.jpg)
ខ្សែការពារអន្តរជាតិអង់គ្លេស Kyle Walker (កណ្តាល) ខ្សែការពារ Harry Maguire (ឆ្វេង) និងខ្សែការពារ Kieran Trippier (ស្តាំ) ចូលរួមហ្វឹកហាត់ កាលពីថ្ងៃទី ២០ ខែវិច្ឆិកា។ AFP
ក្រុមបាល់ទាត់ជម្រើសជាតិអង់គ្លេស នឹងចាប់ផ្តើមយុទ្ធនាការ World Cup របស់ពួកគេ ក្នុងពេលពួកគេប៉ះជាមួយនឹងក្រុមបាល់ទាត់ជម្រើសជាតិអ៊ីរ៉ង់ នៅរាត្រីថ្ងៃចន្ទ ទី២១ ខែវិច្ឆិកា ដោយសង្ឃឹមថា អាចបោះជំហានចុងក្រោយបាន ក្រោយពីបានខកខានទាំងប្រផិតប្រផើយចំនួន២លើកក្នុងការឈ្នះពានរង្វាន់ធំជាលើកដំបូងរបស់ពួកគេ ក្នុងរយៈពេលច្រើនជាងកន្លះសតវត្សរ៍។
ទីបំផុត ក្រុមកីឡាកររបស់លោក Gareth Southgate អាចផ្តោតលើការប្រកួតកីឡាបាល់ទាត់ទាំងស្រុង ក្រោយពីការត្រៀមខ្លួនរបស់ពួកគេសម្រាប់យុទ្ធនាការនេះ បានលាយឡំជាមួយនឹងភាពចម្រូងចម្រាស់ជុំវិញប្រទេសម្ចាស់ផ្ទះកាតា។ ប៉ុន្តែ បច្ចុប្បន្ន ពួកគេត្រូវតែបង្វែរការចាប់អារម្មណ៍របស់ខ្លួនទៅកាន់ទីលានប្រកួត ខណៈដែលពួកគេនឹងចាប់ផ្តើមការប្រកួតក្នុងពូល B ក្នុងនាមជាក្រុមមួយក្នុងចំណោមក្រុមមានក្តីសង្ឃឹមខ្ពស់ក្នុងយុទ្ធនាការ World Cup។
ស្ថានភាពនេះ គឺខុសគ្នាស្រឡះទៅនឹងរយៈពេលកាលពី ៦ ឆ្នាំ ដែលនៅពេលនោះលោក Southgate បានចូលកាន់តំណែងក្នុងក្រុមជម្រើសជាតិអង់គ្លេស ដែលស្ថិតក្នុងចំណាត់ថ្នាក់ដ៏ទាប ក្រោយពីការជួបភាពអាម៉ាសជាបន្តបន្ទាប់ទាំងនៅលើ និងក្រៅទីលានប្រកួត។
ការធ្លាក់ចេញក្នុងព្រឹត្តិការណ៍ Euro ឆ្នាំ ២០១៦ ក្រោមស្នាដៃក្រុមជម្រើសជាតិអ៊ីស្លង់ បាននាំឲ្យមានការបញ្ចប់យ៉ាងខកចិត្តក្នុងរជ្ជកាលដឹកនាំរបស់លោក Roy Hodgson ក្នុងក្រុមជម្រើសជាតិអង់គ្លេស ស្របពេលដែលលោក Sam Allardyce ដែលជាគ្រូបង្វឹកមុន បានចំណាយពេលត្រឹមតែ ៦៧ ថ្ងៃ និងដឹកនាំបានត្រឹមតែ១ប្រកួត នៅមុនពេលចាកចេញពីតំណែងរបស់លោក ក្រោយពីការរិះគន់របស់សារព័ត៌មានជាបន្តបន្ទាប់។
ខ្សែប្រយុទ្ធអន្តរជាតិអង់គ្លេស Harry Kane (ឆ្វេង)និងលោកគ្រូបង្វឹក Gareth Southgate បង្ហាញមុខក្នុងសន្និសីទសារព័ត៌មាន នៅមជ្ឈមណ្ឌលសន្និបាតជាតិរបស់កាតា។ AFP
លោក Southgate បានចូលកាន់តំណែងដើម្បីរៀបចំឡើងក្រុមឡើងវិញ ហើយទីបំផុត លោកបានធ្វើឲ្យអង់គ្លេស ឈានដល់កម្រិតដ៏ខ្លាំងលើឆាកអន្តរជាតិវិញ។ ការឈានទៅប្រកួតវគ្គពាក់កណ្តាលផ្តាច់ព្រ័ត្រនៃព្រឹត្តិការណ៍ World Cup ឆ្នាំ ២០១៨ នៅប្រទេសរុស្ស៊ី បានធ្វើឲ្យគ្រូបង្វឹករូបនេះ ទទួលបាននូវការកោតសរសើរយ៉ាងខ្លាំងក្នុងចំណោមកីឡាករ និងអ្នកគាំទ្រ។
បន្ទាប់មកទៀត លោកបានបង្កើតឲ្យមានការភ្ញាក់ផ្អើល តាមរយៈការដឹកនាំឲ្យក្រុមជម្រើសជាតិអង់គ្លេស ឈានទៅវគ្គផ្តាច់ព្រ័ត្រក្នុងយុទ្ធនាការដ៏ធំមួយជាលើកដំបូងក្នុងរយៈពេល ៥៥ ឆ្នាំ ក្នុងព្រឹត្តិការណ៍ Euro កាលពីឆ្នាំមុន។
ប៉ុន្តែ ទោះបីជាយ៉ាងណា ពួកគេត្រូវតែព្យាយាមឆ្លងឲ្យផុតពីវគ្គចែកពូលជាមុនសិន ខណៈដែលពួកគេក៏ត្រូវប៉ះជាមួយនឹងក្រុមជម្រើសជាតិអាមេរិក និងវេលស៍ ផងដែរ៕ AFP
