ភ្នំពេញៈ លោកនាយករដ្ឋមន្ត្រី ហ៊ុន សែន បានកោតសរសើរដល់ក្រសួងអប់រំ យុវជន និងកីឡា និងគណៈកម្មាធិការជាតិអូឡាំពិកកម្ពុជា(NOCC)ព្រមទាំងសហព័ន្ធកីឡាជាតិនិងភាគីពាក់ព័ន្ធផ្សេងទៀតដែលបានរួមគ្នារៀបចំការប្រកួតកីឡាជាតិលើកទី៣ និងកីឡាជនពិការជាតិលើកទី១ ឆ្នាំនេះ បានរលូន និងបញ្ចប់ដោយជោគជ័យដោយក្រសួង និងរាជធានី-ខេត្តទាំង២៨សុទ្ធតែដណ្តើមបានមេដាយក្នុងព្រឹត្តិការណ៍នេះ។
ឆ្លើយតបទៅនឹងរបាយការណ៍រៀបចំការប្រកួតកីឡាជាតិរបស់លោក ស សុខា រដ្ឋលេខាធិការក្រសួងអប់រំ យុវជន និងកីឡា នៅក្នុងពិធីបិទការប្រកួតកីឡាជាតិនៅពហុកីឡដ្ឋានជាតិមរតកតេជោកាលពីយប់ថ្ងៃទី៣០ ខែវិច្ឆិកា លោកហ៊ុន សែន បានលើកឡើងថា ការប្រកួតនេះ បានប្រព្រឹត្តទៅដោយរលូន និងជោគជ័យ ក្រោមបរិយាកាសសប្បាយរីករាយ ហើយកីឡាករ កីឡាការិនី បានខិតខំហ្វឹកហាត់ និងប្រឹងប្រែងប្រកួតអស់ពីសមត្ថភាព និងទេពកោសល្យរៀងៗខ្លួន រហូតទទួលបានជ័យជម្នះគួរជាទីមោទនៈ។
លោក ហ៊ុន សែន បានថ្លែងថា៖ «ខ្ញុំពិតជាមានមោទនភាពចំពោះការរៀបចំពិធី និងដំណើរការនៃការប្រកួតដ៏ល្អនេះ ដែលបានទាក់ទាញអ្នកទស្សនាផ្ទាល់ជាង៤ម៉ឺននាក់ និងអ្នកទស្សនាតាមប្រព័ន្ធផ្សព្វផ្សាយសង្គមរាប់លាននាក់។ ខ្ញុំសូមកោតសរសើរដល់ថ្នាក់ដឹកនាំ និងគណៈកម្មាធិការរៀបចំការប្រកួត ជាពិសេសសិល្បករ សិល្បការិនី និងយោធិនបញ្ជាការដ្ឋានអង្គរក្សចំពោះកិច្ចខិតខំប្រឹងប្រែងហ្វឹកហាត់ និងការសម្ដែងប្រកបដោយទេពកោសល្យ ដែលនេះបង្ហាញនូវកិច្ចសហការល្អ ក្នុងស្មារតីសាមគ្គីភាព និងការទទួលខុសត្រូវខ្ពស់»។
ទន្ទឹមនឹងនេះ លោក ហ៊ុន សែន បានរំឭកដល់កីឡាករ កីឡាការិនីដែលបានចូលរួមថា ការឈ្នះចាញ់ពីការប្រកួតកីឡា គឺជាមេរៀន និងបទពិសោធន៍ ក្នុងការពង្រឹងសមត្ថភាពរបស់ខ្លួនឱ្យកាន់តែប្រសើរ ដើម្បីលើកកម្ពស់ជំនាញវិជ្ជាជីវៈកីឡាបន្ថែមទៀត។ផ្ទុយទៅវិញ ការអាក់អន់ចិត្ត ឬការបាក់ទឹកចិត្តដោយសារការចាញ់អាចធ្វើឱ្យអត្តពលិកបាត់បង់ការតស៊ូ និងការខិតខំប្រឹងប្រែងបន្ត ដើម្បីយកឈ្នះក្នុងការប្រកួតនៅពេលអនាគត។
លោកបានបន្ថែមថា៖ «ខ្ញុំមានសុទិដ្ឋិនិយម និងសូមអបអរចំពោះក្រុមកីឡាករ កីឡាការិនីរបស់ក្រសួងស្ថាប័ន រាជធានី-ខេត្ត ដែលទទួលបានចំណាត់ថ្នាក់ល្អ និងមេដាយច្រើនជាងគេ ហើយសូមឱ្យបន្តយកចិត្តទុកដាក់ពង្រឹងសមត្ថភាព ជំនាញកីឡា និងបំផុសចលនាកីឡាក្នុងដែនសមត្ថកិច្ចគ្រប់គ្រងរបស់ខ្លួនឱ្យកាន់តែរីកចម្រើនថែមទៀត»។
ចំពោះក្រសួង ស្ថាប័ន រាជធានី-ខេត្ត ដែលទទួលបានលទ្ធផលមិនល្អ លោក ហ៊ុន សែន បានលើកទឹកចិត្តឱ្យបន្តយកចិត្តទុកដាក់ កែលម្អ និងត្រូវខិតខំប្រឹងប្រែងបន្ត ដើម្បីសម្រេចបាននៅលទ្ធផលល្អក្នុងការប្រកួតកីឡាជាតិ លើកទី៤ និងកីឡាជនពិការជាតិ លើកទី២ ឆ្នាំ២០២៤ ហើយលោកបញ្ជាក់ថា៖ «ឆ្នាំ២០២៤ ខ្ញុំនឹងចូលរួម ក្នុងឋានៈជាកីឡាករអុកចត្រង្គផងដែរ។ សូមចុះឈ្មោះទុកពីឥឡូវ បើទោះបីជាចាញ់ ឬឈ្នះ ក៏បានមកអង្គុយកំដរ សម្រាប់កីឡាករជើងចាស់មួយនេះ»។
ជាមួយគ្នានេះ លោក ហ៊ុន សែន បានជំរុញឱ្យគ្រប់ផ្នែក ជាពិសេសគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣ ត្រូវពន្លឿនការពង្រឹងសមត្ថភាព និងត្រៀមខ្លួនឱ្យបានល្អថែមទៀត ដើម្បីធានាបាននូវការទទួលបានជោគជ័យ ពេលកម្ពុជាធ្វើម្ចាស់ផ្ទះស៊ីហ្គេម និងអាស៊ានប៉ារ៉ាហ្គេមនេះ នៅឆ្នាំ២០២៣។
«គណៈកម្មាធិការជាតិរៀបចំការប្រកួតកីឡាស៊ីហ្គេម និងអាស៊ានប៉ារ៉ាហ្គេមឆ្នាំ២០២៣ត្រូវជំរុញល្បឿននៃការត្រៀមខ្លួនឱ្យបានគ្រប់ជ្រុងជ្រោយជាស្រេចដើម្បីធានាបាននូវជោគជ័យខ្ពស់ ក្នុងការធ្វើជាម្ចាស់ផ្ទះរៀបចំការប្រកួតកីឡាកម្រិតអន្តរជាតិដ៏ធំជាប្រវត្តិសាស្ត្រនេះ»។ នេះបើតាមការបញ្ជាក់ពីលោក ហ៊ុន សែន នៅក្នុងការផ្តល់នូវទស្សនៈ និងចំណុចគន្លឹះមួយចំនួនរបស់លោក សម្រាប់ត្រៀមទៅស៊ីហ្គេម ឆ្នាំ២០២៣។
ជាមួយនេះដែរ លោក ហ៊ុន សែន បានជំរុញឱ្យក្រសួងស្ថាប័ន និងអាជ្ញាធររាជធានី-ខេត្ត ដែលមិនទាន់មានក្រុមកីឡាចូលរួមប្រកួត ត្រូវបង្កើតអង្គភាពកីឡា ឬសមាគមកីឡាប្រចាំក្រសួងស្ថាប័ន អាជ្ញាធររាជធានី-ខេត្តរបស់ខ្លួនដោយមានយន្តការគ្រប់គ្រងដឹកនាំច្បាស់លាស់ មានតម្លាភាពក្នុងការគ្រប់គ្រង និងបង្កើនសមត្ថភាពកីឡាករ កីឡាការិនីរបស់ខ្លួនជាប្រចាំ សម្រាប់ចូលរួមក្នុងការប្រកួតថ្នាក់ជាតិ និងអន្តរជាតិ។
បន្ថែមពីលើនេះ លោកបានជំរុញឱ្យក្រសួងស្ថាប័នទាំងនោះ ត្រូវយកចិត្តទុកដាក់ក្នុងការបង្កើតក្រុមកីឡា ដែលខ្លួនមានឧត្តមភាពនិងត្រូវរៀបចំការប្រកួតក្នុងក្របខ័ណ្ឌផ្ទៃក្នុងតាមពេលវេលាសមស្របសម្រាប់ពង្រឹងសមត្ថភាពកីឡាករ កីឡាការិនី ដើម្បីចូលរួមក្នុងការប្រកួតកីឡាជាតិលើកទី៤ និងកីឡាជនពិការជាតិលើកទី២ ឱ្យបានកាន់តែច្រើន។
លោកបានបញ្ជាក់ថា៖ «គ្រប់ក្រសួងស្ថាប័នពាក់ព័ន្ធ និងអាជ្ញាធររាជធានី-ខេត្ត ត្រូវពង្រីកកិច្ចសហការឱ្យបានជិតស្និទ្ធប្រកបដោយស្មារតីទទួលខុសត្រូវខ្ពស់ និងស្របតាមអភិក្រម«ជីវភាពនៃប្រព័ន្ធតួអង្គតែមួយ»ដើម្បីដោះស្រាយនូវរាល់បញ្ហាប្រឈមនានាជាបន្ទាន់សំដៅធានាបានប្រសិទ្ធភាពក្នុងការដឹកនាំការគ្រប់គ្រង និងការរៀបចំព្រឹត្តិការណ៍កីឡាដ៏ធំនៅឆ្នាំ២០២៣ ហើយសូមអំពាវនាវដល់វិស័យឯកជន ក្រុមហ៊ុន សហគ្រាស និងសប្បុរសជន ចូលរួមជួយដល់មូលនិធិកីឡាស៊ីហ្គេម និងអាស៊ានប៉ារ៉ាហ្គេម ដើម្បីរួមចំណែកដល់ភាពជោគជ័យនៃការរៀបចំការប្រកួតកីឡាកម្រិតអន្តរជាតិនេះ»។
ជាងនេះទៅទៀត លោក ហ៊ុន សែន បានអំពាវនាវដល់ប្រជាជនទាំងអស់ឱ្យប្រកាន់ខ្ជាប់នូវស្មារតី«ប្រជាជនម្នាក់ជាម្ចាស់ផ្ទះម្នាក់» ពិសេសប្រជាជន នៅតាមរាជធានី-ខេត្ត ដែលត្រូវត្រៀមទទួលរៀបចំការប្រកួតកីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ សូមរៀបចំអនាម័យ ថែរក្សាបរិស្ថានឱ្យបានល្អ និងរៀបចំតុបតែងលម្អ ដើម្បីលើកកម្ពស់សោភណភាពមូលដ្ឋានរបស់ខ្លួន សំដៅលើកមុខមាត់កម្ពុជា និងទាក់ទាញការចាប់អារម្មណ៍របស់ប្រតិភូកីឡា និងភ្ញៀវអន្តរជាតិទាំងអស់ ដែលនឹងអញ្ជើញមកចូលរួមការប្រកួតនៅកម្ពុជានៅឆ្នាំ២០២៣។
លើសពីនេះទៅទៀត លោកបានលើកទឹកចិត្តឱ្យគ្រប់ភាគីពាក់ព័ន្ធ បន្តរៀបចំកម្មវិធីយុទ្ធនាការអប់រំសង្គម «មានអ្វីលើសពីការប្រកួតកីឡា» របស់សហភាពសហព័ន្ធយុវជនកម្ពុជា ដើម្បីបង្កើនការយល់ដឹងអំពីបច្ច័យជាវិជ្ជមាន នៃការធ្វើជាម្ចាស់ផ្ទះរៀបចំព្រឹត្តិការណ៍កីឡាដ៏ធំជាប្រវត្តិសាស្ត្រនេះ ។
នៅក្នុងពិធីនោះដែរ លោក ថោង ខុន ប្រធានគណៈកម្មាធិការជាតិអូឡាំពិកកម្ពុជា(NOCC)និងជាអនុប្រធានអចិន្ត្រៃយ៍នៃគណៈកម្មាធិការជាតិ CAMSOC បានប្តេជ្ញាចិត្តខ្ពស់ដោយគោរពអនុវត្តតាមអនុសាសន៍ណែនាំរបស់ លោកនាយករដ្ឋមន្ត្រីដើម្បីពង្រឹងសមត្ថភាព គុណភាពកីឡាករ កីឡាការិនី ឆ្ពោះទៅរកឧត្តមភាពបច្ចេកទេសកីឡាកម្រិតខ្ពស់ ក្នុងការប្រកួតកីឡាស៊ីហ្គេម និងអាស៊ានប៉ារ៉ាហ្គេមឆ្នាំ២០២៣។
លោករដ្ឋមន្ត្រីបានថ្លែងថា៖ «ខ្ញុំសូមគោរពថ្លែងអំណរគុណសាជាថ្មីដល់ក្រសួងអប់រំ យុវជន និងកីឡា និងសហព័ន្ធកីឡាជាតិ ក្រោមកិច្ចសហការយ៉ាងជិតស្និទ្ធជាមួយគណៈកម្មាធិការជាតិរៀបចំកីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ និងNOCC ធ្វើឱ្យព្រឹត្តិការណ៍កីឡាជាតិលើកទី៣ និងកីឡាជាតិជនពិការលើកទី១ នេះ ប្រព្រឹត្តទៅដោយរលូន និងទទួលបានជោគជ័យ ហើយដែលជាឱកាសផ្ដល់នូវមេរៀនបទពិសោធន៍ដ៏ល្អៗ សម្រាប់ឆ្ពោះទៅរៀបចំស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ ឱ្យទទួលបានជោគជ័យ»៕