ភ្នំពេញៈ លោកនាយករដ្ឋមន្ត្រី ហ៊ុន សែន បានបញ្ជាក់ជាថ្មី ចំពោះគោលជំហររបស់កម្ពុជា ក្នុងការធ្វើម្ចាស់ផ្ទះស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣ គឺមិនយកបញ្ហាការប្រកួតប្រជែងដណ្តើមយកមេដាយ ធ្វើជាគោលដៅធំនោះទេ ប៉ុន្តែអ្វីដែលសំខាន់បំផុតគឺត្រូវរៀបចំការប្រកួតប្រកបដោយមិត្តភាព សុវត្ថិភាព និងទទួលស្វាគមន៍ភ្ញៀវឱ្យបានល្អ ទៅតាមទឹកចិត្ត និងបេះដូងរបស់កម្ពុជា។
ថ្លែងក្នុងពិធីបើកការដ្ឋានសាងសង់ ផ្លូវល្បឿនលឿនភ្នំពេញ-បាវិត និង បើកការដ្ឋានសាងសង់ ស្ពានឆ្លងកាត់ទន្លេមេគង្គ និងផ្លូវតភ្ជាប់ក្បាលស្ពាន កាលពីព្រឹកថ្ងៃទី៧ ខែមិថុនា លោក ហ៊ុន សែន បានរំឭកឡើងវិញពីលទ្ធផលការប្រកួតស៊ីហ្គេម លើកទី៣២ ដែលកម្ពុជា ឈរនៅលេខ៤ ដោយមានមេដាយមាសចំនួន ៨១ ប្រាក់ ៧៤ សំរឹទ្ធ ១២៧ តិចជាង ឥណ្ឌូនេស៊ី ដែលមានមេដាយមាស ៨៧ ប្រាក់ ៨០ និងសំរឹទ្ធ ១០៩ ប៉ុន្តែបើនិយាយពីចំនួនមេដាយសរុបកម្ពុជា បានច្រើនជាង គឺ ២៨២ ទល់នឹង ២៧៦ មេដាយ។
យ៉ាងណាមិញ ចំពោះការប្រកួតអាស៊ានប៉ារ៉ាហ្គេម លើកទី១២ សម្រាប់ក្រុមអត្តពលិក ជនពិការ ដែលកំពុងដំណើរការ នៅក្នុងប្រទេសកម្ពុជា លោកនាយករដ្ឋមន្ត្រី បានអះអាងថា ឥណ្ឌួនេស៊ី នឹងទទួលបានចំណាត់លេខ១ គឺសូម្បីវៀតណាម ដែលបានឈ្នះមេដាយមាស ១៣៦ និងថៃ បានមេដាយមាស ១០៨ នៅស៊ីហ្គេម ក៏មិនអាចតាមប្រជែងជាមួយឥណ្ឌូនេស៊ី បាននោះដែរ។
លោក ហ៊ុន សែន បានថ្លែងបែបនេះថា៖ «កាលស៊ីហ្គេម យើងចាញ់ឥណ្ឌូនេស៊ី តែចំនួន មេដាយមាសទេ ប៉ុន្តែជាមេដាយសរុប យើងឈរនៅលំដាប់ទី៣។ ចំណែកការប្រកួត អាស៊ានប៉ារ៉ាហ្គេមនេះវិញ ឥណ្ឌូនេស៊ី គាត់យកលេខ១ ហើយ។ គាត់មានប្រជាជនជាង ២០០ លាននាក់ ហើយបានបញ្ជូនមកសុទ្ធតែក្រុមអត្តពលិកជើងខ្លាំង ឥឡូវមេដាយមាស របស់គាត់ មិនអាចមាននរណាទៅវ៉ាបានទេ ទាំងថៃក្តី វៀតណាមក្តី និងហ្វីលីពីនក្តី»។
យ៉ាងណាក៏ដោយ ជុំវិញការប្រកួតប្រជែងគ្នាដណ្តើមយកមេដាយនេះ លោក ហ៊ុន សែន បានបញ្ជាក់ថា៖ «យើងអត់យកបញ្ហាមេដាយជាអាទិភាពទេ យើងយកការប្រកួត ប្រកបដោយ មិត្តភាព សុវត្ថិភាព ទទួលស្វាគមន៍ភ្ញៀវឱ្យបានល្អជាគោលដៅធំ។ កាតព្វកិច្ចបង់ប្រាក់ សម្រាប់ចូលរួមដូចការប្រកួតនានា អត់ត្រូវបានធ្វើទេ គឺកម្ពុជាក្រពិត តូចពិត តែកម្ពុជា មានចិត្ត និងមានបេះដូងធំ ដោយខំទទួលភ្ញៀវ ធ្វើម៉េចឱ្យមានសុវត្ថិភាព ហើយនៅថ្ងៃទី៩ យើងបិទការប្រកួតហើយ»។
ប្រមុខដឹកនាំប្រទេស បានឱ្យដឹងទៀតថា បន្ទាប់ពីព្រឹត្តិការណ៍អាស៊ានប៉ារ៉ាហ្គេម លើកទី១២ ត្រូវបានបញ្ចប់ គឺគ្រប់ប្រតិភូកីឡា និងភ្ញៀវអន្តរជាតិ នឹងត្រូវត្រឡប់ទៅមាតុប្រទេសរបស់គេវិញ ហើយបើអ្នកទាំងនោះ ចាកចេញពីប្រទេសកម្ពុជា ដោយសុវត្ថិភាព នោះជាជោគជ័យរបស់កម្ពុជា ដោយលោកបានសង្កត់ធ្ងន់ថា៖«នេះជាជោគជ័យរបស់យើង អ៊ីចឹងបានជាខ្ញុំនិយាយថា លុយអាចចាយអស់ ក៏ប៉ុន្តែកិត្តិយស កេរ្តិ៍ឈ្មោះ សេចក្តីថ្លៃថ្នូររបស់យើង នឹងស្ថិតស្ថេររាប់ជំនាន់មនុស្សទៅក្រោយ»។
ជាមួយគ្នានេះ ក្នុងនាមកម្ពុជា ជាសមាជិកពេញសិទ្ធិរបស់អាស៊ាន លោក ហ៊ុន សែន បានផ្តួចផ្តើមជាគំនិត ដោយជំរុញឱ្យប្រទេសទាំងអស់នៅក្នុងតំបន់អាស៊ាន ពង្រឹងទំនាក់ទំនងជាមួយគ្នាឱ្យបានខ្លាំង តាមរយៈកីឡា ដើម្បីបង្កើតបានក្រុមបាល់ទាត់តំណាងឱ្យអាស៊ានដ៏ខ្លាំងមួយ សម្រាប់ចូលប្រកួតនៅ World Cup។ លោកបានបញ្ជាក់ថា កម្ពុជា នឹងធ្វើម្ចាស់ផ្ទះស៊ីហ្គេម និងអាស៊ានប៉ារ៉ាហ្គេម ម្តងទៀត ទៅតាមកាលកំណត់។
លោក ហ៊ុន សែន បានបញ្ចេញទស្សនៈបែបនេះថា៖ «យើងចង់ពង្រឹងសាមគ្គីភាព នៅក្នុងចំណោមប្រជាជនអាស៊ាន ដែលមានមានជាង ៦០០ លាននាក់ តាមរយៈកីឡានេះឯង គឺទាំងកីឡាធម្មតា និងកីឡាជនពិការ។ យើងចង់ឱ្យមានទំនាក់ទំនងកាន់តែជិតស្និទ្ធរវាងប្រជាជន និងប្រជាជន តាមរយៈវិស័យកីឡា ហើយយើងក៏ចង់ឱ្យវិស័យកីឡាអាស៊ាន ក្លាយជាទៅជាកីឡាដ៏ខ្លាំង ក្នុងក្របខ័ណ្ឌតំបន់របស់យើង ដែលខ្ញុំនឹកស្រមៃថា អាស៊ាន នឹងមានបាល់ទាត់របស់អាស៊ាន»។
ជាមួយការផ្តើមគំនិត បង្កើតឱ្យមានក្រុមបាល់ទាត់តំណាងឱ្យអាស៊ាននេះ លោកនាយករដ្ឋមន្ត្រី ហ៊ុន សែន មានការជឿជាក់ថា អាស៊ាន នឹងអាចជ្រើសរើសបានកីឡាករល្អៗ ចេញពីប្រជាជនជាង ៦០០ លាននាក់ ដើម្បីបង្កើតជាក្រុមមួយ ដែលមានប្រភពចេញពីប្រទេសនីមួយៗ នៅក្នុងតំបន់អាស៊ានទាំងអស់ ហើយលោកបានបង្ហាញពីតម្រុយថា ក្រុមបាល់ទាត់អាស៊ាន នឹងសុំការប្រកួតជាមួយបាល់ទាត់របស់ចិន ដែលមានប្រជាជនប្រមាណ ១៤០០ លាននាក់។
លោកបានបញ្ជាក់ពីជំហររបស់កម្ពុជាដូច្នេះថា៖ «ខ្ញុំចង់បានចំណុចទាំងអស់ហ្នឹង ហើយថ្ងៃក្រោយទៅ យើងអាចដេញថ្លៃ ធ្វើ World Cup និងដេញថ្លៃការប្រកួតកីឡាអូឡាំពិក។ អាហ្នឹងជាទស្សនទានសម្រាប់ថ្ងៃអនាគត ដែលចាប់ផ្តើមពីកម្ពុជា ដោយយើងធ្វើជាគំរូ ហើយខ្ញុំសង្ឃឹមថា ប្រទេសនានានឹងចូលរួមជាមួយអ្វីដែលជាការគិតគូររបស់កម្ពុជា»៕
