.jpg)
លោកបណ្ឌិត អាំង សិរីពិសិដ្ឋ ពេលឡើងបំពាក់មេដាយ ដល់កីឡាករ ដែលឈ្នះបានជយលាភី ការប្រកួតបាល់ទះឆ្នេរខ្សាច់ ក្នុងព្រឹត្តិការណ៍កីឡាជាតិ លើកទី៣ ឆ្នាំ២២២។ រូបថត ឈន ណន
ភ្នំពេញ៖ មន្រ្តីជំនាញរបស់សហព័ន្ធកីឡាបាល់ទះកម្ពុជា លោកបណ្ឌិត អាំង សិរីពិសិដ្ឋ បានចាត់ទុក ការប្រកួតកីឡាជាតិ លើកទី៣ និងកីឡាជនពិការជាតិ លើកទី១ ឆ្នាំ ២០២២ ដែលទើបតែបញ្ចប់ កាលពីពេលថ្មីៗនេះថា បានផ្តល់អត្តប្រយោជន៍ជាច្រើនទាំងសម្រាប់កីឡាករ កីឡាការិនី ជាពិសេសក្រុមមន្រ្តីបច្ចេកទេស ឱ្យទទួលនូវបទពិសោធបន្ថែម ក្នុងការពង្រឹងជំនាញរបស់ពួកគាត់ កាន់តែប្រសើរ សម្រាប់ត្រៀមឆ្ពោះទៅធ្វើជាម្ចាស់ផ្ទះ ការប្រកួតស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣។
អគ្គលេខាធិការសហព័ន្ធកីឡាបាល់ទះកម្ពុជា លោក អាំង សិរីពិសិដ្ឋ បានលើកឡើងថា តាមរយៈការប្រកួតកីឡាជាតិលើកទី៣ ចំនួន១២ថ្ងៃនេះ គឺអ្វីៗមានភាពល្អប្រសើរ ដែលបង្ហាញពីភាពចាស់ទុំនៃការគ្រប់គ្រង និងរៀបចំព្រឹត្តិការណ៍ ពិសេសវាជាឱកាសមួយ សម្រាប់សហព័ន្ធកីឡាបាល់ទះកម្ពុជា ក្នុងការពង្រឹងសមត្ថភាពមន្ដ្រីបច្ចេកទេស អាជ្ញាកណ្ដាល ដើម្បីជាការតេស្ដសាកល្បង ក៏ដូចជាពិនិត្យពីចំណុចខ្វះខាត និងកំហុសឆ្គង ដែលយើងត្រូវធ្វើការកែតម្រូវ និងបំពេញបន្ថែម។
លោក អាំង សិរីពិសិដ្ឋ បានថ្លែង នៅក្នុងពិធីបិទការប្រកួតកីឡាបាល់ទះឆ្នេរខ្សាច់ ក្នុងព្រឹត្តិការណ៍កីឡាជាតិនេះ កាលពីថ្ងៃទី២៩ ខែវិច្ឆិកាថា៖ «ចំពោះមន្រ្តីអាជ្ញាកណ្តាលរបស់យើង កាន់តែមានភាពរឹងមាំថែមទៀត ហើយជាក់ស្តែង នៅក្នុងព្រឹត្តិការណ៍កីឡាជាតិនេះ សហព័ន្ធបានផ្ដល់ឱកាសដល់មន្ដ្រីបច្ចេកទេសវ័យក្មេងៗជាច្រើនឱ្យចូលរួមដឹកនាំ និងរៀបចំការប្រកួតនេះ ព្រោះពេលនេះជាយុគសម័យ ដែលត្រូវបន្តវេន»។
យ៉ាងណាក៏ដោយ សម្រាប់ការឆ្ពោះទៅធ្វើម្ចាស់ផ្ទះស៊ីហ្គេម ឆ្នាំ២០២៣នេះ វាទាមទារឱ្យមន្រ្តីអាជ្ញាកណ្តាល ត្រូវមានអាជ្ញាប័ណ្ឌអន្ដរជាតិ ក្នុងការគ្រប់គ្រង និងដឹកនាំការប្រកួត ហើយបញ្ហានេះ ត្រូវបានលោក អាំង សិរីពិសិដ្ឋ ចាត់ទុកថា ជាក្តីកង្វល់មួយផងដែរ សម្រាប់សហព័ន្ធកីឡាបាល់ទះកម្ពុជា។
តែទោះបីជាយ៉ាងណា លោកបានអះអាងថា តាមរយៈការប្រកួតកីឡាជាតិ លើកទី៣នេះ ក៏ដូចជាការត្រៀមបញ្ចូនមន្ដ្រីអាជ្ញាកណ្ដាល ទៅសិក្សារៀនសូត្របន្ថែមនៅបរទេសជាបន្ដបន្ទាប់ នាពេលឆាប់ៗខាងមុខ សហព័ន្ធជឿជាក់ថា មន្ដ្រីបច្ចេកទេសកម្ពុជា នឹងអាចត្រៀមលក្ខណៈបានគ្រប់គ្រាន់ ដើម្បីទទួលរៀបចំ និងដឹកនាំការប្រកួតក្នុងព្រឹត្តិការណ៍ជាប្រវត្តិសាស្ដ្រ ដែលកម្ពុជារង់ចាំអស់៦៤ឆ្នាំមួយនេះ។
លោក អាំង សិរីពិសិដ្ឋ បានបង្ហាញសុទិដ្ឋិនិយមបែបនេះថា៖ «តាមបទពិសោធដែលយើងបានរៀបចំក្នុងកីឡាជាតិ បូករួមទាំងយើងសិក្សានៅថ្នាក់អន្ដរជាតិថែមទៀត យើងជឿជាក់ថា សហព័ន្ធកីឡាបាល់ទះកម្ពុជារបស់យើង នឹងមានភាពរឹងមាំ គឺរឹងមាំទាំងផ្នែកកីឡាករ កីឡាការិនី រឹងមាំទាំងគណៈកម្មការរៀបចំ និងមន្ដ្រីអាជ្ញាកណ្ដាល សម្រាប់ការប្រកួតកីឡាស៊ីហ្គេម ឆ្នាំ២០២៣ ខាងមុខ»។
សម្រាប់ការប្រកួតកីឡាជាតិ លើកទី ៣ ឆ្នាំ ២០២២នេះ ប្រភេទកីឡាបាល់ទះ បានបែងចែកការប្រកួតជា៣ផ្នែកដាច់ពីគ្នា គឺទី១ កីឡាបាល់ទះក្នុងសាលបុរស មានបេក្ខភាពចំនួន៩ក្រសួង និងរាជធានី-ខេត្តចូលរួម ទី២ កីឡាបាល់ទះក្នុងសាលនារី មានបេក្ខភាព ៨ ខេត្តចូលរួម និងទី៣ កីឡាបាល់ទះឆ្នេរខ្សាច់បុរស មានបេក្ខភាព ១០ក្រសួង និងរាជធានី-ខេត្តចូលរួម ដែលបានធ្វើការប្រកួត ចាប់ពីថ្ងៃទី ២០ រហូតដល់ថ្ងៃទី ២៩ ខែវិច្ឆិកា ឆ្នាំ ២០២២ នេះ។
ជាលទ្ធផលបច្ចេកទេស សម្រាប់ការប្រកួតនេះ ក្រុមកីឡាបាល់ទះក្នុងសាលរបស់ក្រសួងមហាផ្ទៃ ដណ្ដើមបានមេដាយមាស រីឯមេដាយប្រាក់បានទៅខេត្តព្រៃវែង និងរាជធានីភ្នំពេញ ទទួលបានមេដាយសំរឹទ្ធ។ ចំណែកការប្រកួតបាល់ទះក្នុងសាលនារីវិញ ក្រុមខេត្តកណ្ដាល ទទួលបានមេដាយមាស ខេត្តពោធិ៍សាត់ បានមេដាយប្រាក់ និងខេត្ដបន្ទាយមានជ័យ ឈ្នះមេដាយសំរឹទ្ធ។ ចំពោះបាល់ទះឆ្នេរខ្សាច់បុរស គឺក្រុមខេត្តព្រះសីហនុ បានគ្រងតំណែងជើងឯង រីឯជើងឯករក បានទៅក្រុមក្រសួងការពារជាតិ និងលេខ៣ បានទៅក្រុមខេត្តពោធិ៍សាត់៕
