធ្វើជាម្ចាស់ផ្ទះស៊ីហ្គេម លើកទី៣២ ឆ្នាំ ២០២៣ ខាងមុខនេះ។
ទន្ទឹមនឹងនោះ កម្ពុជា ក៏បានស្នើសមាគមកីឡាកម្ពុជា-អាមេរិក ឱ្យជួយស្វែងរកកីឡាការិនីក្នុងសាល រស់នៅក្រៅប្រទេស សម្រាប់ចូលរួមប្រកួតតំណាងឱ្យកម្ពុជាផងដែរ ដោយលោកបានបញ្ជាក់ថា ក្រុមកីឡាការិនីរបស់កម្ពុជា ពេលនេះ នៅមានកម្រិតទាបខ្លាំង ពិបាកប្រកួតប្រជែងជាមួយបណ្ដាប្រទេសជិតខាង ដោយសហព័ន្ធ ទើបជ្រើសរើសបានកីឡាការិនី ១៤ នាក់ ដើម្បីទៅហ្វឹកហាត់នៅប្រទេសចិន ខណៈកន្លងមកកម្ពុជា មិនធ្លាប់បង្កើតក្រុមជម្រើសជាតិនារី ដើម្បីប្រកួតប្រជែងជាមួយនឹងបរទេសនោះទេ។
លោក សិរីពិសិដ្ឋ បានបញ្ជាក់ថា៖ «និយាយដោយស្មោះត្រង់ គុណផលរបស់យើង គឺនៅមានកម្រិតទាបបំផុត ដោយសារការប្រកួតប្រជែងបាល់ទះនារីរបស់យើង គឺមិនសម្បូរបែប ខុសពីបុរស អ៊ីចឹងយើងទាមទារឱ្យជនរួមជាតិ ជាជនជាតិខ្មែរ រស់នៅតាមបណ្តាប្រទេសផ្សេងៗ នៅលើពិភពលោក ដែលជាអត្តពលិកមានគុណផលល្អ មានទេពកោសល្យល្អ ហើយកំពុងលេងឱ្យសាកលវិទ្យាល័យ វិទ្យាល័យ នៅស្រុកគេ គឺគាត់អាចមកចូលរួមលេងតំណាងឱ្យកម្ពុជាបាន ជាមួយនឹងកីឡាការិនី ដែលយើងទើបតែរើសបាន ១៤ នាក់»។
សម្រាប់ការអំពាវនាវរកកីឡាករកូនខ្មែរ នៅក្រៅប្រទេស មកលេងតំណាងឱ្យកម្ពុជា លោក អាំង សិរីពិសិដ្ឋ មានការជឿជាក់ថា សមាគមកីឡាកម្ពុជា-អាមេរិក នឹងជ្រើសរើសបានកីឡាការិនី ដែលមានគុណផលល្អ នៅសហរដ្ឋអាមេរិក ដើម្បីយកមកលេងតំណាងឱ្យកម្ពុជា ហើយជាមួយគ្នានេះ កម្ពុជា ក៏បានស្នើឱ្យមានការប្រកួតមិត្តភាពអន្តរជាតិរវាងក្រុមបាល់ទះអាមេរិក និងក្រុមកម្ពុជា ផងដែរ ខណៈការប្រកួតមិត្តភាពអន្តរជាតិក្នុងស្រុក កាលពីពេលថ្មីៗនេះ ក្រុមកម្ពុជា បានយកឈ្នះក្រុមសិង្ហបុរី ដោយលទ្ធផល ២-១ និងបានបន្តឈ្នះក្រុម U21 ជម្រើសជាតិគុយបា ៣-២។
លោក អាំង សិរីពិសិដ្ឋ បានសង្កត់ធ្ងន់ថា៖ «ខ្ញុំបានសំណូមពរទៅសហរដ្ឋអាមេរិក ដូចយើងបានសំណូមពរទៅខាងសហព័ន្ធកីឡាបាល់ទះបារាំងដែរ ដោយយើងបានស្នើសុំឱ្យមានក្រុមបាល់ទះរបស់សហរដ្ឋអាមេរិក ហោះមកប្រកួតនៅស្រុកខ្មែរ ឬយើងហោះពីស្រុកខ្មែរ ទៅប្រកួតនៅសហរដ្ឋអាមេរិក អ៊ីចឹងនៅពេលមានការប្រកួតអន្តរជាតិបែបហ្នឹងកាន់តែច្រើន យើងអាចពង្រឹងគ្រឹះរបស់កីឡាករកម្ពុជា កាន់តែខ្លាំងថែមទៀត»៕
