​ការ​ស៊ុត​បាល់​បញ្ចូល​ទី​១ ​គ្រាប់​ដ៏​អស្ចារ្យនៅ​លី​គ​ ២ ​កម្ពុជា ​ទទួល​បាន​ការ​ចាប់​អារម្មណ៍​​ខ្លាំង​នៅ​អង់​គ្លេស​​

កីឡាករ Bruno Wellington Krenkel ពេលកំពុងរៀបទាត់បាល់ពេលកំពុងប្រកួតជម្រើសជើងឯកកម្ពុជាលីគ២ ។ រូបថត សហការី

ភ្នំពេញៈ ខ្សែវីដេអូខ្លីបង្ហាញពីការស៊ុតបាល់បញ្ចូលទីពីចម្ងាយដ៏អស្ចារ្យរបស់សមាជិកក្រុមណិចស្តិបអេហ្វស៊ី Bruno Wellington Krenkel សម្រាប់ការប្រកួតជម្រើសជើងឯកកម្ពុជាលីគ ២ (Cambodian League 2) ប្រចាំឆ្នាំ ២០២២ បាននិងកំពុងទទួលបានការចាប់អារម្មណ៍ខ្លាំងនៅលើពិភពលោក ជាពិសេសនៅអង់គ្លេស ដែលជាប្រទេសមានវិស័យបាល់ទាត់រីកចម្រើនខ្លាំងជាងគេ ។

បើទោះបីជាគ្រាប់បាល់ស៊ុតពីពាក់កណ្តាលទីរបស់ខ្សែប្រយុទ្ធ Bruno Wellington Krenkel បានកើតមានឡើងតាំងពីថ្ងៃទី១៧ ខែកក្កដា ឆ្នាំ២០២២ គឺនៅពេលក្រុមណិចស្តិបអេហ្វស៊ី បានចាញ់ក្រុមព្រៃវែង

អេហ្វស៊ី ៤-២ នៅកីឡដ្ឋានសៀមរាប ប៉ុន្តែសកម្មភាពអូសបាល់រំលងកីឡាករទាំង២នាក់របស់ក្រុមព្រៃវែង រួចស៊ុតបំផ្លោងពីចម្ងាយបញ្ចូលទីយ៉ាងល្អបំផុតនៅត្រឹមនាទីទី៤ របស់ម្ចាស់អាវលេខ១៧ Bruno Krenkel បានក្លាយជាវីដេអូ ដែលកំពុងទទួលបានការគាំទ្រកាន់តែខ្លាំង។

ខ្សែវីដេអូខ្លីប្រមាណ២០វិនាទីស្តីពីការស៊ុតបាល់បញ្ចូលទីរបស់ Bruno Krenkel នេះ បានធ្វើឱ្យអ្នកគាំទ្របាល់ទាត់នៅលើពិភពលោក មានការកោតសរសើរ និងភ្ញាក់ផ្អើលខ្លាំង ហើយពួកគេកាន់តែមិននឹកស្មានដល់ថា គ្រាប់បាល់ដ៏ល្អបំផុតនេះបានកើតមានឡើងនៅក្នុងការប្រកួតជម្រើសជើងឯកកម្ពុជាលីគ២។

អ្នកគាំទ្រភាគច្រើន បានចាត់ទុកគ្រាប់បាល់នោះថា ជាគ្រាប់បាល់ដ៏កម្រ ដែលសមនឹងទទួលបានរង្វាន់ពី FIFA ហើយបច្ចុប្បន្ន វីដេអូខ្លីនេះ បាននិងកំពុងបន្តចែករំលែកកាន់តែទូលំទូលាយ និងច្រើនឡើងៗ តាម Twitter នៅប្រទេសអង់គ្លេស។

លោក Tom Watson ដែលជាវិស្វករម្នាក់មកពីទីក្រុង Derby ប្រទេសអង់គ្លេស បានថ្លែងថា៖ «នេះគឺជាគ្រាប់បាល់ដ៏អស្ចារ្យដែលបានបង្ហោះនៅលើ Twitter របស់ខ្ញុំ ហើយខ្ញុំស្ទើរតែមិនជឿនោះឡើយ! វាជាគ្រាប់បាល់កម្រិតពិភពលោក ហើយអ្នកអធិប្បាយកម្ពុជា ជួយបំពេញនូវរូបភាពវីដេអូនេះ។ ទោះបីខ្ញុំមិនចេះនិយាយភាសានោះ (ភាសាខ្មែរ) ប៉ុន្តែខ្ញុំដឹងយ៉ាងច្បាស់ពីអារម្មណ៍របស់អ្នកអធិប្បាយ»។

«នេះជារឿងដ៏អស្ចារ្យដែលគ្រាប់បាល់១ បានស៊ុតពីចម្ងាយដ៏ឆ្ងាយក្នុងការប្រកួតនៅកម្ពុជា ហើយគ្រាប់បាល់នេះ ត្រូវបានចែករំលែកនៅលើបណ្តាញសង្គម Twitter ដោយអ្នកគាំទ្របាល់ទាត់រាប់ពាន់នាក់ នៅអង់គ្លេស ហើយនេះជាការបង្ហាញពីកម្រិតទូទៅនៃបាល់ទាត់។ក្រុមដែលខ្ញុំគាំទ្រ គឺ Newcastle United ហើយខ្ញុំសង្ឃឹមថា ក្លិបនេះអាចនាំយកកីឡាករលេខ១៧ ដើម្បីមកធ្វើការតេស្តសមត្ថភាព!»។ លោក Tom Watson បានបន្ថែម។

ចំណែក Bruno Wellington Krenkel វិញ នៅតែចងចាំមិនភ្លេចចំពោះគ្រាប់បាល់ ដែលរូបគេបានស៊ុតបញ្ចូលទីទៅលើក្រុមព្រៃវែង។ ខ្សែប្រយុទ្ធប្រេស៊ីលរូបនេះបានបង្ហោះសារនៅលើហ្វេសប៊ុកបែបនេះថា៖«ខ្ញុំទទួលបានវីដេអូនេះ កាលពីដើមខែធ្នូ ដោយខ្ញុំចាំថា បេះដូងរបស់ខ្ញុំពិតជាលោតញាប់ណាស់ ហើយខ្ញុំក៏ចងចាំរឿងរ៉ាវ និងការបង្ហោះជាច្រើន ដោយខ្ញុំបានសរសេរបែបនេះ«ខ្ញុំចង់ធ្វើរឿងដ៏អស្ចារ្យជាច្រើននៅកម្ពុជា ក្នុងក្លិបណិចស្ដិប»ឬ«ខ្ញុំដឹងថា វាលំបាក ប៉ុន្តែគ្មានអ្វីអាចយកឈ្នះការខិតខំព្យាយាមបានឡើយ»ឬក៏សរសេរថា«អ្នកដឹងទេអ្នកកំពុងតែស្ថិតលើផ្លូវដែលត្រឹមត្រូវហើយ»។

Bruno Krenkel បានបន្ថែមថា៖ «មួយរយៈពេលក្រោយមក គ្រាប់បាល់១គ្រាប់ បានផ្លាស់ប្តូរជីវិតរបស់អ្នក ហើយចំពោះមនុស្សជាច្រើន វាមិនមានន័យអ្វីឡើយ ប៉ុន្តែគ្រាប់បាល់នេះ បានបង្កើតឱ្យមានការផ្លាស់ប្តូរ។ ១ថ្ងៃ មុនពេលរកបានគ្រាប់បាល់នេះ ខ្ញុំបានលុតជង្គង់ដើម្បីនិយាយបន់ស្រន់ទាំងទឹកភ្នែកទៅព្រះជាម្ចាស់ឱ្យទាត់បាល់ឱ្យខ្ញុំដើម្បីរឿងដ៏អស្ចារ្យមួយ។ នៅពេលភ្ញាក់ឡើងរាល់អ្វីៗដែលខ្ញុំបានធ្វើ ហាក់ដូចជាខុសប្លែកពីធម្មតា ខ្ញុំបានដឹងពីអ្វីដែលខ្ញុំបានធ្វើ និងកម្រិតនៃការខិតខំដែលខ្ញុំមាន។ មនុស្សជាច្រើនប្រហែលជាភ្លេចខ្ញុំ ប៉ុន្តែព្រះជាម្ចាស់ មិនបានភ្លេចឡើយ!»។

ទន្ទឹមនឹងនេះ លោក កែវ សារ៉េត អគ្គលេខាធិការសហព័ន្ធកីឡាបាល់ទាត់កម្ពុជា(FFC)ដែលធ្លាប់ជាអ្នកលេងបាល់ទាត់១រូបផងនោះ បានអះអាងថា គ្រាប់បាល់របស់ខ្សែប្រយុទ្ធ Bruno Wellington Krenkel វាសមនឹងទទួលបានការគាំទ្រខ្លាំងបែបនេះព្រោះអ្នកគាំទ្របាល់ទាត់នៅលើពិភពលោកពិតជាចង់ឃើញគ្រាប់បាល់ដ៏អស្ចារ្យ ដែលកើតចេញពីបច្ចេកទេសពិតប្រាកដបែបនេះ។

លោកបានប្រាប់ ភ្នំពេញ ប៉ុស្តិ៍ កាលពីថ្ងៃអាទិត្យថា៖ «ពិតជាណាស់ អ្នកគាំទ្រ ពិតជាចង់ឃើញគ្រាប់បាល់ដ៏អស្ចារ្យបែបនេះ ហើយវាកាន់តែមានមោទនភាព ដែលគ្រាប់បាល់នេះ បានកើតមានឡើងនៅលើទឹកដីកម្ពុជា និងក្នុងការប្រកួតជម្រើសជើងឯកកម្ពុជាលីគ២របស់យើង។ នៅពេលវីដេអូ នៃការស៊ុតបញ្ចូលទីយ៉ាងល្អនេះ ត្រូវបានចែករំលែកលើឆាកអន្តរជាតិ ហើយក៏កំពុងទទួលបានការចាប់អារម្មណ៍ខ្លាំងនៅអង់គ្លេសទៀតនោះ គឺពិតណាស់ វាបានផ្តល់នូវអត្ថប្រយោជន៍យ៉ាងសំខាន់ ក្នុងការផ្សព្វផ្សាយពីវិស័យកីឡាបាល់ទាត់របស់យើង»។

អ្នកជំនាញរបស់ FFC រូបនេះ បានបញ្ជាក់ថា៖ «ក្នុងនាមខ្ញុំ ជាគណៈកម្មការបច្ចេកទេសរបស់សហព័ន្ធ ពិតជាមានអារម្មណ៍រីករាយ និងមានមោទនភាពចំពោះដំណឹងដ៏ល្អនេះ ហើយវានឹងក្លាយជាសារជំរុញឱ្យកីឡាករ កីឡាការិនីរបស់យើងបន្តខំប្រឹងបន្ថែមទៀតក្នុងការរួមចំណែកអភិវឌ្ឍវិស័យបាល់ទាត់របស់យើងស្របពេលដែលថ្នាក់ដឹកនាំរបស់សហព័ន្ធលោកក៏បានយកចិត្តទុកដាក់និងប្រឹងប្រែងខ្លាំងដើម្បីជំរុញវិស័យនេះឱ្យកាន់តែមានការរីកចម្រើនដូចគ្នា»។

ស្រដៀងគ្នានេះ លោក ជា ម៉េងលី អគ្គលេខាធិការក្លិបបាល់ទាត់ណិចស្តិប ក៏បានបង្ហាញការអបអរដល់ភាពល្បីរន្ទឺចំពោះគ្រាប់បាល់របស់ Bruno Wellington Krenkel ផងដែរ។ លោកបានប្រាប់កាលពីថ្ងៃទី៩ ខែមករា ថា៖ «បើនិយាយពីគុណភាពលេងរបស់ក្រុមយើង គឺនៅមានកម្រិតទាប ដោយការប្រកួតប្រជែងរបស់យើង នៅមិនទាន់ដល់ក្រុមមួយចំនួនធំនៅលីគកំពូល និងលីគ ២ នោះទេ ប៉ុន្តែនៅពេល Bruno បានបង្កើតឱ្យមានទទួលស្គាល់នេះឡើង យើងពិតជាភ្ញាក់ផ្អើល និងរំភើប ព្រោះនេះជាមោទនភាព សម្រាប់វិស័យបាល់ទាត់របស់យើង ហើយភាពល្បីល្បាញនៃគ្រាប់បាល់នេះ ក៏បានលើកមុខមាត់ដល់ក្លិបណិចស្តិបរបស់យើងផងដែរ»៕

ឈន ណន និង James Watson

ការស៊ុតបាល់បញ្ចូលទី១ គ្រាប់ដ៏អស្ចារ្យនៅលីគ ២ កម្ពុជា ទទួលបានការចាប់អារម្មណ៍ខ្លាំងនៅអង់គ្លេស

ព័ត៌មានថ្មីៗ

វីដេអូ