លោកនាយករដ្ឋមន្ត្រី ហ៊ុន សែន ក្នុងពិធីបិទជាផ្លូវការ ព្រឹត្តិការណ៍អាស៊ានប៉ារ៉ាហ្គេមលើកទី១២ នៅពហុកីឡដ្ឋានជាតិមរតកតេជោ នាថ្ងៃទី៩ ខែមិថុនា ឆ្នាំ ២០២៣។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន ថ្លែងថា បន្ទាប់ពីបានទទួលជោគជ័យយ៉ាងត្រចះត្រចង់ក្នុងនាមជាម្ចាស់ផ្ទះរៀបចំការប្រកួតកីឡាអាស៊ីអាគ្នេយ៍ និងកីឡាជនពិការអាស៊ាន កម្ពុជាត្រៀមធ្វើជាម្ចាស់ផ្ទះក្នុងការរៀបចំកីឡាយុវជនអាស៊ី លើកទី៥ នៅឆ្នាំ ២០២៩ ខាងមុខបន្តទៀត ក្នុងក្របខ័ណ្ឌធំជាង កីឡាអាស៊ីអាគ្នេយ៍ និង កីឡាជនពិការអាស៊ាន។
លោកបានថ្លែងបែបនេះក្នុងពិធីបិទជាផ្លូវការ ព្រឹត្តិការណ៍អាស៊ានប៉ារ៉ាហ្គេមលើកទី១២ នៅពហុកីឡដ្ឋានជាតិមរតកតេជោ នាថ្ងៃទី៩ ខែមិថុនា ឆ្នាំ ២០២៣។
លោកថ្លែងថា៖ «យើងនឹងជួបជុំគ្នានៅទីនេះ និង នៅព្រះរាជាណាចក្រកម្ពុជា ក្នុងក្របខ័ណ្ឌទ្រង់ទ្រាយធំជាងនេះនៅឆ្នាំ ២០២៩ ខាងមុខ»។
លោកនាយករដ្ឋមន្ត្រីបានកោតសរសើរនិងវាយតម្លៃខ្ពស់ចំពោះគណៈកម្មាធិការជាតិរៀបចំការប្រកួតអាស៊ានប៉ារ៉ាហ្គេមលើកទី ១២ សហព័ន្ធកីឡាជនពិការអាស៊ាន និងប្រតិភូកីឡាជនពិការអាស៊ាន និង ទីម័រលេស ដែលបានរួមគ្នាលើកតម្កើងតម្លៃបន្ថែមជូនអត្តពលិកមានពិការភាព និងផ្តល់់នូវស្មារតីគាំទ្រយ៉ាងពេញទំហឹងចំពោះព្រឹត្តិការណ៍កីឡាជនពិការអាស៊ានលើកទី១២ នៅព្រះរាជាណាចក្រកម្ពុជា។
លោកថ្លែងថា៖ «ក្នុងនាមជាម្ចាស់ផ្ទះយើងបានខិតខំអស់ពីសមត្ថភាព និងលទ្ធភាព ដើម្បីធានារៀបចំការប្រកួតកីឡាជនពិការអាស៊ានលើកទី១២ នេះ ឱ្យប្រព្រឹត្តទៅតាមនិយាម និង ស្តង់ដាកីឡាជនពិការអន្តរជាតិ ពិតប្រាកដ។ ការប្រកួតបានបញ្ចប់ ខ្ញុំសង្ឃឹមថា ប្រជាជនអាស៊ាន និង ទីម័រលេសដែលមានជាង ៦០០ លាននាក់ពិតជានឹងចងចាំនូវអនុស្សាវរីយ៍ទាំងឡាយ»៕
