ភ្នំពេញៈ លោកឧត្តមសេនីយ៍ GEN OSOTH BHAVILAI ប្រធានសហព័ន្ធកីឡាជនពិការអាស៊ីអាគ្នេយ៍ (APSF) បានចាត់ទុកព្រះរាជពិធីប្រោសព្រះរាជទាន «ព្រះអគ្គិជ័យកីឡា» ក្រោមវត្តមានរបស់ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងថ្នាក់ដឹកកំពូលៗរបស់កម្ពុជា នៅប្រាសាទអង្គរវត្ត កាលពីព្រឹកថ្ងៃទី ២១ ខែមីនាថា ជាព្រឹត្តិការណ៍ដ៏អាស្ចារ្យ និងជាកេរមរតក បញ្ជាក់ពីការប្តេជ្ញាចិត្តរបស់ម្ចាស់ផ្ទះកម្ពុជា ក្នុងការរៀបចំព្រឹត្តិការណ៍ស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ ២០២៣ នេះ។
តាងនាមឱ្យសហព័ន្ធកីឡាជនពិការអាស៊ីអាគ្នេយ៍ (ASEAN Para Sports Federation)និងសហគមន៍ប៉ារ៉ាឡាំពិកអាស៊ាន (ASEAN paralympic community) លោក GEN OSOTH BHAVILAI បានថ្លែងអំណរព្រះរាជគុណដ៏ថ្លៃថ្លាបំផុត ចំពោះព្រះបាទ នរោត្តម សីហមុនី ដែលស្តេចយាងជាព្រះរាជាធិបតីភាព ក្នុងព្រះរាជពិធីប្រោសព្រះរាជទាន «ព្រះអគ្គិជ័យកីឡា» នេះ ស្របពេលដែលពលរដ្ឋកម្ពុជាទាំងអស់ និងសហគមន៍ជនមានពិការភាពអាស៊ាន ពិតជារំភើបរីករាយ និងទន្ទឹងឆ្ពោះទៅរកការប្រកួតកីឡាអាស៊ានប៉ារ៉ាហ្គេម នៅកម្ពុជានេះ។
លោកបានថ្លែងថា៖ «ខ្ញុំពិតជាមានកិត្តិយសណាស់ ដែលបានចូលរួមក្នុងព្រឹត្តិការណ៍ដ៏អស្ចារ្យដែលជាសញ្ញាចាប់ផ្តើមកីឡាស៊ីហ្គេម លើកទី៣២ និងកីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ នៅកម្ពុជា។ ថ្ងៃនេះជាប្រវត្តិសាស្ត្រដែលបានប្រារព្ធព្រះរាជពិធីសុំព្រះអគ្គិជ័យកីឡា ជាផ្លូវការនៅប្រាសាទអង្គរវត្តដ៏ល្បីល្បាញទូទាំងពិភពលោក ដែលនឹងស្ថិតជាប់ក្នុងបេះដូងរបស់យើងទាំងអស់គ្នា ស្របពេលប្រទេសកម្ពុជា រៀបចំព្រឹត្តិការណ៍ពហុកីឡា ជាលើកដំបូង ក្នុងប្រវត្តិសាស្ត្រ»។
ប្រធាន APSF រូបនេះ បានបន្ថែមថា៖ «ព្រះរាជពិធីសុំ ព្រះអគ្គិជ័យកីឡា នេះ មិនមែនត្រឹមជាព្រឹត្តិការណ៍ដ៏អស្ចារ្យ និងជាកេរមរតកបញ្ជាក់ពីការប្តេជ្ញាចិត្តរបស់ម្ចាស់ផ្ទះកម្ពុជា ប៉ុណ្ណោះទេ ប៉ុន្តែថែមទាំងបានបង្ហាញឱ្យឃើញ និងបំផុសស្មារតីជាថ្មីនៃចំណងមិត្តភាព ដែលបានចាប់ផ្តើមបដិសន្ធិជាយូរណាស់មកហើយ ក្នុងចំណោមប្រជាជនអាស៊ាន។ វាបង្ហាញនូវឱកាស ដែលប្រជាជនអាស៊ានទាំងមូលរៀបចំ និងអបអររួមគ្នាជាផ្នែកមួយនៃហ្គេមនេះ»។
ទន្ទឹមនឹងនេះ លោក GEN OSOTH BHAVILAI បានឱ្យដឹងថា វត្តមានថ្នាក់ដឹកនាំរបស់ APSF នៅក្នុងពិធីព្រះរាជទាន «ព្រះអគ្គិជ័យកីឡា» និងរត់ភ្លើងគប់ នៅអង្គរ កាលពីព្រឹកថ្ងៃទី២១ ខែមីនានោះ វាជាសក្ខីភាពនៃកិច្ចសហប្រតិបត្តិការជិតស្និទ្ធរវាង APSF និងគណៈកម្មាធិការជាតិ CAMAPGOC ដើម្បីឆ្ពោះទៅរកការរៀបចំកីឡាអាស៊ានប៉ារ៉ាហ្គេម លើកទី១២ ដោយរលូន និងជោគជ័យ។
លោកបានបញ្ជាក់ថា៖ «ខ្ញុំសូមថ្លែងអំណរព្រះរាជគុណដ៏ស្មោះអស់ពីដូងចិត្ត ចំពោះព្រះករុណាព្រះបាទ នរោត្តម សីហមុនី និងសម្តេចតេជោនាយករដ្ឋមន្ត្រី ព្រមទាំងប្រជាជនកម្ពុជាទាំងអស់ សម្រាប់កិច្ចខិតខំប្រឹងប្រែងរៀបចំព្រឹត្តិការណ៍ថ្ងៃនេះ ដោយជោគជ័យ និងសំខាន់បំផុត រៀបចំកីឡា ដែលនាំមកនូវសន្តិភាព និងសមភាព។ យើងត្រូវរស់នៅជាមួយស្មារតីនៃចលនាអាស៊ានរួមគ្នា ក្នុងសំឡេងតែមួយ ធ្វើការរួមគ្នាឆ្ពោះទៅជំរុញសន្តិភាព និងការយោគយល់គ្នា ស្របតាមបាវចនា កីឡារស់ក្នុងសន្តិភាព»។
គិតត្រឹមថ្ងៃទី២២ ខែមីនានេះ ការប្រកួតកីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ សម្រាប់ក្រុមកីឡាករ-កីឡាការិនីមានពិការភាព នៅសល់ពេលត្រឹម៧៣ថ្ងៃទៀតទេ ដោយព្រឹត្តិការណ៍នេះ នឹងរៀបចំបើកនៅថ្ងៃទី៣ និងបញ្ចប់ថ្ងៃទី៩ ខែមិថុនា ហើយនៅក្នុងពិធីរត់ភ្លើងគប់នៅជុំវិញវង់តូចអង្គរ កាលពីព្រឹកថ្ងៃទី២១ ខែមីនានោះ កីឡាករ កីឡាការិនីជនពិការជាច្រើននាក់ ត្រូវបានគណៈកម្មាធិការជាតិ CAMSOC-CAMAPGOC រៀបចំឱ្យចូលរួមការរត់ភ្លើងគប់ បណ្តាក់គ្នានោះដែរ ដោយម្នាក់ៗបានបង្ហាញនូវមោទនភាព ជាមួយការទទួលបានឱកាសដ៏ពិសេសនេះ។
ជាក់ស្តែង កីឡាការិនីពិការជើង ជាម្ចាស់មេដាយមាសអាស៊ានប៉ារ៉ាហ្គេម លើកទី១១ នៅប្រទេសឥណ្ឌូនេស៊ី វ៉ិត ចន្ថា ដែលបានទទួលការប្រោសព្រះរាជទាន «ព្រះអគ្គិជ័យកីឡា» ពីព្រះករុណាព្រះបាទសម្ដេចព្រះបរមនាថ នរោត្តម សីហមុនី ដោយផ្ទាល់ជាមួយកីឡាករតេក្វាន់ វ៉ា មិថុនា ដើម្បីជាកិច្ចរត់ភ្លើងគប់នោះ បានបង្ហាញក្តីរំភើបរហូតដល់ស្រក់ទឹកភ្នែក។
កីឡាការិនី វ៉ិត ចន្ថា បានបញ្ជាក់ថា៖ «ខ្ញុំរំភើបរហូតដល់ស្រក់ទឹកភ្នែក ព្រោះនេះជាកិត្តិយសដ៏ធំធេងសម្រាប់ប្រទេសជាតិរបស់យើង ក៏ដូចជាខ្លួនឯងផ្ទាល់។ ខ្ញុំធ្លាប់ជាក្មេងស្នាក់នៅជាមួយគេ ខ្ញុំធ្លាប់លាងចាន បោកខោអាវ បម្រើនៅផ្ទះគេ និងជាក្មេងមានពិការភាព ដែលមិនធ្លាប់ស្រមៃថា នឹងបានក្លាយខ្លួនទទួលបានកិត្តិយសបែបនេះទេ»។
កីឡាករតេក្វាន់ដូ WT វ៉ា មិថុនា ដែលទើបបានឈ្នះមេដាយមាស ក្នុងការប្រកួតស៊ីហ្គេម នៅប្រទេសវៀតណាម កាលពីខែឧសភា ឆ្នាំ២០២២នោះ បាននិយាយថា៖ «ខ្ញុំមានសេចក្តីរីករាយ និងមានកិត្តិយសខ្លាំងណាស់ ដែលទទួលការប្រោសព្រះរាជទានព្រះអគ្គិជ័យកីឡា ពីអង្គព្រះមហាក្សត្រ ហើយជាមួយគ្នានេះ ខ្ញុំបានដាក់គោលដៅដណ្តើមឱ្យបានមេដាយមាស ជាថ្មីម្តងទៀត ក្នុងស៊ីហ្គេម នៅកម្ពុជា ដើម្បីថែរក្សាការពារមេដាយមាស ក្នុងនាមជាកីឡាករម្ចាស់ផ្ទះ»៕