.jpg)
ខ្សែបម្រើអន្តរជាតិប៉ូឡូញ Przemyslaw Frankowski (ស្តាំ) ប្រជែងដណ្តើមបាល់ជាមួយនឹងខ្សែប្រយុទ្ធអន្តរជាតិបារាំង Kylian Mbappe ក្នុងការប្រកួតកាលពីថ្ងៃទី៤ ខែវិច្ឆិកា។ AFP
លោក Gareth Southgate បានទទួលស្គាល់ថា ក្រុមបាល់ទាត់ជម្រើសជាតិអង់គ្លេស នឹងត្រូវជួប «ការល្បងសមត្ថភាពដ៏តានតឹងបំផុត» នៃមហិច្ឆតាក្នុង World Cup របស់ពួកគេ នៅពេលដែលពួកគេប៉ះជាមួយនឹងក្រុមម្ចាស់ការពារជើងឯក បារាំង ក្នុងវគ្គ៨ក្រុមចុងក្រោយ នៅថ្ងៃសៅរ៍ ចុងសប្តាហ៍នេះ។
ក្រុមរបស់លោក Southgate បានធ្វើការស្រោចស្រង់ពីការចាប់ផ្តើមមិនបានល្អ នៅមុនពេលបានកត់ត្រាជ័យជម្នះយ៉ាងងាយស្រួលក្នុងលទ្ធផល ៣-០ លើក្រុមជម្រើសជាតិសេណេហ្គាល់ ក្នុងការប្រកួតវគ្គ១៦ក្រុមចុងក្រោយ នៅកីឡដ្ឋាន Al Bayt កាលពីថ្ងៃអាទិត្យ ទី៤ ខែធ្នូ។
ក្រុមបាល់ទាត់ជម្រើសជាតិអង់គ្លេស នឹងវិលទៅកាន់ទីក្រុងវាលខ្សាច់ Al Khor វិញ នៅចុងសប្តាហ៍នេះ សម្រាប់ការប្រកួតរំភើបជាមួយនឹងក្រុមជម្រើសជាតិបារាំង ដែលកំពុងតែសម្លឹងរកការក្លាយជាក្រុមដំបូងគេក្នុងការឈ្នះពាន World Cup ២លើកជាប់ៗគ្នា បើគិតចាប់តាំពីប្រេស៊ីល ធ្វើបានសម្រេចក្នុងឆ្នាំ១៩៥៨ និង១៩៦២។
ស្របពេលដែលអង់គ្លេស បានបង្ហាញពីទម្រង់លេងយ៉ាងល្អ នៅពេលដែលខ្សែបម្រើ Jordan Henderson រកបានគ្រាប់បាល់នាំមុខមុន ពេលប្រកួតជាមួយនឹងក្រុមជម្រើសជាតិសេណេហ្គាល់ មុនពេលខ្សែប្រយុទ្ធ Harry Kane និងខ្សែបម្រើ Bukayo Saka បានបន្ថែម២គ្រាប់ទៀត លោក Southgate ទទួលស្គាល់ថា ក្រុមជម្រើសជាតិបារាំងរបស់លោក Didier Deschamps គឺជាគូប្រកួតដ៏ស្វិតស្វាញយ៉ាងពិតប្រាកដ។
ខ្សែបម្រើអង់គ្លេស Jordan Henderson (កណ្តាល) អបអរការរកបានគ្រាប់បាល់ជាមួយខ្សែប្រយុទ្ធ Harry Kane ខ្សែបម្រើ Jude Bellingham (ឆ្វេង) និងខ្សែប្រយុទ្ធ Bukayo Saka។ AFP
លោក Southgate បានឲ្យដឹងថា៖ «នេះគឺជាការល្បងសមត្ថភាពដ៏ធំបំផុតដែលយើងអាចនឹងជួបប្រទះ។ ពួកគេជាម្ចាស់ជើងឯកពិភពលោក និងជាក្រុមប្រជុំដោយកីឡាករឆ្នើមបំផុត និងពោរពេញដោយទេពកោលស្យ។ ពួកគេជាក្រុមខ្លាំងដែលផ្តល់ការលំបាកដល់ដៃគូ និងមានតំបន់ការពាររឹងមាំ»។
គ្រូបង្វឹករូបនេះបានបន្ថែមទៀតថា៖ «នេះគឺប្រកួតដ៏អស្ចារ្យមួយ។ វាជាការប្រជែងគ្នាជាប្រវត្តិសាស្ត្រ ក្រោយពីធ្លាប់បានបង្កើតភាពអស្ចារ្យរួចជាស្រេចក្នុងការប្រកួតមុនៗ។ នេះគឺជាប្រកួតដ៏អស្ចារ្យសម្រាប់យើង និងជាការល្បងសមត្ថភាពពេលប្រកួតជាមួយនឹងក្រុមខ្លាំងបំផុត»។
ក្រោមជំនួយដ៏ធំពីខ្សែប្រយុទ្ធ Kylian Mbappe របស់ក្លិប Paris Saint Germain ក្រុមជម្រើសជាតិបារាំង បានផ្តួលក្រុមជម្រើសជាតិប៉ូឡូញ ក្នុងលទ្ធផល ៣-១ ក្នុងវគ្គ១៦ក្រុមចុងក្រោយ ពោលគឺត្រឹមតែប៉ុន្មានម៉ោងប៉ុណ្ណោះ មុនពេលអង់គ្លេស បានចូលរួមជាមួយនឹងពួកគេក្នុងវគ្គ៨ក្រុមចុងក្រោយ។
ជាមួយគ្នានេះ Mbappe បានស៊ុតបាល់បញ្ចូលទី២គ្រាប់ ក្នុងពេលប្រកួតជាមួយនឹងប៉ូឡូញ និងរកបាន៥គ្រាប់រួចជាស្រេចក្នុងយុទ្ធនាការ World Cup នៅឆ្នាំនេះ។
លោក Southgate បាននិយាយថា៖ «Mbappe ពិតជាកីឡាករកម្រិតពិភពលោកម្នាក់។ រូបគេបានបង្កើតភាពអស្ចារ្យជាច្រើន ក្នុងយុទ្ធនាការនេះ ក្នុងយុទ្ធនាការមុនៗ។ Griezmann ក៏ជាកីឡាករដ៏អស្ចារ្យម្នាក់ផងដែរ ហើយយើងស្គាល់ Giroud យ៉ាងច្បាស់ ហើយពួកគេក៏មានខ្សែបម្រើឆ្នើមៗជាច្រើនផងដែរ។ វាជាការល្បងសមត្ថភាពដ៏ធំមួយ ប៉ុន្តែ យើងពិតជាកំពុងតែផ្តោតលើការប្រកួតនេះ»៕ AFP
