ការ​ខិត​ខំព្យា​យាម​របស់​ក្រុម​ជម្រើស​ជាតិ​បារាំង​​ក្នុង​ការ​ការ​ពារ​ពាន World Cup នឹង​បន្ត នៅពេល​​ដែលពួកគេ​ប៉ះ​ជាមួយនឹងក្រុម​បាល់ទាត់​ជម្រើស​ជាតិ​​ប៉ូឡូញ​ នៅ​រាត្រី​ថ្ងៃ​​អាទិត្យ ទី​៤ ខែ​ធ្នូ​នេះ ស្រប​ពេល​ដែល​ការ​ប្រមាញ់​របស់​ក្រុម​​ជម្រើស​ជាតិ​អង់គ្លេស ដើម្បី​ឈ្នះ​ពាន​ដ៏សំខាន់​ជាលើក​ដំបូង​របស់​ពួក​គេ ក្នុង​រយៈពេល​ ៥៦​ ឆ្នាំ នឹងត្រូវ​ល្បង​សមត្ថភាព​​ពេល​ប៉ះ​ជាមួយនឹងក្រុម​ជម្រើស​ជាតិ​​សេ​ណេហ្គាល់​។

ក្រុម​បារាំង របស់​លោក Didier Deschamps កំពុង​តែ​មាន​បំណង​ដើម្បី​ក្លាយ​ជា​ក្រុម​ដំបូង​គេ​ដែល​បាន​ឈ្នះពាន World Cup ២លើក​ជាប់​ៗ​គ្នា បើ​គិត​ចាប់​តាំងពី​ប្រេស៊ីល ធ្វើ​បាន​សម្រេច​ក្នុង​ឆ្នាំ​១៩៥៨ និង​ឆ្នាំ​១៩៦២ ក្រោយពី​បាន​​បញ្ចប់​ដោយ​ការ​ឈរ​លេខ​១​ក្នុងពូល D​។

ជាមួយ​​នឹង​ការ​មាន​អាវុធ​ដ៏មុតស្រួច​គឺ​ខ្សែ​ប្រយុទ្ធ Kylian Mbappe របស់​ក្លិប Paris Saint-Germain ក្រុម​ជម្រើស​ជាតិ​បារាំង ត្រូវ​បាន​ចាត់​ទុក​ថា ជាក្រុម​មានក្តី​សង្ឃឹម​ខ្ពស់​ក្នុងការ​ផ្តួល​ក្រុម​ជម្រើស​ជាតិ​ប៉ូឡូញ នៅ​កីឡដ្ឋាន​ Al Thumama នៅ​ទីក្រុង​ដូ​ហា​។

ប៉ុន្តែ ស្រប​ពេល​ដែល​ព្រឹត្តិ​ការណ៍ World Cup ​នេះ កំពុង​តែ​បង្កើត​ឲ្យ​មាន​រឿង​​ភ្ញាក់​ផ្អើល​ជា​​ច្រើន ដូច​ជា​ការ​ធ្លាក់​ចេញ​របស់​ក្រុម​ជម្រើស​ជាតិ​​បែលហ្ស៊ិក និង​អាល្លឺ​ម៉ង់ ខ្សែ​ប្រយុទ្ធ Robert Lewandowski របស់​ក្លិប Barcelona គឺ​ជា​កីឡាករ​សំខាន់​ដែលអាច​នឹង​ផ្តល់​ឲ្យ​មានការ​ភ្ញាក់​ផ្អើល​សម្រាប់​ក្រុម​បារាំង​។

ខ្សែ​ប្រយុទ្ធ​អន្តរ​ជាតិ​បារាំង Kylian Mbappe សម្លឹង​មើល​បាល់ អំឡុង​ពេល​ហ្វឹកហាត់ នៅកីឡដ្ឋាន Jassim-bin-Hamad ខណៈ​ដែល​ក្រុម​ជម្រើស​ជាតិ​បារាំង ត្រៀម​ប៉ះ​ ជាមួយនឹង​ប៉ូឡូញ​។ AFP

ខ្សែ​ប្រយុទ្ធ​ដែល​រក​បាន​គ្រាប់​បាល់​ច្រើន​ជាង​គេ​របស់​ប៉ូឡូញ​រូបនេះ សង្ឃឹម​ថា នឹង​អាច​រក​បាន​គ្រាប់​បាល់​​ទី​២​ក្នុង World Cup របស់​គេ តាម​រយៈ​ទម្លុះ​សំណាញ់​ទី​របស់​អ្នក​ចាំ​ទី​អន្តរ​ជាតិ​បារាំង Hugo Lloris ដែល​នឹង​ត្រូវ​បង្ហាញ​ខ្លួន​ជា​អន្តរ​ជាតិ​លើក​ទី​១៤២​របស់​គេ ដើម្បី​តាម​ស្មើ​ Lilian Thuram ក្នុងនាម​ជា​កីឡាករ​ដែល​បង្ហាញខ្លួន​ច្រើន​ជាង​គេ​បំផុត​របស់​បារាំង​​។

អ្នក​ចាំ​ទី Lloris ដែល​ជា​ប្រធានក្រុម​បារាំង បាន​កោតសរសើរ​ទាំង Lewandowski និង​អ្នក​ចាំទីប៉ូឡូញ Wojciech Szczesny ដែល​បាន​​សង្គ្រោះ​បាល់​ប៉េណាល់ទី​២​គ្រាប់ ដើម្បី​ជួយ​ឲ្យ​ក្រុម​ខ្លួន​បាន​បញ្ចប់​ក្នុង​ចំណាត់​ថ្នាក់​លេខ​២​ក្នុងពូល C​។

Lloris បាន​ឲ្យដឹងថា៖ «Lewandowski បាក្លាយ​ជា​​​​ខ្សែ​ប្រយុទ្ធ​ម្នាក់​ក្នុង​ចំណោមខ្សែ​ប្រយុទ្ធ​ម្នាក់ដ៏ឆ្នើម​បំផុត​​ក្នុង​ពិភព​លោក អស់​រយៈ​ពេល​ជា​ច្រើន​ឆ្នាំ​មកហើយ ប៉ុន្តែ ពួក​គេ​ក៏​ជាក្រុម​ខ្លាំង​ផងដែរ​»​។ ប្រសិន​បើ​បារាំង យកឈ្នះ​លើ​ប៉ូឡូញ ដំណើរ​របស់​ពួក​គេ​ទៅកាន់ World Cup វគ្គ​ផ្តាច់​ព្រ័ត្រ នា​ថ្ងៃ​ទី​១៨ ខែ​ធ្នូ អាច​នឹង​បញ្ចប់​ត្រឹម​វគ្គ​៨​ក្រុម​ចុងក្រោយ នៅពេល​ដែល​ប៉ះ​ជាមួយ​នឹង​អង់គ្លេស​។

ក្រុម​អ់គ្លេស​របស់​លោក Gareth Southgate ត្រូវ​បាន​រំពឹង​ទុក​ថា នឹង​ធ្វើ​ដំណើរ​ទៅ​ជួ​បារាំង​ក្នុង​វគ្គ​៨​ក្រុម​ចុង​ក្រោយ ប្រសិន​បើ​ពួក​គេ​ផ្តួល​ក្រុម​ជម្រើស​ជាតិ​សេណេ​ហ្គាល់ នាកីឡដ្ឋាន Al Bayt​។

ខ្សែ​ប្រយុទ្ធ Lionel Messi បាន​ស៊ុត​បាល់​បញ្ចូល​ទី​​ជាលើក​ដំបូង​របស់​គេ ក្នុង​វគ្គ​ចាញ់​ធ្លាក់​ជានៃ​ព្រឹត្តិការណ៍ World Cup ខណៈ​ដែល​គ្រាប់បាល់នោះ​បាន​កើត​​ឡើង​ក្នុងការ​ប្រកួត​ទី​១០០០​របស់គេ ​កាលពីថ្ងៃ​សៅរ៍ ទី​៤ ខែ​ធ្នូ​។ បច្ចុប្បន្ន ក្រុម​បាល់ទាត់​ជម្រើស​ជាតិ​អាហ្សង់​ទីន នឹង​ត្រូវ​ជួប​ជាមួយនឹងក្រុម​បាល់ទាត់​ជម្រើស​ជាតិ​ហូ​ឡង់ ក្នុងការ​ប្រកួត​វគ្គ​៨​ក្រុម​ចុងក្រោយ ក្នុង World Cup ឆ្នាំ​២០២២ នៅ​ប្រទេស​កាតា ក្រោយពី​បាន​ផ្តួលក្រុម​ជម្រើស​ជាតិ​អូស្ត្រាលី ក្នុងលទ្ធ​ផល ២-១​៕

កម្មវិធ​ប្រកួត​នៅ​រាត្រីនេះ៖

- បារាំង v ប៉ូឡូ ម៉ោង ១០ យប់

- អង់គ្លេស v សេណេហ្គាល់ ម៉ោង ២ ទៀប​ភ្លឺ