ទីបំផុត ក្រុមបាល់ទាត់ជម្រើសជាតិកាតា នឹងចាប់ផ្តើមយុទ្ធនាការ World Cup លើទឹកដីខ្លួនឯងនៅរាត្រីថ្ងៃអាទិត្យ ទី ២០ ខែវិច្ឆិកា ឆ្នាំ ២០២២ ក្រោយពីការដេញថ្លៃយ៉ាងជោគជ័យរបស់ប្រទេសមួយនេះ បានបង្កើតឲ្យមានការត្រៀមខ្លួនប្រកបដោយភាពចម្រូងចម្រាស់ និងការចំណាយប្រាក់រាប់ពាន់លានដុល្លារអាមេរិក។
គេបានទទួលស្គាល់ជាទូទៅថា រដ្ឋឈូងសមុទ្រមួយនេះ បានចំណាយប្រាក់ដល់ទៅ២០០ពាន់លានដុល្លារអាមេរិក ទៅលើការរៀបចំព្រឹត្តិការណ៍កីឡាបាល់ទាត់ដ៏ធំបំផុត ហើយកាតា នឹងភ្លក្សរសជាតិលើលទ្ធផលចុងក្រោយ ជាលើកដំបូងរបស់ពួកគេ នៅកីឡដ្ឋាន Al Bayt ក្នុងទីក្រុង Al Khor នៅពេលដែលធ្វើជាម្ចាស់ផ្ទះទទួលក្រុមជម្រើសជាតិអេក្វាទ័រ។
គណៈកម្មការរៀបចំការប្រកួត បានបញ្ជាក់ថា សំបុត្រចំនួន២,៩លានសន្លឹក ក្នុងចំណោមសំបុត្រសរុបចំនួន៣,១លានសន្លឹក ត្រូវបានលក់អស់ ហើយពួកគេរំពឹងទុកថា នឹងមានអ្នកគាំទ្រចំនួន៦ម៉ឺននាក់ នៅថ្ងៃអាទិត្យ ទី ២០ ខែវិច្ឆិកា នេះ។
កីឡាកររបស់ក្រុមម្ចាស់ផ្ទះ បានត្រៀមខ្លួនយ៉ាងយកចិត្តទុក ដោយពួកគេបានចំណាយអស់រយៈពេលជាច្រើនខែ ក្នុងជុំរុំហ្វឹកហាត់ដាច់ដោយឡែក នៅខាងក្រៅប្រទេសកាតា ក្នុងកិច្ចខិតខំព្យាយាមដើម្បីឈានទៅវគ្គចាញ់ធ្លាក់ ក្នុងការបង្ហាញខ្លួនជាលើកដំបូងរបស់ពួកគេក្នុងព្រឹត្តិការណ៍ World Cup។
លោកគ្រូបង្វឹក Felix Sanchez បានប្រាប់សន្និសីទសារព័ត៌មាន នៅមុនពេលការប្រកួតបើកឆាកនៃព្រឹត្តិការណ៍ World Cup កាលពីល្ងាចថ្ងៃសៅរ៍ថា៖ «ស្ថានភាពរបស់យើង គឺខុសគ្នា បើធៀបទៅនឹងក្រុមផ្សេង ហើយយើងត្រូវតែធ្វើជាមួយនឹងអ្វីដែលយើងមាន»។
លោកបានបន្តថា៖ «ពិតណាស់ វាគឺជាការលះបង់ដ៏ធំមួយ ក្រោយពីបានចំណាយពេលជាច្រើននៅឆ្ងាយពីក្រុមគ្រួសាររបស់យើង និងនៅក្រៅប្រទេស ហើយនេះបង្ហាញពីការប្តេជ្ញាចិត្តរបស់កីឡាករក្នុងការប្រកួត ហើយទាំងអស់នោះ នឹងចាប់ផ្តើមនៅថ្ងៃស្អែកនេះ»។
ការប្រកួតពូល A នេះ ដែលត្រូវបានប្តូរពីថ្ងៃចន្ទ ដើម្បីអនុញ្ញាតក្រុមម្ចាស់ផ្ទះកាតា លេងការប្រកួតបើកឆាកមុនគេនោះ នឹងក្លាយជាការល្បងសមត្ថភាពដ៏សំខាន់សម្រាប់ក្រុមម្ចាស់ផ្ទះទាំងនៅលើ និងក្រៅទីលានប្រកួត។
សហព័ន្ធកីឡាបាលទាត់អន្តរជាតិហៅកាត់ថា FIFA និងគណៈកម្មការរៀបចំការប្រកួត សង្ឃឹមថា ការប្រកួតបើកឆាកនេះ អាចជួយលុបបំបាត់ភាពចម្រូងចម្រាស់មួយផ្នែក។
កាតា បានរងនូវការរិះគន់ជាច្រើនលើបញ្ហាសិទ្ធិមនុស្ស និងការប្រព្រឹត្តជាទូទៅ ក្នុងការធ្វើជាម្ចាស់ផ្ទះព្រឹត្តិការណ៍នេះ។ លោក Gianni Infantino ប្រធាន FIFA បានអំពាវនាវឲ្យក្រុមក្នុង World Cup ផ្តោតលើការលេងបាល់ទាត់ ក្នុងលិខិតមួយ កាលពីដើមខែនេះ និងបានចោទប្រកាន់ក្រុមអ្នករិះគន់នៅប្រទេសលោកខាងលិច ពីបទសម្តែង ឬលាក់ពុត កាលពីថ្ងៃសៅរ៍៕