The Phnom Penh Post Search

Search form

Logo of Phnom Penh Post newspaper Phnom Penh Post - ក្រុមហ៊ុន​ឯកជន​កម្ពុជា​ និង​វៀត​ណាម ​ចុះ​អនុស្ស​រណៈ​ជួយ​កីឡា Esports ឱ្យ​អាច​បង្កើត​ស្នាដៃ​នៅ​ស៊ី​ហ្គេម​

ក្រុមហ៊ុន​ឯកជន​កម្ពុជា​ និង​វៀត​ណាម ​ចុះ​អនុស្ស​រណៈ​ជួយ​កីឡា Esports ឱ្យ​អាច​បង្កើត​ស្នាដៃ​នៅ​ស៊ី​ហ្គេម​

Content image - Phnom Penh Post
ពិធីចុះអនុស្សរណៈរវាងក្រុមហ៊ុនកម្ពុជា-វៀតណាម ដើម្បីអភិវឌ្ឍវិស័យកីឡាEsportsនៅកម្ពុជាកាលពីចុងខែមុន។ រូបថត សហការី

ក្រុមហ៊ុន​ឯកជន​កម្ពុជា​ និង​វៀត​ណាម ​ចុះ​អនុស្ស​រណៈ​ជួយ​កីឡា Esports ឱ្យ​អាច​បង្កើត​ស្នាដៃ​នៅ​ស៊ី​ហ្គេម​

ភ្នំពេញៈ ជា​ក្រុម​ហ៊ុន​ឯក​ជន​មួយ​ដែល​មាន​ភាព​ស្ទាត់​ជំនាញ​លើ​ការ​រៀបចំ​ព្រឹត្តិ​ការណ៍​កីឡា​អេឡិច​ត្រូនិក(Esports)ប្រចាំ​នៅ​កម្ពុជាT.Y Media បាន​សម្រេច​ចាប់​ដៃគូ​ជាមួយ​ក្រុម​ហ៊ុន​វៀ​ត​ណា​ម Mineski Global ដើម្បី​រួមគ្នា​អភិ​វឌ្ឍ​វិស័យ​កីឡាEsportsនៅ​កម្ពុជា​ឱ្យ​កាន់តែ​រីក​ចម្រើន​ដែល​អាច​ឈាន​ទៅ​បង្កើត​ស្នាដៃ​ជូន​ជាតិក្នុង​ការ​ប្រជែង​យក​មេដាយ​នៅ​ស៊ី​ហ្គេមលើក​ទី​៣២ ឆ្នាំ​២០២៣ ​ដែល​កម្ពុជា​ត្រូវ​ធ្វើជា​ម្ចាស់ផ្ទះ​។​

​​តាម​រយៈ​ការចុះ​អនុស្ស​រណៈ​យោគ​យល់​គ្នា(MoU)នេះ ថ្នាក់​ដឹក​នាំ​របស់ T.Y Media និង Mineski Global បាន​អះ​អាង​ថា​ នឹង​រួមគ្នា​ជួយ​សម្រួល​ដល់​ការ​បង្កើត​នូវ​បណ្តេញ​ទំនាក់​ទំនង​ដែល​អនុញ្ញាត​ឱ្យ​បង្កើត ​និង​ផ្លាស់​ប្តូរ​ព័ត៌​មាន​ក៏ដូច​ជា​កិច្ច​សហ​ប្រតិ​បត្តិ​ការ​ផ្នែក​បច្ចេក​ទេស ហិរញ្ញ​វត្ថុ សម្រាប់​ស្ថាប័ន​នៅ​ក្នុង​តំបន់​នៃ​កីឡា​អេឡិច​ត្រូ​និក និង​ដើម្បី​ចូល​រួម​ចំណែក​អភិវឌ្ឍ​វិស័យ​កីឡា​អេឡិច​ត្រូនិក​នៅ​កម្ពុជា​ឱ្យ​មាន​ការរីក​ចម្រើន​ថែម​ទៀត សម្រាប់​ត្រៀម​ចូល​រួម​ការ​ប្រកួត​នៅ​ស៊ី​ហ្គេម​។​

​លោក ​ធី វាយ អគ្គ​នាយក​ក្រុម​ហ៊ុនT.Y Media បាន​ថ្លែង​ថា​៖ «​ការចុះ MoU នៅ​ពេល​នេះ ខ្ញុំ​នឹង​រួម​ចំណែក​មួយ​យ៉ាង​ធំដើម្បី​បណ្តុះ​បណ្តាល​វិស័យ​កីឡា​អេឡិច​ត្រូនិក​នៅ​កម្ពុជា​ឱ្យ​ឈាន​ទៅ​ដល់​ការលេង​ហ្គេម​ដ៏​ពិត​ប្រាកដ​មួយ ហើយ​ក្រុម​អាជីព​របស់​យើង​ទាំង​អស់​នឹង​អាច​ប្រកួត​ប្រជែង​ជាមួយ​ក្រុម​អាជីព​របស់​ប្រទេស​ផ្សេងៗ​ទៀត​បាន ជា​ពិសេស​ខាង​ហ្វី​លី​ពីន ដែល​មាន​កម្រិត​បច្ចេក​ទេស​ខ្លាំង​ដែល​យើង​គួរឱ្យ​ប្រុង​ប្រយ័ត្ន​»​។

​ទន្ទឹម​នឹង​នេះ លោក លន់ សាម​ឌី អគ្គ​លេខាធិ​ការ​សហ​ព័ន្ធ​កីឡា​អេឡិច​ត្រូនិក​កម្ពុជា​ដែល​បាន​ចូល​រួម​ជា​សក្ខី​ភាព​នៅ​ក្នុង​ពិធី​ចុះ MoU កាល​ពី​ថ្ងៃទី​២៨ ​ខែវិច្ឆិកា ឆ្នាំ​២០២២​នោះ​ដែរ បាន​ដាក់​ក្តី​សង្ឃឹម​ថា T.Y Media និង​Mineski Global នឹង​រួមគ្នា​បង្កើត​ឱ្យ​មាន​ព្រឹត្តិ​ការណ៍​កីឡា​អេឡិច​ត្រូនិក​នៅ​កម្ពុជា​ឱ្យបាន​កាន់​តែ​ច្រើន ដើម្បី​ផ្តល់​ឱកាស​ឱ្យ​កីឡា​ករ​កម្ពុជា​បាន​ប្រកួត​ប្រជែង​គ្នា​ដក​ស្រង់​បច្ចេក​ទេស​គ្នា និង​ពង្រឹង​សមត្ថ​ភាព​បន្ថែម​ទៀត​។​

​លោក​បាន​បញ្ជាក់​ថា​៖ «​យើង​សង្ឃឹម​ថា ការ​ចាប់ដៃ​គ្នា​រវាង​ភាគី​វៀត​ណាម ​និង​ភាគី​កម្ពុជា​របស់​យើង ​នឹង​នាំមក​នូវ​ការ​ប្រកួត​ច្រើន​ជា​លក្ខណៈ​ផ្លូវ​ការ និង​ស្តង់​ដា ហើយ​យើង​ក៏​រំពឹង​ដែរ​ថា T.Y Med​ia និង Mineski Global នឹង​នាំ​យក​ព្រឹត្តិ​ការណ៍​​ប្រកួត​អន្តរ​ជាតិ​លើ​វិញ្ញា​សា​កីឡា Esports នេះ មក​កម្ពុជា​បាន ​អ៊ីចឹង​រំពឹង​ថា ការ​ប្រកួត Mobile​ Legends: Bang Bang Southeast Asia Cup (MSC) នៅ​ឆ្នាំ​ក្រោយ នឹង​បាន​មក​កម្ពុជា​»​។​

​យ៉ាង​ណា​ក៏​ដោយ ​លោក ធី វាយ បាន​ប្រាប់​ទៅ​គ្រូប​ង្វឹក ក៏ដូច​ជា​តំណាង​ក្រុម​កីឡា​អេឡិច​ត្រូនិក​នៅ​កម្ពុជា​ទាំង​អស់ ត្រូវ​ខិត​ខំ​ប្រឹង​ប្រែង​ពង្រឹង​សមត្ថ​ភាព និង​បច្ចេក​ទេស​ឱ្យបាន​ខ្លាំង​ផង​ដែរ​ ព្រោះ​ពិត​ណាស់ ​T.Y Media និង​Mineski Global នឹង​រៀបចំ​ឱ្យមាន​ព្រឹត្តិ​ការណ៍​ធំៗ​ជា​ច្រើន ហើយ​នេះ​ជា​ឱកាស​យ៉ាង​ល្អ​សម្រាប់​ក្រុម Esport​sកម្ពុជា ជា​ពិសេស​ក្រុម​កីឡាករ​ជម្រើស​ជាតិ​កម្ពុជា​ក្នុង​ការ​ប្រកួត​ដុស​ខាត់​ជំនាញ​ឱ្យបាន​កាន់​តែ​ល្អ​ដើម្បី​ឈាន​ទៅ​កាន់​ការ​ប្រកួត​ស៊ី​ហ្គេម​។​

លោក​បាន​បញ្ជាក់​ថា​៖«​ការ​ខិតខំ​ពង្រឹង​សមត្ថ​ភាព​នេះ មិន​មែន​ត្រឹមតែ​ដើម្បី​ខ្លួន​ឯង និង​កីឡា Esports នោះ​ទេ ប៉ុន្តែ​យើង​ខំប្រឹង​ដើម្បី​ជាតិ ​ព្រោះ​ស៊ី​ហ្គេម ​ឆ្នាំ​២០២៣ នៅ​កម្ពុជា នឹង​ចូល​មក​ដល់​នៅ​ខែ​ឧសភា អ៊ី​ចឹង​យើង​ត្រូវតែ​បង្កើន​សមត្ថ​ភាព​របស់​យើង​ឱ្យ​ល្អនៅលើ​ឆាក​អន្តរ​ជាតិ​ដើម្បី​ឱ្យគេ​ឃើញ​ថា​វិស័យ​កីឡា​អេឡិច​ត្រូនិក​នៅ​កម្ពុជា ក៏​មិន​ធម្មតា​នោះ​ដែរ​»​។​

​ជុំវិញ​ការគាំ​ទ្រ​ដល់​ការចុះ MoU របស់​ក្រុម​ហ៊ុន T.Y Media និង Mineski Global លោក ​លន់ សាម​ឌី បាន​អះ​អាង​ថា ត្រូវ​បាន​ធ្វើ​ឡើង​ទៅ​តាម​គោល​ការណ៍​កីឡា​ទាំង​អស់​ ហើយ​សហ​ព័ន្ធ​កីឡា​អេ​ឡិ​ត្រូ​និក​កម្ពុជា ​តែងតែ​មើល​ច្បាស់​ណាស់​ទៅលើ​គោល​ការណ៍ Fair play ជាធំ ទាំង​ជា​មួយ​កីឡាករ ​ក្លិប និង​អ្នក​ពាក់​ព័ន្ធ​ផ្សេង​ទៀត គឺ​យើង​មិនឱ្យ​ប៉ះ​ពាល់ ឬ​ធ្វើ​ខុស​នាំ​ឱ្យ​សហ​ព័ន្ធ​កីឡា​អេឡិច​ត្រូ​និក​អន្តរ​ជាតិ ធ្វើ​ការ​ពិន័យ​នោះ​ទេ​។​

​លោក​បាន​សង្កត់​ធ្ងន់​ថា​៖ «​បើ​សហព័ន្ធ​យើង​ធ្វើ​ខុស ​នោះ​សហ​ព័ន្ធ​អន្តរ​ជាតិ នឹង​ពិន័យ​ព្យួរ​យើង​ហើយ ​គឺ​មិន​អនុញ្ញាត​ឱ្យ​យើង​បញ្ជូន​កីឡាករ​ទៅ​ចូលរួម​ការ​ប្រកួត​ជើង​ឯក​ពិភព​លោកបា​ន​នោះទេ ប៉ុន្តែ​សហ​ព័ន្ធ​របស់​យើង តែង​តែ​ធ្វើ​អ្វី​ដែល​គោ​រព​ទៅ​តាម​គោល​ការណ៍​កីឡា ដូច្នេះហើ​យ​ទើប​យើង​ទទួ​លបាន​សិទ្ធិ​រៀបចំ​ការ​ប្រកួត​ស៊ី​ហ្គេម​ នៅ​ឆ្នាំ​២០២៣»​។

​យ៉ាង​ណាមិ​ញ លោក ជា ច័ន្ទ​បរិបូរ​ណ៍ ប្រធាន​សហ​ព័ន្ធ​កីឡា​អេឡិច​ត្រូនិ​ក​កម្ពុជា​ធ្លាប់​បាន​អះអាង​ដែរ​ថា ​ជា​ចក្ខុ​វិស័យ​របស់​លោកគឺ​​ត្រូវ​រៀបចំ​វិស័យ​កីឡា Esports នេះ ឱ្យ​ទៅជា​កីឡា​ពិត​ប្រាកដ​នៅ​ក្នុង​សង្គម​កម្ពុជា ​ដែល​សហ​ព័ន្ធ​ត្រូវ​តស៊ូ​មតិ​ច្រើន​ណាស់ ប៉ុ​ន្តែ​មានតែ​ការ​គោរព​នូវ​គោល​ការណ៍​យុត្តិ​ធម៌(Fair Play)ទេ ទើប​អាច​ធ្វើ​ឱ្យ Esports​ ឈាន​ទៅ​មុខ​បាន​។​

​រដ្ឋ​លេខាធិ​ការ​ក្រសួង​ព័ត៌​មាន លោក ​ច័ន្ទ​បរិបូរណ៍ បាន​ថ្លែង​ប្រាប់​ភ្នំពេញ​ប៉ុស្តិ៍​ថា​៖«​យើង​ត្រូវ​រក្សា​ឱ្យបាន​នូវ Fair play ព្រោះ​កាល​ណា​យើង​រក្សា​មិន​បាន​នូវ​ Fair play ទេ យើង​មិន​អាច​ពង្រឹង​វិស័យ​ហ្នឹង​បាន​ទេ ​អ៊ីចឹង​ខ្ញុំ​សូម​អំពាវ​នាវ​ដល់​បណ្តា​អ្នក​ពាក់​ព័ន្ធ​ទាំង​អស់​ថា ប្រសិន​ជា​មាន​បំណង​ចង់​រៀ​ចំ​អ្វី​ក៏ដោយ ​នៅ​ក្នុង​វិស័យ ​Esports គឺ​សុំឱ្យ​សហ​ការ​ជាមួយ​សហ​ព័ន្ធដើម្បី​យើង​ជួយ​រៀបចំ និ​ង​ជួយ​តម្រង់​ទិស​ឱ្យ​វា​ត្រូវ​ទៅ​នឹង​កីឡា​ពិត​ប្រាកដ​»៕

អត្ថបទគួរចាប់អារម្មណ៍