The Phnom Penh Post Search

Search form

Logo of Phnom Penh Post newspaper Phnom Penh Post - ជើង​ខ្លាំង​ប្រេស៊ីល និង​ព័រ​ទុយ​ហ្គាល់ ដឹក​ដៃគ្នា​ទៅ​វគ្គ ​១៦ ក្រុម ខណៈ​កូរ៉េ ចាញ់​​ទាំង​សោកស្តាយ

ជើង​ខ្លាំង​ប្រេស៊ីល និង​ព័រ​ទុយ​ហ្គាល់ ដឹក​ដៃគ្នា​ទៅ​វគ្គ ​១៦ ក្រុម ខណៈ​កូរ៉េ ចាញ់​​ទាំង​សោកស្តាយ

Content image - Phnom Penh Post
ខ្សែ​បម្រើ​អន្តរ​ជាតិ​ប្រេស៊ីល Casemiro (ឆ្វេង) អប​អរ​​ជាមួយនឹង​ខ្សែ​ប្រយុទ្ធ Vinicius Junior ក្រោយពី​រក​បាន​​គ្រាប់​បាល់​ឈ្នះ​ ក្នុងការ​ប្រកួត​ជាមួយនឹង​ស្វ៊ីស កាលពីថ្ងៃ​ទី​២៨ ខែវិច្ឆិកា​។ AFP

ជើង​ខ្លាំង​ប្រេស៊ីល និង​ព័រ​ទុយ​ហ្គាល់ ដឹក​ដៃគ្នា​ទៅ​វគ្គ ​១៦ ក្រុម ខណៈ​កូរ៉េ ចាញ់​​ទាំង​សោកស្តាយ

ខ្សែ​បម្រើ Bruno Fernandes បាន​​ស៊ុត​បាល់បញ្ចូល​ទី​២​គ្រាប់ ដើម្បី​ជួយ​ឲ្យ​ក្រុម​បាល់ទាត់​ជម្រើស​ជាតិ​ព័រ​ទុយ​ហ្គាល់ ដណ្តើម​បាន​ជ័យ​ជម្នះ​ក្នុងលទ្ធ​ផល ២-០ លើ​ក្រុម​ជ្រើស​ជាតិ​អ៊ុយ​រូ​ហ្គាយ កាលពីថ្ងៃ​ចន្ទ ទី​ ២៨ ខែ​វិច្ឆិកា និង​ជួយ​ឲ្យ​​ពួក​​គេ​ឈាន​ទៅ​វគ្គ​បន្ត​នៃ​ព្រឹត្តិការណ៍​ World Cup រួម​ជាមួយនឹងក្រុម​ម្ចាស់​ជើង​ឯក ​២​ សម័យ​កាល បារាំង និង​ក្រុម​ម្ចាស់​ជើង​ឯក ​៥ ​សម័យ​កាល ប្រេស៊ីល​។

ខ្សែ​​បម្រើ​​របស់​ក្លិប Manchester United រូប​នេះ បាន​ស៊ុត​បាល់បញ្ចូល​ទី​យ៉ាងល្អ ក្រោយពី​លេង​បាន​ត្រឹម​តែ​៩​នាទី​ក្នុងតង់ទី​២ ហើយ​បន្ទាប់មក បាន​បន្ថែម​ ១ ​គ្រាប់​ទៀត​ពីការ​ស៊ុត​បាល់ប៉េ​ណាល់ទី​នៅ​ជិត​បញ្ចប់ការ​ប្រកួត ក្រោយពី​ការ​ធ្វើ​ឲ្យ​បាល់​ប៉ះ​​ដៃ​ពី​កីឡាករ Jose Maria Gimenez​។

ការ​ប្រកួតនៅ​​កីឡដ្ឋាន Lusail​ ដែលអាច​ផ្ទុក​អ្នក​ទស្សនា​បាន​ចំនួន​ ៨៩ ០០០ នាក់មួយនេះ ក៏​ត្រូវ​បាន​បង្អាក់​ក្នុង​រយៈ​ពេល​ដ៏ខ្លី​ផង​ដែរ នៅពេល​ដែល​បុរស​ម្នាក់ បាន​រត់​ចូល​ទីលាន​ប្រកួត ដើម្បី​បង្ហាញ​សារ​គាំទ្រ​​ប្រទេស​អ៊ុយក្រែន និង​ស្ត្រីនៅអុី​រ៉ង់​។

លោក Fernando Santos គ្រូបង្វឹកនៃក្រុម​ជម្រើស​ជាតិ​ព័រ​ទុយ​ហ្គាល់ បាន​ឲ្យដឹងថា៖ «​នេះគឺ​ជាការ​ដណ្តើម​បាន​ជ័យ​ជម្នះ​ដ៏​ស័ក្តិ​សម​។ ជុំ​ទី​១​ បញ្ចប់ហើយ ប៉ុន្តែ យើង​នៅ​តែ​មានការ​ស្រេកឃ្លាន​។ ពេល​នេះ ខ្ញុំនឹង​បន្ត​ធ្វើ​ការ​ដើម្បី​​ពង្រឹង​ចំណុច​ដែលត្រូវ​ពង្រឹង​»។

Content image - Phnom Penh Post
ខ្សែ​បម្រើ​អន្តរ​ជាតិ​ព័រ​ទុយ​ហ្គាល់ Bruno Fernandes (ឆ្វេង) និង​ខ្សែ​ការ​ពារ Mathias Olivera របស់​អ៊ុយ​រូ​ហ្គាយ ព្យា​យាម​ដណ្តើម​បាល់ ក្នុងការ​ប្រកួត World Cup កាលពីថ្ងៃ​ទី​ ២៨ ខែ​វិច្ឆិកា។ AFP

ស្រប​ពេល​ជាមួយ​គ្នានេះ ក្រុម​ជម្រើស​ជាតិ​ប្រេស៊ីល ក៏បាន​ឈាន​ទៅ​វគ្គ​​បន្ត​ផង​ដែរ ក្រោយពី​បាន​យកឈ្នះ​លើ​ក្រុម​ជម្រើស​ជាតិ​ស្វ៊ីស ទាំង​ប្រផិត​ប្រផើយ​ក្នុងលទ្ធ​ផល ១-០​ ក្រោយពី​ខ្សែ​បម្រើ Casemiro បាន​ស៊ុត​បាល់ប​ញ្ចូល​ទីនៅ​នាទី ទី​៨៣ នា​កីឡដ្ឋាន Stadium 974​។

ដោយឡែក ក្រុម​បាល់ទាត់​ជម្រើស​ជាតិកូរ៉េ​ខាង​ត្បូង បាន​រង​នូវ​ការ​ខកចិត្ត​ធំ​ ក្រោយពី​បាន​រង​បរា​ជ័យ​ទាំង​ប្រផិត​ប្រផើយ​ក្នុងលទ្ធ​ផល ៣-២ ក្រោមស្នា​ដៃក្រុម​ជម្រើស​ជាតិ​ហ្គា​ណា ក្នុងការ​ប្រកួត​ដ៏រំភើប​ នៅ​ថ្ងៃ​ដដែលនោះ​​។

ខ្សែ​បម្រើ Mohammed Kudus បាន​ស៊ុត​បាល់​បញ្ចូល​ទី​២​ គ្រាប់ឲ្យ​ក្រុម​ជម្រើស​ជាតិ​ហ្គា​ណា ដើម្បី​ធ្វើ​ឲ្យ​ក្រុមជម្រើស​ជាតិ​​កូរ៉េខាង​ត្បូ​របស់​លោក Paulo Bento ប្រឈម​មុខ​នឹងការ​ធ្លាក់​ចេញត្រឹម​វគ្គ​ចែកពូល​។

ក្នុង​ការ​ប្រកួត​គូ​បើក​ឆាកនៅ​ថ្ងៃ​ដដែលនោះ ក្រុម​ជម្រើស​ជាតិ​ស៊ែ​ប៊ី គួរ​តែ​មាន​ការ​សោកស្តាយ ចំពោះ​ការ​​ខ្ជះ​ខ្ជាយ​ឱកាស​ជា​ច្រើន ក្នុង​ពេល​ពួកគេ​បាន​បញ្ចប់​ក្នុង​លទ្ធ​ផល​ស្មើ ៣-៣ ជាមួយនឹងក្រុម​ជម្រើស​ជាតិកាមេរូន នៅ​កីឡដ្ឋាន Al Janoub៕ AFP

អត្ថបទគួរចាប់អារម្មណ៍