ការប្រតាយប្រតប់គ្នា រវាងក្រុមជម្រើសជាតិថៃ និង ឥណ្ឌូនេស៊ី សម្រាប់ប្រកួតផ្តាច់ព្រ័ត្រ កាលពីថ្ងៃទី១៦ ខែឧសភា ឆ្នាំ២០២៣។ រូបថត សហការី ហេង ជីវ័ន
ភ្នំពេញ៖ ការទន្ទឹមរង់ចាំអស់រយៈពេល ៣២ ឆ្នាំ ដើម្បីឈ្នះមេដាយមាសម្តងទៀត របស់ក្រុមជម្រើសជាតិឥណ្ឌូនេស៊ី បានកើតមានឡើងជាថ្មី ក្នុងពេលដែលពួកគេ បានយកឈ្នះក្រុមជម្រើសជាតិថៃ ទាំងចម្រូងចម្រាស ក្នុងលទ្ធផល ៥-២ នៅពហុកីឡដ្ឋានជាតិ កាលពីយប់ថ្ងៃទី១៦ ខែឧសភា ហើយក៏ជាពេលដែលអាជ្ញាកណ្តាល បានប្រើកាតក្រហមច្រើនបំផុត ក្នុងប្រវត្តិស៊ីហ្គេម ដើម្បីពិន័យ និងអន្តរាគមន៍ទៅលើការប្រតាយប្រតប់គ្នា ដោយហិង្សា រវាងក្រុមទាំង២នេះផងដែរ។
ចំពោះហេតុការណ៍ ដែលនាំមុខឱ្យមានការប្រតាយប្រតប់គ្នាពេញទីលាន ចំនួន២ដងនោះ អាជ្ញាកណ្តាលជនជាតិអូម៉ង់ លោក Matar Ali Al-Hatmi Qasim បានពិន័យកាតក្រហមចំនួន៨ ទៅកាន់អ្នកដែលបានពាក់ព័ន្ធ ក្នុងនោះមានកីឡាករ និងក្រុមការងាររបស់ថៃ ចំនួន៤នាក់ និងក្រុមឥណ្ឌូនេស៊ី ៤នាក់ ហើយកីឡាករថៃ ចំនួន២នាក់ទៀត ក៏ត្រូវបានបណ្តេញចេញ ជាមួយការពិន័យកាតលឿងចំនួន២ ស្មើកាតក្រហម ផងដែរ។
តាមរយៈការប្រកួតនោះ ខ្សែប្រយុទ្ធ Ramadhan Sananta បានជួយឱ្យក្រុមឥណ្ឌូនេស៊ី នាំមុខ ២-០ នៅក្នុងតង់ទី១ តាមរយៈការរកបានគ្រាប់បាល់ដ៏ល្អរបស់គេ នៅនាទីទី ២១ និងទី ៤៥+៥ មុនពេលខ្សែប្រយុទ្ធរបស់ថៃ Anan Yodsangwal វាយបកបាន១គ្រាប់វិញ នៅនាទីទី៦៥។
ក្រុមឥណ្ឌូនេស៊ី បានព្យាយាមលេងទប់ ដើម្បីរក្សាគ្រាប់បាល់នាំមុខ ២-១ នេះ រហូតដល់នាទី ៩០+៧ ហើយនៅពេលអាជ្ញាកណ្តាលផ្តុំកញ្ចែនោះ ក្រុមឥណ្ឌូនេស៊ី បាននាំគ្នារត់ចូលទៅលាន ដើម្បីអបអរជ័យជម្នះរបស់គេ ហើយអ្នកគាំទ្ររាប់ម៉ឺននាក់ ដែលបានចូលរួមទស្សនាផ្ទាល់ ក៏បានស្រែកអបអរយ៉ាងកងរំពងដូចគ្នា។
ប៉ុន្តែភ្លាមនោះ លោកអាជ្ញាកណ្តាល Matar Ali Al-Hatmi Qasim បានធ្វើការអន្តរាគមន៍ ដោយបានប្រាប់ទៅក្រុមឥណ្ឌូនេស៊ី ថា ការប្រកួតមិនទាន់បញ្ចប់ទេ ការផ្លុំកញ្ចែរបស់លោក គឺផ្តល់បាល់ហ្វ្រីឃីកទៅឱ្យក្រុមថៃ ហើយមិនទាន់ទាំងបានសម្រួលអារម្មណ៍វិញផង ខ្សែប្រយុទ្ធពាក់លេខ៩របស់ថៃ Yotsakorn បានរត់ទៅឆក់យកបាល់ពីការប្រជែងគ្នា នៃការទាត់ហ្រ្វីឃីកនោះបាន រួចស៊ុតបញ្ចូលទីយ៉ាងល្អបំផុត ដើម្បីជួយសង្រ្គោះក្រុមថៃ ឱ្យតាមស្មើ ២-២ ក្នុងវិនាទីចុងក្រោយនោះ។
ក្រុមថៃ បាននាំគ្នារត់អបអរសាទរគ្រាប់បាល់នេះ ពេញទីលាន ស្របពេលក្រុមឥណ្ឌូនេស៊ី ក៏បានលើកគ្នាទៅតវ៉ាជាមួយក្រុមអាជ្ញាកណ្តាល ចំពោះពេលវេលាចុងក្រោយនេះផងដែរ ហើយជាមួយអារម្មណ៍ពុះកញ្រ្ជោលដូចគ្នានេះ ក្រុមទាំង២ បានប៉ះទង្គិចគ្នា រហូតមានការអន្តរាគមន៍ពីកងកម្លាំង ទើបអាចទប់ស្ថានការណ៍នេះបាន។ ក្នុងហេតុការណ៍លើកទី១ នៅនាទីទី៩២នេះ លោកអាជ្ញាកណ្តាល បានពិន័យកាតក្រហមទៅអ្នកចាំទីថៃ Prasobchoke Chokemore និងខ្សែការពារពាក់លេខ៤របស់ក្រុមឥណ្ឌូនេស៊ី Komang Teguh Trisnanda។
ក្រោយហេតុការណ៍នេះ បានបញ្ចប់ ការប្រកួតបន្ថែមនាទី ១៥នាទី លើកទី១ ក៏បានចាប់ផ្តើម ហើយនៅនាទីទី ៩៨ ខ្សែប្រយុទ្ធ YOTSAKON BURAPHA ក៏រកបានគ្រាប់បាល់នាំមុខ ៣-២ ឱ្យឥណ្ឌូនេស៊ី ប៉ុន្តែភ្លាមនោះ ក្រុមការងារ និងគ្រូបង្វឹករបស់ក្រុមទាំង២ ពិសេសខាងថៃ បានផ្ទុះកំហឹង នាំឱ្យមានការប្រតាយប្រតប់គ្នាខ្លាំង ដោយក្នុងនោះគ្រូជំនួយរបស់ក្រុមឥណ្ឌូនេស៊ី ម្នាក់ ត្រូវបានខាងថៃ វាយឡើងឈាមមាត់។
ចំពោះការវាយប្រតាយប្រតប់គ្នាលើកនេះ អាជ្ញាកណ្តាល បានផ្តល់កាតក្រហមទៅឱ្យខាងថៃ ចំនួន៣នាក់ រួមមានគ្រូចាំទីលោក PRASOBCHOKE CHOKEMOR ព្រមទាំងលោក MAYEID MAD-ADAM និងលោក PATTARAWUT WONGSRIPHUEK ដែលជាក្រុមការងាររបស់ថៃ ចំណែកកីឡាករ TITAN AGUNG BAGUS FAWWAZI គ្រូចាំទី SAHARI GULTOM និងក្រុមការងារឥណ្ឌូនេស៊ី លោក TEGAR DIORKTA ANDIAS ក៏ត្រូវបានពិន័យកាតក្រហមផងដែរ។
បន្ទាប់ទៀត ខ្សែការពារលេខ៤ JONATHAN KHEMDEE ក៏ត្រូវបានពិន័យកាតក្រហម ក្រោយទទួលបានកាតលឿង ជាលើកទី២ មុនពេលកីឡាករ MUHAMMAD FAJAR FATHUR RACHMAN បានស៊ុតគ្រាប់បាល់ទី៤ ឱ្យឥណ្ឌូនេស៊ី ហើយក្នុងពេលនោះ កីឡាករ TEERASAK POEIPHIMAI របស់ថៃ ក៏បានទទួលកាតលឿងទី២ ស្មើកាតក្រហម ក្នុងនាទីទី១១៨ ដូចគ្នា។ នៅនាទី ១២០ កីឡាករ BECKHAM PUTRA NUGRAHA បានស៊ុតបញ្ចូលទី១គ្រាប់ទៀត ដើម្បីជួយឱ្យ ក្រុមឥណ្ឌូនេស៊ី បានយកឈ្នះក្រុមថៃ ដែលនៅសល់សមាជិកត្រឹម៨នាក់ ទល់នឹង១០នាក់ នៅលើទីលាន។
ជាមួយការយកឈ្នះក្រុមថៃ ដោយលទ្ធផល ៥-២ ដោយចម្រូងចម្រាសនេះ បានជួយឱ្យក្រុមឥណ្ឌូនេស៊ី ឈ្នះបានមេដាយមាស ជាថ្មីម្តងទៀត បន្ទាប់ពីរង់ចាំអស់រយៈពេល៣២ឆ្នាំ ព្រោះក្រុមឥណ្ឌូនេស៊ី បានឈ្នះមេដាយមាស លើការប្រកួតបាល់ទាត់បុរសនេះ ជាលើកទី១ នៅឆ្នាំ១៩៨៧ ក្នុងពេលពួកគេ ធ្វើជាម្ចាស់ផ្ទះ និងឈ្នះមេដាយមាស លើកទី២ នៅឆ្នាំ១៩៩១ ក្នុងពេលប្រទេសហ្វីលីពីន បានធ្វើជាម្ចាស់ផ្ទះ៕
