ភ្នំពេញៈ ភាពរីកចម្រើនទៅលើគុណភាព និងបច្ចេកទេសនៃការសម្តែង ព្រមទាំងការទទួលបានជោគជ័យ សម្រាប់ការដណ្តើមបានមេដាយប្រាក់ និងសំរឹទ្ធ ពីការប្រកួតនៅលើឆាកអន្តរជាតិ ជាបន្តបន្ទាប់កន្លងមកនេះ បានធ្វើឱ្យក្រុមកីឡាកាយសម្ព័ន្ធកម្ពុជា កាន់តែមានភាពជឿជាក់ ក្នុងការឈានទៅសម្រេចគោលដៅឈ្នះមេដាយមាសជូនកម្ពុជា នៅស៊ីហ្គេម លើកទី៣២ ឆ្នាំ២០២៣ ដែលកម្ពុជា ត្រូវធ្វើជាម្ចាស់ផ្ទះ ហើយក្រុមកាយសម្ព័ន្ធ ក៏ទើបតែទទួលបានប្រាក់រង្វាន់ពីរាជរដ្ឋាភិបាល ចំពោះជ័យជម្នះរបស់ពួកគេផងដែរ។
មន្ត្រីបច្ចេកទេសរបស់សហព័ន្ធកីឡាកាយសម្ព័ន្ធកម្ពុជា លោក ណយ ផាណា បានវាយតម្លៃជារួមថា កម្រិតប្រកួតប្រជែងរបស់ក្រុមកាយសម្ព័ន្ធ ពិតជាមានសម្ទុះឡើងខ្លាំង ដោយសារតែពួកគេបានប្រឹងប្រែងហ្វឹកហាត់ខ្លាំង ហើយមានចិត្ត ក្នុងការប្រកួតប្រជែងគ្នាខ្លាំងទាំងនៅក្នុងការប្រកួតជើងឯកថ្នាក់ជាតិ ឆ្នាំ២០២២ និងការប្រកួតនៅក្នុងព្រឹត្តិការណ៍កីឡាជាតិ លើកទី៣ ដែលទើបបានបញ្ចប់ កាលពីថ្ងៃទី៣០ ខែវិច្ឆិកា ឆ្នាំ២០២២នេះ។
អគ្គលេខាធិការសហព័ន្ធកីឡាកាយសម្ព័ន្ធកម្ពុជា លោក ណយ ផាណា បានប្រាប់ភ្នំពេញប៉ុស្តិ៍ថា៖ «ការចង់ឈ្នះខ្លាំងរបស់កីឡាករ កីឡាការិនីរបស់យើង បានធ្វើឱ្យការប្រកួតប្រជែង មានសម្ទុះឡើងខ្លាំង ដែលធ្វើឱ្យយើងទទួលបានកីឡាករ កីឡាការិនីល្អៗច្រើន គឺកីឡាការិនីផ្នែកអាទីស្ទិក ខ្ញុំឃើញ៣ទៅ៤នាក់ ចំណែកផ្នែកអេរ៉ូប៊ិក ខ្ញុំឃើញ៧ទៅ៨នាក់ គឺយើងឃើញច្រើន សម្រាប់បន្តវេនទៅថ្ងៃអនាគតនៃប្រភេទកីឡាកាយសម្ព័ន្ធរបស់យើង»។
ជាមួយការបង្ហាញពីភាពរីកចម្រើនក្នុងការប្រកួតប្រជែងគ្នា នៅក្នុងស្រុកនេះ ក្រុមកីឡាករ កីឡាការិនីជម្រើសជាតិកាយសម្ព័ន្ធ បាននឹងកំពុងធ្វើឱ្យថ្នាក់ដឹកនាំរបស់ខ្លួន មានការជឿជាក់ទៅលើពួកគេ ក្នុងការឈានទៅដណ្តើមបានមេដាយមាស នៅស៊ីហ្គេម ឆ្នាំ២០២៣ បន្ទាប់ពីពួកគេ ដណ្តើមបានមេដាយប្រាក់៣ និងសំរឹទ្ធ១ ក្នុងស៊ីហ្គេម នៅវៀតណាម កាលពីខែឧសភា ឆ្នាំ២០២២ និងការដណ្តើមបានមេដាយប្រាក់២ និងសំរឹទ្ធ១ ពីការប្រកួតកីឡាកាយសម្ព័ន្ធអាអេរ៉ូប៊ិកជើងឯកអាស៊ី លើកទី៧ ឆ្នាំ២០២២ នៅប្រទេសថៃ។
លោក ថោង ខុន ប្រធានសហព័ន្ធកីឡាកាយសម្ព័ន្ធកម្ពុជា បានថ្លែងថា នៅក្នុងពិធីបិទការប្រកួតកីឡាជាតិ ថា៖ «កន្លងមកនេះ កីឡាកាយសម្ព័ន្ធរបស់យើង នៅមានកម្រិតទាប ប៉ុន្តែយើងបានតស៊ូណាស់ ហើយការតស៊ូចុងក្រោយ យើងបានគ្រូបង្វឹកប្រេស៊ីល មកជួយបង្ហាត់យើង ធ្វើឱ្យយើងមានការរីកចម្រើន រហូតយើងឈ្នះបានមេដាយប្រាក់ និងសំរឹទ្ធ នៅស៊ីហ្គេម ប្រទេសវៀតណាម និងដណ្តើមបានមេដាយប្រាក់ និងសំរឹទ្ធ ពីការប្រកួតជើងឯកអាស៊ី នៅបាងកក»។
រដ្ឋមន្ត្រីក្រសួងទេសចរណ៍ លោក ថោង ខុន បានបន្ថែមថា៖ «ពីពេលនេះ ទៅដល់ស៊ីហ្គេម ឆ្នាំ២០២៣ នៅសល់ពេល ៥ទៅ៦ខែទៀត អ៊ីចឹងយើងអាចយកបានមេដាយមាស។ ខ្ញុំមានសង្ឃឹមណាស់ ដោយសារការដាក់សម្ទុះរបស់ CAMSOC គឺកីឡាកាយសម្ព័ន្ធរបស់យើងហ្នឹង ត្រូវបានមេដាយមាសយ៉ាងតិច១ ហើយយ៉ាងតិច១នេះ មិនមែនមានន័យថា ១ទេ គឺលើសពី១ អ៊ីចឹងយើងត្រូវប្តេជ្ញាចិត្តទាំងអស់គ្នាថា ត្រូវដណ្តើមមេដាយមាសឱ្យបានលើសពី១ ព្រោះនេះជាជោគជ័យ និងជាកិត្តិយសសម្រាប់ជាតិយើង»។
ជុំវិញការបង្ហាញភាពជឿជាក់របស់ លោក ថោង ខុន ដែលថា ក្រុមកាយសម្ព័ន្ធកម្ពុជា នឹងអាចដណ្តើមបានមេដាយមាស នៅស៊ីហ្គេមនេះ ត្រូវបានលោក ណយ ផាណា ជាអ្នកជំនាញ បានអះអាងថា មកពី លោក ថោង ខុន ដែលជាប្រធានគណៈកម្មាធិការជាតិអូឡាំពិកកម្ពុជា (NOCC) ផងនោះ បានយល់ពីលក្ខណៈបច្ចេកទេស ស្របពេលការដាក់ផែនការ២លើករបស់សហព័ន្ធកីឡាកាយសម្ព័ន្ធកម្ពុជា សុទ្ធតែធ្វើបានសម្រេចទៅទៀត។
លោ ណយ ផាណា បានបញ្ជាក់ថា៖ «កាលដែលឯកឧត្តមប្រធាន ថោង ខុន ហ៊ានវាយតម្លៃថា ត្រូវយកមេដាយមាសឱ្យបាន១ ឬលើសពី១ នៅស៊ីហ្គេមនេះ ដោយសាលោកបានយល់ពីលក្ខណៈបច្ចេកទេស និងការពិនិត្យជាក់ស្តែងទៅលើលទ្ធផលដែលយើងបានដាក់ចេញនេះឯង។ ចំណែកខ្ញុំជាអ្នកជំនាញ ពិតជាយល់ស្រប ចំពោះអ្វីដែលលោកបានលើកឡើង គឺរឿងបញ្ហាមេដាយមាស១ យើងនឹងធ្វើឱ្យបាន ហើយបើបានលើសពី១ កាន់តែប្រសើរ»។
ចំពោះផែនការទាំង២ ដែលលោក ណយ ផាណា បានលើកឡើងនេះ គឺទី១ សំដៅទៅលើការដណ្តើមបានមេដាយប្រាក់៣ និងសំរឹទ្ធ១ នៅស៊ីហ្គេម ប្រទេសវៀតណាម ដែលលោកអះអាងថា ជាជោគជ័យលើសពីផែនការ និងទី២ការដណ្តើមបានមេដាយប្រាក់២ និងសំរឹទ្ធ១ សម្រាប់ការប្រកួត Aerobic Gymnastics Asian Championship 2022 នៅខេត្តប៉ាតាយ៉ា ប្រទេសថៃ កាលពីខែកញ្ញា។
សម្រាប់ការដណ្តើមបានមេដាយប្រាក់២ និងសំរឹទ្ធ១ ពីការជើងឯកអាស៊ី លើកទី៧ ឆ្នាំ២០២២ នៅប្រទេសថៃនេះ គឺក្រុមកីឡាករ កីឡាការិនី និងគ្រូបង្វឹកកីឡាកាយសម្ព័ន្ធកម្ពុជា ទើបតែទទួលបានប្រាក់រង្វាន់ពីរាជរដ្ឋាភិបាល កាលពីថ្ងៃទី៦ ខែធ្នូនេះ ដោយក្នុងនោះ អ្នកឈ្នះមេដាយប្រាក់ ទទួលបាន២០លានរៀលដូចគ្នា ចំណែកអ្នកបានមេដាយសំរឹទ្ធ ទទួលបាន ១៦លានរៀល។
ចំពោះគ្រូបង្វឹក ទទួលបានប្រាក់រង្វាន់លើកទឹកចិត្ត១០០ភាគរយ ស្មើនឹងមេដាយខ្ពស់បំផុតរបស់កីឡាករកីឡាការិនី និងគ្រូជំនួយ ទទួលបាន៧០ភាគរយ នៃមេដាយរបស់កីឡាករ កីឡាការិនី ទទួលបានផងដែរ ដូច្នេះប្រាក់រង្វាន់ ដែលរាជរដ្ឋាភិបាលផ្តល់ជូនដល់ម្ចាស់ជយលាភីកីឡាកាយសម្ព័ន្ធអាអេរ៉ូប៊ិកជើងឯកអាស៊ី លើកទី៧នេះ មានចំនួនសរុប ២៣៦លានរៀល៕