កីឡាករ គីម ទិត្យសុវឌ្ឍនៈ ឈ្នះមេដាយមាស គុនល្បុក្កតោ លើវិញ្ញាសាសម្តែង អាវុធអត់មុខ ក្នុងព្រឹត្តិការណ៍ កីឡាSEA GAMES លើកទី ៣២ ។ ហុង មិនា
ភ្នំពេញៈ គិតត្រឹមម៉ោង ១២ ថ្ងៃត្រង់ ថ្ងៃទី០៦ ខែឧសភា ឆ្នាំ២០២៣នេះ កម្ពុជាបានឈ្នះមេដាយស៊ីហ្គេមសរុបចំនួន ១២ ក្នុងនោះមេដាយប្រភេទលេខ១ (មេដាយមាស) ចំនួន ៦ មេដាយលេខ២ (មេដាយប្រាក់) ចំនួន ៤ និងមេដាយ លេខ ៣ (មេដាយសំរិទ្ធ) ចំនួន ២ ។ នេះបើតាមតារាងមេដាយស៊ីហ្គេម ថ្ងៃទី០៦ ខែឧសភានេះ។
តារាងមេដាយនោះបង្ហាញឱ្យដឹងទៀតថា ក្រៅពីកម្ពុជា ប្រទេស ហ្វីលីពីនក៏បានឈ្នះមេដាយចំនួន ១៤ ក្នុងនោះ មេដាយលេខ១ចំនួន ៤ លេខ២ ចំនួន ៦ និងលេខ៣ចំនួន ៤។
គិតត្រឹមម៉ោង ១២ ថ្ងៃត្រង់ថ្ងៃនេះ កម្ពុជាឈ្នះមេដាយស៊ីហ្គេមចំនួន ១២ ហើយ
រីឯប្រទេសថៃ បានឈ្នះមេដាយចំនួន ៤ ក្នុងនោះ មេដាយលេខ១ ចំនួន១ លេខ២ចំនួន ២ និងមេដាយលេខ ៣ ចំនួន ១ផងដែរ។ ស្រដៀងនេះ ប្រទេសឡាវ ក៏បានឈ្នះមេដាយចំនួន ៤ ក្នុងនោះមេដាយប្រភេទលេខ១ចំនួន១ និងមេដាយលេខ៣ ចំនួន ៣ ។ រីឯប្រទេស វៀតណាម ឈ្នះមេដាយ៥ ក្នុងនោះ មានមេដាយលេខ២ចំនួន ១ និងមេដាយលេខ ៣ ចំនួន ៤។
តារាងដដែលនោះបង្ហាញទៀតថា ប្រទេសមីយ៉ាន់ម៉ាក៏បានឈ្នះមេដាយចំនួន ៤ រួមមាន មេដាយលេខ២ ចំនួន ១ និងមេដាយលេខ ៣ចំនួន ៣។ ដោយឡែកប្រទេស ម៉ាឡេស៊ី និង សិង្ហបុរី ឈ្នះមេដាយម្នាក់១ ជាមេដាយប្រភេទលេខ ៣៕
