នៅសល់តែ ៣ ថ្ងៃទៀតប៉ុណ្ណោះ ព្រឹត្តិការណ៍កីឡាជាតិលើកទី៣ នឹងបើកធ្វើជាផ្លូវការនៅថ្ងៃចន្ទ ទី២១ ខែវិច្ឆិកា ឆ្នាំ២០២២ នៅពហុកីឡដ្ឋានជាតិមរតកតេជោ។
លោក វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជា (NOCC) និងជាអគ្គលេខាធិការ គណៈកម្មាធិការជាតិរៀបចំការប្រកួតកីឡាស៊ីហ្គេម លើកទី៣២ ឆ្នាំ២០២៣ (CAMSOC) គូសបញ្ជាក់ថា នៅក្នុងពិធីបើកជាផ្លូវការនៃកីឡាជាតិលើកទី ៣ នេះ គណៈកម្មការបានរៀបចំបង្ហាញការសម្តែងទស្សនីយភាពពិសេសៗជាច្រើនទម្រង់ ពីក្រុមកងយោធពលខេមរភូមិន្ទរបស់ក្រុមបញ្ជាការដ្ឋានអង្គរក្ស ចំនួន ១០០០នាក់ ការរាំចង្វាក់រាំវង់ ឡាំលាវ ដែលជាការរំាចង្វាក់ប្រជាប្រិយខ្មែរ មាននារី ៥០០នាក់ ការបាញ់កាំជ្រួចទំនើប រួមទាំងទស្សនីយភាពនៃការសម្តែងកីឡាមួយចំនួនទៀត ដែលសរុបមានអ្នកសម្តែងប្រមាណ ២០០០នាក់។
បើតាមលោក វ៉ាត់ ចំរើន ពិធីបើកកីឡាជាតិលើកទី៣ នាខែវិច្ឆិកា ឆ្នាំ២០២២ នឹងមានការអញ្ជើញជាអធិបតីពីសំណាក់លោកនាយករដ្ឋមន្ដ្រី ហ៊ុន សែន ដោយកម្មវិធីនឹងចាប់ផ្តើមជាមួយនឹងទស្សនីយភាពចលនាកាយសមស្រប លំហាត់អប់រំកាយនិងកីឡា ក្បួនដង្ហែប្រតិភូកីឡារាជធានី-ខេត្ត និងក្រសួង-ស្ថាប័ន។ ក៏មានផងដែរ ការដង្ហែទង់ជាតិ ទង់កីឡាជាតិ និងគោរពទង់ជាតិកម្ពុជា។
បន្ទាប់ពីនោះ នឹងមានសុន្ទរកថា និងរបាយការណ៍របស់លោក ហង់ ជួនណារ៉ុន រដ្ឋមន្ដ្រីក្រសួងអប់រំ យុវជន និងកីឡា ដែលជាប្រធានគណៈកម្មការរៀបចំការប្រកួតកីឡាជាតិលើកទី៣ និងសុន្ទរកថារបស់លោក ថោង ខុន រដ្ឋមន្ដ្រីក្រសួងទេសចរណ៍ ដែលប្រធានគណៈកម្មាធិការជាតិអូឡាំពិកកម្ពុជា និងសុន្ទរកថាបើកជាផ្លូវការរបស់ប្រមុខរដ្ឋាភិបាលកម្ពុជា លោក ហ៊ុន សែន។
ដោយឡែក លោក ស សុខា រដ្ឋលេខាធិការក្រសួងអប់រំ យុវជន និងកីឡា និងជាអនុប្រធានអចិន្ត្រៃយ៍ គណៈកម្មការទទួលបន្ទុករួមនៃព្រឹត្តិការណ៍កីឡាជាតិលើកទី៣ ឆ្នាំ២០២២ បានផ្តល់ការណែនាំដល់តំណាងសហព័ន្ធកីឡាជាតិ រួមទាំងប្រតិភូកីឡារាជធានីខេត្ត-ក្រសួងត្រូវយកចិត្តទុកដាក់ឱ្យបានខ្ពស់ក្នុងការប្រយុទ្ធប្រឆាំងនឹងសារធាតុហាមឃាត់ក្នុងកីឡា និងការកាត់សេចក្តីដល់ការប្រកួតឱ្យយុត្តិធម៌ ដើម្បីរួមគ្នាជំរុញឱ្យព្រឹត្តិការណ៍កីឡាជាតិលើកទី៣ ទទួលបានជោគជ័យ។
លោក ស សុខា បានថ្លែងយ៉ាងដូច្នេះ នៅក្នុងកិច្ចប្រជុំគណៈកម្មការជំនាញ ស្តីពីការរៀបចំការប្រកួតកីឡាជាតិ លើកទី៣ និងកីឡាជនពិការជាតិ លើកទី១ ឆ្នាំ២០២២ នៅមជ្ឈមណ្ឌលជាតិហ្វឹកហ្វឺនកីឡា កាលពីល្ងាចថ្ងៃទី១៨ ខែវិច្ឆិកា ឆ្នាំ២០២២។
លោក ស សុខា៖ «ខ្ញុំសូមផ្តាំផ្ញើដល់គ្រប់គណៈកម្មការ ទាំងអស់នៃកីឡាជាតិលើកទី៣ ឆ្នាំ២០២២ តំណាងសហព័ន្ធកីឡាជាតិទាំង៣៨ និងតំណាងកីឡាប៉ារ៉ាឡាំពិក ព្រមទាំងប្រតិភូ រាជធានី-ខេត្ត ទាំងអស់សូមសហការឈ្វេងយល់ពីការប្រយុទ្ធប្រឆាំងនឹងការប្រើប្រាស់សារធាតុហាមឃាត់ក្នុងកីឡា ដើម្បីកុំឱ្យជាប់បម្រាមពីទីភ្ញាក់ងារប្រយុទ្ធប្រឆាំងដូពីងពិភពលោក (WADA) នៃដំណើរឆ្ពោះទៅធ្វើម្ចាស់ផ្ទះ ស៊ីហ្គេម-អាស៊ានប៉ារ៉ាហ្គេម ២០២៣»។
សូមជម្រាបជូនថា ព្រឹត្តិការណ៍កីឡាជាតិ លើកទី៣ ឆ្នាំ២០២២ មានការប្រកួតលើ ៣៨ ប្រភេទកីឡា និងប្រភេទកីឡា ប៉ារ៉ាឡាំពិកចំនួន៧ ដែលមានវិញ្ញាសាសរុបចំនួន ៤០៥។
ការប្រកួតតាមប្រភេទកីឡា និងវិញ្ញាសាគ្រោងនឹងធ្វើឡើងនៅរាជធានីភ្នំពេញ កែប កំពត ព្រះសីហនុ និងខេត្តសៀមរាប។ កន្លងមក កម្ពុជាធ្លាប់បានរៀបចំព្រឹត្តិការណ៍កីឡាជាតិនេះចំនួន ២ លើករួចមកហើយ ដោយការប្រកួតកីឡាជាតិលើកទី១ ត្រូវបានប្រារព្ធធ្វើឡើង កាលពីឆ្នាំ២០១៦ និងការប្រកួតកីឡាជាតិលើកទី២ ត្រូវបានធ្វើឡើងកាលពីឆ្នាំ ២០១៨។
បើតាមលោក វ៉ាត់ ចំរើន គ្រប់ទម្រង់នៃការរៀបចំការប្រកួតកីឡាជាតិនេះ មានគោលដៅចម្បង ទាំងការរៀបចំពិធីបើក-បិទ ទម្រង់ការប្រកួតរបស់មន្ត្រីរៀបចំការប្រកួត ការកាត់សេចក្តីរបស់អាជ្ញាកណ្តាល ចៅក្រម ក៏ដូចជា បង្កើនគុណភាពបច្ចេកទេសរបស់កីឡាករ កីឡាការិនី លើប្រភេទកីឡាទាំងអស់ គឺសុទ្ធតែបាញ់ឆ្ពោះទៅទទួលរៀបចំធ្វើម្ចាស់ផ្ទះ ការប្រកួតកីឡា ស៊ីហ្គេម លើកទី៣២ និងការប្រកួតកីឡាជនពិការ អាស៊ានប៉ារ៉ាហ្គេម លើកទី១២ ឆ្នាំ២០២៣៕