The Phnom Penh Post Search

Search form

Logo of Phnom Penh Post newspaper Phnom Penh Post - គូ​សត្រូវ​​នយោ​បាយ អាមេរិក និង​​អ៊ីរ៉ង់ ត្រៀម​ប៉ះ​គ្នាក្នុង World Cup រាត្រីនេះ

គូ​សត្រូវ​​នយោ​បាយ អាមេរិក និង​​អ៊ីរ៉ង់ ត្រៀម​ប៉ះ​គ្នាក្នុង World Cup រាត្រីនេះ

Content image - Phnom Penh Post
ខ្សែ​បម្រើ​អន្តរ​ជាតិ​អាមេរិក Tyler Adams និង​លោក Gregg Berhalter និយាយ​ក្នុង​សន្និសីទ​សារ​ព័ត៌​មាន​ កាលពីថ្ងៃ​ទី​២៨ ខែ​វិច្ឆិកា ឆ្នាំ​២០២២​។ AFP

គូ​សត្រូវ​​នយោ​បាយ អាមេរិក និង​​អ៊ីរ៉ង់ ត្រៀម​ប៉ះ​គ្នាក្នុង World Cup រាត្រីនេះ

អាមេរិក និង​អ៊ីរ៉ង់ នឹងត្រូវ​ជួប​គ្នា​​ក្នុង​ការ​ប្រកួត​ដ៏​សំខាន់​​​នៃ​ព្រឹត្តិ​ការណ៍ World Cup ដែល​ត្រូវ​បាន​​គេ​ចាត់ទុក​ថា ​ជាផ្នែកមួយនៃ​ការ​ប្រឈម​មុខ​ដាក់​គ្នា​​​ក្នុងផ្នែក​នយោ​បាយ​ផងដែរ នៅ​រាត្រីថ្ងៃ​អង្គារ ទី​ ២៩ ខែ​វិច្ឆិកា នេះ ស្រប​ពេល​ដែលក្រុម​បាល់ទាត់​ជម្រើស​ជាតិ​អង់គ្លេស ដាក់​គោល​ដៅ​​លើ​ការ​ប្រជែង​យក​កៅអី​វគ្គ​ ១៦ ​ក្រុម​ចុងក្រោយ ក្នុង​នាម​ជា​ក្រុម​លេខ ​១ ​ក្នុងពូល តាមរយៈ​ការយកឈ្នះ​​លើ​ក្រុម​ជម្រើស​ជាតិ​វេលស៍​​​។

សូម្បី​តែ​លទ្ធ​ផល​នៃ​ការ​ចាប់​ឆ្នោត​សម្រាប់​យុទ្ធ​នា​ការ​នេះ ត្រូវ​បាន​ប្រកាស​ឡើង​កាលពី​ខែ​មេសា ការ​ប្រកួត​​ក្នុង​ពូល B រវាងក្រុម​ជម្រើស​ជាតិ​អាមេរិក និង​​អ៊ីរ៉ង់ ត្រូវ​បាន​ចាត់​ទុក​ថា ជា​ការ​ប្រកួត​មួយ​ក្នុង​ចំណោម​​ការ​ប្រកួត​ដ៏​គួរ​ឲ្យ​ចាប់​អារម្មណ៍​បំផុត​​នៃ​វគ្គ​ចែកពូល នៅ​ប្រទេស​កាតា​។

ជាមួយនឹង​ការ​ផ្តោត​អារម្មណ៍​តិច​តួច​ប៉ុណ្ណោះ​លើ​លទ្ធផល ការ​ប្រកួត​នា​កីឡដ្ឋាន Thumama នឹង​បង្កើត​ឲ្យ​មាន​​ការ​លើក​ឡើង​ជាច្រើន​ទាក់ទង​នឹង​បញ្ហា​នយោ​បាយ ហើយ​នេះ​គឺ​​ការ​ជួប​គ្នា​ជាលើក​ទី​៣​នៅលើ​ទីលាន​វាល​ស្មៅ​រវាង​ក្រុម​ប្រទេស​ទាំង​ ២ ដែល​​ជា​គូ​សត្រូវ​​ផ្នែក​មនោ​គមវិជ្ជា​ អស់​រយៈពេល​ច្រើន​ជាង​ ៤០ ​ឆ្នាំមក​ហើយ​។

ប៉ុន្តែ ការ​ប្រកួត​នៅ​រាត្រី​ថ្ងៃ​អង្គា​រនេះ នឹង​នាំ​ឲ្យ​មាន​ភាព​តាន​តឹង​បន្ថែម​ទៀត ខណៈ​ដែល​ក្រុម​​ទាំង​ ២ ដឹង​ថា ការ​ដណ្តើម​បាន​ជ័យ​ជម្នះ​នឹង​ធ្វើឲ្យ​ក្រុម​មួយ​ក្នុង​ចំណោម​ពួកគេ ឈាន​ទៅ​វគ្គ​​បន្ត ស្រប​​ពេល​ដែល​ក្រុម​ចាញ់ នឹង​ត្រូវ​ធ្លាក់ចេញ​​។

បន្ថែម​ទៅលើ​នេះ​ទៅទៀត ភាព​តាន​តឹង​នាន បាន​ចាប់​ផ្តើម​ផ្ទុះ​ឡើង កាលពី​ចុង​សប្តាហ៍​ថ្មី​ៗនេះ ក្រោយពី​សហ​ព័ន្ធ​កីឡាបា​ល់​ទាត់​​អាមេរិក បាន​បង្ហោះ​រូបភាព​​នៃ​ទង់​ជាតិ​​អ៊ីរ៉ង់ ដែល​ត្រូវ​បាន​កែ​ខុស​ពី​ទម្រង់​ដើម នៅលើ​បណ្តាញ​​សង្គមរបស់​ខ្លួន​។

សកម្មភាពនេះ បាន​បង្កើត​ឲ្យ​មានការ​ខឹង​សម្បា​ដល់​ប្រធាន​សហ​ព័ន្ធកីឡាបាល់ទាត់​​អ៊ីរ៉ង់ ដែល​បាន​ដាក់​ពាក្យ​បណ្តឹង​ទៅ​កាន់​​សហ​ព័ន្ធ​កីឡាបាល់ទាត់​អន្តរ​ជាតិហៅ​កាត់ថា FIFA ដើម្បី​ទាម​ទារ​ឲ្យ​មានការ​ដាក់ទណ្ឌ​កម្ម​។

Content image - Phnom Penh Post
ខ្សែ​ប្រយុទ្ធ​អន្តរ​ជាតិអង់គ្លេស Jack Grealish (ឆ្វេង) ខ្សែ​ប្រយុទ្ធ Phil Foden (កណ្តាល)​ និង​ខ្សែ​​ប្រយុទ្ធ Callum Wilson (ស្តាំ) ចូលរួម​ការ​ហ្វឹក​ហាត់ កាលពីថ្ងៃទី​ ២៨ ខែ​វិច្ឆិកា ឆ្នាំ​ ២០២២​។ AFP

ដំបូង​ឡើង សហ​ព័ន្ធកីឡាបាល់ទាត់​អាមេរិក បាន​បញ្ជាក់​ថា ទង់​ជាតិ​ដែល​ត្រូវ​បាន​កែ​ខុសពី​ទម្រង់​ដើម​នេះ ត្រូវ​បាន​បង្ហោះ​ឡើង​ដើម្បី​ធ្វើ​ជា​សារ​គាំទ្រ​ដល់​​ក្រុមបាតុករ​ជាស្ត្រី​នៅ​​អ៊ីរ៉ង់ នៅមុន​ពេល​​លុប​ចោល​​​វិញ​​។

លោក Gregg Berhalter គ្រូ​បង្វឹក​ក្រុម​ជម្រើស​ជាតិអាមេរិក បាន​និយាយ​កាលពីថ្ងៃចន្ទថា កីឡាករ​ និង​បុគ្គលិក​របស់​លោក មិនបានដឹង​ពី​បញ្ហា​ទាក់ទង​នឹង​ទង់​ជាតិឡើយ និង​បានព្យាយាម​កាត់​បន្ថយ​ភាព​តាន​តឹង​នានា តាមរយៈ​ការ​សង្កត់​ធ្ងន់​ថា រឿង​នយោបាយ មិនមែន​ជា​កត្តា​ដែលត្រូវ​គិតនៅ​រាត្រីនេះឡើយ​។​

លោក Berhalter បាន​ឲ្យដឹងថា៖ «នៅពេល​ដែលខ្ញុំ​គិត​អំពីការ​ប្រកួតនេះ ខ្ញុំ​ដឹង​ថា មាន​ចំណុច​ពាក់​ព័ន្ធ​ជាច្រើន​ទាក់ទង​នឹង​ការ​ប្រកួតនេះ​។ ប៉ុន្តែ សម្រាប់យើង នេះ​គឺ​ជា​ការ​ប្រកួត​កីឡា​បាល់ទាត់ ជាមួយ​នឹងក្រុម​ដ៏ខ្លាំង​មួយ ហើយ​គ្មាន​ចំណុច​អ្វី​លើស​​ហ្នឹង​ឡើយ​។ នេះ​គឺជា​ការ​ប្រកួត​កាត់​សេចក្តី រវាងក្រុម​ខ្លាំង​ ២ ដែល​ចង់​ទៅ​វគ្គ​បន្ត​»​៕ AFP

កម្មវិធី​ប្រកួតនៅ​រាត្រីនេះ៖

- អេ​ក្វាទ័រ v សេណេហ្គាល់ ម៉ោង ១០ យប់

- ហូ​ឡង់ v កា​តា ម៉ោង ១០ យប់

​- អ៊ីរ៉ង់ v អាមេរិក ម៉ោង ២ ទៀប​ភ្លឺ

- វេលស៍ v អង់គ្លេស ម៉ោង ២ ទៀប​ភ្លឺ

អត្ថបទគួរចាប់អារម្មណ៍