ភ្នំពេញ៖ នៅទីបំផុត ការព្យាយាមប្រឹងប្រែងដ៏វែងឆ្ងាយរបស់ក្រុមសិង្ហក្រហម ភ្នំពេញក្រោន បានជួយឱ្យពួកគេ អាចបញ្ចប់រដូវកាល នៃការប្រកួតប្រជែង នៅលីគកំពូលកម្ពុជា ឆ្នាំ២០២២ ជាមួយលទ្ធផលដ៏គួរឱ្យភ្ញាក់ផ្អើលបំផុត គឺការឈ្នះតំណែងជើងឯក ដែលធ្វើឱ្យដៃគូប្រជែងរបស់ពួកគេ វិសាខា មានការខកចិត្តខ្លាំង។
ការអាចរក្សាតំណែងជើងឯករបស់ក្រុមភ្នំពេញក្រោន បានកើតមានឡើង បន្ទាប់ពីពួកគេ បានយកឈ្នះក្រុមបឹងកេត ៥-០ នៅកីឡដ្ឋានស្មាតអអេសអ៊ិន កាលពីយប់ថ្ងៃម្សិលមិញ ដោយក្នុងនោះខ្សែប្រយុទ្ធរបស់អាហ្វហ្គានីស្ថាន Fareed Sadat រកបាន២គ្រាប់ ហើយកីឡាករជប៉ុន Yudai Ogawa កីឡាករអ៊ុយក្រែន Valerii Hryshyn និងខ្សែប្រយុទ្ធឆ្នើម លឹម ពិសុទ្ធ រកបានម្នាក់១គ្រាប់។
ការដណ្តើមបាន៣ពិន្ទុ ពីក្រុមបឹងកេត នេះ បានធ្វើឱ្យ ភ្នំពេញក្រោន បានយកប្រៀបលើក្រុមវិសាខា ព្រោះការប្រកួតកាលពីយប់ថ្ងៃសៅរ៍នោះ វិសាខា ក៏បានយកឈ្នះក្រុមម្ចាស់ផ្ទះ ព្រះខ័នរាជស្វាយរៀង ១-០ ដែលរកបានដោយខ្សែប្រយុទ្ធប្រេស៊ីល Paulo Victor នៅនាទីទី ៩០+២ ផងដែរ ដើម្បីមាន៥២ពិន្ទុស្មើជាមួយ ភ្នំពេញក្រោន ប៉ុន្តែ វិសាខា ចាញ់ប្រៀប ភ្នំពេញក្រោន ដោយសារធ្លាប់ចាញ់ ភ្នំពេញក្រោន ច្រើនជាង សម្រាប់ការជួបគ្នាចំនួន៥លើក ក្នុងរដូវកាលនេះ។
យ៉ាងណាក៏ដោយ ការឈ្នះពានលីគកំពូលកម្ពុជា ឆ្នាំ២០២២នេះ របស់ភ្នំពេញក្រោន បានបង្ហាញពីការប្រឹងប្រែងយ៉ាងខ្លាំង ដោយក្រុមមួយនេះ បានព្យាយាមជម្នះទាំងការប្រកួត និងការពង្រឹងស្មារតី ដើម្បីងើបឡើងផុតពីតំបន់កាត់ចោល និងឈានឡើងមកឈរនៅលេខ៤ចុងក្រោយគេ ក្នុងតំបន់កំពូលតារាងទាំង៤ (Top4) ដែលមានសិទ្ធិបានប្រកួត នៅក្នុងដំណាក់កាលទី៤ចុងក្រោយ។
សម្រាប់ការប្រកួត នៅក្នុងដំណាក់កាលទី៤ចុងក្រោយ ដែលមានការប្រកួត២ជើងនោះ ភ្នំពេញក្រោន ធ្វើបានយ៉ាងល្អបំផុត ដោយបានឈ្នះ៥លើក និងស្មើ១លើក ដើម្បីឈ្នះពានមួយនេះ ដ៏គួរឱ្យភ្ញាក់ផ្អើលបំផុត ហើយលោក លី ហៀង អគ្គលេខាធិការក្លិបបាល់ទាត់ភ្នំពេញក្រោន បានចាត់ទុករដូវកាល ដែលភ្នំពេញក្រោន ឈ្នះពាននេះ ជារដូវកាលចម្លែក។
លោក លី ហៀង បានសរសេរបង្ហោះនៅលើហ្វេសប៊ុករបស់លោកថា៖ «ភាពឡើងចុះក្នុងបាល់ទាត់!ខ្ញុំកំណត់វាជារដូវកាលចម្លែកនៅឆ្នាំនេះ យើងតាមពីក្រោយ ១៨ពិន្ទុ ក្នុងសប្តាហ៍ទី១០នៃលីគ។ វាជាសម្ពាធដ៏ធំមួយលើក្រុមការពារជើងឯក ហើយសម្ពាធគឺមកពីគ្រប់ទិសទី។ គ្រប់គ្នាជឿថា យើងបានជ្រុះចេញពីការប្រកួតប្រជែងនេះ»។
លោកបានបន្ថែមថា៖ «ប៉ុន្តែយើងមិនអាចអរគុណដល់កីឡាករ និងបុគ្គលិកគ្រូបង្វឹក គ្រប់គ្រាន់ សម្រាប់ការខិតខំប្រឹងប្រែងរបស់ពួកគេ ដើម្បីផ្តល់ស្នាមញញឹមដល់អ្នកគាំទ្ររបស់យើងម្តងទៀតនោះទេ។ ខ្ញុំគិតថា ពួកគេបានភ្លេចពាក្យ «បោះបង់» នៅក្នុងវចនានុក្រមរបស់ពួកគេ។ ពួកគេដាក់ខ្លួន និងមានការគោរព ហើយខិតខំប្រឹងប្រែងទាំងក្នុង និងក្រៅទីលានរហូតដល់ទីបំផុត»។
អគ្គលេខាធិការក្លិបបឹងកេតរូបនេះ បានបន្ថែមថា៖ «បាល់ទាត់ គឺជាការងារចម្លែកមួយ។ ខ្ញុំចង់អរគុណអ្នកពាក់ព័ន្ធបាល់ទាត់ទាំងអស់ ភាគច្រើនជាមនុស្សនៅក្នុងបរិបទរបស់ខ្ញុំ អ្នកគ្រប់គ្រង និងគ្រូបង្វឹកទាំងអស់នៅក្នុងក្រុមគូបដិបក្ខ។ យើងប្រឈមគ្នាយ៉ាងតឹងតែងក្នុងការប្រកួតប្រជែង ដើម្បីឈ្នះរាល់ចុងសប្តាហ៍ ប៉ុន្តែអង្គុយនៅព្រឹកថ្ងៃចន្ទ ដើម្បីពិភាក្សាអំពីរបៀបធ្វើឱ្យការប្រកួតកាន់តែខ្លាំង និងអ្វីដែលល្អសម្រាប់បាល់ទាត់។ សូមអរគុណដល់លោក Satoshi និង ក្រុម CPL សម្រាប់ការប្រជុំដ៏តានតឹងជារៀងរាល់ដើមសប្តាហ៍។ កិត្តិយសដ៏ធំធេងចំពោះប្រធានក្លិបគ្រប់រូប ហើយយើងមិនអាចបំភ្លេចក្នុងការលើកឡើងពីពួកគាត់»។
តាមរយៈការប្រកួតលីគកំពូលកម្ពុជា ឆ្នាំ២០២២ ដែលបានប្រើពេលប្រកួតអស់រយៈពេល២៧សប្តាហ៍នោះ ក្រុមភ្នំពេញក្រោន បានបញ្ចប់ការប្រកួតរបស់ខ្លួន ដោយឈ្នះឈ្នះ១៥ ស្មើ៧ ចាញ់៥ មាន៥២ពិន្ទុ ស្មើជាមួយក្រុមលេខ២ វិសាខា ដែលឈ្នះ១៦ ស្មើ៤ ចាញ់៧ ចំណែកក្រុមលេខ៣ ស្វាយរៀង បានឈ្នះ១៥ ស្មើ៤ ចាញ់៨ មាន៤៩ពិន្ទុ ខណៈក្រុមបឹងកេត បានលេខ៤ ដោយឈ្នះបាន១១ ស្មើ៦ និងចាញ់១០លើក។
ជាមួយគ្នានេះ លោកស្រី ភូឈាលីន ខ្លុងគិតចាកន ភរិយានៃសពលោក ឬទ្ធី សំណាង ជាប្រធានក្លិបភ្នំពេញក្រោន បានថ្លែងថា៖ «ខ្ញុំពិតជារំភើបរីករាយណាស់ ដែលក្លិបទទួលបានសមិទ្ធផលនេះ សូមចូលរួមអបអរសាទរចំពោះកីឡាករ ក្រុមគ្រូបង្វឹក ដែលធ្វើវាឱ្យកើតឡើងម្តងទៀត និងធ្វើឱ្យអ្នកគាំទ្រយើងរីករាយ។ ដូចអ្វីដែលយើងធ្លាប់និយាយ ភ្នំពេញក្រោន គឺជាក្លិបសម្រាប់អ្នករាល់គ្នា យើងសង្ឃឹមថា អ្នកគាំទ្រ សាទរជាមួយជ័យជម្នះនេះ គាំទ្រយើង និងតែងតែនៅពីក្រោយយើងជានិច្ច»៕