ភ្នំពេញៈ អគ្គលេខាធិការដ្ឋាន នៃក្រុមប្រឹក្សាកីឡាក្រសួងមហាផ្ទៃ នៅថ្ងៃទី ៣ ខែកុម្ភៈ បានបើកកិច្ចប្រជុំស្តីពីការត្រៀមបញ្ជូនអត្តពលិក ទៅចូលរួមការប្រកួតកីឡានគរបាល និងកងកម្លាំងពន្លត់អគ្គិភ័យពិភពលោក លើកទី២០ ឆ្នាំ ២០២៣ (The 20th World Police and Fire Games 2023) នៅទីក្រុងWinnipeg ខេត្ត Manitoba ប្រទេសកាណាដា ដោយគ្រោងបញ្ជូនកីឡាចំនួន ១៣ប្រភេទទៅចូលរួមប្រកួត។
លោកឧត្តមសេនីយ៍ទោ យិត ភីរៈ អគ្គលេខាធិការ នៃអគ្គលេខាធិការដ្ឋានក្រុមប្រឹក្សាកីឡាក្រសួងមហាផ្ទៃ ដែលជាអធិបតីក្នុងកិច្ចប្រជុំនេះ បានថ្លែងថា កីឡាករ កីឡាការិនី ដែលនឹងទៅចូលរួមក្នុងព្រឹត្តិការណ៍នៅប្រទេសកាណាដា ដាច់ខាតត្រូវតែឆ្លងកាត់ការប្រកួតធ្វើតេស្តសមត្ថភាពជាមុនសិន ទើបអាចទទួលបានឱកាសទៅចូលរួមក្នុងការប្រកួត។
ការប្រកួតតេស្តនេះ ធ្វើឡើងដើម្បីចម្រាញ់រកកីឡាករ កីឡាការិនី ដែលមានសមត្ថភាពលើប្រភេទកីឡា ដែលមានសក្តានុពល ជាពិសេស ជាកីឡាករមានឆន្ទៈពិតប្រាកដ ដើម្បីទៅដណ្តើមមេដាយជូនជាតិមាតុភូមិ ដ្បិតជោគជ័យរបស់អត្តពលិកទាំងអស់ គឺជាការលើកមុខមាត់ជាតិនៅលើឆាកអន្តរជាតិ។
លោកឧត្តមសេនីយ៍ទោ យិត ភីរៈ បានជំរុញឱ្យប្រតិភូ និងគ្រូបង្វឹកតាមប្រភេទកីឡានីមួយៗរបស់ខ្លួន ត្រូវបង្កើនកិច្ចសហការលើការងារនេះឱ្យបានល្អប្រសើរ និងយកចិត្តទុកដាក់ខ្ពស់ ដើម្បីឱ្យការជ្រើសរើសកីឡាករ និងកីឡាការិនី ទៅចូលរួមការប្រកួតទទួលបានលទ្ធផលល្អ។
ជាពិសេស ត្រូវមានការចាត់តាំងការងារឱ្យបានច្បាស់លាស់ពាក់ព័ន្ធការត្រៀមខ្លួនចូលរួម ដើម្បីឱ្យសមស្របទៅតាមលក្ខន្តិកៈ នៃការប្រកួតទៅតាមប្រភេទកីឡាដែលម្ចាស់ផ្ទះកាណាដាបានកំណត់។
សូមជម្រាបជូនថា ព្រឹត្តិការណ៍កីឡានគរបាល និងកងកម្លាំងពន្លត់អគ្គិភ័យពិភពលោក លើកទី២០ ឆ្នាំ២០២៣ នៅប្រទេសកាណាដា នឹងចាប់ផ្តើមធ្វើឡើងពីថ្ងៃទី២៨ ខែកក្កដា ដល់ថ្ងៃទី៦ ខែសីហា ឆ្នាំ២០២៣។
ក្រសួងមហាផ្ទៃ គ្រោងនឹងបញ្ជូនកីឡាចំនួន ១៣ប្រភេទ ឱ្យទៅចូលរួមការប្រកួតក្នុងនោះ មានដូចជា៖ កីឡាវាយសី, កាយវប្បកម្ម, ប្រណាំងទូកនាគ, ជឺជីតស៊ូ, យូដូ, ការ៉ាតេ, ហែលទឹក, វាយកូនឃ្លីលើតុ, ត្រីយ៉ាត្លុង, បាល់ទះក្នុងសាល, បាល់ទះលើឆ្នេរខ្សាច់, ចំបាប់កាច់ដៃ, និងកីឡាចំបាប់។
បើតាមក្រសួងមហាផ្ទៃ ការចូលរួមព្រឹត្តិការណ៍កីឡានគរបាល និងកងពន្លត់អគ្គិភ័យពិភពលោកលើកទី១៩ កាលពីឆ្នាំ២០២២ នៅទីក្រុង Rotterdam ប្រទេសហូឡង់កន្លងទៅ កម្ពុជាដណ្តើមបានមេដាយសរុបចំនួន ៣៣គ្រឿង ក្នុងនោះមេដាយមាស ១៥គ្រឿង មេដាយប្រាក់ ៨គ្រឿង និងមេដាយសំរឹទ្ធ ១០គ្រឿង៕