ខ្សែប្រយុទ្ធ Olivier Giroud បានបន្តអភិនិហាររបស់គេ ក្នុងព្រឹត្តិការណ៍ World Cup តាមរយៈការរកគ្រាប់បាល់ឈ្នះឲ្យក្រុមជម្រើសជាតិបារាំង ក្នុងការប្រកួតវគ្គ៨ក្រុមចុងក្រោយរបស់ពួកគេ ជាមួយនឹងក្រុមជម្រើសជាតិអង់គ្លេស កាលពីថ្ងៃសៅរ៍ ទី១០ ខែធ្នូ (ម៉ោងនៅកម្ពុជា) និងបានទទួលស្គាល់ថា ការបង្ហាញពីទម្រង់លេងយ៉ាងរឹងមាំរបស់ក្រុមម្ចាស់ការពារជើងឯកមួយនេះ បានបំផុសឲ្យមានស្មារតីនៃការទទួលជ័យជម្នះរបស់ពួកគេក្នុងឆ្នាំ២០១៨។
បច្ចុប្បន្ន បារាំង ត្រូវការឈ្នះត្រឹមតែ២លើកទៀតប៉ុណ្ណោះ ដើម្បីក្លាយជាក្រុមដំបូងគេក្នុងរយៈពេល៦០ឆ្នាំ ដែលបានការពារពានពានយ៉ាងជោគជ័យ ក្រោយពីគ្រាប់បាល់ទី៤របស់ Giroud ប្រចាំយុទ្ធនាការនេះ បានទម្លាក់ក្រុមជម្រើសជាតិអង់គ្លេស ក្នុងការប្រកួតដ៏រំភើបនាកីឡដ្ឋាន Al Bayt។
ក្រុមម្ចាស់ការពារជើងឯកបារាំង បានរកគ្រាប់បាល់នាំមុខមុនតាមរយៈកីឡាករ Aurelien Tchouameni ប៉ុន្តែ ត្រូវបានតាមស្មើវិញនៅដើមតង់ទី១ ហើយលទ្ធផលស្មើនោះ បានបន្តក្នុងរយៈពេលដ៏យូរ មុនពេល Giroud បានតែតបាល់បញ្ចូលទីយ៉ាងល្អកាត់សេចក្តីក្នុងការប្រកួតនៅនាទី ទី៧៨ ដើម្បីបំពេញជ័យជម្នះក្នុងលទ្ធផល ២-១ តែម្តង។
បារាំង មានភាគរយនៃការគ្រប់គ្រងបាល់តិចជាង ក៏ដូចជាឱកាសរកគ្រាប់បាល់តិចជាងដល់ទៅពាក់កណ្តាល ប៉ុន្តែ បានជួបសំណាងល្អ នៅពេលដែល Harry Kane ដែលបានស៊ុតបាល់ប៉េណាល់ទីតាមស្មើកាលពីដើមតង់ទី២នោះ បានស៊ុតបាល់ប៉េណាល់ទីមួយទៀតរំលងរបាទី ដើម្បីបញ្ចប់ក្តីសង្ឃឹមរបស់ក្រុមខ្លួនតែម្តង។
Giroud បាននិយាយថា ការប្រកួតនេះ បានបង្កើតឲ្យមានការចងចាំពីការប្រកួតរបស់ក្រុមខ្លួនក្នុងវគ្គពាក់កណ្តាលផ្តាច់ព្រ័ត្រក្នុងប្រទេសរុស្ស៊ី កាលពី៤ឆ្នាំមុន នៅពេលដែលពួកគេបានយកឈ្នះលើក្រុមជម្រើសជាតិបែលហ្ស៊ិក ក្នុងលទ្ធផល ១-០ ក្នុងទីក្រុង Saint-Petersburg នៅមុនពេលយកឈ្នះលើក្រូអាស៊ី និងឈ្នះពាន World Cup។
ខ្សែប្រយុទ្ធរូបនេះបានឲ្យដឹងថា៖ «ការប្រកួតនេះ ធ្វើឲ្យខ្ញុំនឹកឃើញពីការប្រកួតជាមួយនឹងក្រុមបែលហ្ស៊ិក ក្នុងឆ្នាំ២០១៨ បើទោះបីសេណារីយ៉ោខុសគ្នាក៏ដោយ ពីព្រោះអង់គ្លេស បានវាយបកវិញ និងជឿជាក់លើឱកាសរបស់ពួកគេ និងវាយសម្រុកជានិច្ច។ យើងបានបង្ហាញពីស្មារតីដ៏អស្ចារ្យ និងបានខិតខំព្យាយាមខ្លាំង។ នេះគឺជាការបង្ហាញពីស្មារតីដូចគ្នាទៅនឹងឆ្នាំ២០១៨ ហើយខ្ញុំសង្ឃឹមថា យើងធ្វើដំណើរទៅតានឆ្ងាយ ពីព្រោះក្រុមនេះ មានសមត្ថភាពដ៏អស្ចារ្យ»៕