ពិធីបិទការប្រកួតស៊ីហ្គេមនៅរាជធានីភ្នំពេញ។ ហុង មិនា
ភ្នំពេញៈ ដោយមានអតីតកាលជាកីឡាករផ្នែកប្រយុទ្ធដ៏ជំនាញម្នាក់ ដែលបានឆ្លងកាត់ភាពជូរចត់រាប់មិនអស់ ទាំងនៅលើការហ្វឹកហាត់ និងការប្រកួត នៅលើទីលាន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) លោក វ៉ាត់ ចំរើន បានថ្លែងថា វិស័យកីឡា នៅកម្ពុជា នាពេលបច្ចុប្បន្ន បាននិងកំពុងមានការរីកចម្រើនផុសផុលខ្លាំង ហើយភាពជោគជ័យដ៏ត្រចះត្រចង់នៃការធ្វើម្ចាស់ផ្ទះស៊ីហ្គេម និងអាស៊ានប៉ារ៉ាហ្គេម ជាប្រវត្តិសាស្ត្រលើកដំបូងនៅឆ្នាំ ២០២៣ បានក្លាយជាឧត្តមភាព ដែលធ្វើឱ្យវិស័យកីឡា បានដើរនាំមុខវិស័យផ្សេងៗទៀត នៅកម្ពុជា។
បើទោះបីជាវិស័យកីឡាដ៏រុងរឿងរបស់កម្ពុជា កាលពីសម័យដើម ត្រូវបានរលាយបាត់ ដោយសារសង្គ្រាមរ៉ាំរ៉ៃ ហើយត្រូវបានបង្កើតឱ្យមានឡើងវិញ ទាំងលំបាក បន្ទាប់ពីរបបប្រល័យពូជសាសន៍ប៉ុលពត បានដួលរលំ នាថ្ងៃទី ៧ ខែមករា ឆ្នាំ ១៩៧៩ ប៉ុន្តែការវិវឌ្ឍបន្តិចម្តងៗនៃវិស័យនេះ បានចាប់ផ្តើមចេញជាផ្លែផ្កា នៅពេលព្រឹទ្ធាចារ្យកីឡា និងគ្រូគុនមួយចំនួន ដែលរួចផុតពីការស្លាប់ ក្នុងរបបដ៏ខ្មៅងងឹត បានប្រមូលផ្តុំគ្នា បង្កើតជាសមាគមកីឡា ក្នុងនាមជាអ្នកស្ម័គ្រចិត្ត នៅតាមខេត្តមួយចំនួន។
ជាមួយគ្នានេះ ពហុកីឡដ្ឋានជាតិអូឡាំពិក ដែលធ្លាប់រៀបចំធ្វើម្ចាស់ផ្ទះការប្រកួតកីឡា GANEFO លើកទី ២ ឆ្នាំ ១៩៦៦ ដ៏រុងរឿង កាលពីសម័យសង្គមរាស្ត្រនិយមនោះ បានក្លាយជាទីតាំងដ៏សំខាន់ សម្រាប់ការស្នាក់នៅរបស់អ្នកកីឡា ដើម្បីធ្វើការហ្វឹកហាត់ និងប្រកួតកីឡាឡើងវិញ នៅអំឡុងឆ្នាំ ១៩៨១ និងឆ្នាំ ១៩៨២ ហើយកម្ពុជា បានបញ្ជូនប្រតិភូកីឡាចូលរួមការប្រកួតស៊ីហ្គេម ឡើងវិញ ជាលើកដំបូង នៅឆ្នាំ ១៩៨៣ គឺក្នុងពេលប្រទេសសិង្ហបុរី បានធ្វើជាម្ចាស់ផ្ទះ តែកម្ពុជា មិនដណ្តើមបានមេដាយទេ។ ចំណែកនៅឆ្នាំ ១៩៨៥ កម្ពុជា បានបញ្ជូនប្រតិភូកីឡា ទៅចូលរួមការប្រកួតស៊ីហ្គេម នៅប្រទេសថៃ ជាថ្មីម្តងទៀត ប៉ុន្តែនៅតែមិនដណ្តើមបានមេដាយដដែល។ តែទោះបីជាយ៉ាងណា សម្រាប់ការប្រកួតស៊ីហ្គេម លើកទី១៤ នៅឥណ្ឌូនេស៊ី ក្រុមអត្តពលិកកម្ពុជា បានឈ្នះមេដាយប្រាក់ ១ និងសំរឹទ្ធ ៩ ជាលើកដំបូង។
បន្ទាប់មក កម្ពុជា បានអាក់ខាន សម្រាប់ការចូលរួមប្រកួតស៊ីហ្គេមចំនួន ៣ លើកទៀត គឺឆ្នាំ ១៩៨៩ នៅម៉ាឡេស៊ី ឆ្នាំ ១៩៩១ នៅហ្វីលីពីន និងស៊ីហ្គេម ឆ្នាំ១ ៩៩៣ នៅសិង្ហបុរី ប៉ុន្តែកម្ពុជាបានចូលរួមប្រកួតស៊ីហ្គេម បានជាប់លាប់វិញ ចាប់តាំងពីឆ្នាំ ១៩៩៥ មក ហើយក្រុមអត្តពលិកកម្ពុជា បានឈ្នះមេដាយមាសជាលើកដំបូង ពីព្រឹត្តិការណ៍នេះ នៅឆ្នាំ ២០០១ គឺនៅពេលម៉ាឡេស៊ី បានធ្វើជាម្ចាស់ផ្ទះ ដោយកាលនោះកម្ពុជា បានបញ្ជូនប្រតិភូកីឡាទៅចូលរួម ៩២ នាក់ និងឈ្នះបានមេដាយសរុប ៧ គឺមាស ១ ប្រាក់ ១ សំរឹទ្ធ ៥ និងឈរនៅលេខ ៩ ក្នុងចំណោម ១០ ប្រទេស។
ចាប់តាំងពីពេលនោះមក ក្រុមអត្តពលិកកម្ពុជាបានចេញទៅប្រកួតនៅលើឆាកអន្តរជាតិកាន់តែច្រើន និងដណ្តើមបានមេដាយជូនជាតិជាបន្តបន្ទាប់។ ជាមួយគ្នានេះ ប្រវត្តិសាស្ត្រនៃវិស័យកីឡារបស់កម្ពុជា ត្រូវបានបង្កើតឡើង នៅពេលរាជរដ្ឋាភិបាលកម្ពុជា បានសម្រេចធ្វើជាម្ចាស់ផ្ទះស៊ីហ្គេម ជាលើកដំបូង កាលពីខែឧសភា ឆ្នាំ ២០២៣ នេះ ហើយវាក៏ជាពេលដែលកម្ពុជា បានបំបែកកំណត់ត្រា ឈ្នះមេដាយបានច្រើនបំផុត គឺមេដាយមាស ៨១ ប្រាក់ ៧៤ សំរឹទ្ធ ១២៧ និងបានឈរនៅចំណាត់ថ្នាក់លេខ ៤ ក្នុងចំណោមប្រទេសទាំង ១១ នៅអាស៊ាន ជាលើកដំបូង។
ជាមួយការចាប់ផ្តើមសកម្មភាពកីឡាពីបាតដៃទទេ និងផេះផង់ធូលី ដែលបន្សល់ទុកពីរបបប៉ុលពត រហូតក្លាយជាវិស័យ មានការរីកចម្រើន និងផុសផុលខ្លាំងនេះ លោក វ៉ាត់ ចំរើន បានអះអាងថា វាកើតឡើងដោយសារមានការរួមគ្នាគិត រួមគ្នាធ្វើ និងរួមគ្នាទទួលខុសត្រូវ របស់មហាគ្រួសារកីឡាកម្ពុជា និងប្រជាជនកម្ពុជា ក្រោមការជួយជ្រោមជ្រែងពីរាជរដ្ឋាភិបាល ដោយបានដាក់ចេញនូវយុទ្ធសាស្ត្រកំណែទម្រង់ដ៏ស៊ីជម្រៅ នាសម័យកាលថ្មីនេះ ហើយភាពជោគជ័យ នេះ វាជាបន្ទាត់មួយ ក្នុងការរុញកម្លាំងចិត្តឱ្យធ្វើការងារកីឡាកាន់តែបានល្អថែមទៀត។
លោក វ៉ាត់ ចំរើន បានថ្លែងថា៖ «ភាពជោគជ័យដ៏ត្រចេះត្រចង់ បានមកពីស៊ីហ្គេម ធ្វើឱ្យសង្គមជាតិរបស់យើងផុសផុល ដោយយើងឃើញថា សហព័ន្ធកីឡាជាតិ ពេលនេះមានភាពមមាញឹក គឺគ្រាន់តែគាត់បើកទ្វារទទួលយកសិស្សហ្វឹកហាត់ មានសិស្សចូលហាត់ពេញៗតែម្តង អ៊ីចឹងបានន័យថា ការយល់ដឹង ការជ្រួតជ្រាប និងការផុសផុលរបស់ប្រជាជនយើង ដោយសារតែស៊ីហ្គេមហ្នឹង គឺមានច្រើនណាស់»។
ចំពោះភាពផុសផុលខ្លាំង នៅក្នុងវិស័យកីឡា នាពេលនេះ ដោយសារតែប្រជាពលរដ្ឋ បានស្គាល់ពីគុណតម្លៃ និងអត្ថប្រយោជន៍របស់កីឡា សម្រាប់សង្គមជាតិ និងសម្រាប់ជីវិតបុគ្គលម្នាក់ៗ ដែលកម្ពុជាបានកំណត់យកគោលការណ៍ផ្សព្វផ្សាយ តាមរយៈការធ្វើម្ចាស់ផ្ទះស៊ីហ្គេមថា «ប្រជាជនម្នាក់ ត្រូវលេងកីឡា ១ ប្រភេទប្រចាំជីវិតយ៉ាងតិច» ហើយគោលការណ៍នេះ គឺសម្រាប់ជាតិរបស់យើង ទៅថ្ងៃក្រោយទៀត។
ទន្ទឹមនឹងនេះ ការឈ្នះបានមេដាយមាសចំនួន ៨១ ពីការធ្វើម្ចាស់ផ្ទះស៊ីហ្គេម ជាលើកដំបូងនេះ លោក វ៉ាត់ ចំរើន បានសង្កត់ធ្ងន់ថា វាបានក្លាយជាប្រវត្តិសាស្ត្រមិនធ្លាប់មាន ដែលធ្វើឱ្យខ្មែររស់នៅក្នុងស្រុក និងក្រៅប្រទេស បើកភ្នែកធំៗ ដោយងឿងឆ្ងល់ថា មិនដឹងជាមានកីឡាករ កីឡាការិនី មកពីណា យកបានមេដាយច្រើន គឺពួកគាត់ មិននឹកស្មានដល់ថា ខ្មែរយើងមានសមត្ថភាពដល់ប៉ុណ្ណឹង ហើយការសរសើរ ដោយការភ្ញាក់ផ្អើលនេះ បានធ្វើឱ្យវិស័យកីឡាទទួលបាននូវឧត្តមភាព លើវិស័យផ្សេងៗទៀត នៅកម្ពុជា។
លោកបានបញ្ជាក់ថា៖ «នេះជាការកោតសរសើរ ចំពោះការខិតខំប្រឹងប្រែងរួមគ្នារបស់យើង អ៊ីចឹងយើងត្រូវបន្តសក្តានុពលនេះ ព្រោះប្រទេសរបស់យើង ត្រូវការឧត្តមភាពរបស់ជាតិ នៅលើឆាកអន្តរជាតិ ហើយមកដល់ពេលនេះ ឧត្តមភាពជាតិរបស់វិស័យកីឡា បានដើរមុនគេ គឺបានបង្ហាញនៅលើឆាកអន្តរជាតិមុនគេហើយ អ៊ីចឹងយើងនឹងខិតខំប្រឹងប្រែងបន្តទៀត ក្នុងការកែទម្រង់វិស័យកីឡារបស់យើង»។
សម្រាប់ការត្រៀមធ្វើជាម្ចាស់ផ្ទះស៊ីហ្គេម លើកទី៣២ ឆ្នាំ ២០២៣ កន្លងមកនេះ រាជរដ្ឋាភិបាលកម្ពុជា តាមរយៈក្រសួងអប់រំ យុវជន និងកីឡា បានធ្វើការប្រមូលផ្តុំហ្វឹកហាត់ក្រុមជម្រើសជាតិរបស់សហព័ន្ធកីឡាជាតិចំនួន ៣៦ ដែលមានអត្តពលិក គ្រូបង្វឹក អនុរក្ស និងក្រុមបច្ចេកទេសសម្រាប់ត្រួតពិនិត្យ សរុបចំនួន ១១-១៤ ខណៈអត្តពលិកមួយចំនួនទៀត បានហ្វឹកហាត់នៅក្រៅប្រទេស ព្រោះការប្រកួតស៊ីហ្គេមនេះ កម្ពុជា បានដាក់ប្រតិភូកីឡាចំនួន ១ ១៥៨ នាក់ ឱ្យចូលរួមប្រកួតជាមួយប្រតិភូកីឡា មកពីបណ្តាប្រទេសចំនួន ១០ ទៀត ដែលមានប្រតិភូកីឡាសរុបទាំងអស់ ១២ ៤០៤ នាក់។
លោក ធិន វិចិត្រ អនុប្រធានទទួលបន្ទុករួមមជ្ឈមណ្ឌលជាតិព័ត៌មានវិទ្យា និងស្ថិតិកីឡា នៃក្រសួងអប់រំ យុវជន និងកីឡា បានឱ្យដឹងថា គិតត្រឹមឆ្នាំ ២០២៣ នេះ ចំនួនសហព័ន្ធកីឡាជាតិ នៅក្នុងប្រទេសកម្ពុជា មានចំនួន ៦០ ដោយក្នុងនោះ សហព័ន្ធកីឡាអូឡាំពិក មាន ២៩ និងសហព័ន្ធកីឡាមិនអូឡាំពិកមានចំនួន ៣១។
បើតាមតួលេខនេះ បានបង្ហាញថា ចំនួនសហព័ន្ធកីឡជាតិ មានការកើនឡើងច្រើន បើធៀបទៅនឹងការបង្កើតឱ្យមានសកម្មភាពកីឡាឡើងវិញ ក្រោយឆ្នាំ ១៩៧៩ ហើយចំនួនកីឡាករ កីឡាការិនី នៅតាមសហព័ន្ធកីឡានីមួយៗ ក៏បានកើនឡើងផងដែរ។ ចំណែកសមត្ថភាព និងគុណភាពនៃការប្រកួតប្រជែងរបស់អត្តពលិកកម្ពុជា ក៏កើនឡើងខ្ពស់ ហេតុនេះទើបធ្វើឱ្យកម្ពុជា ទទួលបានលទ្ធផលដ៏ល្អឥតខ្ចោះ សម្រាប់ការធ្វើជាម្ចាស់ផ្ទះស៊ីហ្គេម និងអាស៊ានប៉ារ៉ាហ្គេម ឆ្នាំ ២០២៣ នេះ។
អតីតនាយករដ្ឋមន្ត្រី លោក ហ៊ុន សែន បានសម្រេចមិនឱ្យយកតម្លៃសេវាគ្រប់យ៉ាង ពីប្រតិភូកីឡាគ្រប់ប្រទេស ដែលបានចូលរួមក្នុងការប្រកួតស៊ីហ្គេម និងអាស៊ានប៉ារ៉ាហ្គេម ឆ្នាំ ២០២៣ នេះ បានធ្វើឱ្យអន្តរជាតិ មានការកោតសរសើរខ្លាំង ចំពោះទឹកចិត្តរបស់កម្ពុជា ដែលជាប្រទេសតូច តែមានបេះដូងធំ ដោយហ៊ានចំណាយថវិកាផ្ទាល់ខ្លួន ប្រមាណ ១១៨ លានដុល្លារ សម្រាប់រៀបចំព្រឹត្តិការណ៍ដ៏អស្ចារ្យនេះ។
បន្ថែមលើនេះ ការផ្តល់សិទ្ធិឱ្យគ្រប់ប្រព័ន្ធផ្សព្វផ្សាយទាំងជាតិ និងអន្តរជាតិ ធ្វើការផ្សាយដោយមិនយកប្រាក់ បានធ្វើឱ្យស៊ីហ្គេម នៅកម្ពុជា មានភាពល្បីរន្ទឺខ្លាំង នៅទូទាំងពិភពលោក ដោយមានអ្នកចូលមើលព្រឹត្តិការណ៍នេះ តាមរយៈការផ្សាយបន្តផ្ទាល់ ព្រមទាំងតាមប្រព័ន្ធផ្សព្វផ្សាយ និងបណ្តាញសង្គមផ្សេងៗ សរុបប្រមាណ ៣២ កោដិ ហើយនេះជាតួលេខខ្ពស់បំផុត មិនធ្លាប់មាននៅក្នុងប្រវត្តិស៊ីហ្គេម នោះទេ។
យ៉ាងណាក៏ដោយ លោក វ៉ាត់ ចំរើន ដែលទើបទទួលបានតួនាទីថ្មី ជារដ្ឋលេខាធិការក្រសួងអប់រំ យុវជន និងកីឡា ទទួលបន្ទុកខាងកីឡានេះ បានថ្លែងថា ការធ្វើម្ចាស់ផ្ទះស៊ីហ្គេម ជាយុទ្ធសាស្ត្រដាច់ដោយឡែក ក្នុងការសម្រេចបាននូវលទ្ធផលដ៏ជោគជ័យ ប៉ុន្តែកម្ពុជា នៅមានការងារច្រើនណាស់ ដែលត្រូវធ្វើបន្ត ដើម្បីអាចឈានទៅសម្រេចក្តីសុបិនធំ ដែលខ្លួនមិនទាន់ធ្វើបាន ក្នុងការប្រកួតកីឡាអូឡាំពិកហ្គេម។
លោក វ៉ាត់ ចំរើន បានថ្លែងថា៖ «យើងកំពុងតែរុញសុបិនរបស់យើង និងការអភិវឌ្ឍកីឡារបស់យើង ឆ្ពោះទៅរកភាពជោគជ័យចុងក្រោយរបស់យើង គឺឥឡូវនេះ យើងអត់មានអ្វីក្រៅពីសុបិនថា កម្ពុជាដណ្តើមបានមេដាយពីអូឡាំពិកហ្គេម អ៊ីចឹងគោលដៅទាំងអស់ហ្នឹង វាត្រូវមានការគាំទ្រ និងចូលរួមបណ្តុះបណ្តាលធនធានកីឡាឱ្យបានពេញទំហឹង ហើយកូនខ្មែរទាំងអស់ ត្រូវយកគោលដៅនេះ ដើម្បីអាចក្លាយជាវីរបុរសរបស់ជាតិប្រចាំកីឡារាប់រយឆ្នាំបន្តទៅមុខទៀត ដែលគេផ្តល់កិត្តិយស និងតម្លៃយ៉ាងធំធេងសម្រាប់កម្ពុជា»។ «យើងត្រូវមានសុបិន និងរុញគោលដៅ ព្រោះអាហ្នឹងជាមេដែកទាក់ទាញ ក្នុងការអភិវឌ្ឍវិស័យកីឡាកម្រិតខ្ពស់ ស៊ីហ្គេម ខ្មែរធ្វើបាន ចុះរឿងអីសុបិនរបស់យើង ក្នុងការឈានទៅដណ្តើមមេដាយ នៅអូឡាំពិក យើងធ្វើមិនបាន គឺយើងនៅតែធ្វើបាន»៕
