ភ្នំពេញ៖ ព្រឹត្តិការណ៍ប្រកួត «WURKZ ប្រដាល់គុនខ្មែរប្រចាំប្រទេស» រដូវកាលទី២ ដណ្តើមខ្សែក្រវាត់គុនខ្មែរកម្រិតពិភពលោក IPCC KUN KHMER នឹងចាប់ផ្តើមប្រកួតជម្រុះរវាងបេក្ខភាពទាំង២៤នាក់ នៅថ្ងៃសៅរ៍ សប្តាហ៍នេះ ដើម្បីស្វែងរកជើងខ្លាំង ឡើងទៅប្រកួតនៅវគ្គបន្ត ដែលនឹងត្រូវធ្វើនៅតាមរាជធានី-ខេត្ត ចំនួន១២ ក្នុងប្រទេសកម្ពុជា ខណៈជើងខ្លាំង ផល សោភ័ណ្ឌ បានក្លាយជាម្ចាស់ខ្សែក្រវាត់នៃការប្រកួតរដូវកាលទី១។
ដោយមានការសហការពីក្រសួងអប់រំ យុវជន និងកីឡា ព្រមទាំងសហព័ន្ធកីឡាប្រដាល់គុនខ្មែរ និងស្ថាប័នប្រដាល់អន្តរជាតិ International Professional Combat Council (IPCC) គឺសង្វៀនថោន ដែលជាអ្នករៀបចំការប្រកួតនេះ បានជ្រើសរើសរួចរាល់ហើយ នូវបេក្ខភាពចំនួន២៤នាក់ សម្រាប់ឱ្យចូលរួមការប្រកួតខ្សែក្រវាត់ IPCC KUN KHMER ទម្ងន់៦០គីឡូក្រាម ក្នុងរដូវកាលនេះ។
សម្រាប់កីឡាករទាំង ២៤ នាក់ ដែលបានចុះឈ្មោះចូលរួមក្នុងការប្រកួតនេះ រួមមាន ធី វ៉ារិទ្ធ, សូដា សុជាតិ, សៀវ ង៉ុយ, រឿម វណ្ណៈ, ឡូញ វណ្ណឌី, ឡុង ខេត្ត, នឿន សាវឌី, ភួន ឡាំងកូស៊ីន, ហ៊ិត សុភាព, លាភ សំណាង, សេក គឹមសាន្ត, សេន កុសល់, ពុទ្ធ សំបូរ, គង់ ហូវ, ស៊ន រ៉ាគីម, ឆន ឈៀងរ៉ាន់, សូត្រ វាសនា, ពេជ្រ ម្ទេសខ្មាំង, លាភ រដ្ឋា, ហេង សុភ័ក្រ, ម៉ន សាម៉េត, អេលីត សាន់, វ៉ាន់ វឿន និង បឺត សង្ឃឹម។
អ្នកទាំង ២៤ នេះ បានចាប់ឆ្នោតផ្គូផ្គងរួចហើយ នៅក្នុងសន្និសីទកាសែត កាលពីថ្ងៃទី២៨ ខែវិច្ឆិកា ហើយពួកគេ នឹងត្រូវធ្វើការប្រកួតជម្រុះ នៅលើសង្វៀនគុនខ្មែរ ៨ ជ្រុង ចាប់ពីរសៀលម៉ោង ១ ថ្ងៃសៅរ៍នេះតទៅ ដើម្បីរកអ្នកឈ្នះចំនួន ១២ នាក់ ឡើងទៅវគ្គបន្ត ដែលមានការប្រកួតចំនួន១២រាជធានី-ខេត្ត គឺខេត្តពោធិ៍សាត់ បាត់ដំបង់ កំពង់ឆ្នាំង បន្ទាយមានជ័យ សៀមរាប កំពង់ធំ កំពង់ចាម ព្រៃវែង ស្វាយរៀង តាកែវ និងខេត្តកណ្តាល ហើយវគ្គផ្តាច់ព្រ័ត្ត នឹងធ្វើនៅរាជធានីភ្នំពេញ ដើម្បីស្វែងរកម្ចាស់ខ្សែក្រវាត់ ខណៈប្រាក់រង្វាន់សរុបមានរហូតដល់១២៤លានរៀល។
ទាក់ទងទៅនឹងការប្រកួតដណ្តើមខ្សែក្រវាត់ពិភពលោកនេះ ខ្លាចាស់កំពូលល្បិច ម៉ន សាម៉េត មកពីក្លិបកងចក្ររាជសី ដែលត្រូវប្រកួតជម្រុះជាមួយកីឡាករ ហ៊ិត សុភាព នោះ បាននិយាយថា៖ «ការចូលរួមព្រឹត្តិការណ៍នេះ ជាក្តីប្រាថ្នារបស់យើងខ្ញុំ ហើយខ្ញុំប្តេជ្ញាចិត្តថា នឹងធ្វើជាម្ចាស់ខ្សែក្រវាត់ IPCC KUN KHMER នេះ ឱ្យបាន»។
ម៉ន សាម៉េត បានបន្ថែមថា៖ «នេះជាមោទនភាពជាតិ សម្រាប់វិស័យគុនខ្មែរ ដែលស្ថាប័នអន្តរជាតិ IPCC បានដាក់កម្ពុជាជាសមាជិកស្ថាប័នមួយនេះ ហើយខ្ញុំពិតជាចង់មាន ឈ្មោះបន្តទៅប្រកួត នៅលើឆាកអន្តរជាតិ ដើម្បីដណ្តើមខ្សែក្រវាត់ពិភពលោក ដែលជាក្តីប្រាថ្នារបស់ខ្ញុំក្នុងនាមជាកីឡាករខ្មែរ»។
ចំណែកលោក Tomy Kim TOMY តំណាង IPCC KUN KHMER ប្រចាំនៅកម្ពុជា បានឱ្យដឹងថា IPCC បានសម្រេចទទួលស្វាគមន៍ «ក្បាច់គុនខ្មែរ» ចូលជាសមាជិកគ្រួសាររបស់ស្ថាប័ននេះហើយ ដែលមានសមាជិកជាង៦០ប្រទេស ហើយគ្រប់ការប្រកួតរបស់សង្វៀន IPCC KUN KHMER គឺសុទ្ធតែជាការយកចិត្តទុកដាក់តាមដានបំផុត ពីស្ថាប័នប្រដាល់ជាសមាជិក IPCC ទាំងអស់ តាមរយៈការផ្សាយផ្ទាល់ចេញពីកញ្ចក់ទូរទស្សន៍ Town Full HDTV ជាពិសេសស្ថាប័នប្រដាល់ប្រទេសជិតខាងកម្ពុជា គេយកចិត្តទុកដាក់តាមដានបំផុតពីភាពរស់រវើកនៃក្បាច់គុនខ្មែរយ៉ាងសម្បូរបែប។
លោក Tomy បានបន្ថែមថា៖«យើងចង់ឃើញកីឡាករគុនខ្មែរ ទៅឈរលើសង្វៀនអន្តរជាតិ ដែលរៀបចំឡើងដោយស្ថាប័នប្រដាល់ IPCC ដើម្បីដណ្តើមជ័យជម្នះឱ្យបានជូនជាតិមាតុភូមិ ហើយខ្ញុំចង់ឃើញកីឡាករគុនខ្មែរ ទៅប្រកួតក្នុងព្រឹត្តិការណ៍លំដាប់ពិភពលោក ដណ្តើមខ្សែក្រវាត់ IPCC KUN KHMER EUROPE CHAMPIONSHIP ដែលរៀបចំដោយ IPCC»។
ចំណែកលោក និន ភារម្យ អនុប្រធានសហពន្ធកីឡាប្រដាល់គុនខ្មែរ បាននិយាយថា យើងពិតជាសប្បាយចិត្ត នៅពេលឃើញព្រឹត្តិការណ៍សង្វៀនប្រដាល់គុនខ្មែរ៨ជ្រុង ធ្វើដំណើរស្វែងរកកីឡាករពោរពេញដោយសមត្ថភាព និងទេពកោសល្យ ដោយការប្រកួតជម្រុះវិលជុំតាមបណ្តារាជធានី-ខេត្ត និងត្រៀមឈានទៅប្រកួតលើសង្វៀនកម្រិតអន្តរជាតិបន្តនៅក្រៅប្រទេស៕