ភ្នំពេញៈ សហព័ន្ធកីឡាប្រដាល់គុនខ្មែរ និងសហព័ន្ធកីឡាឃីកបុកស៊ីងកម្ពុជា បានសហការជាមួយក្លិប LoongHai Fight Club របស់ចិន ដើម្បីបញ្ជូនកីឡាករ លន បញ្ញា ទៅចូលការប្រកួតប្រដាល់ឃីកបុកស៊ីង ក្នុងព្រឹត្តិការណ៍ WES ជាលើកដំបូង ស្របពេលដែលកម្ពុជាក៏មានផែនការច្បាស់លាស់ក្នុងការពង្រីកការប្រកួតទៅកាន់ប្រទេសក្រិក សហរដ្ឋអាមេរិក និងប្រទេសបារាំង ក្នុងពេលខាងមុខនេះផងដែរ។
សម្រាប់ព្រឹត្តិការណ៍ WES ដែលរៀបចំឡើងដោយស្ថានីយទូរទស្សន៍ហ័រណាននេះ គឺជាព្រឹត្តិការណ៍ប្រចាំឆ្នាំដ៏ធំរបស់ចិន ហើយការប្រកួតនេះ ម្ចាស់មេដាយប្រាក់ស៊ីហ្គេម លន បញ្ញា នឹងត្រូវប្រកួតមិត្តភាពអន្តរជាតិជាមួយកីឡាករម្ចាស់ផ្ទះចិនក្នុងប្រទេសទម្ងន់៦៧ គីឡូក្រាម នាថ្ងៃទី ៣ ខែកុម្ភៈខាងមុខ។
នៅក្នុងសន្និសីទកាសែតកាលពីថ្ងៃទី ៣០ ខែមករា លោក ហេង សុខឃន ប្រធានសហព័ន្ធកីឡាឃីកបុកស៊ីងកម្ពុជាបានថ្លែងថា៖ «នេះជាលើកដំបូង ដែលកម្ពុជាបានបញ្ជូនកីឡាករទៅប្រកួតនៅចិន ហើយវាជាមោទនភាព និងជាឱកាសដ៏ពិសេសដែលកីឡាករយើងបានវាស់ស្ទង់សមត្ថភាពដើម្បីត្រៀមចូលរួមការប្រកួតស៊ីហ្គេម ឆ្នាំ ២០២៣ នៅខែឧសភា ខាងមុខនេះ»។
លោក ហេង សុខឃន ដែលជាអគ្គលេខាធិការសហព័ន្ធកីឡាប្រដាល់គុនខ្មែរផងនោះបានឱ្យដឹងទៀតថា កីឡាករជម្រើសជាតិបឺត សង្ឃឹម, ឈុត សេរីវ៉ាន់ថង, ឈឿង ល្វៃ និង ខាំ ខ្លានាង ជាដើម សុទ្ធតែស្ថិតនៅក្នុងការចាប់អារម្មណ៍របស់ក្លិប LoongHai ក្នុងការចង់បានទៅប្រកួតនៅចិន ហើយនេះជាការបើកឱកាសថ្មី សម្រាប់ទីផ្សារកីឡាករគុនខ្មែរ និងឃីកបុកស៊ីងកម្ពុជាផងដែរ។
ចំណែកលោក Guo Yang ប្រធានក្លិបប្រដាល់ LoongHai បានថ្លែងក្នុងសន្និសីទកាសែតនោះដែរថា៖ «សម្រាប់ការចូលឆ្នាំថ្មីនៅប្រទេសចិន ស្ថានីយទូរទស្សន៍ហ័រណានបានរៀបចំការប្រកួតដ៏ធំរបស់ខ្លួន ហើយខ្ញុំគិតថា ព្រឹត្តិការណ៍ដ៏ធំបែបនេះ មិនអាចគ្មានវត្តមានកីឡាករកម្ពុជាបានទេ ហេតុនេះយើងបានទំនាក់ទំនងមកសហព័ន្ធដើម្បីយកកីឡាករកម្ពុជាទៅប្រកួត ព្រោះយើងចង់លើកស្ទួយកីឡាករកម្ពុជា ឱ្យមានទីផ្សារប្រកួតកាន់តែទូលំទូលាយ និងចង់ផ្សព្វផ្សាយគុនខ្មែរទៅកាន់ពិភពលោក»។
លោកបានបន្តថា ក្រោមកិច្ចសហប្រតិបត្តិការរវាងក្លិប LoongHai និងសហព័ន្ធកីឡាឃីកបុកស៊ីងកម្ពុជា គឺភាគីទាំង២ចង់ឱ្យមានការផ្លាស់ប្តូរការប្រកួតជាមួយគ្នាបានច្រើនដងថែមទៀត ហើយនេះជាជំហានទី១ ដែលភាគីចិន បានយកកីឡាករកម្ពុជាទៅប្រកួត ហើយក្លិប LoongHai ផ្ទាល់ ក៏ធ្លាប់រៀបចំការប្រកួតប្រដាល់នៅខេត្តសៀមរាប កាលពីឆ្នាំ ២០២២ ផងដែរ ដោយព្រឹត្តិការណ៍នោះបានទទួលការគាំទ្រខ្លាំងពីប្រជាជនចិន។
លោក Guo Yang បានបន្ថែមថា៖ «សម្រាប់ទឹកចិត្តខ្ញុំផ្ទាល់ គឺខ្ញុំចង់ជួយឱ្យកីឡាករកម្ពុជា ឈានជើងចូលទៅប្រកួតព្រឹត្តិការណ៍ធំៗនៅលើឆាកអន្តរជាតិដើម្បីឱ្យពួកគាត់បានបញ្ចេញសមត្ថភាព។ ម្យ៉ាងទៀត កម្ពុជាមានវប្បធម៌ដ៏អស្ចារ្យ ហើយប្រដាល់គុនខ្មែរ ជាកីឡាអត្តសញ្ញាណជាតិរបស់ខ្មែរ ហេតុនេះយើងចង់ចូលរួមចំណែក លើកកម្ពស់ និងផ្សព្វផ្សាយ គុនខ្មែរឱ្យគេស្គាល់បានកាន់តែច្រើន នៅលើពិភពលោក»។
ទន្ទឹមនឹងនេះ លោក Guo Yang បានចាត់ទុកទំនាក់ទំនងរវាង ក្លិប LoongHai និងសហព័ន្ធកីឡាឃីកបុកស៊ីងកម្ពុជា ក៏ដូចជាសហព័ន្ធកីឡាប្រដាល់គុនខ្មែរ ជាកិច្ចសហប្រតិបត្តិការរវាងប្រទេសចិន និងកម្ពុជា។ លោកបញ្ជាក់ថា៖ «តាមរយៈកិច្ចសហការនេះ យើងនឹងធ្វើឱ្យវិស័យកីឡារបស់យើង ក៏ដូចជាមិត្តភាពរវាងប្រទេសទាំង ២ កាន់តែល្អថែមទៀត គឺដូចពាក្យស្លោកចិនមួយ បានពោលថា ឱ្យតែចិត្តរួមចិត្ត មិត្តរួមមិត្ត គ្មានអ្វីដែលយើងមិនអាចធ្វើបាននោះទេ ហើយចំណងមិត្ត និងមិត្ត ចិត្តស្អិតល្មួត នឹងធ្វើឱ្យយើងកាន់តែរឹងមាំ»។
ជាមួយគ្នានេះ លោក Guo Yang បានអះអាងថា កីឡាករ លន បញ្ញា មានសមត្ថភាពល្អដែលនឹងអាចនាំយកជ័យជម្នះត្រឡប់មកជូនកម្ពុជាវិញសម្រាប់ការប្រកួតនៅប្រទេសចិនជាលើកដំបូងនេះហើយស្របពេលនេះ លោក ហេង សុខឃន បានអះអាងថា កម្ពុជាបាន និងកំពុងពង្រីកការប្រកួតកាន់តែធំទៅកាន់ពិភពលោក ដោយសហព័ន្ធបានទំនាក់ទំនងរួចរាល់ហើយ។
លោក សុខឃន បានបញ្ជាក់ថា៖ «យើងមានទីផ្សារប្រកួតច្រើននៅថៃ ហើយឥឡូវនេះ យើងមានចិន និងបន្ទាប់ទៀត យើងនឹងបញ្ជូនកីឡាករទៅប្រកួតនៅប្រទេសក្រិក ដោយយើងបានចុះ MoU រួចហើយ ព្រោះយើងមានក្រុមអ្នកជំនាញសម្រាប់ទំនាក់ទំនងទាំងក្នុងប្រទេស និងក្រៅប្រទេសធ្វើឱ្យកីឡារបស់យើងមានទីផ្សារច្រើន និងជ្រៀតចូលដល់ទីផ្សារធំៗ។ ជាក់ស្ដែងនៅខែមិថុនាខាងមុខ សហព័ន្ធ ត្រៀមនឹងបញ្ជូនកីឡាករ៤នាក់ទៅប្រកួតនៅសហរដ្ឋអាមេរិក និងគ្រោងបញ្ជូនកីឡាករ ៤ នាក់ទៀត ទៅប្រកួតនៅប្រទេសបារាំង»៕