ខ្សែប្រយុទ្ធ Cristiano Ronaldo នឹងដាក់គោលដៅទៅលើការជួយឲ្យក្រុមបាល់ទាត់ជម្រើសជាតិព័រទុយហ្គាល់ យកឈ្នះលើក្រុមជម្រើសជាតិស្វ៊ីស និងឈានទៅប្រកួតវគ្គ៨ក្រុមចុងក្រោយនៃព្រឹត្តិការណ៍ World Cup នៅរាត្រីថ្ងៃអង្គារ ទី៦ ខែធ្នូ នេះ ស្របពេលដែលក្រុមជម្រើសជាតិម៉ារ៉ុក នឹងព្យាយាមបង្អាក់ដំណើររបស់អេស្ប៉ាញ មិនឲ្យឈ្នះពានពិភពលោកជាលើកទី២។
នៅសល់តែកៅអី២ទៀតប៉ុណ្ណោះដែលត្រូវបំពេញសម្រាប់វគ្គ៨១/៤ផ្តាច់ព្រ័ត្រ នៅទំនេរនៅឡើយក្នុងប្រទេសកាតា ក្រោយពីក្រុមម្ចាស់ជើងឯក៥សម័យកាល ប្រេស៊ីល បានយកឈ្នះលើក្រុមជម្រើសជាតិកូរ៉េខាងត្បូង ក្នុងលទ្ធផល ៤-១ ហើយក្រុមម្ចាស់ជើងឯករងឆ្នាំ២០១៨ ក្រូអាស៊ី បានយកឈ្នះជប៉ុន ដោយការស៊ុតបាល់ប៉េណាល់ទីកាត់សេចក្តី។
Ronaldo បានបង្កើតឲ្យមានការចាប់អារម្មណ៍យ៉ាងខ្លាំង នៅក្នុងយុទ្ធនាការនេះ នៅមុនពេលរូបគេបានចាប់ផ្តើមប្រកួត ក្រោយពីបាននិយាយវាយប្រហារក្លិប Manchester United និងលោកគ្រូបង្វឹក Erik ten Hag។
ក្រោយពីបានចាកចេញតាមរយៈការ «យល់ព្រមទាំងសងខាង» បច្ចុប្បន្ន រូបគេកំពុងតែស្វែងរកក្លិបថ្មី ខណៈដែលប្រភពជាច្រើនបានបញ្ជាក់ថា រូបគេកំពុងតែពិភាក្សាលើការផ្ទេរទៅកាន់ក្លិប Al-Nassr របស់អារ៉ាប៊ីសាអ៊ូឌីត។ ខ្សែប្រយុទ្ធវ័យ៣៧ឆ្នាំរូបនេះ ដែលកំពុងតែបង្ហាញខ្លួនក្នុង World Cup ជាលើកចុងក្រោយរបស់គេនោះ នៅតែឡោមព័ទ្ធទៅដោយរឿងរ៉ាវដ៏ចម្រូងចម្រាស់នៅក្លិបចាស់របស់គេ។
ក្រោយពីបានស៊ុតបាល់ប៉េណាល់ទីឲ្យក្រុមខ្លួន ក្នុងការប្រកួតបើកឆាកជាមួយនឹងក្រុមជម្រើសជាតិហ្គាណា ដើម្បីក្លាយជាកីឡាករដំបូងគេដែលរកបានគ្រាប់បាល់បញ្ចូលទីក្នុងការប្រកួត World Cup ទាំង៥លើក រូបគេបានបង្ហាញពីកម្រិតលេងប្រកបដោយថាមពលប៉ុន្តែមិនបានស៊ុតបាល់បញ្ចូលទីម្តងទៀតឡើយ។
តួនាទីក្នុងជម្រើសទាំង១១នាក់ដំបូងរបស់ Ronaldo ក្នុងក្រុមព័រទុយហ្គាល់ នៅតែជាប្រធានបទក្តៅ ក្នុងចំណោមអ្នកគាំទ្ររបស់ខ្លួន ប៉ុន្តែ លោកគ្រូបង្វឹក Fernando Santos បាននិយាយថា លោកមិនចាប់អារម្មណ៍ទៅលើបញ្ហានេះឡើយ។
គ្រូបង្វឹករូបនេះ បានឲ្យដឹងថា៖ «ខ្ញុំមិនបានអានព័ត៌មានទាំងនេះឡើយ។ វាមិនមែនជាការមិនគោរពឡើយ ប៉ុន្តែគ្រាន់តែថា យើងមានពេលតែ៣ថ្ងៃ ដើម្បីហ្វឹកហាត់ត្រៀមសម្រាប់ការប្រកួតមួយ ហើយខ្ញុំមិនមែនផ្តោតលើព័ត៌មានទាំងនោះឡើយ។ យើងផ្តោតលើការប្រកួតខាងមុខនេះ»។
ស្របពេលជាមួយគ្នានេះ ម៉ារ៉ុក គឺជាក្រុមដែលនៅសល់តែមួយមកពីទ្វីបអាហ្វ្រិក ហើយក៏ជាក្រុមអារ៉ាប់តែមួយដែលនៅរក្សាវត្តមានក្នុង World Cup នៅកាតា ផងដែរ។
លោក WalidRegragui គ្រូបង្វឹកនៃក្រុមបាល់ទាត់ជម្រើសជាតិម៉ារ៉ុក បានលើកទឹកចិត្តឲ្យកីឡាកររបស់លោក ជឿជាក់ថា ពួកគេអាចផ្តួលក្រុមខ្លាំងអេស្ប៉ាញ បាន ខណៈដែលពួកគេត្រូវប្រជែងដណ្តើមកៅអីទៅកាន់វគ្គ៨ក្រុមចុងក្រោយនៃព្រឹត្តិការណ៍ World Cup។
ក្រុមមកពីអាហ្វ្រិកខាងជើងមួយនេះ កំពុងតែស្ថិតក្នុងវគ្គ១៦ក្រុមចុងក្រោយជាលើកទី២ ក្រោយពីបានឈានទៅវគ្គបន្តក្នុងនាមជាក្រុមឈរលេខ១ក្នុងពូល F នៅពីលើក្រុមជើងឯករងឆ្នាំ២០១៨ ក្រូអាស៊ី បន្ទាប់ពីបានផ្តួលក្រុមជម្រើសជាតិបែលហ្ស៊ិក និងកាតា ក្នុងប្រទេសកាតា។
លោក Regragui បាននិយាយកាលពីថ្ងៃចន្ទ ទី៥ ខែធ្នូ ថា៖ «វានឹងក្លាយជាការប្រកួតដ៏សំខាន់មួយសម្រាប់យើង។ យើងនឹងត្រូវឈានទៅប៉ះក្រុមមួយក្នុងចំណោមក្រុមដ៏ខ្លាំងបំផុតក្នុងកីឡាបាល់ទាត់។ ប៉ុន្តែ យើងក៏ត្រូវតែប្រឹងឲ្យអស់ពីសមត្ថភាពរបស់យើងផងដែរ។ យើងមានពេលសម្រាកច្រើនជាង១ថ្ងៃ បើធៀបទៅនឹងពួកគេ ហើយយើងនឹងព្យាយាមបង្កើតការភ្ញាក់ផ្អើល»៕ AFP