The Phnom Penh Post Search

Search form

Logo of Phnom Penh Post newspaper Phnom Penh Post - CAMSOC យកការ​ប្រកួត​កីឡានៅ​បុណ្យ​សមុទ្រ ជាបុរេ​ព្រឹត្តិ​ការណ៍ សម្រាប់​ឆ្ពោះ​ទៅរៀប​ចំ ធ្វើ​ម្ចាស់​ផ្ទះ​ស៊ីហ្គេម​

CAMSOC យកការ​ប្រកួត​កីឡានៅ​បុណ្យ​សមុទ្រ ជាបុរេ​ព្រឹត្តិ​ការណ៍ សម្រាប់​ឆ្ពោះ​ទៅរៀប​ចំ ធ្វើ​ម្ចាស់​ផ្ទះ​ស៊ីហ្គេម​

Content image - Phnom Penh Post
ការប្រកួតទូកក្តោង ក្នុងពិធីបុណ្យសមុទ្រនៅខេត្តព្រះសីហនុ កាលពីខែមករាឆ្នាំ២០២១។ ហេង ជីវ័ន

CAMSOC យកការ​ប្រកួត​កីឡានៅ​បុណ្យ​សមុទ្រ ជាបុរេ​ព្រឹត្តិ​ការណ៍ សម្រាប់​ឆ្ពោះ​ទៅរៀប​ចំ ធ្វើ​ម្ចាស់​ផ្ទះ​ស៊ីហ្គេម​

ភ្នំពេញៈមន្រ្តីជំនាញ​របស់​គណៈ​កម្មាធិការ​ជាតិ​រៀបចំការ​ប្រកួត​កីឡាអាស៊ី​អាគ្នេយ៍ លើក​ទី​៣២ ឆ្នាំ​២០២៣ (CAMSOC) បានឱ្យដឹង​ថា ការរៀបចំការ​ប្រកួត​កីឡា​ប្រដាល់​គុន​ខ្មែរ ជ្រើស​រើស​ជើង​ឯក​​អាស៊ី​​អាគ្នេយ៍ ក្នុង​ពិធី​បុណ្យ​សមុទ្រ ក្នុង​​ខេត្តព្រះ​សីហនុ ចាប់​ពី​ថ្ងៃទី​​៩ ដល់​ទី​១១ ខែធ្នូ​ គឺ​ជាបុរេ​ព្រឹត្តិ​ការណ៍ ឬ Pre-Sea Games សម្រាប់​ឆ្ពោះទៅ​​ទទួល​រៀ​បចំ​ធ្វើម្ចា​ស់​ផ្ទះ ស៊ីហ្គេម​២០២៣ ដែល​កម្ពុជា ត្រូវ​ធ្វើ​ជាម្ចាស់​ផ្ទះ។

សម្រាប់​​ពិធីបុណ្យ​សមុទ្រ លើក​ទី៩ ដែលនឹង​ត្រូវ​ធ្វើ​ឡើង​រយៈពេល​៣​ថ្ងៃ នៅ​ថ្ងៃសុក្រ​ សៅរ៍ និងថ្ងៃ​អាទិត្យ​នេះ CAMSOC គណៈ​កម្មាធិការ​ជាតិ​អូឡាំ​ពិក​កម្ពុជា (NOCC) រួមទាំង​ក្រសួង​ទេស​ចរណ៍ មាន​រៀបចំ​ទស្សនីយ​ភាព និងព្រឹត្តិការណ៍​កីឡា​ជា​ច្រើន ដើម្បីបម្រើ​ដល់​​ការ​កម្សាន្ត​​របស់​អ្នក​ចូល​រួម​​ផ្ទាល់ ហើយ​សន្និបាត​ក្លិបឆ្នេរ​ស្អាត​ជាងគេ​ នៅលើ​​ពិភព​លោក ក៏ត្រូវ​ធ្វើ​ឡើង នៅ​ខេត្ត​ព្រះសី​ហនុ ក្នុង​ពេលជា​មួយគ្នា​នេះផង​ដែរ។

លោក វ៉ាត់ ចំរើន អគ្គលេ​ខាធិការ CAMSOC បាន​​ថ្លែងថា៖​«ពិធី​បុណ្យសមុទ្រ លើក​ទី​៩​នេះ បាន​វិលមក​ដល់ជុំ​ខេត្ត​ព្រះ​សីហនុ​វិញ ដោយភ្ជាប់​​ជាមួយ​នឹង​ការធ្វើ​សន្និបាត​ក្លិប​ឆ្នេរ​ស្អាត​ជាងគេ​ នៅលើ​ពិភពលោក ហើយ​បុណ្យ​សមុទ្រ​នេះ នឹង​ប្រារព្ធពិធី​បើក​ជា​ផ្លូវការ ក្រោម​អធិបតី​ភាព​ដ៏ខ្ពង់​ខ្ពស់​សម្តេច​តេជោនាយក​រដ្ឋមន្ត្រី ហ៊ុន សែន ហេតុ​នេះ​ឯកឧត្តម​បណ្ឌិត ថោង ខុន រដ្ឋមន្ត្រី​ក្រសួង​ទេស​ចរណ៍ ​ជា​ប្រធាន​គណៈ​កម្មការ​អន្តរ​ក្រសួង រៀប​ចំ​បុណ្យ​សមុទ្រ បាន​ជំរុញឱ្យ​គណៈ​កម្មការ​រៀបចំ​បាន​រៀបរយ​ល្អ​ប្រសើរ និង​មាន​ភាព​ហ្មត់​ចត់​​បំផុត»។

ជាមួយ​គ្នា​នេះ លោក ថោង ខុន ដែល​ជា​ប្រធាន​គណៈ​កម្មាធិការ​ជាតិ NOCC និងជា​អនុ​ប្រធាន​អចិន្រ្តៃយ៍​របស់ CAMSOC ផង​នោះ បាន​​អនុញ្ញាត​ឱ្យ NOCC រៀបចំ​​នៅ​ព្រឹត្តិ​ការណ៍​កីឡា ​អមជាមួយ​​នឹងព្រឹត្តិ​ការណ៍​​តាំង​ពិព័រណ៍ ព្រឹត្តិការ​ណ៍​ម្អូប​អាហារ និង​ព្រឹត្តិ​ការណ៍​ទស្ស​នីយភាព​កម្សាន្ត​សប្បាយៗ​ជាច្រើន​ទៀត នៅ​ក្នុងពិធី​បុណ្យ​សមុទ្រ​នេះ ផង​ដែរ ដើម្បី​ធ្វើ​ឱ្យមាន​ភាព​ទាក់​ទាញ​ដល់​ភ្ញៀវ​ទេស​ចរ។

ចំពោះ​ប្រភេទ​កីឡា ដែល NOCC បាន​រៀបចំ​ឱ្យ​មាន​ការ​ប្រកួត នៅ​ក្នុង​ពិធី​បុណ្យ​សមុទ្រ​ឆ្នាំ​នេះ រួមមាន​ការ​ប្រកួត​កីឡា​បាល់​បោះ​៣​នាក់​ទល់​៣​នាក់ ការ​រត់​ប្រណាំង​៣គីឡូ​ម៉ែត្រ និង​៥​គីឡូ​ម៉ែត្រ ការប្រណាំង​កង់​ចម្ងាយ​៤០​គីឡូ​ម៉ែត្រ ២០​គីឡូ​ម៉ែត្រ និងការ​ជិះកង់​កម្សាន្ត​ចម្ងាយ​១៥​​គីឡូ​ម៉ែត្រ ព្រមទាំង​ការ​ប្រកួត​កីឡា​ប្រដាល់​គុនខ្មែរ​ជ្រើសរើស​ជើងឯក​អាស៊ី​អាគ្នេយ៍ ឆ្នាំ​២០២២ និងការ​បង្ហាញសមត្ថ​ភាព​របស់ក្រុម​ទូកក្តោង នៅ​លើផ្ទៃ​សមុទ្រ ដើម្បី​ផ្តល់​ភាព​រីក​រាយ សម្រាប់​អ្នក​ចូល​រួម​ទាំង​អស់។

តែទោះបី​ជាយ៉ាង​ណា នៅ​ក្នុង​ចំណោម​ប្រភេទ​កីឡា ដែល​ត្រូវបាន​រៀបចំ​ឱ្យមាន​ការ​ប្រកួត នៅ​បុណ្យ​សមុទ្រ​នេះ គឺ​ការ​ប្រកួត​កីឡា​ប្រដាល់​គុនខ្មែរ​ជ្រើសរើស​ជើងឯក​អាស៊ី​អាគ្នេយ៍ មាន​សារៈ​សំខាន់ និង​ត្រូវ​រៀបចំ​ឡើង​ដោយ​ភាព​ស្តង់​ដាខ្ពស់ ព្រោះ​ការប្រកួត ត្រូវ​បាន​ចាត់​ទុក​ថា ជា​បុរេ​ព្រឹត្តិការណ៍​សម្រាប់​កម្ពុជា ក្នុង​ការ​ឈាន​ទៅ​រៀប​ចំការ​ប្រកួត​ស៊ី​ហ្គេម លើកទី​៣២ ឆ្នាំ​២០២៣។

លោក វ៉ាត់ ចំរើន បាន​បញ្ជាក់​ថា៖ «ការរៀបចំ​ការ​ប្រកួត​កីឡា​ប្រដាល់​គុន​ខ្មែរ​ជើង​ឯក​អាស៊ីអា​គ្នេយ៍ នៅ​បុណ្យ​សមុទ្រ​នេះ គឺ​យើង​រៀបចំ​ឱ្យគ្រប់​ស្តង់ដា ក្នុង​ការ​ឈាន​ទៅ​ស៊ីហ្គេម។ យើង​ហៅ​ថា ជាបុរេ​ព្រឹត្តិ​ការណ៍ ឬ Pre-Sea Games សម្រាប់​ឆ្ពោះ​ទៅទទួល​រៀបចំ​ធ្វើម្ចាស់​ផ្ទះ ស៊ីហ្គេម ២០២៣ អ៊ីចឹង​យើង​ត្រូវ​ធ្វើ​ឱ្យបានគ្រប់​ជ្រុង​ជ្រោយ​»។

ជា​មួយ​គ្នា​នេះ CAMSOC ក៏បានរៀប​ចំ​វគ្គ​អាជ្ញា​កណ្តាល-ចៅក្រម​គុន​ខ្មែរ​អន្តរ​ជាតិ ​ដោយ​មានសិក្ខា​កាមជា​អាជ្ញា​កណ្តាល-ចៅក្រម​ខ្មែរចំនួ​ន៣​០នាក់ និង​មន្ត្រីអន្តរ​ជាតិ​២៥​នាក់ ដើម្បី​​ត្រៀម​ចូល​រួម​កាត់សេចក្តី នៅ​ក្នុង​ការ​ប្រកួត​​កីឡា​ប្រដាល់​គុនខ្មែរ​ជ្រើសរើស​ជើងឯក​អាស៊ី​អាគ្នេយ៍ ឆ្នាំ២០២២ (KUN KHMER SEA Championship 2022)នេះ ហើយ​វគ្គ​នេះ បាន​បិទ​បញ្ចប់​​ជា​​ផ្លូវការ កាល​ពី​ល្ងាចថ្ងៃទី​៧ ខែធ្នូ ​ឆ្នាំ​២០២២​នេះ នៅ​ខេត្ត​ព្រះសីហនុ​នោះ​តែ​ម្តង។

លោក វ៉ាត់ ចំរើន ដែល​ជារដ្ឋលេខា​ធិការ​ក្រសួង​ទេស​ចរណ៍ និងជា​អគ្គលេខា​ធិការ គណៈ​កម្មាធិការ​ជាតិ CAMSOC ដែល​បាន​ចូល​រួម​ជាអធិបតី​ភាព ក្នុង​ពិធីបិទ​វគ្គ​នោះ បាន​កោត​សរសើរ និងវាយ​តម្លៃ​ខ្ពស់ ​ចំពោះ​ការ​ខិតខំ​ប្រឹង​​ប្រែង​​ក្រេប​ជញ្ជក់​ចំណេះ​ដឹង​របស់​សិក្ខាកាម​ទាំង​អស់​ពី​គ្រូឧទ្ទេ​សអន្តរ​ជាតិ ដើម្បី​ពង្រឹង​សមត្ថ​ភាព​​​បន្ថែម ក្នុង​ការ​បម្រើ​ដល់​ការ​រៀបចំ​ជើងឯក​អាស៊ី​អាគ្នេយ៍ ពីថ្ងៃទី៩ ដល់​ថ្ងៃទី​១១ ខែធ្នូ ក្នុង​​ពិធី​​បុណ្យ​សមុទ្រនេះ ឱ្យ​ទទួល​បាន​ជោគ​ជ័យ។

យ៉ាងណា​ក៏​ដោយ លោក វ៉ាត់ ចំរើន ក៏បាន​លើក​ទឹក​ចិត្ត​ដល់​សិក្ខា​កាម ដែល​ជា​មន្ត្រី​អាជ្ញា​កណ្តាល-ចៅក្រម​​ប្រដាល់​គុន​ខ្មែរ ត្រូវ​ខិតខំ​ដុសខាត់​សមត្ថ​ភាពឱ្យ​បាន​ល្អ​ប្រសើរ​បន្ថែម​ទៀត នៅ​ក្នុងការ​ប្រកួត KUN KHMER SEA Championship 2022នេះ ដើម្បី​ពង្រឹង​សមត្ថ​ភាព ត្រៀម​ធ្វើ​ម្ចាស់​ផ្ទះ នៅស៊ី​ហ្គេម ឆ្នាំ​២០២៣។

លោក​បញ្ជាក់​ថា៖​ «តាម​រយៈការ​អនុវត្ត​ផ្ទាល់ នៅ​ក្នុង​ការ​ប្រកួត​ដ៏​មាន​សារៈសំខាន់​មួយ​នេះ វាជាពេល​វេលា​ដ៏​ល្អ ដែល​មន្រ្តី​អាជ្ញា​កណ្តាល ចៅ​ក្រម​របស់​យើង បាន​ពង្រឹង​គុណ​ភាព​​ឱ្យ​កាន់​តែ​រឹងមាំ សម្រួច​គោល​ដៅ​ឆ្ពោះទៅ​ទទួល​រៀបចំ​ធ្វើ​ម្ចាស់​ផ្ទះ ការ​ប្រកួត​កីឡា ស៊ីហ្គេម លើក​ទី៣២ ឆ្នាំ២០២៣ ជាប្រវត្តិសាស្ត្រ​ដំបូង​របស់​កម្ពុជា​»។

សម្រាប់​ការ​ប្រកួត​កីឡា​ប្រដាល់​គុន​ខ្មែរ​ជើង​ឯកអាស៊ី​អាគ្នេយ៍ ក្នុង​ពិធីបុណ្យ​សមុទ្រ លើក​ទី​៩ ឆ្នាំ​២០២២ នៅខេត្ត​ព្រះសីហនុ​នេះ មាន​កីឡាករ កីឡា​ការិនី​ចូល​រួម​ប្រកួត​ជាង​១៤០​នាក់ ​មកពី​ប្រទេស​វៀតណាម​ ម៉ាឡេស៊ី ហ្វីលី​ពីន ឥណ្ឌូនេ​ស៊ី ថៃ មីយ៉ាន់​ម៉ា ខណៈ​កីឡា​ករ កីឡា​ការិនី​កម្ពុជា​មាន១៧នាក់ (ស្រី៤​នាក់) ដោយ​ពួកគេ ត្រូវ​​ប្រកួត​លើ​វិញ្ញាសា​​ផ្នែកបុរស​ចំនួ​ន​៧​ប្រភេទ​ទម្ងន់ ផ្នែក​នារី៤​ប្រភេទ​ទម្ងន់ និងវិញ្ញា​សាគុន​គ្រូ២​វិញ្ញា​សា៕

អត្ថបទគួរចាប់អារម្មណ៍