ភ្នំពេញៈ អ្នកលេងផ្លែកែង ធឿន ធារ៉ា បានក្លាយជាកីឡាករគុនខ្មែរដំបូងគេដែលដណ្តើមបានខ្សែក្រវាត់ Thai Fight និងពានរង្វាន់ស្តេចថៃ ឆ្នាំ២០២២ បន្ទាប់ពីរូបគេបានវាយកែងបណ្តាលឱ្យជើងខ្លាំងចាស់វស្សារបស់ថៃ Saiyok Sakchainrong បែកធំ និងត្រូវបានគ្រូពេទ្របញ្ឈប់ត្រឹមទឹក១ សម្រាប់ការប្រកួតផ្តាច់ព្រ័ត្រដណ្តើមខ្សែក្រវាត់នេះក្នុងប្រភេទទម្ងន់៧២,៥គីឡូក្រាម ប៉ុន្តែ អេលីត ហ៊ុនកង ត្រូវបានខ្លាចាស់ សែន ឆ័យ ទាត់ឱ្យសន្លប់ធំ នៅទឹកទី២។
តាមរយៈការប្រកួត ដែលធ្វើនៅប្រទេសថៃ កាលពីយប់ថ្ងៃ២៤ ខែធ្នូ ធឿន ធារ៉ា ធ្វើបានល្អបំផុត ដោយរូបគេ បានវាយលុកទៅលើខ្លាចាស់ Saiyok ដោយគ្មានញញើតនោះទេ បើទោះបីជា Saiyok ជាខ្លាកំណាចរបស់ Thai Fight ដែលទើបទាត់ឱ្យមិត្តរួមជាតិរបស់គេ ធន់ រិទ្ធី សន្លប់ក្នុងទឹកទី២ ក៏ដោយ។
ការប្រើកណ្តាប់ដៃឆ្វេងស្តាំ ម៉ាត់ទៅលើកណ្តៀតក្អមរបស់ ធឿន ធារ៉ា បានធ្វើឱ្យ Saiyok ហាក់គ្មានឱកាសដកឃ្លា ទាល់តែសោះ ក្នុងការប្រើស្នៀតជើងដ៏ខ្លាំងរបស់គេ ព្រោះការវាយសន្ធាប់មិនដកថយរបស់ ធឿន ធារ៉ា បានធ្វើឱ្យកីឡាករចាស់វិស្សារបស់ថៃរូបនេះ រងសម្ពាធខ្លាំង ហើយស្ថិតក្នុងស្ថានភាពដ៏អំណោយផលនេះ ធារ៉ា បានវាយកែងខ្លីថែមយ៉ាងលឿន បណ្តាលឱ្យ Saiyok បែកលើចិញ្ចឹមខាងស្តាំ ហូរឈាមស្រោចពេញមុខ។
ភ្លាមៗនោះ គ្រូពេទ្យប្រចាំសង្វៀន Thai Fight បានចាប់ឃាត់ Saiyok ដើម្បីធ្វើការពិនិត្យមុខរបួសបែកនេះ រួចក៏បញ្ឈប់ការប្រកួត និងផ្តល់ជ័យជម្នះឱ្យ ធឿន ធារ៉ា តែម្តង។ ធឿន ធារ៉ា បានបង្ហាញក្តីរំភើបខ្លាំង រហូតយំ ព្រោះជ័យជម្នះនេះ វាពិតជាសំខាន់ខ្លាំងណាស់ ក្នុងការជួយលើកមុខមាត់គុនខ្មែរនៅលើឆាកអន្តរជាតិ ហើយវាក៏ជាពេលដែល ធឿន ធារ៉ា បានឈ្នះខ្សែក្រវាត់ និងពានលេខ១នេះ ជាលើកដំបូង ក្នុងអាជីពផងដែរ។
ធឿន ធារ៉ា បាននិយាយក្រោយការប្រកួតថា៖ «ខ្ញុំមានអារម្មណ៍ក្តុកក្តួលខ្លាំង ព្រោះវាជាលើកទី១ ដែលខ្ញុំទទួលបានខ្សែក្រវាត់ ហើយខ្ញុំមិនស្មានដល់ថា អាចបានខ្សែក្រវាត់នេះទេ ព្រោះគេល្អ។ វ័យគេចាស់មែន តែក្បាច់របស់គេនៅល្អ គឺគាត់ទាត់ធ្ងន់ និងកែងខ្លីបានលឿន ប៉ុន្តែខ្ញុំវាយដៃចូលមុន ហើយឃើញថា គាត់ចុក អ៊ីចឹងខ្ញុំក៏វាយកែងថែមទៀត ដែលការបត់កែងរបស់ខ្ញុំនេះ ចូលពេញល្អ»។
ជាមួយការឈ្នះខ្សែក្រវាត់ Thai Fight នេះ ធឿន ធារ៉ា ទទួលបានប្រាក់រង្វាន់សរុបជិត៣ម៉ឺនដុល្លារ ហើយរួមគេក៏ទទួលបានប្រាក់ឧបត្ថម្ភពីជនរួមជាតិជាច្រើនទៀតផងដែរ ព្រោះគ្រប់គ្នា ពិតជារំភើបខ្លាំងបំផុត ដែល ធារ៉ា បានផ្តួលខ្លាកំណាចប្រចាំនៅ Thai Fight សៃយុគ បានសម្រេច ខណៈកីឡាករកម្ពុជាច្រើននាក់ណាស់ បានសន្លប់ និងចាញ់ នៅលើសង្វៀនមួយនេះ ពោលគឺមានតែ សេន ប៊ុនថេន និង កែវ រំចង់ ប៉ុណ្ណោះ ដែលធ្លាប់ឈ្នះនៅ Thai Fight កន្លងមក ប៉ុន្តែនោះគ្រាន់តែជាការប្រកួតមិត្តភាពអន្តរជាតិប៉ុណ្ណោះ មិនមែនជាការប្រកួតដណ្តើមខ្សែក្រវាត់ដូច ធឿន ធារ៉ា នោះឡើយ។
យ៉ាងណាក៏ដោយ នៅមុនការប្រកួតផ្តាច់ព្រ័ត្រជាមួយ Saiyok នេះ ធឿន ធារ៉ា បានហ្វឹកហាត់ខ្លាំងណាស់ ក្រោមការបង្ហាត់ផ្ទាល់ពីលោកគ្រូ អេ ភូថង។ ធារ៉ា បានបញ្ជាក់ថា៖«សម្រាប់ការប្រកួតនេះ ខ្ញុំបានត្រៀមខ្លួនរួចរាល់មុន ដោយខ្ញុំចាំឈរបាំងឆ្វេង និងកាត់ជើងមុខរបស់គាត់។ ខ្ញុំបានដាក់ក្តីសង្ឃឹមថា នឹងយកឈ្នះឱ្យបាន ប៉ុន្តែខ្ញុំពិតជាមិននឹកស្មានដល់ថា ខ្ញុំធ្វើបានល្អដល់ថ្នាក់ហ្នឹងនោះទេ»។
ជាមួយគ្នានេះលោក ហ៊ុន ម៉ាណែត មេបញ្ជាការកងទ័ពជើងគោកកម្ពុជា ក៏បានសម្តែងការអបអរសាទរដល់ ធឿន ធារ៉ា ផងដែរ។ កូនប្រុសច្បងរបស់លោកនាយករដ្ឋមន្រ្តី ហ៊ុន សែន រូបនេះ បានបង្ហោះសារនៅលើផេកហ្វេសប៊ុករបស់លោកថា៖ «អបអរសាទរកីឡាករ ធឿន ធារ៉ា ដែលបានឈ្នះខ្សែក្រវាត់ Thai Fight និងពានរង្វាន់ស្តេចថៃ ឆ្នាំ២០២២ ដោយផ្តួលកីឡាករ សៃយុគ ក្នុងទឹកទី១»។
ផ្ទុយពីនេះ កីឡាករកម្ពុជា អេលីត ហ៊ុនកង ដែលប្រកួតផ្តាច់ព្រ័ត្រ ដណ្តើមខ្សែក្រវាត់ជាមួយជើងខ្លាំង Saenchai កាលពីយប់ថ្ងៃសៅរ៍នោះដែរគឺមិនអាចទប់ទល់ជាមួយតារាប្រយុទ្ធជើងចាស់ប្រចាំនៅ Thai Fight ម្នាក់នេះបាននោះទេ។ ទោះបីជា ហ៊ុនកង បានតាមវាយលុកទៅលើ Saenchai ដោយគ្មានការញញើតក៏ដោយ ប៉ុន្តែការទាត់ឆ្វេងចូលកញ្ចឹងកពេញទំហឹង និងម៉ាត់ថែម១ដៃរបស់ Saenchai បានធ្វើឱ្យ ហ៊ុនកង ដួលទាំងវង្វេង ហើយត្រូវបានអាជ្ញាកណ្តាលរាប់តាំងពីទឹកទី១។
យ៉ាងណាមិញ សម្រាប់ការព្យាយាមចូលវាយកណ្តាប់ដៃដោយខ្វះការប្រុងប្រយ័ត្នរបស់ អេលីត ហ៊ុនកង នាំឱ្យ Saenchai អាចទាត់ឆ្វេង ចូលកញ្ចឹងក ជាលើកទី២ និងធ្វើឱ្យ ហ៊ុនកង ដួលសន្លប់ នៅពាក់កណ្តាលទឹកទី២តែម្តង ហើយនេះជាជ័យជម្នះ៦៨លើកជាប់ៗគ្នារបស់ សែនឆ័យ។
ជាមួយគ្នានេះ លោក ស៊ន អេលីត គ្រូបង្វឹក អេលីត ហ៊ុនកង បានលើកឡើងបែបការពារ ដល់ការចាញ់របស់ ហ៊ុនកង ថា៖ «អ្នកគាំទ្រស្ដីបន្ទោស ហ៊ុនកង ធ្វើអី បើសូម្បី ណងអូ ម្ចាស់ខ្សែក្រវាត់ ONE ក៏ទទួលស្គាល់ថា ខ្លួនមិនដល់ សែនឆ័យ ដែរ (ចាញ់៤ លើកជាប់គ្នា)។ យើងរៀនបើក Wikipedia មើល សិក្សាពីគេបន្ថែម គឺ៦៨នាក់ហើយ ដែលចាញ់ សែនឆ័យ កន្លងមក មិនមែនដំឡូងមូលទាំងអស់ទេ ក្នុងនោះក៏មាន ផល សោភ័ណ្ឌ ដែរ»។
ចំណែកកីឡាករ អេលីត ហ៊ុនកង ដែលជាបេក្ខភាព ធ្លាប់ឈ្នះមេដាយសំរឹទ្ធផ្នែកកីឡាប្រដាល់សកល ជូនកម្ពុជា នៅស៊ីហ្គេមប្រទេសវៀតណាមឆ្នាំ២០២២នេះ បាននិយាយក្រោយការប្រកួតថា៖ «ថ្ងៃនេះ ខ្ញុំធ្វើអត់សូវបានល្អទេ ដោយសារតែយើងធ្លាក់ដៃពេក ហើយខ្ញុំនឹងយកចំណុចខ្វះខាតនេះទៅកែប្រែ និងខំប្រឹងធ្វើឱ្យអស់ពីលទ្ធភាព សម្រាប់ការប្រកួតក្រោយៗទៀត»៕