
និស្សិតកម្ពុជានិងជប៉ុនកំពុងផ្តល់ការអប់រំដល់កុមារតាមរយៈកីឡា។ ហេង ជីវ័ន
ភ្នំពេញ: និស្សិតកម្ពុជា និងជប៉ុនកំពុងបំពេញបេសកកម្មរួមគ្នាតាមរយៈកម្មវិធី «ដំណើរកម្សាន្ដនៃភាពចម្រុះ» ដើម្បីនាំមកនូវថាមពលកម្លាំងសាមគ្គីភាពដល់កុមារតាមរយៈកីឡា។ បេសកកម្មរួមគ្នារបស់ពួកគេគឺផ្តល់អំណាចដល់យុវជន ដើម្បីលើកកម្ពស់បរិយាប័ន្នដល់មនុស្សជំនាន់ក្រោយ។
កម្មវិធី «ដំណើរកម្សាន្ដនៃភាពចម្រុះ»រៀបចំឡើងចាប់ពីថ្ងៃទី ៥ ដល់ថ្ងៃទី ១៣ កញ្ញា ឆ្នាំ ២០២៣ ដោយមាននិស្សិតកម្ពុជាចូលរួមចាប់ពីថ្ងៃទី ៦ ដល់ថ្ងៃទី ១១ ខែកញ្ញា សម្រាប់កម្មវិធីរយៈពេល ៦ ថ្ងៃ។ នៅក្នុងវគ្គ Summer 2023 មាននិស្សិតសាកលវិទ្យាល័យ តូយ៉ូ សរុបចំនួន ១៤ នាក់ និងនិស្សិតសាកលវិទ្យាល័យកម្ពុជា ចំនួន ១១ នាក់។ អ្នកចូលរួមត្រូវបានជ្រើសរើសយ៉ាងយកចិត្តទុកដាក់តាមរយៈដំណើរការពិនិត្យពាក្យសុំ និងការសម្ភាស ហើយការជ្រើសរើសអ្នកចូលរួមជនជាតិជប៉ុនត្រូវបានបញ្ចប់នៅចុងខែមិថុនា។ នៅថ្ងៃទី ១១ ខែកញ្ញា ឆ្នាំ ២០២៣ និស្សិតទាំង ២៥ នាក់បាននាំយកចំណេះដឹងរបស់ពួកគេមកបង្កើតជាសកម្មភាពចំហ្គេមកីឡាសម្រាប់កុមារ ប្រហែល ១០០ នាក់នៅពហុកីឡដ្ឋានជាតិអូឡាំពិក ដោយបង្ហាញពីការប្តេជ្ញាចិត្តរបស់កម្មវិធីក្នុងការប្រើប្រាស់កីឡាជាឧបករណ៍សម្រាប់ការអប់រំ។
លោក គីមូរ៉ា ដៃស៊ូកេ ផលិតករអប់រំសកល អ្នកសម្របសម្រួលភាពចម្រុះ និងជាប្រធានផ្នែកស្រាវជ្រាវអប់រំអង្គការ GiFT ជប៉ុនដែលដឹកនាំគម្រោងនេះ បានថ្លែងថា៖ «នៅកម្ពុជារហូតមកដល់ពេលនេះ ខ្ញុំចង់លើកយកប្រធានបទកីឡានិងការអភិវឌ្ឍសង្គមមួយចំនួន។ ប៉ុន្តែកីឡាគឺជាឧបករណ៍សំខាន់សម្រាប់ពួកយើងក្នុងការបញ្ជូនសារទៅកាន់ពួកគេ»។ លោកថា៖ «ដើមឡើយយើងរៀបចំកម្មវិធីនេះក្រោមកិច្ចខិតខំប្រឹងប្រែងរបស់និស្សិតដើម្បីលើកកម្ពស់កីឡា និងគុណតម្លៃរបស់វាជាមួយស្មារតីអូឡាំពិក»។
កញ្ញា មាស ឡាយលាភ និស្សិតឆ្នាំទី ២ ឯកទេសភាសាជប៉ុន នៃសាកលវិទ្យាល័យភូមិន្ទភ្នំពេញ បានដើរតួយ៉ាងសំខាន់ក្នុងសកម្មភាពទាំងនេះ។ ក្នុងនាមជាសមាជិកនៃក្រុមនិស្សិត និងជាអ្នកបកប្រែ ដែលសម្របសម្រួលទំនាក់ទំនងរវាងនិស្សិតជប៉ុន និងកុមារកម្ពុជា កញ្ញា ឡាយលាភ បានណែនាំមេរៀនជីវិតសំខាន់ៗក្នុងសាមគ្គីភាព ការងារជាក្រុម និងជម្នះឧបសគ្គតាមរយៈការប្រកួតកីឡាដល់កុមារដែលបានចូលរួម។ កញ្ញា បាននិយាយថា៖«រយៈពេលប្រមាណ ១ សប្ដាហ៍នេះ យើងបានរៀនពីកីឡា ចំណេះដឹងផ្នែកអប់រំ ភាពជា អ្នកដឹកនាំ ជាពិសេស សកម្មភាពលើកទឹកចិត្ដកុមារក្នុងការរៀនសូត្រតាមរយៈកីឡា»។
ក្នុងនាមជានិស្សិតដូចគ្នាពួកគេបានចែករំលែកកម្មវិធីសិក្សាអំពីកីឡានៅតាមសាលារៀនរវាងសិស្ស-និស្សិតប្រទេសទាំង ២។
កញ្ញាប្រាប់ ភ្នំពេញ ប៉ុស្ដិ៍ថា៖ «ដោយសារកុមារកម្ពុជាមិនសូវមានឱកាសបានលេងកីឡា ដូចកុមារនៅជប៉ុននិស្សិតជប៉ុនបានសិក្សាស្វែងយល់ និងបង្កើតកម្មវិធីក៏ដូចជាសកម្មភាពផ្សេងៗដើម្បីឱ្យពួកគេបានលេងកីឡា»។
កម្មវិធី «ដំណើរកម្សាន្ដនៃភាពចម្រុះ» ដែលត្រូវបានរៀបចំឡើងតាំងពីឆ្នាំ ២០១៤ ផ្តោតលើការជំរុញយុវជនឱ្យអភិវឌ្ឍសមត្ថភាព និងជំនាញក្នុងសតវត្សរ៍ទី២១ របស់ពួកគេ ក៏ដូចជាផ្នត់គំនិតនៃភាពជាពលរដ្ឋសកល។
កម្មវិធីនេះត្រូវបានប្រារព្ធឡើងនៅក្នុងប្រទេសចំនួន ៨ រួមមាន កម្ពុជា ថៃ ឥណ្ឌូនេស៊ី ហ្វីលីពីន ម៉ាឡេស៊ី ឡាវ សិង្ហបុរី និងប៊ូតង់ ហើយក្នុងអំឡុងពេលកូវីដ ១៩ កម្មវិធីអនឡាញត្រូវបានធ្វើឡើងដោយភ្ជាប់អ្នកចូលរួមជាមួយប្រទេសអាល្លឺម៉ង់និងអេហ្ស៊ីប។
លោក ដៃស៊ូកេ បានលើកឡើងថា៖ «កម្មវិធីនៅភ្នំពេញបានប្រារព្ធឡើងតាំងពីរដូវក្តៅឆ្នាំ ២០១៧ ចំនួន ៨ ដង (២ ដងតាមអនឡាញ)។ នៅក្នុងកម្មវិធីជាបន្តបន្ទាប់នោះ មាននិស្សិតប្រហែល ២៥០ នាក់ (ជប៉ុន ១៥០ នាក់ និង ១០០ នាក់) បានចូលរួម។ ខ្ញុំចង់ឱ្យមាននិស្សិតកាន់តែច្រើនចូលរួមក្នុងកម្មវិធីរបស់យើងហើយឥឡូវនេះយើងស្ថិតក្នុងយុទ្ធសាស្ត្រនាំយកនិស្សិតកម្ពុជាទៅប្រទេសជប៉ុន ដើម្បីពង្រីកកម្មវិធី»។
លោកបន្ថែមថាសម្រាប់កម្មវិធីរដូវក្តៅឆ្នាំ ២០២៣ នេះ ដូចដែលកម្ពុជាបានទទួលធ្វើជាម្ចាស់ផ្ទះព្រឹត្ដិការណ៍ស៊ីហ្គេមប្រកបដោយភាពជោគជ័យ អង្គការ GiFT ចង់បន្ដលើកកម្ពស់តម្លៃនៃកីឡា និងស្មារតីនៃកីឡាអូឡាំពិក (សន្តិភាពមិត្តភាពសាមគ្គីភាព និងយុត្តិធម៌) ជាមួយនឹងពាក្យគន្លឹះ «Beyond the Games» ដល់កុមារនៅកម្ពុជាបន្ថែមទៀត។
កញ្ញា កូបាយ៉ាស៊ិ ណាហ្ស៊ុគិ ជានិស្សិតមកពីសាកលវិទ្យាល័យតូយ៉ូ បានបង្ហាញនូវភាពរីករាយក្នុងកិច្ចសហការជាមួយនិស្សិតកម្ពុជា និងចែករំលែកការអប់រំតាមរយៈកីឡា។ កញ្ញាបានប្រាប់ភ្នំពេញប៉ុស្ដិ៍ថា៖ «អ្វីដែលខ្ញុំបាននិងកំពុងធ្វើគឺសហការជាមួយនិស្សិតខ្មែរ ហើយយើងជួយគ្នាទៅវិញទៅមក។ ចំណុចសំខាន់មួយទៀត គឺយើងផ្សព្វផ្សាយអំពីការប្រាស្រ័យទាក់ទងជាមួយនិស្សិតខ្មែរ តាំងពីចំណុចតូចរហូតដល់កិច្ចការធំៗ»៕