ក្រុមកីឡាករកម្ពុជាពេលចូលរួមប្រកួតកីឡាអាស៊ីលើកទី១៩ ។ រូបថត សហការី
ភ្នំពេញៈព្រឹត្តិការណ៍ប្រកួតកីឡាអាស៊ីលើកទី១៩ (The 19th Asian Games) នៅទីក្រុង Hangzhou ប្រទេសចិន បានរៀបចំពិធីបើកជាផ្លូវការយ៉ាងឱឡារិកកាលពីយប់ថ្ងៃទី ២៣ ខែកញ្ញា ដោយមានប្រតិភូកីឡាចំនួន ៤៥ ប្រទេសបានចូលរួម ហើយជាមួយគ្នានោះ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ក៏បានយាងចូលរួមជាព្រះរាជាធិបតីភាពដ៏ខ្ពង់ខ្ពស់ក្នុងការពិធីបើកនេះ តបតាមសេចក្តីក្រាបបង្គំសូមយាងរបស់លោក Xi JinPing ប្រធានាធិបតីចិន ផងដែរ។
នៅក្នុងពិធីបើកការប្រកួតកីឡាអាស៊ី លើកទី១៩ នេះ កម្ពុជា បានដាក់ប្រតិភូកីឡាករ កីឡាការិនី ចំនួន៤៧នាក់ ឱ្យចូលដង្ហែក្បួនជាមួយបណ្តាប្រទេសចំនួន៤៤ទៀត ដោយក្នុងនោះ មាននាយបេសកកម្ម១នាក់ នាយរងបេសកកម្មម្នាក់ មន្ត្រីរដ្ឋបាលព័ត៌មាន និងពេទ្យ ២០នាក់ ក្រុមបាល់បោះ៦នាក់ បាល់ទះ១៥នាក់ យូដូម្នាក់ និងគុនដាវ៣នាក់ ហើយកីឡាករ បាល់បោះ ទេព ឆរ៉ាត ជាម្ចាស់មេដាយមាសស៊ីហ្គេម ឆ្នាំ២០២៣ និងកីឡាការិនីឆ្នើមផ្នែកគុនដាវ ហៃ ស្រីស្រស់ ជាអ្នកកាន់ទង់ជាតិ ចំណែកលោក ថោង ខុន ប្រធាន NOCC និងលោក វ៉ាត់ ចំរើន ជាអគ្គលេខាធិការ NOCC អង្គុយនៅកន្លែង VIP។
យ៉ាងណាមិញ ងាកមកចាប់អារម្មណ៍ការប្រកួតប្រជែងរបស់ក្រុមអត្តពលិកកម្ពុជា ចំនួន៥ប្រភេទ មកដល់ពេលនេះ ទទួលបានលទ្ធផលមិនគាប់ប្រសើរទេ ដោយក្នុងនោះក្រុមជម្រើសជាតិបាល់ទះកម្ពុជា បានធ្លាក់ចេញពីការប្រកួតមុនគេ តាំងពីថ្ងៃទី២១ ខែកញ្ញា បន្ទាប់ពីពួកគេបានចាញ់ក្រុមជម្រើសជាតិឥណ្ឌា និងកូរ៉េខាងត្បូង ដោយលទ្ធផល៣សិតដាច់ (៣-០) ដូចគ្នា ក្នុងការប្រកួតជម្រុះតាមពូលនោះ។
ចំណែកការប្រកួតរបស់ក្រុមជម្រើសជាតិទូកក្តោងកម្ពុជាវិញ គឺកីឡាករ កែវ ភារុណ បានបញ្ចប់ការប្រកួតវិញ្ញាសា Men''s Windsurfer RS:X-RS:X ដោយទទួលបានចំណាត់ថ្នាក់លេខ៦ក្រោយគេ ក្នុងចំណោមកីឡាករទាំង៦នាក់ រីឯកីឡាករ ញ៉ូវ ចាន់ បានបញ្ចប់ការប្រកួតវិញ្ញាសា Men''s Dinghy-ILCA7 ដោយបានលេខ១២ ក្នុងចំណោមកីឡាករ១៣នាក់ ហើយកីឡាករ កែវ ភានុន ដែលប្រកួតវិញ្ញាសា Men''s Windsurfing – iQFoil ក៏ទទួលបានលទ្ធផលមិនល្អ និងធ្លាក់ចេញពីការប្រកួតនេះដូចគ្នា។
ស្រដៀងគ្នានេះ ក្រុមកីឡាករ កីឡាការិនីហែលទឹកកម្ពុជា ក៏ធ្វើមិនបានល្អ សម្រាប់ការប្រកួតបើកឆាករបស់ពួកគេ នៅថ្ងៃទី២៤ ខែកញ្ញាផងដែរ ដោយក្នុងនោះកីឡាករ ដឺ ឡាប៉ារ៉ង់ អង់ត្វ័ន បានធ្លាក់ក្នុងការប្រកួតហែលសេរីចម្ងាយ១០០ម៉ែត្រ ដោយបានលេខ៧ ក្នុងចំណោមកីឡាករ៨នាក់ ដែលប្រកួតជម្រុះក្នុង Heat 3 ហើយ ដឺ ឡាប៉ារ៉ង់ អង់ត្វ័ន ក៏បានធ្លាក់ពីការប្រកួតហែលផ្ងារចម្ងាយ១០០ម៉ែត្រផងដែរ ដោយបានលេខ៨ចុងក្រោយគេ ក្នុង Heat 3។
ចំណែកកីឡាករហែលទឹក មនត្រស ផានសុវណ្ណអារុន ទទួលបានចំណាត់ថ្នាក់លេខ៥ ក្នុងចំណោមកីឡាករ៨នាក់ ដែលប្រកួតហែលសេរីចម្ងាយ១០០ម៉ែត្រ ក្នុង Heat 2 ហើយ កីឡាការិនី សុខ វរល័ក្ខណ៍ ទទួលបានលេខ៧ ក្នុងចំណោមកីឡាការិនី៨នាក់ ដែលចូលប្រកួតហែលកង្កែប ចម្ងាយ៥០ម៉ែត្រ ក្នុង Heat3។ តែទោះយ៉ាងណា ពួកគេនៅសល់វិញ្ញាសាផ្សេងទៀត ដែលត្រូវប្រកួតបន្ត នៅថ្ងៃទី២៥ ខែកញ្ញា។
ដោយឡែកកីឡាការិនីគុនដាវកម្ពុជា ម៉ែន ម៉ូនីកា បានចាញ់គ្រប់ការប្រកួត លើវិញ្ញាសា Womme’s Epee ឯកត្តជននារី នៅក្នុង Pool 4 ដោយក្នុងនោះបានចាញ់កីឡាការិនីអារ៉ាប់រួម ដោយពិន្ទុ ៥-១ ចាញ់កីឡាការិនីកូរ៉េខាងត្បូង ៥-២ ចាញ់កីឡាការិនីអ៊ូសបេគីស្ថាន ៥-១ និងចាញ់កីឡាការិនីរបស់ជប៉ុន និងថៃ ដោយពិន្ទុ ៥-៣ ដូចគ្នា រីឯកីឡាការិនី ហៃ ស្រីស្រស់ ត្រូវប្រកួតវិញ្ញាសា Women’s Foil ឯកត្តជន នៅថ្ងៃទី២៥ ខែកញ្ញា។
ចំណែកកីឡាករយូដូរបស់កម្ពុជា ហ្គូឆ្កូវ វូឡូឌីមៀរ បានធ្លាក់ចេញពីការប្រកួត ក្នុងប្រភេទទម្ងន់៦០គីឡូក្រាមរបស់ខ្លួនហើយ បន្ទាប់ពីបានចាញ់កីឡាកររបស់នេប៉ាល់ Nep B.K Vikas កាលពីថ្ងៃទី២៤ ខែកញ្ញា ហើយកីឡាករយូដូរបស់កម្ពុជាម្នាក់ទៀតគឺ អូណូ ស៊ីនតារ៉ូ នឹងត្រូវប្រកួតទម្ងន់៧៣គីឡូក្រាម នៅថ្ងៃទី២៥ ខែកញ្ញា ។
គួរបញ្ជាក់ថា កម្ពុជា បានបញ្ជូនក្រុមអត្ដពលិកចំនួន១១៤នាក់ ទៅចូលរួមការប្រកួតកីឡាអាស៊ី លើកទី១៩ ដែលកំពុងធ្វើនៅប្រទេសចិននេះ ដោយអ្នកទាំងនេះ ត្រូវប្រកួតប្រជែង លើប្រភេទកីឡាចំនួន១៧ រួមមានកីឡាហែលទឹក (មានអត្ដពលិក៤នាក់) អត្ដពលកម្ម (១០ នាក់) វាយសី (២នាក់) បាល់បោះ៣ទល់៣ (៤នាក់) គ្រីកឃីត (១៥នាក់) ទូកនាគ (១៤ នាក់) គុនដាវ (២នាក់) យូដូ (២នាក់) ជឺជិតស៊ូ (២នាក់) ការ៉ាតេ (១០នាក់) អុកចិន (២ នាក់) ទូកក្ដោង (៣នាក់) តេក្វាន់ដូ WT (៦នាក់) សូហ្វតិន្នីស (១០នាក់) ទ្រីយ៉ាត្លុង (២ នាក់) បាល់ទះក្នុងសាលបុរស (១២នាក់) និងក្រុមចំបាប់ មានអត្ដពលិក១៤នាក់៕
