ភ្នំពេញៈ ប្រធានគណៈកម្មាធិការជាតិរៀបចំការប្រកួតកីឡាអាស៊ានប៉ារ៉ាហ្គេម លើកទី១២ ឆ្នាំ ២០២៣ (CAMAPGOC) លោក ទៀ បាញ់ បានលើកឡើងថា កម្ពុជាបានខិតខំប្រឹងប្រែងចាត់ចែងទីលានប្រកួតគ្រប់ប្រភេទកីឡាទាំងអស់ប្រកបដោយភាពរលូន និងជោគជ័យក្នុងពេលធ្វើម្ចាស់ផ្ទះអាស៊ានប៉ារ៉ាហ្គេម លើកទី១២ ឆ្នាំ ២០២៣។
លោកឧបនាយករដ្ឋមន្ត្រី រដ្ឋមន្ត្រីក្រសួងការពារជាតិបានអះអាងពីភាពរលូន និងជោគជ័យនេះទៅកាន់អ្នកសារព័ត៌មានជាតិ និងអន្តរជាតិក្នុងឱកាសដែលលោកអញ្ជើញទស្សនាលើកទឹកចិត្តដល់ការប្រកួតកីឡាអាស៊ានប៉ារ៉ាហ្គេម នៅពហុកីឡដ្ឋានជាតិមរតកតេជោ។
លោក ទៀ បាញ់ ថ្លែងថា បើទោះបីជាការប្រកួតកីឡាជនពិការនេះមានភាពស្មុគស្មាញខ្លះ ជាពិសេសលើឧបករណ៍ ទីលានប្រកួតសម្រាប់ប៉ារ៉ាហ្គេមក្តី ក៏កម្ពុជាបានពុះពាររៀបចំ ដោយមកដល់ពេលនេះ គឺអាចចាត់ទុកថា ជាជោគជ័យធំធេងណាស់។ នេះបើយោងតាមក្រសួងព័ត៌មាននៅថ្ងៃទី ៩ ខែមិថុនា។
លោកឧបនាយករដ្ឋមន្ត្រីបានមានប្រសាសន៍ថា នៅក្នុងការទទួលធ្វើម្ចាស់ផ្ទះ ស៊ីហ្គេម និងអាស៊ានប៉ារ៉ាហ្គេម ឆ្នាំ ២០២៣ គឺកម្ពុជាបានដកពិសោធន៍បានច្រើនដែរទាំងយុទ្ធសាស្ត្រ យុទ្ធវិធីនានា ទាំងប្រភេទកីឡា វិញ្ញាសាប្រកួត ដែលបានធ្វើឱ្យកម្ពុជាសិក្សារៀនសូត្របានច្រើន។ ចំពោះកីឡាករ កីឡាការិនី ក៏បានដកពិសោធន៍បានច្រើនផងដែរ។
ម្ចាស់ផ្ទះកម្ពុជាមិនទទួលបានមេដាយមាសច្រើនទេ ព្រោះថានេះជាការរៀបចំធ្វើម្ចាស់ផ្ទះជាលើកដំបូង ម្យ៉ាងការហ្វឹកហាត់របស់ក្រុមកីឡាករ កីឡាការិនីមានពិការភាពមានពេលវេលាតិចតួច។
លោក ទៀ បាញ់ បានមានប្រសាសន៍ថា៖ «ចំពោះការដណ្តើមមេដាយក្នុងនាមជាម្ចាស់ផ្ទះនេះ គឺយើងបានទទួលបានស្របតាមយុទ្ធសាស្ត្ររបស់យើង កម្លាំងពិតរបស់កីឡាករ កីឡាការិនីពិការយើងហើយ ដោយការពីការប្រកួតអាស៊ានប៉ារ៉ាហ្គេមលើកទី១១នៅទីក្រុងសូឡូ ប្រទេសឥណ្ឌូនេស៊ីកាលពីឆ្នាំ ២០២២ កន្លងទៅ គឺកម្ពុជាឈ្នះមេដាយមាសបាន៧។ ប៉ុន្តែពេលនេះ គឺកម្ពុជាដណ្តើមបានមេដាយមាស ៩ គ្រឿង»។ នេះបើយោងតាមប្រភពដដែលនេះ៕
